बेळगाव / प्रतिनिधी
माळमारुती पोलीस स्थानकाचे पोलीस निरीक्षक जे. एम. कालीमिर्ची यांनी शहर सीईएन विभागाचे पोलीस निरीक्षक म्हणून नुकतीच सूत्रे स्विकारली. बी. आर. गड्डेकर यांच्या बदलीनंतर हे पद रिक्त झाले होते.
गेल्या आठवड्यात शंभरहून अधिक पोलीस निरीक्षकांच्या बदल्या झाल्या. यामध्ये माळमारुती स्थानकाचे पोलीस निरीक्षक कालीमिर्ची यांचीही बदली झाली. या आदेशात त्यांना नवी नियुक्ती देण्यात आली नव्हती. दोन दिवसांपूर्वी त्यांच्याकडे शहर सीईएन पोलीस स्थानकाचा भार सोपवण्यात आला. सोमवारी त्यांनी आपल्या पदाची सूत्रे स्वीकारली.
१ नोव्हेंबर काळ्या दिनावेळी निरीक्षक कालीमिर्ची यांची म. ए. समितीतर्फे निघणाऱ्या काळा दिन फेरीच्या बंदोबस्तासाठी नियुक्ती झाली होती. ज्यांच्यावर पोलिसांची करडी नजर असते, अशांबरोबर तुम्ही सातत्याने राहायला हवे, असा वरिष्ठ पोलिसांचा अलिखीत आदेश असतो. कन्नड – मराठी वादामुळे समितीचे युवानेते शुभम शेळके हे पोलिसांच्या रडारवर होते. त्यांच्या हालचालींवर नजर ठेवण्यासाठी वरिष्ठ पोलीस अधिकाऱ्यांनी ही जवाबदारी कालीमिर्ची यांच्यावर सोपवली होती.
त्यामुळे काळादिन फेरीच्या आधी कालीमिर्ची यांनी शेळके यांच्यासोबत सेल्फी घेऊन ती वरिष्ठ पोलीस अधिकाऱ्यांना पाठवली. हा त्यांच्या नियमित ड्युटीचा भाग होता. परंतु, काही माध्यमांनी सेल्फी घेतानाचे छायाचित्र प्रसारित करून काही कन्नड माध्यमांनी चुकीच्या पद्धतीने वार्तांकन व्हायरल केले.
निरीक्षकांच्या बदलीची यादी आली तेव्हा कालीमिर्ची यांचीही बदली झाली. माळमारुती स्थानकात दोन वर्षांहून अधिक काळ झाल्याने ती नियमित बदली होती. परंतु, सोशल मीडियावर त्यांना निलंबित केल्याचेही खोटे वृत्त व्हायरल झाले होते. तथापि, त्यांची फक्त बदली झाली होती.
माळमारुती स्थानकातून बदली झाल्यानंतर काही दिवस रजेवर होतो. त्यातच चुकीच्या वृत्तांमुळे मनस्ताप सहन करावा लागला. पोलीस महासंचालकांच्या आदेशानुसार सध्या आपण शहर सीईएन विभागात निरीक्षक म्हणून कार्यभार स्वीकारला आहे.
– जे. एम. कालीमिर्ची, पोलीस निरीक्षक, सीईएन बेळगाव
