- पीएसआय राघवेंद्र खोत
- शिवानंद महाविद्यालयात ‘नशामुक्त युवा भारत’ कार्यक्रम उत्साहात
- योग, स्वसंरक्षणाची प्रात्यक्षिके आणि व्यसनमुक्तीविषयी विद्यार्थ्यांना मार्गदर्शन
कागवाड : “मादक पदार्थांचे सेवन आणि व्यसनाधीनता ही केवळ एका व्यक्तीच्या आरोग्याला हानी पोहोचवत नाही, तर संपूर्ण कुटुंब उद्ध्वस्त करणारी एक मूक शत्रू आहे. आज देशातील अनेक तरुण मद्यपान आणि अमली पदार्थांच्या विळख्यात अडकून आपले मौल्यवान आयुष्य उद्ध्वस्त करीत आहेत. व्यसनाधीनतेमुळे तरुणांचे शारीरिक आणि मानसिक आरोग्य बिघडते. त्यांचे कौटुंबिक जीवन आणि सामाजिक प्रतिष्ठाही धोक्यात येते. त्यामुळे तरुणांनी व्यसनांपासून दूर राहून आपले भविष्य उज्ज्वल घडवावे,” असे प्रतिपादन कागवाड पोलीस ठाण्याचे पोलीस उपनिरीक्षक राघवेंद्र खोत यांनी केले.
कागवाड येथील शिवानंद महाविद्यालयात भारत सरकारच्या युवा कार्यक्रम व क्रीडा मंत्रालयाच्या सहकार्याने आणि महाविद्यालयाच्या अंतर्गत गुणवत्ता हमी कक्षाच्या (IQAC) पुढाकारातून राष्ट्रीय सेवा योजना (NSS), राष्ट्रीय छात्र सेना (NCC), यूथ रेडक्रॉस (YRC), क्रीडा विभाग आणि विद्यार्थिनी संघ यांच्या संयुक्त विद्यमाने आयोजित ‘नशामुक्त युवा भारत’ या विशेष जनजागृती कार्यक्रमात प्रमुख मार्गदर्शक म्हणून ते बोलत होते.
यावेळी खोत यांनी अमली पदार्थांच्या सेवनामुळे व्यक्तीच्या शारीरिक आरोग्यावर, मानसिक स्थितीवर, कौटुंबिक जीवनावर आणि सामाजिक प्रतिष्ठेवर होणाऱ्या दुष्परिणामांची सविस्तर माहिती दिली. व्यसनाधीनता ही तरुणांच्या उज्ज्वल भविष्यातील सर्वांत मोठा अडथळा ठरत आहे. त्यामुळे त्यांचे शिक्षण, करिअर आणि व्यक्तिमत्त्व विकासावर विपरीत परिणाम होतो. तरुणांनी वाईट सवयींपासून दूर राहून आपला मौल्यवान वेळ शिक्षण, क्रीडा, कौशल्य विकास आणि समाजोपयोगी उपक्रमांसाठी खर्च करावा. प्रत्येक विद्यार्थ्याने स्वतः व्यसनमुक्त राहण्याबरोबरच समाजात व्यसनमुक्तीविषयी जनजागृती करण्यासाठी पुढाकार घ्यावा, असे आवाहन त्यांनी केले.
कार्यक्रमाचे प्रमुख पाहुणे तथा संस्थेचे प्रशासकीय अधिकारी मेजर व्ही. एस. तुगशेट्टी यांनी देशाच्या विकासात युवकांची भूमिका अत्यंत महत्त्वाची असल्याचे सांगितले. ते म्हणाले, “निरोगी, शिस्तप्रिय आणि जबाबदार तरुणाई ही विकसित भारताच्या निर्मितीचा भक्कम पाया आहे. युवकांनी आपल्या जीवनात चांगले संस्कार, नैतिक मूल्ये आणि शिस्त अंगीकारली पाहिजे. व्यसनांपासून दूर राहून राष्ट्राच्या प्रगतीसाठी योगदान दिले पाहिजे. तरुणांची ऊर्जा विधायक कार्यासाठी वापरली गेली तर देशाचा सर्वांगीण विकास साध्य होऊ शकतो.”
