- युवा समिती सीमाभाग राबवणार उपक्रम
- “लढा नाही तर गुलामीची सवय लागेल” – लोकचळवळीचा निर्धार
बेळगाव / प्रतिनिधी
महाराष्ट्र एकीकरण युवा समिती सीमाभागतर्फे संपूर्ण सीमाभागात ‘मराठी सन्मान यात्रा’ काढण्याचा निर्णय घेण्यात आला आहे. मराठी भाषेचा सन्मान, अधिकार आणि मराठी भाषिकांना पुन्हा लढ्याच्या प्रवाहात आणण्यासाठी ही यात्रा लोकचळवळ म्हणून राबवली जाणार आहे.
या संदर्भात समितीची बैठक आज मराठा मंदिर येथे संघटनेचे अध्यक्ष शुभम शेळके यांच्या अध्यक्षतेखाली पार पडली. बैठकीपूर्वी पत्रकार परिषद घेण्यात आली. बैठकीच्या प्रारंभी कार्याध्यक्ष धनंजय पाटील यांनी प्रास्ताविक केले.
बैठकीत बोलताना अध्यक्ष शुभम शेळके म्हणाले की, संपूर्ण सीमाभागात मराठी सन्मान यात्रा काढून प्रवाहाबाहेर गेलेले युवक आणि मराठी भाषिक पुन्हा चळवळीत सहभागी करून घेणे गरजेचे आहे. “लढा दिला नाही तर गुलामीची सवय लागते,” असे स्पष्ट मत त्यांनी मांडले.
गजानन शहापूरकर यांनी, राष्ट्रीय पक्षांचे लोकप्रतिनिधी निवडणुकीत मराठीत अर्ज स्वीकारतात, मात्र प्रशासकीय पातळीवर मराठीसाठी आग्रह धरत नाहीत, यावर नाराजी व्यक्त केली. मराठी नगरसेवकांनी मराठी भाषेसाठी ठोस भूमिका घ्यावी, अन्यथा जाब विचारला जाईल, असा इशाराही त्यांनी दिला.
राजू पाटील यांनी मराठी सन्मान यात्रेला अनुमोदन देत ती संघटितपणे आणि यशस्वीपणे राबवण्याचे आवाहन केले. रमेश माळवी यांनीही यात्रेला पाठिंबा दर्शविला. मोतेस बारदेसकर यांनी केवळ निवडणुकीपुरता नव्हे तर कायमस्वरूपी मराठी भाषेत व्यवहार सुरू ठेवण्यासाठी प्रयत्न करावेत, असे सुचवले.
कार्याध्यक्ष धनंजय पाटील यांनी सांगितले की, २१ जानेवारी रोजी न्यायालयीन सुनावणी असल्याने कोणताही विपरीत संदेश जाऊ नये म्हणून मराठी सन्मान यात्रा ही २१ जानेवारीनंतर आयोजित केली जाईल. यासाठी मध्यवर्ती महाराष्ट्र एकीकरण समिती, घटक समित्या, नेते व कार्यकर्त्यांशी चर्चा करून तारीख निश्चित केली जाईल.
याच बैठकीत अखिल भारतीय मराठी साहित्य संमेलन बेळगाव येथे भरवावे, अशी मागणी करण्याचा ठराव एकमताने संमत करण्यात आला. बैठकीच्या शेवटी सरचिटणीस मनोहर हुंदरे यांनी आभार प्रदर्शन केले.
यावेळी अशोक घगवे, शिवाजी हावळानाचे, नगरसेवक शिवाजी मंडोळकर, सचिन दळवी, सागर कणबरकर, इंद्रजित धामाणेकर, रणजित हावळानाचे, निलेश काकतकर, सुरज जाधव, साहिल तिनेकर, राहुल बेनाळकर, श्री जाधव, कुणाल जाधव, रोहित जाधव, ओंकार जाधव, निरंजन जाधव, गणेश मोहिते, श्रीकांत नांदूरकर, विनायक मजुकर, राजू पावले आदी पदाधिकारी व कार्यकर्ते मोठ्या संख्येने उपस्थित होते.
