निपाणी : तालुक्यातील बेनाडी गावातील विविध समस्यांसह काळम्मावाडी कालव्यावरील अपूर्ण पुलाच्या कामाबाबत राज्य शेतकरी संघटनेने जिल्हाधिकाऱ्यांना निवेदन सादर केले. या निवेदनाद्वारे संबंधित प्रश्नांकडे तातडीने लक्ष देण्याची मागणी करण्यात आली.
संघटनेच्या पदाधिकाऱ्यांनी जिल्हाधिकाऱ्यांची भेट घेऊन गावातील पायाभूत सुविधांची दयनीय अवस्था मांडली. बेनाडी येथे रस्ते आणि गटारींची मोठी दुरवस्था झाली असून मूलभूत सुविधा अपुऱ्या असल्याचे त्यांनी निदर्शनास आणले. काही व्यक्तींनी नैसर्गिक नाला अडविल्यामुळे पावसाचे पाणी गावात साचत असल्याची तक्रारही करण्यात आली. अनेक वर्षांपासून आश्वासने मिळूनही प्रत्यक्षात कामे सुरू न झाल्याबद्दल नाराजी व्यक्त करण्यात आली.
अप्पाचीवाडी परिसरात काळम्मावाडी कालव्याचे पाणी उपलब्ध असूनही गेली अनेक वर्षे पुलाचे काम प्रलंबित आहे. याबाबत तातडीने कार्यवाही करण्याचे निर्देश जिल्हाधिकाऱ्यांनी संबंधित विभागाला दिल्याचे सांगण्यात आले. काम लवकर सुरू न झाल्यास आंदोलनाचा इशारा संघटनेचे राज्य सचिव राजू पवार यांनी दिला.
तसेच, बेनाडीतील मातंग समाजाच्या वस्तीमध्ये गटारीचे पाणी सोडले जात असल्याने स्थानिक नागरिकांना मोठा त्रास सहन करावा लागत आहे. यामुळे परिसरात अस्वच्छता वाढून आरोग्याच्या समस्या निर्माण होण्याची भीती व्यक्त करण्यात आली. ग्रामपंचायत आणि तालुका प्रशासनाकडून केवळ आश्वासने दिली जात असल्याची टीका करण्यात आली.
जिल्हाधिकाऱ्यांनी या सर्व मुद्द्यांवर सकारात्मक भूमिका घेत संबंधित यंत्रणांना आवश्यक सूचना दिल्या आहेत. आदेशांची अंमलबजावणी न झाल्यास पुढील तीव्र आंदोलन छेडण्याचा इशारा राज्य सचिव किशन नंदी यांनी दिला. यावेळी बेनाडी व अप्पाचीवाडी परिसरातील शेतकरी मोठ्या संख्येने उपस्थित होते.
