बेळगाव : बेळगाव विभागाचे अतिरिक्त अबकारी आयुक्त वाय. मंजुनाथ यांच्या निवासस्थानावर सक्तवसुली संचालनालयाने (ईडी) केलेल्या छाप्यामध्ये मोठ्या प्रमाणावर रोख रक्कम, दागदागिने आणि महत्त्वाची आर्थिक कागदपत्रे जप्त करण्यात आली आहेत. या कारवाईनंतर ईडीने तपासासंदर्भातील अधिकृत माहिती जाहीर केली आहे.
ईडीच्या शोधमोहिमेदरम्यान एकूण १३.३ कोटी रुपयांची मालमत्ता जप्त करण्यात आली. यामध्ये ५.५ कोटी रुपयांची रोख रक्कम, ७.८ कोटी रुपये मूल्याचे सोन्या-चांदीचे दागिने तसेच ३.३ लाख रुपयांचे परदेशी चलन समाविष्ट आहे. याशिवाय कॅश बुक, मालमत्तेशी संबंधित कागदपत्रे आणि आर्थिक व्यवहारांची नोंद असलेले अनेक दस्तऐवजही जप्त करण्यात आले आहेत.
ईडीने बेळगाव, म्हैसूर आणि बेंगळुरू येथील एकूण १४ ठिकाणी छापेमारी केली. या कारवाईत अतिरिक्त अबकारी आयुक्त वाय. मंजुनाथ, वरिष्ठ अधिकारी जगदीश नायक आणि के. एम. तम्मण्णा यांच्याशी संबंधित ठिकाणांचा समावेश होता.
तपासादरम्यान अधिकाऱ्यांच्या हाती एक महत्त्वाची डायरी लागली असून, त्यामध्ये अबकारी परवाने मंजूर करणे, नूतनीकरण करणे आणि इतर प्रशासकीय प्रक्रियांशी संबंधित कथित आर्थिक व्यवहारांच्या नोंदी असल्याचे सांगितले जात आहे. तसेच विविध दारू विक्री परवानाधारकांकडून नियमित स्वरूपात रक्कम गोळा केल्याच्या नोंदीही आढळल्याची माहिती समोर आली आहे.
ईडीच्या प्राथमिक तपासात या कथित व्यवहारांमधून मिळालेल्या निधीचा वापर बेनामी मालमत्ता खरेदी, नातेवाईकांच्या नावावर गुंतवणूक आणि इतर आर्थिक व्यवहारांसाठी करण्यात आल्याचा संशय व्यक्त करण्यात आला आहे. जप्त कागदपत्रांच्या आधारे ईडीकडून पुढील तपास सुरू असून, या प्रकरणातील आर्थिक व्यवहारांची सखोल चौकशी केली जात आहे.
