- मराठी सन्मान यात्रेला पाठिंबा – डांबर मोर्चात ताकदीनिशी सहभागाचा निर्णय
- बेळगाव तालुका महाराष्ट्र एकीकरण समितीची बैठक
बेळगाव / प्रतिनिधी
महाराष्ट्र एकीकरण समितीच्या वतीने दरवर्षीप्रमाणे यंदाही कंग्राळी खुर्द येथे येत्या १७ जानेवारी रोजी आयोजित करण्यात येणाऱ्या हुतात्मा अभिवादन कार्यक्रमास मोठ्या संख्येने उपस्थित राहण्याचा ठराव बेळगाव तालुका महाराष्ट्र एकीकरण समितीच्या बैठकीत एकमताने मंजूर करण्यात आला. याचबरोबर महाराष्ट्र एकीकरण युवा समिती सीमाभाग आयोजित मराठी सन्मान यात्रेला जाहीर पाठिंबा देण्याचा तसेच मध्यवर्ती महाराष्ट्र एकीकरण समितीच्या आगामी डांबर मोर्चामध्ये संपूर्ण ताकदीनिशी सहभागी होण्याचा निर्णयही या बैठकीत घेण्यात आला.
खानापूर रोडवरील रेल्वे ओव्हरब्रिजजवळील मराठा मंदिरात गुरुवारी ही बैठक पार पडली. बैठकीच्या अध्यक्षस्थानी समितीचे अध्यक्ष व माजी आमदार मनोहर किणेकर होते. व्यासपीठावर सचिव एम. जी. पाटील, आर. एम. चौगुले, लक्ष्मण होनगेकर, रामचंद्र मोदगेकर, मोनाप्पा पाटील व विठ्ठल पाटील उपस्थित होते.
बैठकीच्या सुरुवातीला महाराष्ट्र एकीकरण समितीच्या दिवंगत कार्यकर्त्यांना श्रद्धांजली अर्पण करण्यात आली. त्यानंतर सचिव एम. जी. पाटील यांनी बैठकीचा उद्देश स्पष्ट केला. प्रास्ताविकात बोलताना माजी आमदार मनोहर किणेकर यांनी १७ जानेवारी १९५६ रोजी सीमा प्रश्नासंदर्भात झालेल्या आंदोलनात पोलिसांच्या गोळीबारात पाच जण हुतात्मा झाल्याचा इतिहास उपस्थितांसमोर मांडला. सीमा प्रश्नावर न्यायालयीन लढाई सुरू असली तरी रस्त्यावरचा संघर्षही तितकाच महत्त्वाचा असून तो अधिक तीव्रतेने चालू ठेवण्याची गरज असल्याचे त्यांनी ठामपणे सांगितले.
येत्या १७ जानेवारी रोजी सकाळी ९ वाजता कंग्राळी खुर्द येथे होणाऱ्या हुतात्मा अभिवादन कार्यक्रमास सर्व पदाधिकारी, कार्यकर्ते व मराठी बांधवांनी बहुसंख्येने उपस्थित राहावे, असे आवाहनही त्यांनी केले.
यावेळी आर. एम. चौगुले, रामचंद्र मोदगेकर, शिवाजी खांडेकर, दीपक पावशे व लक्ष्मणराव होनगेकर यांनी सीमाप्रश्नावरील लढ्याला अधिक व्यापक स्वरूप देण्याची आवश्यकता व्यक्त करत आपले विचार मांडले. बैठकीत कंग्राळी खुर्द येथील हुतात्मा अभिवादन कार्यक्रमास मोठ्या संख्येने उपस्थित राहणे, मराठी सन्मान यात्रेला पाठिंबा देणे आणि आगामी डांबर मोर्चामध्ये सक्रिय सहभाग नोंदवणे, असे ठराव एकमताने मंजूर करण्यात आले. बैठकीस महाराष्ट्र एकीकरण समितीचे पदाधिकारी व कार्यकर्ते मोठ्या संख्येने उपस्थित होते.
