बेळगाव : मतदार यादी तयार करण्याच्या प्रक्रियेत होत असलेल्या कथित त्रुटींविरोधात जनजागृती करण्यासाठी सामाजिक संघटनांच्या ‘एद्देळू कर्नाटक’ आघाडीतर्फे बेळगावमध्ये विशेष सभेचे आयोजन करण्यात आले. या सभेत मतदार यादीतील चुका दुरुस्त करण्याच्या मागणीसाठी २० जून रोजी बंगळुरू येथे मोठ्या प्रमाणावर आंदोलन छेडण्याचा निर्णय घेण्यात आला.
राज्यभर सुरू असलेल्या जनजागृती मोहिमेचा एक भाग म्हणून बेळगावमधील कन्नड साहित्य भवन येथे ही सभा पार पडली. कार्यक्रमाच्या प्रारंभी यरगट्टी येथून आलेल्या जनजागृती पथकाचे स्वागत करण्यात आले. त्यानंतर डॉ. बाबासाहेब आंबेडकर यांच्या पुतळ्याला अभिवादन करून सभेला सुरुवात झाली.
सभेत विविध वक्त्यांनी मतदार यादी प्रक्रियेबाबत चिंता व्यक्त केली. पात्र मतदारांची नावे यादीतून वगळली जात असल्याचा आरोप करत त्यांनी या प्रक्रियेत अधिक पारदर्शकता आणि अचूकता आवश्यक असल्याचे सांगितले. तसेच आधार क्रमांकाशी जोडणी करताना निर्माण झालेल्या अडचणी आणि प्रशासकीय गोंधळामुळे अनेक मतदारांना अडचणींचा सामना करावा लागत असल्याचेही वक्त्यांनी नमूद केले.
या पार्श्वभूमीवर २० जून २०२६ रोजी बंगळुरू येथील फ्रीडम पार्कमध्ये निषेध सभेचे आयोजन करण्यात आले असून, नागरिकांनी मोठ्या संख्येने सहभागी होऊन आपली भूमिका मांडावी, असे आवाहन करण्यात आले.
याप्रसंगी शिवलीला मिसाळे, इसाबेला झेवियर, यल्लाप्पा हिम्मडी, मंदा नेवगी, यासीनखान मकानदार आणि धार्मिक नेते आत्मानंद योग गुरुजी, फादर फॉस्टर अणकलगी, युसूफ खन्नी यांच्यासह अनेक प्रमुख वक्त्यांनी सभेला संबोधित केले. तसेच व्यासपीठावर रवी पाटील, आयना शेख, परप्पा कोटागी, निसार अहमद अवटी यांच्यासह जिल्ह्यातील इतर अनेक प्रमुख कार्यकर्ते उपस्थित होते.
