मिळालेल्या माहितीनुसार, विहान हा आपल्या घराजवळील गल्लीत इतर मुलांसोबत खेळत होता. त्यावेळी अचानक दोन भटकी कुत्री तेथे आली आणि त्यांनी विहानवर हल्ला चढवला. अनपेक्षितपणे झालेल्या या हल्ल्यामुळे मुलाला स्वतःचा बचाव करता आला नाही. कुत्र्यांनी त्याच्या हातावर, पायावर आणि मांडीवर चावे घेतल्याने तो गंभीर जखमी झाला.

हल्ल्यानंतर विहानने मोठ्याने आरडाओरडा केल्याने त्याचे आई-वडील आणि परिसरातील नागरिक तत्काळ घटनास्थळी धावून आले. त्यांनी कुत्र्यांना हुसकावून लावत मुलाची सुटका केली. त्यानंतर जखमी अवस्थेतील विहानला तातडीने उपचारासाठी महात्मा गांधी रुग्णालयात दाखल करण्यात आले.

रुग्णालयातील डॉक्टरांनी त्याच्यावर आवश्यक उपचार सुरू केले असून त्याची प्रकृती स्थिर असल्याचे सांगितले जात आहे. सुदैवाने मुलगा धोक्याबाहेर असल्याची माहिती वैद्यकीय सूत्रांनी दिली आहे.

The post निपाणीत भटक्या कुत्र्यांच्या हल्ल्यात ११ वर्षीय मुलगा गंभीर जखमी appeared first on News 24 Tass Marathi.

संघटनेच्या पदाधिकाऱ्यांनी जिल्हाधिकाऱ्यांची भेट घेऊन गावातील पायाभूत सुविधांची दयनीय अवस्था मांडली. बेनाडी येथे रस्ते आणि गटारींची मोठी दुरवस्था झाली असून मूलभूत सुविधा अपुऱ्या असल्याचे त्यांनी निदर्शनास आणले. काही व्यक्तींनी नैसर्गिक नाला अडविल्यामुळे पावसाचे पाणी गावात साचत असल्याची तक्रारही करण्यात आली. अनेक वर्षांपासून आश्वासने मिळूनही प्रत्यक्षात कामे सुरू न झाल्याबद्दल नाराजी व्यक्त करण्यात आली.

अप्पाचीवाडी परिसरात काळम्मावाडी कालव्याचे पाणी उपलब्ध असूनही गेली अनेक वर्षे पुलाचे काम प्रलंबित आहे. याबाबत तातडीने कार्यवाही करण्याचे निर्देश जिल्हाधिकाऱ्यांनी संबंधित विभागाला दिल्याचे सांगण्यात आले. काम लवकर सुरू न झाल्यास आंदोलनाचा इशारा संघटनेचे राज्य सचिव राजू पवार यांनी दिला.

तसेच, बेनाडीतील मातंग समाजाच्या वस्तीमध्ये गटारीचे पाणी सोडले जात असल्याने स्थानिक नागरिकांना मोठा त्रास सहन करावा लागत आहे. यामुळे परिसरात अस्वच्छता वाढून आरोग्याच्या समस्या निर्माण होण्याची भीती व्यक्त करण्यात आली. ग्रामपंचायत आणि तालुका प्रशासनाकडून केवळ आश्वासने दिली जात असल्याची टीका करण्यात आली.

जिल्हाधिकाऱ्यांनी या सर्व मुद्द्यांवर सकारात्मक भूमिका घेत संबंधित यंत्रणांना आवश्यक सूचना दिल्या आहेत. आदेशांची अंमलबजावणी न झाल्यास पुढील तीव्र आंदोलन छेडण्याचा इशारा राज्य सचिव किशन नंदी यांनी दिला. यावेळी बेनाडी व अप्पाचीवाडी परिसरातील शेतकरी मोठ्या संख्येने उपस्थित होते.

The post बेनाडीतील समस्यांबाबत राज्य शेतकरी संघटनेचे जिल्हाधिकाऱ्यांना निवेदन appeared first on News 24 Tass Marathi.

