बेळगाव : येथील छत्रपती शिवाजी रोड कोनवाळ गल्ली, सार्वजनिक श्री गणेश उत्सव मंडळ, श्री राजा शिवछत्रपती युवक मंडळाच्या वतीने गुरूवार दि. ४ सप्टेंबर २०२५ रोजी महाप्रसादाचे आयोजन केले होते. यानिमित्ताने रुग्णसेवक प्राचार्य आनंद अरुण आपटेकर वैद्यकीय समन्वय, म. ए. समिती व कार्यकारी सचिव मध्यवर्ती श्री सार्वजनिक गणेशोत्सव मंडळ बेळगाव यांचा विशेष सत्कार करण्यात आला. यावेळी मध्यवर्ती सार्वजनिक गणेशोत्सव महामंडळाचे जनसंपर्कप्रमुख विकास कलघटगी व लक्ष्मण किल्लेकर यांनाही मंडळाच्या वतीने सन्मानित करण्यात आले.
गतवर्षी ५ सप्टेंबर २०२४ रोजी कोनवाळ गल्लीतील प्रशांत हांडे यांना किडनी प्रत्यारोपणाची गरज होती. यासाठी विविध प्रसार माध्यमांमधून मदतीचे आवाहन करण्यात आले होते. तेव्हा प्रशांत यांना महाराष्ट्राचे तत्कालीन मुख्यमंत्री एकनाथ शिंदे यांचे विशेष अधिकारी व मुख्यमंत्री सहाय्यता निधी कक्ष प्रमुख मंगेश चिवटे यांनी विलंब न करता दोन लाखाचा निधी उपलब्ध करून दिला. यंदाच्या गणेशोत्सवात त्या घटनेला एक वर्ष पूर्ण होत आहे. आता प्रशांत हांडे यांची प्रकृती पूर्वीप्रमाणे ठीक असून ते आपल्या व्यवसायात कार्यरत आहेत.
तेव्हा प्रा. आनंद आपटेकर यांनी केलेल्या सहकार्याप्रती कृतज्ञता व्यक्त करण्यासाठी त्यांचा सत्कार करण्यात आला. सत्कारानंतर मनोगत व्यक्त करताना प्रा. आनंद आपटेकर म्हणाले, घरातील प्रमुख व्यक्तीवर संकट आले म्हणजे पूर्ण घरावर संकट आल्यासारखे असते, म्हणून असे संकट कोणावर येऊ नये अशी प्रार्थना त्यांनी विघ्नहर्त्याकडे केली. तसेच संकट आलेच तर त्या रुग्णाला मदत करून संकटाला सामोरे जाण्यासाठी त्याला धैर्य देऊ असे त्यांनी सांगितले.
यावेळी प्रा. आपटेकर यांनी समिती नेते रमाकांतदादा कोंडुसकर, तज्ञ समिती अध्यक्ष खासदार धैर्यशील माने,मध्यवर्ती म. ए. समितीचे सरचिटणीस मालोजी अष्टेकर यांचे आभार मानले. याप्रसंगी छत्रपती शिवाजीरोड मंडळाचे अध्यक्ष विनायक पवार, मदन अष्टेकर, कुंज नावगेकर, महेश नावगेकर, कुणाल हांडे, आकाश हांडे, प्रदीप किल्लेकर, शिवम उरणकर व महिला मंडळ उपस्थित होते.