अध्यक्षीय भाषणात महाविद्यालयाचे प्राचार्य डॉ. एस. पी. तळवार यांनी व्यसनमुक्त तरुणाई हीच विकसित भारताची खरी ताकद असल्याचे सांगितले. ते म्हणाले, “विद्यार्थ्यांनी केवळ स्वतः व्यसनांपासून दूर राहून चालणार नाही, तर समाजातही व्यसनमुक्तीचा संदेश पोहोचवला पाहिजे. आजच्या तरुण पिढीवर उद्याच्या भारताचे भवितव्य अवलंबून आहे. त्यामुळे प्रत्येक विद्यार्थ्याने सामाजिक जबाबदारीची जाणीव ठेवून अमली पदार्थांविरोधात जनजागृती केली पाहिजे.”
याच कार्यक्रमांतर्गत सकाळच्या सत्रात प्रा. आर. एस. नागरेड्डी यांनी योगाचे महत्त्व विशद करून विद्यार्थ्यांना योगाची विविध प्रात्यक्षिके सादर केली. योग ही भारताने संपूर्ण जगाला दिलेली अमूल्य देणगी आहे. योगाच्या नियमित अभ्यासामुळे शरीर निरोगी राहण्याबरोबरच मनावर नियंत्रण मिळवता येते. मानसिक ताणतणाव कमी होऊन एकाग्रता आणि आत्मविश्वास वाढतो. निरोगी आणि व्यसनमुक्त जीवन जगण्यासाठी योग अत्यंत उपयुक्त असल्याचे त्यांनी सांगितले.
तसेच कु. उषा कोंकणी आणि कु. गणेश साळुंखे यांनी स्वसंरक्षणाची विविध प्रात्यक्षिके सादर करून विद्यार्थ्यांना स्वसंरक्षणाचे महत्त्व पटवून दिले. विशेषतः विद्यार्थिनींनी आत्मविश्वासाने आणि धैर्याने संकटांचा सामना करण्यासाठी स्वसंरक्षणाचे प्रशिक्षण घेणे आवश्यक असल्याचे यावेळी सांगण्यात आले.
कार्यक्रमाच्या प्रारंभी अंतर्गत गुणवत्ता हमी कक्षाचे समन्वयक प्रा. बी. डी. धामण्णवर यांनी प्रास्ताविक केले. त्यांनी कार्यक्रमाच्या आयोजनामागील उद्देश स्पष्ट करून तरुणांमध्ये व्यसनमुक्तीविषयी जागृती निर्माण करण्याची आवश्यकता व्यक्त केली.
राष्ट्रीय सेवा योजना विभाग क्रमांक दोनचे कार्यक्रम अधिकारी प्रा. ए. ए. पाटील यांनी उपस्थितांचे स्वागत केले. यूथ रेडक्रॉसचे अधिकारी प्रा. एस. एस. फडतरे यांनी कार्यक्रमाचे सूत्रसंचालन केले. राष्ट्रीय सेवा योजना विभाग क्रमांक एकचे कार्यक्रम अधिकारी डॉ. चंद्रशेखर वाय. यांनी आभार मानले.
यावेळी व्यासपीठावर राष्ट्रीय छात्र सेनेचे अधिकारी लेफ्टनंट प्रा. ए. आर. आलगोंडी उपस्थित होते.
कार्यक्रमास महाविद्यालयातील सर्व प्राध्यापक, शिक्षकेतर कर्मचारी, महिला व बालकल्याण विभागाच्या अंगणवाडी सेविका तसेच राष्ट्रीय सेवा योजना, राष्ट्रीय छात्र सेना, यूथ रेडक्रॉस आणि विविध विभागांतील विद्यार्थी-विद्यार्थिनी व स्वयंसेवक मोठ्या संख्येने उपस्थित होते. व्यसनमुक्ती, योग आणि स्वसंरक्षण या विषयांवरील मार्गदर्शनामुळे हा कार्यक्रम विद्यार्थ्यांसाठी उपयुक्त ठरला.