निपाणी / प्रतिनिधी

निपाणीमध्ये पुणे-बेंगळुरू राष्ट्रीय महामार्गावर उड्डाणपुलाच्या कामादरम्यान ट्रक आणि दुचाकीमध्ये अपघात झाला. या अपघातात दुचाकीचे पुढचे भाग पूर्णपणे चक्काचूर झाले, मात्र दुचाकीस्वार थोडक्यात बचावला असून कोणतीही जीवितहानी झाली नाही.

अपघात गांधी रुग्णालयाजवळ झाला. उड्डाणपुलाच्या कामामुळे गेल्या काही दिवसांपासून या मार्गावर वाहतूक कोंडी मोठ्या प्रमाणात होत आहे. ट्रकने दुचाकीला धडक दिल्याने दुचाकीची अवस्था बिकट झाली, परंतु दुचाकीस्वार सुरक्षित राहिला. दुचाकीस्वाराचे नाव अद्याप समजू शकलेले नाही.

गेल्या महिनाभरापासून या मार्गावर उड्डाणपुलाच्या कामामुळे छोटे-मोठे अपघात सातत्याने होतात. अपघातानंतर काही वेळ मार्गावरील वाहतूक विस्कळीत झाली होती, ज्यामुळे प्रवाशांना आणि वाहनचालकांना मोठा त्रास सहन करावा लागला.

The post निपाणीत राष्ट्रीय महामार्गावर ट्रक – दुचाकी अपघात appeared first on News 24 Tass Marathi.

निपाणी / प्रतिनिधी

इचलकरंजी येथील युवकाचा निपाणी जवळील अर्जुननगर (ता. कागल) येथील एका महाविद्यालयाच्या मागील बाजूस निर्जन स्थळी युवकाचा धारदार शस्त्राने खून करण्यात आला आहे. नंतर सदरचा मृतदेह येथील निकम ओढ्यामध्ये फेकून दिल्याची घटना शनिवारी (ता.६) पहाटे उघडकीस आली आहे. सुहास थोरात (वय २१ रा. इचलकरंजी, ता. हातकणंगले) असे खून झालेल्या युवकाचे नाव आहे. या घटनेमुळे निपाणी परिसरात खळबळ उडाली आहे.

पोलिसांनी दिलेल्या माहितीनुसार, शुक्रवारी दुपारी सुहास थोरात आपल्या मित्रांसह निपाणी येथे चारचाकी वाहन पाहण्याच्या हेतूने आला होता. नंतर कर्नाटक – महाराष्ट्र सीमेवरील जवाहर तलावाजवळील निर्मनुष्य भागात त्यांच्यात मद्यप्राशन सुरू होते. याचदरम्यान मित्रांमध्ये झालेल्या किरकोळ वादाचे रूपांतर हिसक्यात होऊन धारदार हत्यारांनी सुहासच्या डोके व मानेवर वार करण्यात आले. प्राण गमावल्यानंतर त्याचा मृतदेह शेजारील ओढ्यात फेकून देण्यात आला.

शनिवारी सकाळी अर्जुनी (ता. कागल) येथील पोलीस पाटील दिगंबर कांबळे यांनी ओढ्यात एक मृतदेह तरंगताना पाहून मुरगुड पोलिसांना कळविले. तत्काळ पोलीस पथकाने घटनास्थळी भेट देत नागरिकांच्या मदतीने मृतदेह बाहेर काढला. पंचनामा करून शरीरावर झालेल्या जखमांवरून खून झाल्याची पुष्टी करण्यात आली.

या प्रकरणाचा तपास मुरगुड पोलिसांसह इचलकरंजी शिवाजीनगर पोलीस चालवत आहेत. घटनेची माहिती कळताच परिसरातील नागरिकांची मोठी गर्दी झाली होती. दरम्यान कोल्हापूर फॉरेन्सिक लॅबचे अधिकारी आणि वैद्यकीय पथक घटनास्थळी दाखल होऊन रक्ताचे नमुने व आवश्यक पुरावे गोळा केले. यामुळे गुन्हेगारांचा शोध लागण्यास मदत होणार असल्याचे पोलिसांचे म्हणणे आहे.

