- उद्या खासदार तेजस्वी सूर्या व अभिनेते दीपक करंजीकर यांची उपस्थिती
बेळगाव / प्रतिनिधी
बेळगाव एज्युकेशन सोसायटीच्या बी.के. मॉडेल हायस्कूलच्या भव्य शताब्दी महोत्सवाचा मुख्य सोहळा उद्या, शनिवार दि. २० डिसेंबर रोजी अत्यंत उत्साहात पार पडणार आहे. या ऐतिहासिक कार्यक्रमासाठी बंगळूर दक्षिणचे खासदार व भाजयुमोचे राष्ट्रीय अध्यक्ष तेजस्वी सूर्या प्रमुख पाहुणे म्हणून उपस्थित राहणार आहेत.
अत्यंत तरुण वयात संसदेचे सदस्यत्व मिळवणारे तेजस्वी सूर्या हे अभ्यासू वक्ता म्हणून ओळखले जातात. तंत्रज्ञान, स्टार्टअप्स, युवा उद्योजकता आणि राष्ट्रीय सुरक्षेच्या विषयांवर त्यांनी संसदेत प्रभावी भूमिका मांडली आहे. त्यांच्या उपस्थितीमुळे शताब्दी महोत्सवाचे औचित्य अधिकच वाढणार आहे.
याचबरोबर मराठी चित्रपट व नाट्यसृष्टीतील ज्येष्ठ अभिनेते दीपक करंजीकर यांचीही या सोहळ्याला विशेष उपस्थिती लाभणार आहे. अनेक लोकप्रिय मालिका व चित्रपटांतील त्यांच्या दमदार अभिनयाने त्यांनी रसिकांच्या मनात वेगळे स्थान निर्माण केले आहे. अभिनयासोबतच सामाजिक व आर्थिक विषयांवरील त्यांच्या अभ्यासपूर्ण मांडणीसाठीही ते प्रसिद्ध आहेत.
- मान्यवरांची उपस्थिती :
या शताब्दी सोहळ्यास राज्यसभा सदस्य ईरान्ना कडाडी, बेळगाव दक्षिणचे आमदार अभय पाटील, के.एल.ई. संस्थेचे कार्याध्यक्ष डॉ. प्रभाकर कोरे, माजी आमदार महांतेश कवटगीमठ, संजय पाटील, अनिल बेनके, तसेच शाळेच्या माजी विद्यार्थिनी व ख्यातनाम उद्योजिका विद्या मुरकुंबी यांच्यासह अनेक मान्यवर उपस्थित राहणार आहेत.
- भव्य प्रभात फेरी व मुख्य कार्यक्रम :
शताब्दी महोत्सवानिमित्त उद्या सकाळी ७.३० वाजता बेळगाव एज्युकेशन सोसायटीच्या सर्व शाळांतील विद्यार्थी व कर्मचाऱ्यांची भव्य प्रभात फेरी काढण्यात येणार आहे. सायंकाळी ५.३० वाजता शाळेच्या आवारात उभारलेल्या भव्य मंडपात मुख्य कार्यक्रमास सुरुवात होणार आहे.
या ऐतिहासिक सोहळ्याचे साक्षीदार होण्यासाठी शाळेचे आजी-माजी विद्यार्थी, पालक व नागरिकांनी मोठ्या संख्येने उपस्थित राहावे, असे आवाहन संस्थेचे अध्यक्ष अविनाश पोतदार व सहकाऱ्यांनी केले आहे.
