बेळगाव / प्रतिनिधी
दिल्ली येथील तालकटोरा आंतरराष्ट्रीय जलतरण तलावात १२ ते १७ डिसेंबर दरम्यान आयोजित करण्यात आलेल्या ६९ व्या नॅशनल स्कूल गेम्स जलतरण स्पर्धेत बेळगावच्या कुमारी वेदा वैभव खानोलकर हिने उल्लेखनीय कामगिरी करत रौप्य पदक पटकावले.
आबा हिंद स्पोर्ट्स क्लबची जलतरणपटू आणि जी. जी. चिटणीस स्कूलची विद्यार्थिनी असलेल्या वेदाने कर्नाटक राज्याचे प्रतिनिधित्व करत ४ × १०० मीटर मिडले रिले या प्रकारात द्वितीय क्रमांक मिळवून रौप्य पदकावर आपले नाव कोरले.
वेदाच्या या यशामागे शाळेचे चेअरमन ॲड. चंद्रहास अनवेकर, प्राचार्या नवीना शेट्टीगार, क्रीडा शिक्षक धनाजी सर, आबा हिंद स्पोर्ट्स क्लबचे अध्यक्ष शितल हुलबते, हिंद स्पोर्ट्स क्लबचे अध्यक्ष अरविंद संगोळी यांचे प्रोत्साहन लाभले. तसेच एनआयएस जलतरण प्रशिक्षक विश्वास पवार यांच्या मार्गदर्शनाचा तिला मोलाचा लाभ झाला.
वेदाच्या या यशामुळे बेळगावच्या क्रीडाक्षेत्रात आनंदाचे वातावरण निर्माण झाले असून तिच्यावर सर्व स्तरातून अभिनंदनाचा वर्षाव होत आहे.
