- मानवी साखळी व निषेध मोर्चातून आक्रोश
- प्रतिटन ५,५०० रुपये दर देण्याची मागणी
बेळगाव : ऊस उत्पादक शेतकऱ्यांना त्यांच्या पिकाचा योग्य आणि रास्त मोबदला मिळावा, या मागणीसाठी बेळगावात शेतकरी संघटना आणि वकिलांनी एकत्र येत जोरदार आंदोलन केले. राणी चन्नम्मा चौकात मानवी साखळी उभारून सरकारच्या धोरणांविरोधात निषेध व्यक्त करण्यात आला. उसाला शास्त्रीय निकषांनुसार दर निश्चित करून शेतकऱ्यांना न्याय द्यावा, अशी मागणी यावेळी करण्यात आली.
खते, शेतीसाठी लागणाऱ्या अन्य वस्तू आणि दैनंदिन गरजेच्या वस्तूंच्या किमती सातत्याने वाढत असताना उसाला प्रतिटन केवळ तीन हजार रुपये दर मिळत असल्याबद्दल आंदोलकांनी नाराजी व्यक्त केली. जिल्हाधिकारी कार्यालयासमोर शेतकरी नेते आणि मठाधीशांनी उसाचा दर ठरवताना दूध दर तसेच डीएपी खतासह शेतीच्या वाढत्या खर्चाचा विचार करण्याची मागणी केली. मागण्यांकडे दुर्लक्ष झाल्यास आंदोलन आणखी तीव्र करण्याचा इशाराही देण्यात आला.
शेतकरी नेते कोडीहळ्ळी चंद्रशेखर यांनी कर्नाटक सरकारवर टीका करताना, बेळगाव परिसरातील प्रमुख पीक असलेल्या उसाला योग्य दर मिळवून देण्यात सरकार अपयशी ठरल्याचा आरोप केला. सरकार साखर कारखानदारांची बाजू घेत असल्याचेही त्यांनी म्हटले. पंजाबमध्ये प्रतिटन ४,२०० रुपये, तर तमिळनाडूमध्ये ४,००० रुपये दर जाहीर करण्यात आल्याचा संदर्भ देत कर्नाटकातही उसासाठी रास्त आणि शास्त्रीय पद्धतीने एफआरपी व एसएपी निश्चित करण्याची मागणी त्यांनी केली. साखर आणि इथेनॉलच्या वाढत्या किमतींचा लाभ ऊस उत्पादकांनाही मिळायला हवा, असे त्यांनी सांगितले.
राणी चन्नम्मा चौकातून जिल्हाधिकारी कार्यालयापर्यंत काढण्यात आलेल्या निषेध मोर्चात शेतकरी नेते मनोहर सुळेभावीकर यांनी उसाला प्रतिटन ५,५०० रुपये दर देण्याची मागणी केली. बेळगाव आणि खानापूर तालुक्यांमध्ये पावसामुळे झालेल्या नुकसानीचा विचार करून दुष्काळ जाहीर करावा आणि शेतकऱ्यांना नुकसानभरपाई द्यावी, असेही त्यांनी नमूद केले. खानापूर तालुक्यातील नदी-नाल्यांवर बंधारे उभारून पिण्याच्या पाण्याचा प्रश्न सोडवण्याची मागणी त्यांनी केली. या मागण्यांची पूर्तता न झाल्यास आगामी काळात रेल्वे आणि विमानतळ रोखून आंदोलन करण्याचा इशाराही देण्यात आला. या आंदोलनात मोठ्या संख्येने शेतकरी सहभागी झाले होते.
