- खासदार जगदीश शेट्टर यांचे रेल्वे विभागाला निर्देश
बेळगाव / प्रतिनिधी
खासदार जगदीश शेट्टर यांनी संबंधित रेल्वे विभागाला बेळगाव – कित्तूर – धारवाड दरम्यान नवीन रेल्वे मार्गासाठी आवश्यक असलेल्या उर्वरित भूसंपादनाचे काम पूर्ण करण्याचे निर्देश दिले.
शनिवारी, बेळगाव जिल्हाधिकारी कार्यालयात बेळगाव लोकसभा मतदारसंघात राष्ट्रीय महामार्ग विकास प्राधिकरण, नागरी विमान वाहतूक विभाग आणि केएआयडीबी विभाग यासारख्या केंद्र सरकारच्या विविध विभागांद्वारे राबविल्या जाणाऱ्या विविध विकासकामांच्या अंमलबजावणीबाबत बेळगाव जिल्हाधिकारी मोहम्मद रोशन यांच्या उपस्थितीत आढावा बैठक झाली. या बैठकीच्या अध्यक्षस्थानावरून ते बोलत होते.
दरम्यान, बेळगाव – कित्तूर – धारवाड नवीन रेल्वे मार्गासाठी सुमारे १२०० एकर जमीन आवश्यक आहे. अधिकाऱ्यांनी कित्तूर आणि देसूर दरम्यान आतापर्यंतच्या भूसंपादन प्रक्रियेची माहिती दिली आणि सुमारे ४०७.२४ एकर भूसंपादन प्रक्रियेबाबत अधिसूचना अंतिम टप्प्यावर पोहोचल्याची माहिती बैठकीत दिली. उर्वरित जमिनी संपादित करण्याचे कामही लवकरात लवकर पूर्ण करण्याचे निर्देश खासदार जगदीश शेट्टर यांनी दिले. यावेळी बेळगाव शहराभोवती बायपास रस्त्याच्या (रिंग रोड) बांधकामाबाबतच्या प्रगतीचा आढावा घेण्यात आला.
याप्रसंगी उपस्थित राष्ट्रीय महामार्ग विकास प्राधिकरण प्रकल्प संचालकांना त्याच्या अंमलबजावणीत येणाऱ्या अडचणी दूर करण्याचे आणि काम लवकरात लवकर पूर्ण करण्याचे निर्देश देण्यात आले. बेळगाव विमानतळाच्या विकासासाठी आवश्यक असलेल्या भूसंपादनाबाबत विचारणा केल्यानंतर येत्या काळात हवाई सेवा वापरणाऱ्या लोकसंख्येत वाढ होईल. या संदर्भात, काळानुरूप हवाई सेवा विकसित करणे आवश्यक आहे, असे प्रगती पार्शिलाना यांनी सांगितले.
या बैठकीला जिल्हाधिकारी मोहम्मद रोशन, सहाय्यक आयुक्त श्रावण नायक, विशेष भूसंपादन अधिकारी राजश्री जैनापूर आणि चौहान, राष्ट्रीय महामार्ग प्राधिकरण प्रकल्प संचालक भुवनेश कुमार आणि विमान वाहतूक प्राधिकरणाचे इतर अधिकारी उपस्थित होते.
