बेळगाव / प्रतिनिधी
कर्नाटक आणि महाराष्ट्रातील हजारो भाविकांचे श्रद्धास्थान असलेल्या श्री क्षेत्र पंत बाळेकुंद्री येथील श्री पंत महाराज बाळेकुंद्री यांच्या १२०व्या पुण्यतिथी सोहळ्यास बुधवार, ८ ऑक्टोबरपासून प्रारंभ होत आहे. या तीन दिवस चालणाऱ्या सोहळ्याची जय्यत तयारी श्री दत्त संस्थानतर्फे सुरू असून, विविध धार्मिक कार्यक्रमांचे आयोजन करण्यात आले आहे.
- पहिला दिवस — बुधवार दि. ८ ऑक्टोबर : सकाळी आठ वाजता बेळगावमधील श्रीपंत वाडा, समादेवी गल्ली येथून प्रेमध्वज मिरवणुकीला सुरुवात होईल. शहरातील विविध मार्गाने प्रवास करत ही मिरवणूक सांबरा रोड मार्गे दुपारी दोन वाजता श्री पंत बाळेकुंद्री येथील वाड्यात पोहोचेल. सायंकाळी पाच वाजता दुसरी मिरवणूक निघेल आणि रात्री आठ वाजता प्रेमध्वजारोहण करून मुख्य उत्सवाला प्रारंभ होईल.
- दुसरा दिवस — गुरुवार दि. ९ ऑक्टोबर : पहाटे पाच वाजता श्रींच्या पुण्यस्मरणाचा कार्यक्रम होईल. सकाळी सात वाजता श्रींची पालखी गावातील वाड्यातून निघून दुपारी दोनच्या सुमारास आमराईतील श्रीपंत स्थानी पोहोचेल. रात्री आठ ते बारा दरम्यान भक्तिमय पालखी सेवा पार पडेल.
- तिसरा दिवस — शुक्रवार दि. १० ऑक्टोबर : दुपारी बारा वाजता महाप्रसादाचे आयोजन करण्यात आले असून, दुपारी तीन ते पाच या वेळेत प्रेमानंद टिपरी कार्यक्रम होईल. सायंकाळी सहा वाजता श्रींची पालखी आमराईतील पूज्य स्थानी जाऊन वाड्यात परत येईल आणि उत्सवाची सांगता होईल.
या पार्श्वभूमीवर मंदिर परिसर व आमराईत स्वच्छता आणि रंगकामाचे काम सुरू असून, संपूर्ण क्षेत्र आकर्षक विद्युत रोषणाईने सजवले जात आहे. मोठ्या संख्येने भाविक येण्याची अपेक्षा असल्याने वाहनांसाठी पार्किंगची सोयही करण्यात आली आहे. श्री दत्त संस्थानतर्फे भाविकांना या पुण्यतिथी सोहळ्याचा लाभ घ्यावा, असे आवाहन करण्यात आले आहे.