अर्जुननगर परिसर सायंकाळी निर्जन होत असल्याने अवैध धंद्यांना व झालेखोरांना ऊत येतो. या निर्मनुष्य जागेचाच गैरफायदा घेत मारेकऱ्यांनी खून केला असल्याची चर्चा सुरू आहे.

The post निपाणी नजीक इचलकरंजीतील युवकाचा खून appeared first on News 24 Tass Marathi.

शुक्रवारी रात्री बारा वाजण्याच्या सुमारास हातात लोखंडी साहित्य घेऊन येथील माने प्लॉटमध्ये दरोड्याचा प्रयत्न केला. पण पोलीस आल्याने त्यांच्यासमोरूनच चोरट्यांनी चोरी न करता धूम ठोकली आहे. या घटनामुळे शहरास उपनगरात दहशत निर्माण झाले आहे.

आठवड्याभरात निपाणी उपनगरातील अष्टविनायक नगर, पंतनगर, शिवाजीनगर, बिरोबा माळ येथील बंद घरासह चिक्कोडी रोडवरील भांड्याच्या दुकानातही चोरट्यानी हात साफ केला आहे. त्यामध्ये लाखो रुपयांचे दागिने व रक्कम घेऊन पोवारा केला आहे.परंतु वरील घटनातील एकही चोरटा पोलिसांच्या हाती लागलेला नाही. त्यामुळे या चोरट्यांना पकडण्याचे आव्हान पोलीस हासमोर उभ केले आहे.

परंतु चोर पोलीसांच्या हाती लागलेला नाही. त्या पार्श्वभूमीवर चिक्कोडीचे पोलीस उपाधीक्षक गोपालकृष्ण गौडर यांच्या मार्गदर्शनाखाली येथील मंडल निरीक्षक बी.एस. तळवार यांच्या नेतृत्वाखाली शहर, बसवेश्वर चौक आणि ग्रामीण पोलीस ठाण्यातील उपनिरीक्षकांनी सहकाऱ्यांना घेऊन शहरासह उपनगरात गस्त वाढविली आहे.

शुक्रवारी (ता.५)रात्री येथील माने प्लॉट एका शिक्षकांचे बंद घर फोडण्याचा चोरट्यानी प्रयत्न केला. चोरट्यांनी आपले चेहरे टोपी तसेच रुमालाच्या साह्याने झाकून घेतले होते. चोरटे शिक्षकाच्या दाराजवळ येऊन हत्याराने कुलूप फोडण्याचा प्रयत्न केला. त्याचवेळी दुचाकीवरून पोलिस घराजवळ येताच चोरटे तिथेच लपून बसण्याचा प्रयत्न केला.पण काही वेळाने पोलिसांचा दुचाकी पुढे गेल्यावर चोरांनी पळ काढला. चोरटे दिसताच पोलिसांची दुचाकी आल्याने चार चोरांनी पोलिसांना चाकू, कोयता आणि पारेचा धाक दाखवत पळून जाण्यात यशस्वी झाले. चोरटे चार जण आणि पोलीस दोघेजण असल्याने पोलिसांनाही काही करता आले नाही. हा सर्व प्रकार सीसीटीव्ही कॅमेरामध्ये कैद झाला आहे.

वारंवार घडणाऱ्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे.पोलीस कर्मचारी, वरिष्ठ अधिका-यानी याची गांभीर्याने दखल घेऊन चोरट्यांना जेरबंद करण्याची मागणी होत आहे.

The post निपाणीत शस्त्रधारी चोरट्याकडून धाडसी घरफोडीचा प्रयत्न appeared first on News 24 Tass Marathi.

निपाणी / प्रतिनिधी

देवगड-निपाणी राज्यमार्गावरील श्रीक्षेत्र आदमापूर (ता. भुदरगड) येथील उड्डाणपुलावर उसाच्या कांड्या भरून जाणार्‍या ट्रॉलीचा जॉईंट तुटल्याने ट्रॉली दहा फूट मागे जाऊन मुदाळतिट्ट्याकडे भाजीपाला भरून जाणार्‍या टेम्पोवर आदळली. या अपघातात टेम्पोमध्ये असणारे व्यापारी किरकोळ जखमी झाले.

