बेळगाव / प्रतिनिधी
गेल्या काही दिवसांपासून सोशल मीडियासह विविध माध्यमांवर बहुचर्चित बेळगावकर निर्माते अमोध मुचंडीकर, वाणी हालप्पनवर निर्मित आणि योगेश जाधव दिग्दर्शित वाणीश्री फिल्म प्रॉडक्शनचा धमाल विनोदी चित्रपट “ऑल इज वेल” चित्रपट दि. २७ जून रोजी सर्वत्र प्रदर्शित झाला आहे. जाती – धर्मा पलीकडच्या मैत्रीची अनोखी गोष्ट सांगणारा हा चित्रपट बेळगाव शहरातील दोन प्रसिद्ध चित्रपटगृहांमध्ये झळकला आहे.
अगदी सुरुवातीपासून ते शेवटपर्यंत प्रेक्षकांना खळखळून हसायला लावणारा सदर चित्रपट रुपेरी पडद्यावर प्रदर्शित झाल्यापासून उत्स्फूर्त प्रतिसाद लाभत आहे. फुल धमाल आणि मनोरंजनाचा खजाना असलेल्या या चित्रपटामध्ये प्रत्येक कलाकाराने जीव ओतून काम केले आहे. दरम्यान बेळगावातील चित्रपटगृहांमध्येही चित्रपट पाहण्यासाठी गर्दी दिसून येत आहे.
अमर, अकबर आणि अँथनी यांच्या मैत्रीची रंजक आणि विनोदी गोष्ट हास्याची मेजवानी ठरत आहे. यानिमित्ताने अभिनय बेर्डे, प्रियदर्शन जाधव आणि रोहित हळदीकर हे जबरदस्त त्रिकूट पहिल्यांदाच एकत्र आले आहे. या तिघांसोबत सयाजी शिंदे, अभिजीत चव्हाण, नक्षत्रा मेढेकर, सायली फाटक, माधव वझे,अजय जाधव, अमायरा गोस्वामी, दिशा काटकर आदि कलाकारांच्या भूमिका आहेत. चित्रपट पाहताना विनोदी शैलीने रसिकांच्या मनावर अभिनयाची छाप निर्माण केलेले दिवंगत अभिनेते दादा कोंडके यांची आठवण होते.
हा चित्रपट तरुणाईची कथा, कलाकारांचा सुरेख अभिनय, सुमधुर संगीत आणि नेत्र सुखद सादरीकरणाने सजलेला आहे. त्यामुळे तो बेळगावकरांच्या पसंतीस पडेल, तेव्हा सर्वांनी कुटुंबासह चित्रपट आवर्जून पहावा अशा प्रतिक्रिया चित्रपट पाहिलेल्या प्रेक्षकांनी व्यक्त केल्या आहेत.
