- सेहवाग – द्रविड यांच्या मुलांची संघात निवड
- आर्यवीर सेहवाग आणि अन्वय द्रविड यांना १५ सदस्यीय भारतीय संघात संधी
नवी दिल्ली : एसीसी पुरुष आशिया कप स्पर्धेसाठी भारतीय संघाची घोषणा करण्यात आली आहे. या संघात भारताचे माजी क्रिकेटपटू वीरेंद्र सेहवाग आणि राहुल द्रविड यांच्या मुलांची निवड झाली आहे. आर्यवीर सेहवाग आणि अन्वय द्रविड यांना भारतीय संघात स्थान मिळाले आहे. ओमानमधील मस्कट येथे ५ ते १४ नोव्हेंबर २०२७ या कालावधीत ही स्पर्धा होणार आहे.
ज्युनियर क्रिकेट निवड समितीने ३० ऑक्टोबर २०२६ रोजी १५ सदस्यीय संघ जाहीर केला. लक्ष्य रायचंदानी याच्याकडे भारतीय संघाच्या नेतृत्वाची जबाबदारी सोपविण्यात आली असून, यशवर्धन सिंह चौहान उपकर्णधार असेल.
आर्यवीर आणि अन्वय या दोघांनाही यापूर्वी ऑस्ट्रेलियाविरुद्धच्या १९ वर्षांखालील भारतीय संघात खेळण्याची संधी मिळाली होती. यष्टीरक्षक फलंदाज अन्वय द्रविड जुलै महिन्यात श्रीलंका दौऱ्यावरही गेला होता. या दौऱ्यातील दुसऱ्या एकदिवसीय सामन्यात त्याने ८७ धावांची खेळी केली होती.
दुसरीकडे, आर्यवीर सेहवागनेही ऑस्ट्रेलियाविरुद्ध प्रभावी कामगिरी केली होती. तसेच वीनू मांकड ट्रॉफी स्पर्धेत त्याने १४३ चेंडूंमध्ये १७३ धावांची आक्रमक खेळी साकारली होती. आता आशिया कप स्पर्धेत या दोघांच्या कामगिरीकडे क्रिकेटप्रेमींचे लक्ष लागले आहे.