या घटनेत ट्रॉली टेम्पोपासून थोडीशी मागे गेली असती, तर कठड्यावरून खाली असणार्‍या सर्व्हिस रोडवर कोसळून मोठा अपघात झाला असता. प्रत्येक रविवारी बाळूमामाचे दर्शन घेण्यासाठी भाविकांची गर्दी असते. भाविकांची वाहने उड्डाणपुलाच्या दोन्ही बाजूला उभी केली जातात. त्यामुळे निपाणी राधानगरी मार्गाकडे जाणार्‍या वाहनधारकांना जीव मुठीत धरून मार्गस्थ व्हावे लागते.

The post आदमापूर उड्डाणपुलावर उसाने भरलेल्या ट्रॉलीची टेम्पोला धडक appeared first on News 24 Tass Marathi.

निपाणी : बेळगाव सीमाभागात ‘काळा दिवस’ पाळणाऱ्या मराठी बांधवांना पाठिंबा देण्यासाठी हातकणंगलेचे खासदार आणि तज्ञ समितीचे अध्यक्ष धैर्यशील माने १ नोव्हेंबरला बेळगावकडे निघाले होते. मात्र, महाराष्ट्र–कर्नाटक सीमेजवळील कोगनोळी टोलनाक्यावर कर्नाटक पोलिसांनी त्यांना थांबवत प्रवेश नाकारला. यामुळे काही वेळ पुणे–बंगळूर महामार्गावर वाहतुकीची मोठी कोंडी निर्माण झाली.

प्रवेश बंदीचा निर्णय कळताच खासदार माने यांनी तीव्र नाराजी व्यक्त करत महामार्गावरच ठिय्या आंदोलन सुरू केले. “मी लोकप्रतिनिधी असून, एका राज्यातून दुसऱ्या राज्यात प्रवास करण्याचा माझा संवैधानिक अधिकार आहे. कोणत्याही प्रशासकीय यंत्रणेला तो रोखण्याचा अधिकार नाही,” असे म्हणत त्यांनी कर्नाटक प्रशासनावर दडपशाहीचा आरोप केला. तसेच बेळगाव जिल्हाधिकाऱ्यांविरुद्ध हक्कभंगाचा प्रस्ताव दाखल करण्याची घोषणाही त्यांनी केली. “मराठी भाषिकांचा न्यायासाठीचा संघर्ष सुरू राहणार,” असेही त्यांनी स्पष्ट केले.

दरम्यान, परिस्थिती बिघडू नये म्हणून कर्नाटक पोलिसांनी खासदार माने यांना ताब्यात घेऊन कागल पोलिस ठाण्यात आणले. त्यांच्यासोबत आलेल्या कार्यकर्त्यांनी यावेळी जोरदार घोषणा देत निषेध नोंदवला.

या घडामोडींमुळे सीमाभागातील वातावरण पुन्हा तणावपूर्ण झाले असून, पुढील काही तासांत या प्रकरणावर राजकीय हालचाली वेग धरण्याची शक्यता व्यक्त केली जात आहे.

The post कोगनोळी टोलनाक्यावर खासदार धैर्यशील माने यांना रोखले appeared first on News 24 Tass Marathi.

बेळगाव जिल्ह्याच्या निपाणी शहरातील जुन्या पीबी रोडवर टायरच्या दुकानाला लागलेल्या आगीत मोठे आर्थिक नुकसान झाले.

नगरपरिषद कार्यालयासमोरील उत्तम मधुकर जाधव यांच्या मालकीचे टायर विक्री आणि पंक्चर दुकान अचानक पेटल्याने काही वेळातच संपूर्ण दुकान जळून खाक झाले. आग लागली तेव्हा दुकान बंद होते. मालक उत्तम जाधव हे घरी गेल्यानंतर काही वेळातच परिसरातून धुराचे लोट उठताना दिसल्याने नागरिकांनी तत्काळ अग्निशमन दलाला कळवले.

