- दोन तरुण थोडक्यात बचावले
खानापूर / प्रतिनिधी
नंदगड परिसरात बुलेरो आणि दुचाकी यांच्यात झालेल्या भीषण धडकेत दोन तरुण गंभीर जखमी झाले असून सुदैवाने त्यांचे प्राण वाचले आहेत. अपघातानंतर घटनास्थळी काही काळ तणावाचे वातावरण निर्माण झाले होते. स्थानिक नागरिकांच्या तत्परतेमुळे जखमींना तातडीने रुग्णालयात हलविण्यात आले.
मिळालेल्या माहितीनुसार, नंदगडजवळील मुख्य रस्त्यावर बुलेरो आणि दुचाकीची समोरासमोर जोरदार धडक झाली. धडकेचा जोर इतका होता की दुचाकीस्वार गंभीर जखमी झाले. अपघाताची माहिती मिळताच नंदगड पोलिसांनी तातडीने घटनास्थळी धाव घेत परिस्थिती नियंत्रणात आणली.
दरम्यान, स्थानिकांच्या मदतीने जखमींना तात्काळ खानापूर येथील सरकारी रुग्णालयात दाखल करण्यात आले. या प्रकरणी नंदगड पोलीस ठाण्यात गुन्हा नोंद करण्यात आला असून अपघाताचे नेमके कारण शोधण्यासाठी पोलिसांकडून अधिक तपास सुरू आहे.
