- फसवणूक करणाऱ्या व्यापाऱ्यांवर कायदेशीर कारवाईची मागणी
बेळगाव / प्रतिनिधी
बेळगाव जिल्ह्यातील खानापूर, कित्तूर आणि बैलहोंगल तालुक्यांमध्ये मिरची उत्पादक शेतकऱ्यांची खासगी व्यापाऱ्यांकडून मोठ्या प्रमाणावर फसवणूक होत असल्याचा आरोप करत कर्नाटक राज्य रयत संघ महासंघाने जिल्हाधिकाऱ्यांकडे निवेदन सादर केले आहे.
याबाबत माहिती देताना शेतकरी संघटनेचे प्रदेशाध्यक्ष बीरप्पा देशनूर यांनी सांगितले की, बाहेरील जिल्ह्यांतून येणारे व्यापारी थेट गावातील शेतकऱ्यांकडे जाऊन मिरची खरेदी करतात. सुरुवातीला शेतकऱ्यांचा विश्वास मिळवून हे व्यापारी नंतर वजन कमी दाखवून मिरची खरेदी करतात. काही व्यापाऱ्यांनी तर शेतकऱ्यांचे कोट्यवधी रुपये न दिल्याशिवाय पळ काढल्याच्या घटना आधीही घडल्या आहेत.
प्रदेशाध्यक्षांनी नमूद केले की, गावागावांत फक्त काही व्यापारी असल्याने ते आपसात संगनमत करून दर पाडतात, ज्यामुळे शेतकऱ्यांना बाजारातील स्पर्धात्मक भाव मिळत नाहीत. तसेच हे व्यापारी सरकारला कोणताही कर किंवा शुल्क देत नसल्याने सरकारी तिजोरीचेही नुकसान होत आहे.
निवेदनात मागणी करण्यात आली आहे की, गावागावांत बेकायदेशीरपणे चालणारी खरेदी केंद्रे बंद केली जावीत, मिरची खरेदी केवळ अधिकृत बाजारपेठेत जाहीर लिलावाद्वारे आणि पारदर्शक वजनासह केली जावी, तसेच विक्रीनंतर शेतकऱ्यांना तात्काळ पैसे मिळतील याची प्रशासनाने खात्री करावी.
तसेच, फसवणूक करणाऱ्या व्यापाऱ्यांवर गुन्हे दाखल करून कडक कायदेशीर कारवाई करावी, अशीही मागणी निवेदनात केली गेली. या कार्यक्रमात कर्नाटक राज्य रयत संघ महासंघाचे अनेक पदाधिकारी उपस्थित होते.
