- नागरिकांची नाराजी
बेळगाव : शहरातील ऐतिहासिक किल्ला तलावात मोठ्या प्रमाणात मासे मृत्युमुखी पडल्याचे समोर आले आहे. स्थानिक नागरिकांच्या मते, प्रशासनाच्या दुर्लक्षामुळे हा प्रकार घडल्याचे दिसत आहे.
अलीकडील मुसळधार पावसामुळे शहरातील सांडपाणी थेट तलावात मिसळले असून, दूषित पाण्यामुळे तलावातील हजारो मासे मृत्युमुखी पडले आहेत. मृत मासे पृष्ठभागावर तरंगताना दिसत असून, यामुळे तलावाच्या परिसरात प्रचंड दुर्गंधी पसरली आहे. पर्यटक आणि रहिवाशांना यामुळे मोठा त्रास सहन करावा लागत आहे.
किल्ला तलावाच्या देखभालीकडे दुर्लक्ष झाल्याने जलचरांचा मोठा बळी जात असल्याचे तक्रारीत म्हटले आहे. तलावाच्या वॉकिंग ट्रॅकची दुरवस्था आणि परिसराची स्वच्छतेची कमतरता देखील चिंताजनक आहे. स्थानिक नागरिकांनी संबंधित लोकप्रतिनिधी आणि प्रशासनाला त्वरित लक्ष देण्याची मागणी केली आहे.
सांडपाणी थेट तलावात आल्यामुळे हा जलचरांचा मृत्यू झाला असून, परिसरातून चालणेही कठीण झाले आहे. नागरिकांची अपेक्षा आहे की प्रशासन तातडीने मृत मासे बाहेर काढून तलावाची स्वच्छता करेल आणि परिसराचे आरोग्यदृष्ट्या सुरक्षित बनवेल.
