- १२५ हून अधिक संशयितांची पोलिसांकडून झाडाझडती
- शांतताभंग करणाऱ्यांवर कठोर कारवाईचा इशारा
बेळगाव : आगामी गणेशोत्सवाच्या पार्श्वभूमीवर शहरातील कायदा व सुव्यवस्था अबाधित ठेवण्यासाठी बेळगाव पोलिसांनी कडक पावले उचलण्यास सुरुवात केली आहे. पोलीस आयुक्त प्रकाश निकम यांच्या उपस्थितीत शनिवारी गुन्हेगारी पार्श्वभूमी असलेल्या व्यक्तींची परेड घेण्यात आली. उत्सवाच्या काळात कोणत्याही बेकायदेशीर कृत्यात सहभागी झाल्यास कठोर कायदेशीर कारवाई केली जाईल, असा स्पष्ट इशारा यावेळी देण्यात आला.
गणेशोत्सव शांततेत आणि सौहार्दपूर्ण वातावरणात पार पडावा, यासाठी पोलिसांकडून गेल्या काही दिवसांपासून पूर्वतयारी सुरू आहे. त्याचाच भाग म्हणून शनिवारी सकाळी पोलीस कवायत मैदानावर विविध पोलीस ठाण्यांच्या हद्दीतील गुन्हेगारी पार्श्वभूमी असलेल्या संशयितांची परेड घेण्यात आली.
- १२५ हून अधिक संशयितांची उपस्थिती
पोलीस आयुक्त प्रकाश निकम यांच्या नेतृत्वाखाली झालेल्या या परेडमध्ये १२५ हून अधिक संशयितांच्या सध्याच्या हालचालींची माहिती घेण्यात आली. गणेशोत्सवाच्या काळात कोणत्याही प्रकारच्या बेकायदेशीर कारवायांपासून दूर राहण्याच्या सूचना संबंधितांना देण्यात आल्या.
मार्केट, माळमारुती, एपीएमसी, कॅम्प, ग्रामीण, शहापूर, उद्यमबाग आणि मारीहाळ पोलीस ठाण्यांच्या हद्दीतील संशयित या परेडमध्ये सहभागी झाले होते. संबंधित पोलीस ठाण्यांकडूनही या व्यक्तींना आवश्यक त्या सूचना देण्यात आल्या आहेत.
- संवेदनशील भागांवर पोलिसांची नजर
गणेशोत्सवादरम्यान शहरातील प्रमुख रस्ते, गणेश मंडपे, मिरवणूक मार्ग आणि संवेदनशील भागांमध्ये अतिरिक्त पोलीस बंदोबस्त तैनात करण्यात येत आहे. संशयास्पद हालचालींवर पोलिसांकडून बारकाईने लक्ष ठेवले जाणार असून, गरज भासल्यास तातडीने कारवाई करण्याच्या सूचना स्थानिक पोलीस ठाण्यांना देण्यात आल्या आहेत.
सणाच्या काळात भीतीचे वातावरण निर्माण करणे, अवैध व्यवसाय करणे किंवा सर्वसामान्य नागरिकांना त्रास देण्याचा प्रयत्न केल्यास संबंधितांवर कायद्यानुसार कठोर कारवाई करण्यात येईल, असे पोलिसांनी स्पष्ट केले आहे.
गणेशोत्सव काळात शहरातील शांतता आणि सुव्यवस्था कायम ठेवण्यासाठी पोलीस प्रशासन पूर्णपणे सतर्क असून, कायदा हातात घेणाऱ्या कोणत्याही व्यक्तीची गय केली जाणार नाही, असा स्पष्ट संदेश पोलीस आयुक्त प्रकाश निकम यांनी या कारवाईतून दिला आहे.
