बेळगाव / प्रतिनिधी
कडोली मराठी साहित्य संघ आणि राज्य मराठी विकास संस्था, मुंबई यांच्या संयुक्त विद्यमाने रविवार, दि. ११ जानेवारी २०२६ रोजी ४१ वे कडोली मराठी साहित्य संमेलन आयोजित करण्यात आले आहे. या साहित्य संमेलनाच्या अध्यक्षपदी टेम्भूर्णी (ता. माढा, जि. सोलापूर) येथील ज्येष्ठ व सुप्रसिद्ध साहित्यिक प्रा. डॉ. महेंद्र कदम यांची निवड करण्यात आली आहे. ही माहिती कडोली मराठी साहित्य संघाचे अध्यक्ष शिवाजी कुट्रे यांनी दिली.
सोमवार (दि. १५) रोजी झालेल्या संघाच्या कार्यकर्त्यांच्या बैठकीत अध्यक्षपदाची अधिकृत घोषणा करण्यात आली. या बैठकीत संमेलनातील विविध सत्रे, सहभागी होणारे साहित्यिक तसेच संमेलनाच्या एकूण तयारीबाबत सविस्तर चर्चा करण्यात आली.
यावेळी विलास बामणे, किशोर पाटील, शिवाजी कुट्रे, बसवंत शहापूरकर, भरमाणी डोंगरे, शिवराज कालकुंद्रीकर, अरुण पाटील, तानाजी कुट्रे, गिरीधर गौंडवाडकर, मोहन पाटील, किरण होणगेकर व किरण पवार यांनी संमेलन यशस्वी करण्यासाठी विविध सूचना मांडल्या. बैठकीला संघाचे कार्यकर्ते मोठ्या संख्येने उपस्थित होते.
