- १२ पदकांची कमाई
बेळगाव / प्रतिनिधी
कोल्हापूर येथील सचिन टीम टॉपर्स स्केटिंग अकॅडमीच्या वतीने आयोजित ‘शिवसमर्थ खुल्या स्पीड स्केटिंग स्पर्धेत’ बेळगाव जिल्हा रोलर स्केटिंग असोसिएशनच्या खेळाडूंनी दमदार कामगिरी करत स्पर्धेवर आपला ठसा उमटवला आहे.
या स्पर्धेत बेळगावच्या स्केटर्सनी ७ सुवर्ण, ४ रौप्य आणि १ कांस्य अशी एकूण १२ पदके पटकावत जिल्ह्याच्या शिरपेचात मानाचा तुरा रोवला. कोल्हापूरमध्ये पार पडलेल्या या स्पर्धेत ३०० हून अधिक नामवंत स्केटिंगपटूंनी सहभाग घेतला होता.
पदक विजेत्यांमध्ये जानवी तेंडुलकर (२ सुवर्ण), शल्य तरळेकर (२ सुवर्ण), सौरभ साळोखे (२ सुवर्ण), आरशान माडीवाले (१ सुवर्ण, १ कांस्य), अमिषा वेर्णेकर (२ रौप्य) आणि प्रीतम बागेवाडी (२ रौप्य) यांचा समावेश आहे. खेळाडूंनी उत्कृष्ट वेग, तंत्र आणि आत्मविश्वासाच्या जोरावर हे यश संपादन केले.
हे सर्व खेळाडू केएलई सोसायटी व गुड शेफर्ड स्केटिंग रिंक येथे प्रशिक्षक सूर्यकांत हिंडलगेकर, विठ्ठल गंगणे, योगेश कुलकर्णी, विश्वनाथ येळ्ळूरकर आणि सोहम हिंडलगेकर यांच्या मार्गदर्शनाखाली नियमित सराव करत आहेत.
या उल्लेखनीय यशाबद्दल डॉ. प्रभाकर कोरे, माजी आमदार शाम घाटगे, राज घाटगे, उमेश कलघटगी आणि प्रसाद तेंडुलकर यांनी खेळाडू व प्रशिक्षकांचे अभिनंदन करून त्यांना पुढील वाटचालीसाठी शुभेच्छा दिल्या आहेत.
