- महिला गटात मुक्त ग्रुप व पुरुष गटात रवळनाथ भजनी मंडळ अव्वल
बेळगाव / प्रतिनिधी
सार्वजनिक वाचनालय ,बेळगाव च्या वतीने १७ ते १९ ऑगस्ट पर्यंत मराठा मंदिर येथे घेण्यात आलेल्या नवव्या संगीत भजन स्पर्धा उत्साहाने संपन्न झाल्या. महिलांचे १९ आणि पुरुषांचे १२ गट सहभागी झालेल्या या स्पर्धेतील पहिला क्रमांक महिला गटात मुक्त ग्रुप महिला भजनी मंड, टिळकवाडी आणि पुरुष गटात रवळनाथ भजनी मंडळ, अडकूर (ता. चंदगड) यांनी पटकावून प्रत्येकी १५ हजार रुपये रोख व स्मृतिचिन्ह मिळविले.
मंगळवारी सायंकाळी सर्व विजेत्यांना रोख रक्कम व स्मृतिचिन्ह देऊन गौरविण्यात आले. याबक्षीस वितरण समारंभास प्रमुख पाहुणे म्हणून मराठा मंदिरचे अध्यक्ष आप्पासाहेब गुरव आणि प्रमुख वक्ते म्हणून महागाव कॉलेज, गडहिंग्लजचे प्रा.पी.डी. पाटील हे उपस्थित होते. अध्यक्षस्थानी वाचनालयाचे अध्यक्ष अनंत लाड हे होते. व्यासपीठावर उपाध्यक्ष डॉ. विनोद गायकवाड, कार्यवाह सुनिता मोहिते, संचालक अभय याळगी, लता पाटील, रघुनाथ बांडगी, प्रसन्न हेरेकर व नेताजी जाधव आदी उपस्थित होते.
अनंत लाड यांनी प्रास्ताविक करून उपस्थितांचे स्वागत केले. पाहुण्यांचा सन्मान डॉ. गायकवाड यांनी केला तर वक्त्यांचा सन्मान अनंत लाड यांनी केला.
“संत साहित्य व समाज प्रबोधन”या विषयावर बोलताना प्रा. पी. डी. पाटील यांनी अनेक उदाहरणे देऊन उपस्थितांना मंत्रमुग्ध केले. “आपण अनेक देवी देवतांची जयंती किंवा पुण्यतिथी साजरी करतो, पण विठ्ठलाची जयंती किंवा पुण्यतिथी कधीच साजरी करत नाही. तसेच प्रत्येक देवी देवताच्या हातात एखादे शस्त्र असते मात्र विठुरायाच्या हातात कोणतेच शस्त्र नसते.”असे सांगून ते म्हणाले की “तुम्ही आंधळेप्रमाणे कोणत्याही गोष्टीवर विश्वास ठेवू नका. कोणत्याही गोष्टीची सत्यता पडताळून पाहूनच मग त्यावर विश्वास ठेवा.”
तुकोबा महाराज, संत गाडगेबाबा, संत बसवेश्वर, ज्ञानोबा – माऊली याचबरोबर अनेक संतांनी आपल्याला दिलेल्या संदेशाचे अवलोकन करा, माणसाचे चरित्र स्वच्छ असेल तर त्याला जगात कुठलीच भीती नसते “असेही ते म्हणाले. आप्पासाहेब गुरव यांनी सर्व मंडळांना तसेच वाचनालयाला या उपक्रमाबद्दल शुभेच्छा दिल्या आणि अभिनंदन केले.
- भजन स्पर्धेचा निकाल पुढीलप्रमाणे : महिला गट
१) मुक्त ग्रुप महिला भजनी मंडळ, टिळकवाडी २) सद्गुरु भजनी मंडळ,भाग्यनगर ३) ओमकार महिला भजनी मंडळ,हनुमान नगर ४) जय हरी महिला भजनी मंडळ, राजहंसगड ५) श्री मंगाई महिला भजनी मंडळ, वडगाव ६) भक्ती सांस्कृतिक महिला भजनी मंडळ ,बापट गल्ली ७) संत मुक्ताई महिला भजनी मंडळ, भारतनगर ८) ज्ञानेश्वर महिला भजनी मंडळ, राजवाडा कंपाउंड वडगाव ९) स्वामी समर्थ महिला भजनी मंडळ किणये आणि उत्तेजनार्थ पंचराशी महिला भजनी मंडळ,राकसकोप
- पुरुष गट :
१) श्री रवळनाथ भजनी मंडळ, अडकुर २) श्रीहरी संगीत कला मंच , कलेहोळ ३) रवळनाथ भजनी मंडळ ,गोल्याळी ता. खानापूर ४) जय हनुमान कलाप्रेमी भजनी मंडळ, करंजगाव ५) श्री संत तुकाराम भजनी मंडळ माणगाव , ता. चंदगड ६) श्री मरगुबाई भजनी मंडळ, माणगाव, ता. चंदगड ७) श्री धन्य ते माता पिता भजनी मंडळ, बाकनूर ८)श्री विठ्ठल रखुमाई भजनी मंडळ, कुद्रेमानी ९) श्रीहरी भजनी मंडळ, इनाम बडस १०) श्री सिद्धेश्वर संगीत भजनी मंडळ, निडगल, ता. खानापूर
- याशिवाय वैयक्तिक स्वरूपाची बक्षिसे :
उत्कृष्ट तबला वादक – श्रीहरी संगीत कला मंच कल्लेहोळ , मृदंग वादक – जय हरी महिला भजनी मंडळ, राजहंसगड , पेटीवादक – भक्ती सांस्कृतिक महिला भजनी मंडळ, बापट गल्ली बेळगाव , गायक – मुक्त ग्रुप महिला भजनी मंडळ, टिळकवाडी
या सर्व विजेत्यांना वाचनालयाचे संचालक आणि उपस्थित पाहुणे यांच्या हस्ते रोख रकमेचे पुरस्कार व स्मृतिचिन्ह देऊन गौरविण्यात आले. या संगीत भजन स्पर्धा बेळगाव शहर आणि परिसरातील अनेक संस्था व व्यक्तींनी प्रायोजित केल्या होत्या. त्या संस्थांच्या प्रतिनिधींचा अध्यक्ष व संचालकांच्या हस्ते स्मृतिचिन्ह व गुलाब पुष्प देऊन सन्मान करण्यात आला. कार्यक्रमाचे सूत्रसंचालन कार्यवाह सुनीता मोहिते यांनी केले. आभार प्रदर्शन रघुनाथ बांडगी यांनी केले. बापट गल्लीच्या कालिका देवी महिला मंडळाने उद्घाटना दिवशी सादर केलेल्या मंगळागौर बद्दल त्यांचाही गौरव करण्यात आला. या स्पर्धेचे परीक्षक म्हणून श्रीकांत सुळेभावकर, कागणी आणि बाबुराव सावंत, पेरणोली, आजरा यांनी काम पाहिले.
