बेळगाव / प्रतिनिधी
कर्नाटक राज्योत्सवाच्या मिरवणुकीदरम्यान बेळगाव शहरातील सदाशिव नगर परिसरात झालेल्या चाकू हल्ल्यात सहा जण जखमी झाल्याची धक्कादायक घटना घडली आहे. त्यापैकी तिघांना बीम्स रुग्णालयात तर दोघांना खासगी रुग्णालयात दाखल करण्यात आले आहे. जखमी पैकी दोन जणांची प्रकृती चिंताजनक असल्याची माहिती समोर आली आहे.
ही घटना बेळगावातील सदाशिवनगर परिसरात लक्ष्मी कॉम्प्लेक्स जवळ घडली आहे राज्योत्सवानिमित्त काढण्यात आलेल्या चित्ररथ मिरवणुकीदरम्यान अचानक काही हल्लेखोरांनी चाकू व जांबिया घेऊन गर्दीत घुसून हल्ला केला आणि घटनास्थळावरून पसार झाले. गुरुनाथ वक्कुंद, सचिन कांबळे, लोकेश बेटगेरी, महेश, विनायक आणि नझीर पठाण अशी या घटनेत जखमी झालेल्यांची नावे आहेत. ही घटना एपीएमसी पोलीस स्थानकाच्या हद्दीत घडली असून, पोलिसांनी गुन्हा दाखल करून तपास सुरू केला आहे.
