बेळगाव / प्रतिनिधी
येत्या सोमवार दि. ११ ऑगस्ट रोजी मध्यवर्ती महाराष्ट्र एकीकरण समितीने कन्नड सक्ती विरोधात महामोर्चाचे आयोजन केले आहे या मोर्चाची धास्ती कर्नाटक प्रशासनाने घेतली असून या संदर्भात चर्चा करण्यासाठी मध्यवर्ती महाराष्ट्र एकीकरण समितीच्या पदाधिका-यांना जिल्हाधिकारी मोहम्मद रोशन, पोलिस आयुक्त भूषण बोरसे यांनी चर्चेसाठी बोलावून घेतले होते. चर्चे दरम्यान प्रशासनाने मध्यवर्ती महाराष्ट्र एकीकरण समितीच्या पदाधिकाऱ्यांना सदर मोर्चा न काढण्याची सूचना केली असता मध्यवर्तीच्या पदाधिकाऱ्यांनी त्यांच्या सूचनेला न जुमानता आपल्या निर्णयावर ठाम राहत कोणत्याही परिस्थितीत सोमवार दि. ११ ऑगस्ट रोजी मराठी भाषिकांचा मोर्चा होणार असल्याचा ठाम निर्णय घेतला. भेटी दरम्यान प्रशासनाशी चर्चा करत असताना मध्यवर्ती पदाधिकाऱ्यांनी प्रशासनाला ठणकावून सांगितले की, कर्नाटक प्रशासन बेकायदेशीररित्या महानगरपालिकेतील मराठी नामफलक काढण्यासोबतच आता गणेशोत्सव मंडळांच्या फलकांवरील मराठी हटविण्याचा प्रयत्न प्रशासनाकडून सुरू आहे. या विरोधात सोमवार दि. ११ रोजी महामोर्चा काढण्याचा निर्णय घेण्यात आला असल्याचे जिल्हाधिकाऱ्यांना सांगण्यात आले.
कन्नडसक्तीबाबत सारवासारव करताना मराठी भाषिकांचे प्रश्न आपल्याला माहीत आहेत, असे जिल्हाधिकाऱ्यांनी सांगितले. परंतु समितीच्या पदाधिकान्यांनी त्यांच्यासमोर अल्पसंख्याक आयोगाच्या आयुक्तांनी पाठवलेली पत्रे, केंद्रीय गृहमंत्र्यांनी दोन राज्यांची केलेली समन्वय समिती याची आठवण जिल्हा प्रशासनाला करून दिली. तसेच परवानगी मिळो अथवा न मिळो महामोर्चा यशस्वी करणारच, असे अधिकाऱ्यांना सांगण्यात आले. बेळगाव शहरात अनेक संघटनांकडून कोणतीही परवानगी न घेता मोठमोठे मोर्चे काढले जातात. त्यावेळी प्रशासन बघ्याची भूमिका घेते. परंतु महाराष्ट्र एकीकरण समितीने मोर्चाची घोषणा करताच आडकाठी घालण्याचे प्रयत्न सुरू झाले आहेत. इतर संघटनांवर मेहरबान असणारे प्रशासन म. ए. समितीच्या बाबतीत मात्र सापत्न भूमिका का घेते? असा प्रश्न जिल्हाधिकाऱ्यांना विचारण्यात आला.
यावेळी मध्यवर्ती महाराष्ट्र एकीकरण समितीचे कार्याध्यक्ष माजी आमदार मनोहर किणेकर, सरचिटणीस मालोजीराव अष्टेकर, खजिनदार प्रकाश मरगाळे, ॲड. एम. जी. पाटील, ॲड. महेश बिर्जे, ॲड.अमर येळ्ळूरकर, जनसंपर्क प्रमुख विकास कलघटगी उपस्थित होते.
