- हुतात्म्यांना अभिवादन करण्यासाठी बहुसंख्येने सहभागी व्हा
- शहर महाराष्ट्र एकीकरण समितीच्या बैठकीत मराठी भाषिकांना आवाहन
बेळगाव / प्रतिनिधी
संयुक्त महाराष्ट्र आंदोलनात १९५६ मध्ये हुतात्म्यांनी दिलेल्या बलिदानाला अभिवादन करण्यासाठी तसेच सीमाप्रश्न, कन्नड संघटनांच्या हालचाली आणि मराठी जनतेच्या हिताचे विषय चर्चेसाठी बेळगावमधील रंगुबाई पॅलेस, रामलिंग खिंड गल्ली येथे शहर महाराष्ट्र एकीकरण समितीची महत्त्वाची बैठक पार पडली.
बैठकीत माजी महापौर मालोजीराव अष्टेकर यांनी उपस्थितांना मार्गदर्शन करत सांगितले की, बेळगावातील मराठी जनता गेली अनेक वर्षे या आंदोलनाला पाठिंबा देत आहे. यंदाही सर्व मराठी भाषिकांनी एकत्र येऊन हुतात्म्यांना वंदन करावे. त्यांनी आवाहन केले की, १७ जानेवारी रोजी सकाळी ९:३० वाजता हुतात्मा चौकात सर्व मराठी भाषिकांनी उपस्थित राहून बलिदानांची आठवण साजरी करावी.
बैठकीत मराठी फलक, भाषा आणि नेत्यांविरुद्ध विनाकारण हालचाली करणाऱ्या कन्नड संघटनांना तोंड देण्यासाठी भव्य निषेध मोर्चा काढण्याचा प्रस्ताव सर्वानुमते मंजूर करण्यात आला. यासाठी मध्यवर्ती महाराष्ट्र एकीकरण समितीला तातडीने बैठक बोलावून मोर्चाची तारीख आणि रुपरेषा निश्चित करण्याचे निर्देश देण्यात आले.
सीमा प्रश्नाबाबत महाराष्ट्र सरकारकडून होत असलेल्या दिरंगाईवर समिती नेते प्रकाश मरगाळे यांनी कडक शब्दांत टीका केली. “सीमा प्रश्न तज्ज्ञ समिती व उच्च अधिकार समितीमध्ये नेमके कोण कार्यरत आहे, याची माहिती वकिलांकडेच नाही, हे दुर्दैव आहे. त्यामुळे मराठी लोकांनी स्वतःच्या ताकदीवर हा लढा लढावा,” असे त्यांनी बैठकीत सांगितले. येत्या दोन दिवसांत सीमा प्रश्नाचे काम पाहणाऱ्या कनिष्ठ आणि ज्येष्ठ वकिलांची बैठक होणार असल्याचेही त्यांनी स्पष्ट केले.
युवा समितीचे अध्यक्ष शुभम शेळके यांनी तरुणांना आवाहन करत सांगितले की, १७ जानेवारी रोजी हुतात्मा चौकात उपस्थित राहून मराठी जनतेची लोकइच्छा आणि सीमा प्रश्नावरील तीव्रता प्रशासनाला दाखवावी.
बैठकीत शिवसेना एकनाथ शिंदे गटाच्या सीमा समितीवरही निशाणा साधला गेला. ही समिती सीमा प्रश्न विरोधी काम करत असल्याने तातडीने तातडीने बरखास्त करावी , तसेच महाराष्ट्राचे मुख्यमंत्री एकनाथ शिंदे यांना याबाबत पत्रव्यवहाराद्वारे माहिती देण्याचे ठराव कार्यकर्त्यांनी मांडला.
बैठकीत रणजीत चव्हाण पाटील, रमाकांत कोंडुसकर, मदन बामणे, प्रकाश मरगाळे, अंकुश केसरकर, शिवराज पाटील यांसह समितीचे अनेक पदाधिकारी आणि कार्यकर्ते मोठ्या संख्येने उपस्थित होते.
