बेळगाव / प्रतिनिधी
बेळगाव येथील प्रतिष्ठित बी. के. मॉडेल स्कूलमध्ये आयोजित करण्यात येणाऱ्या विशेष कार्यक्रमात मराठी चित्रपट, नाटक व दूरदर्शन क्षेत्रातील ज्येष्ठ व बहुआयामी अभिनेते डॉ. गिरीश ओक प्रमुख पाहुणे म्हणून उपस्थित राहणार आहेत. त्यांच्या उपस्थितीमुळे विद्यार्थ्यांसह कला रसिकांसाठी हा कार्यक्रम विशेष आकर्षण ठरणार आहे.
नागपूर येथे जन्मलेले डॉ. गिरीश ओक यांनी आयुर्वेदिक वैद्यकीय शिक्षण पूर्ण केले असले, तरी कलेवरील ओढीमुळे त्यांनी वैद्यकीय व्यवसायाऐवजी अभिनय क्षेत्राची वाट निवडली. १९८४ पासून त्यांच्या अभिनय प्रवासाला सुरुवात झाली असून, त्यांनी आजवर ४० हून अधिक नाटकं, ४० पेक्षा जास्त चित्रपट आणि अनेक लोकप्रिय दूरदर्शन मालिकांमध्ये प्रभावी भूमिका साकारल्या आहेत.
रंगभूमीवर ‘यू टर्न’, ‘टू मी नवेच’, ‘दीपस्तंभ’ यांसारख्या गाजलेल्या नाटकांमधून त्यांनी प्रेक्षकांची मने जिंकली. चित्रपट क्षेत्रात ‘जसा बाप तशी पोर’, ‘सातच्या आत घरात’, ‘कॉर्पोरेट’ (हिंदी), ‘हॅलो! गंधे सर’, ‘तू ही रे’, ‘जुनं फर्निचर’ यांसारख्या चित्रपटांत त्यांनी लक्षवेधी भूमिका केल्या असून, आगामी ‘बिन लग्नाची गोष्ट’ या चित्रपटातही ते झळकणार आहेत.
दूरदर्शनवर ‘अग्गबाई सासूबाई’, ‘अग्गबाई सुनबाई’, ‘जुलून येती रेशीमगाठी’, ‘फुलाला सुगंध मातीचा’ या मालिकांमधील त्यांच्या भूमिकांना प्रेक्षकांचा भरघोस प्रतिसाद मिळाला आहे.
दीर्घ आणि यशस्वी अभिनय कारकिर्दीबद्दल डॉ. गिरीश ओक यांना झी मराठी उत्सव नाट्यांचा जीवनगौरव पुरस्कार तसेच झी नाट्य गौरव पुरस्काराने सन्मानित करण्यात आले आहे. अभिनयाबरोबरच ते कविता व लेखनातही सक्रिय असून, त्यांच्या साहित्यिक लेखनातून सामाजिक व जीवनविषयक जाणिवा व्यक्त होतात.
बी. के. मॉडेल स्कूलच्या या कार्यक्रमातून विद्यार्थ्यांना कला, संस्कृती आणि जीवनप्रवासाबाबत प्रेरणादायी विचार ऐकण्याची संधी मिळणार असल्याचे आयोजकांनी सांगितले आहे.