अग्निशमन दलाच्या जवानांनी घटनास्थळी धाव घेत आगीवर नियंत्रण मिळवण्याचा प्रयत्न केला, मात्र त्यापूर्वीच दुकानातील टायर, उपकरणे आणि साहित्य जळून नुकसान झाले होते. आग लागण्याचे कारण अद्याप स्पष्ट झाले नसून, विजेच्या शॉर्टसर्किटमुळे आग लागल्याची प्राथमिक शक्यता वर्तवली जात आहे. पोलिसांकडून पुढील तपास सुरू आहे.

The post निपाणीत टायर दुकानाला भीषण आग ; लाखो रुपयांचे नुकसान appeared first on News 24 Tass Marathi.

निपाणी शहर व परिसरात गेले 15 दिवस अधूनमधून रिपरिप असणाऱ्या पावसाचा गेल्या दोन दिवसांपासून जोर वाढला आहे. तसेच धरण क्षेत्रातही मुसळधार पाऊस कोसळत असल्याने दूधगंगा आणि वेदगंगा नदीची पाणीपातळी पुन्हा वाढली आहे. परिणामी तालुक्यातील 8 पैकी 6 बंधारे पाण्याखाली गेले आहेत. याठिकाणची वाहतूक बंद होऊन पर्यायी मार्गाने वाहतूक सुरू करण्यात आली आहे.

सध्या तालुक्यातील बेडकीहाळ – शिरदवाड आणि कुन्नूर-मांगूर वगळता अन्य सर्व सहा बंधाऱ्यांवरील वाहतूक बंद झाली आहे. गेल्या 24 तासांत निपाणी परिसरात 25 मिलिमीटर पावसाची नोंद झाली असली तरी काळम्मावाडी धरण क्षेत्रात 90 मिलिमीटर तर पाटगाव धरण क्षेत्रात 130 मिलिमीटर पावसाची नोंद झाली आहे. त्यामुळे वेदगंगा आणि दूधगंगा नद्यांच्या पातळीत गतीने वाढ होत आहे. काळम्मावाडी धरणात 25.49 पैकी 22.61 म्हणजेच 89 टक्के पाणीसाठा आहे तर पाटगाव धरण 100 टक्के भरले आहे. या दोन्ही धरणातून अनुक्रमे 1600 व 400 क्युसेकने विसर्ग सुरू आहे.

गेल्या चार दिवसांत पावसाचा जोर वाढला असला तरी सध्या पूरस्थितीची शक्यता नाही. नद्यांमध्ये 40 हजार क्युसेकने आवक वाढल्यास ती धोकादायक पातळी ठरते. सध्या यमगर्णी येथे वेदगंगा नदीत 5 हजार 851 क्युसेक तर कोगनोळीनजीक दूधगंगा नदीत 6 हजार 821 क्युसेकने पाण्याची आवक सुरू आहे. त्यामुळे निपाणी तालुक्यात नदीकाठच्या भागाला सध्या तरी धोकादायक परिस्थिती नसली तरी नद्यांच्या वाढत्या पातळीवर लक्ष ठेवण्याच्या सूचना तहसीलदार एम. एन. बळीगार यांनी केल्या आहेत.

• पावसाची पाच नक्षत्रे पूर्ण :   

यंदाच्या पावसाळ्यातील पाच नक्षत्रे आतापर्यंत पूर्ण झाली आहेत. शनिवार 16 ऑगस्टपासून आश्लेषा नक्षत्र पूर्ण होऊन मघा नक्षत्राला सुरुवात झाली आहे. दरवर्षी आश्लेषा नक्षत्रात आसळकाचा पाऊस अधिक प्रमाणात होतो. या काळातच पूरस्थिती उद्भवते. मात्र यंदा पावसाने अधूनमधून रिमझिम अशी हजेरी या नक्षत्रात लावली. यामुळे सोयाबीन, भुईमूग आदी पिकांची वाढ खुंटली आहे.

• साथीचे आजार वाढले : 

गेल्या पंधरा दिवसात ऊन, पाऊस, ढगाळ वातावरण असे मिश्र हवामान असल्याने साथीच्या आजारांमध्ये वाढ झाली आहे. थंडी, ताप, सर्दी डोकेदुखी, घसा, अंगदुखी या आजारांचे रुग्ण वाढले अहेत. सून उपचार घेण्यासाठी दवाखान्यांमध्ये गर्दी वाढली आहे. अशावेळी पाणी उकळून पिण्याचे आवाहन वैद्यकीय तज्ञांकडून केले जात आहे.

