बेळगाव / प्रतिनिधी
सीमाभागातील मराठी भाषा, संस्कृती आणि परंपरांचे जतन, शिवकालीन इतिहासाचे संवर्धन तसेच विद्यार्थ्यांमध्ये स्पर्धात्मक परीक्षांसाठी लागणारी बुद्धिमत्ता आणि आत्मविश्वास वाढावा या उद्देशाने महाराष्ट्र एकीकरण युवा समितीतर्फे दरवर्षीप्रमाणे यंदाही भव्य सामान्यज्ञान स्पर्धेचे आयोजन करण्यात आले आहे. यंदाचे हे पाचवे वर्ष असून ही स्पर्धा सीमाभागातील सर्वात मोठी आणि लोकप्रिय स्पर्धा मानली जाते. बेळगाव शहर व ग्रामीण भागासह खानापूर तालुका आणि निपाणी परिसरातून मोठ्या संख्येने विद्यार्थी या स्पर्धेत सहभागी होतात.
मंगळवार, दि. ६ जानेवारी २०२६ रोजी दोन सत्रात ही स्पर्धा पार पडणार असून ठिकाणे गोवावेसजवळील मराठा मंदिर कार्यालय आणि तुकाराम महाराज सांस्कृतिक भवन, खानापूर रोड, बेळगाव अशी असतील.
- स्पर्धेची विभागवार गटवारी :
१) प्राथमिक (लहान गट) – इयत्ता ४थीपर्यंत
२) प्राथमिक (मोठा गट) – इयत्ता ५वी ते ७वी
३) माध्यमिक विभाग – इयत्ता ८वी ते १०वी
४) महाविद्यालयीन विभाग – इयत्ता ११वी ते पदव्युत्तर (वय २८ वर्षांपर्यंत, सीमाभागाबाहेरील विद्यार्थीही सहभागी होऊ शकतात)
सामान्यज्ञान, बुद्धिमत्ता, शिवकालीन इतिहास, शालेय अभ्यासक्रम, संयुक्त महाराष्ट्र चळवळ आणि सीमाप्रश्न या विषयांवर आधारित प्रश्न विचारण्यात येतील. समितीतर्फे उपलब्ध करून देण्यात येणाऱ्या संदर्भ पुस्तिकेवरही प्रश्नांचा आधार असेल.
विजेत्यांना रोख रक्कम, प्रशस्तीपत्र, पदके आणि स्मृतिचिन्ह देऊन गौरविण्यात येणार आहे. तर प्रत्येक स्पर्धकाला सहभाग प्रमाणपत्र देण्यात येईल.
नावनोंदणीची अंतिम तारीख ४ जानेवारी २०२६ असून इच्छुक स्पर्धकांनी खालील स्पर्धा प्रमुखांशी संपर्क साधावा , प्रतीक पाटील : 7338145673 , सिद्धार्थ चौगुले : 7338097882 , आशिष कोचेरी : 9886103373 , साईनाथ शिरोडकर : 7411872442 तर अधिक माहितीसाठी समितीचे अध्यक्ष अंकुश केसरकर, सरचिटणीस श्रीकांत कदम किंवा महाराष्ट्र एकीकरण युवा समिती कार्यालय, कावळे संकुल, टिळकवाडी, बेळगाव येथे संपर्क साधावा.
