- विधानसभा अध्यक्षांकडून तयारीची पाहणी
बेळगाव : येत्या २ डिसेंबरपासून बेळगावमध्ये होणाऱ्या कर्नाटक विधिमंडळाच्या हिवाळी अधिवेशनाच्या पार्श्वभूमीवर सुवर्ण विधानसौधमधील तयारीला वेग आला आहे. अधिवेशनाच्या नियोजनाची प्रत्यक्ष पाहणी करण्यासाठी विधानसभा अध्यक्ष जी. एस. पाटील आणि विधान परिषद सभापती सलीम अहमद यांनी सुवर्ण विधानसौधाला भेट देत विविध व्यवस्थांची तपासणी केली.
यावेळी जिल्हाधिकारी मोहम्मद रोशन, जिल्हा पंचायत मुख्य कार्यकारी अधिकारी राहुल शिंदे, शहर पोलीस आयुक्त प्रकाश निकम यांच्यासह जिल्हा प्रशासनातील वरिष्ठ अधिकाऱ्यांनी दोन्ही मान्यवरांचे स्वागत केले. अधिवेशनाच्या काळात कामकाज सुरळीत पार पडावे, यासाठी प्रशासनाने केलेल्या तयारीची माहिती अधिकाऱ्यांनी त्यांना दिली.
त्यानंतर विधानसभा अध्यक्ष आणि विधान परिषद सभापती यांनी दोन्ही सभागृहांमध्ये जाऊन प्रत्यक्ष व्यवस्थेची पाहणी केली. सभागृहातील अध्यक्षांचे आसन, मंत्री आणि आमदारांसाठी करण्यात आलेली बैठक व्यवस्था, अधिकारी कक्ष, प्रसारमाध्यमांसाठीची गॅलरी तसेच नागरिकांसाठी उपलब्ध असलेल्या प्रेक्षक गॅलरीची त्यांनी तपासणी केली.
याशिवाय सभागृहातील ध्वनिक्षेपण यंत्रणा, प्रकाश व्यवस्था, स्वच्छता आणि सुरक्षेच्या उपाययोजनांचाही आढावा घेण्यात आला. यासंदर्भात जिल्हाधिकारी आणि पोलीस आयुक्तांकडून सविस्तर माहिती जाणून घेतल्यानंतर अधिवेशन सुरू होण्यापूर्वी प्रलंबित कामे पूर्ण करण्याचे निर्देश दोन्ही सभागृहांच्या प्रमुखांनी संबंधित अधिकाऱ्यांना दिले.
अधिवेशनाच्या पार्श्वभूमीवर जिल्हा प्रशासनाकडून आवश्यक त्या सर्व सुविधा आणि व्यवस्थांची पूर्तता करण्यासाठी युद्धपातळीवर प्रयत्न सुरू आहेत.








