- क्षुल्लक कारणावरून मोठ्या भावाची हत्या केलेल्या लहान भावाला अटक
- आरोपी कडून गुन्ह्याची कबुली
बेळगाव / प्रतिनिधी
वारंवार ‘कामावर ये’ असे सांगितल्याने संतापलेल्या धाकट्या भावानेच आपल्या मोठ्या भावाची दगडाने ठेचून हत्या केल्याची धक्कादायक घटना यमकनमर्डी पोलीस स्थानकाच्या हद्दीत उघडकीस आली आहे. याप्रकरणी पोलिसांनी मयताच्या धाकट्या भावाला अटक केली असून, त्याने गुन्ह्याची कबुली दिली आहे. रायप्पा सुरेश कमती (वय २८, रा. हट्टीआलूर) असे मृत मोठ्या भावाचे नाव असून बसवराज सुरेश कमती (वय २४, रा. हट्टीआलूर) असे आरोपी असलेल्या लहान भावाचे नाव आहे.
गेल्या महिन्यात ९ मे रोजी यमकनमर्डी पोलीस स्थानकाच्या हद्दीतील पाश्चापूर येथील शेतातील कालव्याच्या बाजूला एका तरुणाचा मृतदेह रक्ताच्या थारोळ्यात आढळला होता. यानंतर हट्टीआलूर येथील रहिवासी सुरेश बीरप्पा कमती यांनी दि. ०९ मे रोजी यमकनमर्डी पोलीस स्थानकात फिर्याद दिली होती. त्या तक्रारीच्या आधारे गुन्हा दाखल करून या प्रकरणाचा तपास सुरू करण्यात आला होता. पोलिसांच्या तपासणीत हा मृतदेह मेंढपाळ रायप्पा याचा असल्याचे निष्पन्न झाले. घटनास्थळाची पाहणी केली असता, मृताच्या डोळ्यात मिरची पूड फेकल्याचे आढळून आले. सखोल तपास केला असता, हट्टीआलूर गावातील रायप्पा सुरेश कमती (वय २८ वर्ष) याचा लहान भाऊ बसंतराज सुरेश कमती (वय २४ वर्ष) यानेच सुनियोजितपणे त्याची हत्या केल्याचे उघड झाले. बसवराज कुवैतमधील एका कंपनीत काम करत होता आणि तो मार्च महिन्यात बेळगावला परतला होता. रायप्पा हा कुटुंबाचा एकमेव आधार होता आणि तोच काम करून कुटुंबाचा उदरनिर्वाह करत होता. याच मुद्द्यावरून दोघांमध्ये अनेकदा वाद होत असत. मोठा भाऊ रायप्पा मेंढरे चारण्यासाठी कालव्यापाशी जात असल्याचे माहीत असल्याने बसवराजने त्याची हत्या केली. तपास अधिकाऱ्यांनी आरोपीकडून गुन्ह्यात वापरलेली हत्यारे जप्त केली असून त्याला न्यायालयात हजर केले आहे.
सदर खुनाच्या प्रकरणातील आरोपींचा शोध घेण्यासाठी जिल्हा पोलीस अधीक्षक डॉ. भीमाशंकर गुळेद, बेळगाव जिल्ह्याच्या अतिरिक्त पोलीस अधीक्षक कुमारी श्रुती एन.एस. आणि आर.बी.बसरगी, तसेच गोकाक उपविभागाचे डीवायएसपी रवी डी. नाईक यांच्या मार्गदर्शनाखाली यमकनमर्डी पोलीस स्थानकाचे पोलीस निरीक्षक जावेद मुशापुरी यांनी पीएसआयएस के. मन्निकेरी आणि कर्मचारी श्रीशैल पुजेरी, एस.एम. चौगला, सतीश रेड्डी, सुनील चंद्रगी, एल.बी. हमानी यांचे एक विशेष तपास पथक तयार केले. या पथकाने खुनाच्या या प्रकरणाला आव्हान म्हणून स्वीकारले आणि एक महिना सर्व बाजूंनी कसून तपास केला. या तपास पथकाच्या कौतुकास्पद कामगिरीमुळे खुनाचे गूढ उकलले आहे.