• निपाणी तालुक्यातील बंधारे व पुलांची स्थिती : 
• कारदगा – भोज – वाहतूक बंद
• भोजवाडी – कुन्नूर – वाहतूक बंद
• सिदनाळ – अकोळ – वाहतूक बंद
• जत्राट – भिवशी वाहतूक बंद
• हुन्नरगी – ममदापूर – वाहतूक बंद
• कुन्नूर – बारवाड – वाहतूक बंद

The post निपाणी परिसरातील सहा बंधारे पाण्याखाली appeared first on News 24 Tass Marathi.

बेळगाव / प्रतिनिधी

भारतीय हवामान खात्याने दि. १९ आणि २० ऑगस्ट रोजी बेळगाव जिल्ह्यात रेड अलर्ट जाहीर केला आहे. सततच्या पावसामुळे घटप्रभा, कृष्णा, दूधगंगा, हिरण्यकेशी, मार्कंडेय आणि मलप्रभा नद्या धोक्याच्या पातळीवर वाहत आहेत. त्यामुळे जिल्हापालकमंत्री तथा सार्वजनिक बांधकाम मंत्री सतीश जारकीहोळी यांनी नदीकाठच्या रहिवाशांना सुरक्षित ठिकाणी स्थलांतरित होण्याचे आवाहन केले आहे.

त्यांनी एका प्रसिद्धीपत्रकाद्वारे कळविले आहे की, हिडकल जलाशय पूर्णपणे भरल्यामुळे, दररोज हजारो क्युसेक पाणी वाहत आहे आणि २५,००० हून अधिक क्युसेक पाण्याचा आधीच विसर्ग करण्यात आला आहे. हिडकल डॅम, हिरण्यकेशी, मार्कंडेय आणि बळ्ळारी नाला आणि घटप्रभा नदीतून एकत्रितपणे ४०,००० क्युसेक पाण्याचा विसर्ग सुरू असल्याने पुराचा धोका आणखी गंभीर झाला आहे.

या संदर्भात, नदीपात्रात राहणाऱ्या शेतकरी आणि नागरिकांना मी तात्काळ सुरक्षित ठिकाणी स्थलांतरित होण्याचे आवाहन करत आहे. कृष्णा आणि हिरण्यकेशी नद्यांनी धोक्याची पातळी ओलांडली असलयाने, स्थलांतरित होण्याकडे दुर्लक्ष न करता त्वरित कारवाई करावी. अनेक पूल आधीच पाण्याखाली गेले असल्याने, वाहतुक करताना अत्यंत सावधगिरी बाळगावी. जिल्ह्यातील सर्व शाळा आणि महाविद्यालयांना आज सुट्टी जाहीर करण्यात आली आहे. गरज पडल्यास, परिस्थिती लक्षात घेऊन उद्या देखील सुट्टी दिली जाईल. पालकांनी मुले, वृद्ध आणि महिलांच्या सुरक्षिततेकडे विशेष लक्ष द्यावे. आवश्यक वस्तूंची आगाऊ व्यवस्था करावी आणि नदीपात्र, पूल आणि पाण्याच्या प्रवाहाच्या ठिकाणी जाणे काटेकोरपणे टाळावे अशी सूचना त्यांनी केली.

मी जिल्हा प्रशासन, पोलिस विभाग आणि आपत्ती व्यवस्थापन दलांच्या सतत संपर्कात आहे आणि परिस्थितीवर बारकाईने लक्ष ठेवून आहे. नागरिकांची सुरक्षा ही आमचे प्राधान्य आहे. मंत्री सतीश जारकीहोळी यांनी सर्वांना या कठीण परिस्थितीत सतर्क राहून एकमेकांना सहकार्य करण्याची विनंती केली आहे जेणेकरून स्वतःची आणि त्यांच्या कुटुंबाची सुरक्षितता सुनिश्चित होईल.

The post नदीकाठच्या रहिवाशांनी सुरक्षित ठिकाणी स्थलांतरित व्हावे appeared first on News 24 Tass Marathi.