यावेळी त्यांनी राज्य सरकारच्या अनागोंदी कारभारावर टीका केली. हमी योजनांमुळे राज्याची तिजोरी रिकामी झाली असून विकासकामे पूर्णपणे थांबली आहेत. कंत्राटदारांची हजारो कोटींची थकबाकी भागवायला सरकारकडे पैसा उरलेला नाही. वीरशैव मठाधीशांविषयी बेताल वक्तव्ये करणे हे मुख्यमंत्र्यांच्या अहंकाराचे प्रदर्शन असून त्यांनी मठाधीशांची माफी मागितली पाहिजे, अशी मागणी त्यांनी केली. त्यातच अल्पसंख्याकांना खूश करण्यासाठी विधानसौधमध्ये उर्दू उत्सव साजरा करून समाजात फूट पाडण्याचा प्रयत्न काँग्रेस करत आहे, असा आरोप त्यांनी केला.

यावेळी भाजप राज्य उपाध्यक्ष अनिल बेनके, ग्रामीण जिल्हाध्यक्ष सुभाष पाटील, शहर अध्यक्षा गीता सुतार, माजी आमदार संजय पाटील आणि महांतेश कवटगीमठ उपस्थित होते.

The post राज्य सरकारची तिजोरी रिकामी झाल्याची खासदार जगदीश शेट्टर यांची टीका appeared first on News 24 Tass Marathi.

हुबळी : केंद्रीय गृहमंत्री अमित शहा यांची शनिवारी हुबळी येथे प्रकृती अस्वस्थ झाल्याने त्यांनी नियोजित कार्यक्रमाला उपस्थित राहणे टाळले. डॉक्टरांच्या सल्ल्यानुसार त्यांनी हॉटेलमध्ये विश्रांती घेतल्यानंतर हुबळीहून दिल्लीकडे रवाना झाल्याचे वृत्त आहे. त्यांच्या प्रकृती अस्वास्थ्यामुळे एकसंबा आणि कोल्हापूर येथील नियोजित कार्यक्रमांवरही परिणाम झाला आहे.

अमित शहा शुक्रवारी रात्री हुबळी येथे दाखल झाले होते. शनिवारी केएलई संस्थेच्या नूतन वैद्यकीय महाविद्यालयाच्या शैक्षणिक इमारतीसह १,२०० खाटांच्या रुग्णालयाच्या उद्घाटन कार्यक्रमाला ते उपस्थित राहणार होते. मात्र, प्रकृती अस्वस्थ झाल्याने त्यांनी हॉटेलमध्येच विश्रांती घेण्याचा निर्णय घेतला. त्यांच्या अनुपस्थितीत हा कार्यक्रम इतर मान्यवरांच्या उपस्थितीत पार पडला.

• एकसंबा, कोल्हापूर दौऱ्यावरही परिणाम

अमित शहा यांच्या नियोजित दौऱ्यात हुबळीनंतर चिकोडी तालुक्यातील एकसंबा आणि त्यानंतर कोल्हापूरचा समावेश होता. एकसंबा येथे विविध विकासकामांचे उद्घाटन आणि कोल्हापूर जिल्ह्यातील काही कार्यक्रम त्यांच्या उपस्थितीत होणार होते. मात्र, प्रकृती अस्वास्थ्यामुळे पुढील दौरा रद्द करण्यात आला आहे.

दरम्यान, अमित शहा यांच्या प्रकृतीबाबतचा नेमका वैद्यकीय तपशील अधिकृतपणे जाहीर करण्यात आलेला नाही. उपलब्ध माहितीनुसार, प्रकृती अस्वस्थ वाटत असल्याने डॉक्टरांनी त्यांना विश्रांतीचा सल्ला दिला होता.

The post केंद्रीय गृहमंत्री अमित शहा यांची प्रकृती अस्वस्थ appeared first on News 24 Tass Marathi.

बेळगाव : मंत्री सतीश जारकीहोळी यांच्या कुटुंबीय, नातेवाईक आणि निकटवर्तीयांच्या निवासस्थाने व कार्यालयांवर सक्त वसुली संचालनालयाने (ईडी) केलेली शोधमोहीम पूर्ण झाल्यानंतर समर्थकांनी त्यांच्या निवासस्थानासमोर जल्लोष केला. ईडीची पथके कारवाई पूर्ण करून परतल्यानंतर मंत्री सतीश जारकीहोळी निवासस्थानाबाहेर येताच समर्थकांनी घोषणाबाजी करत आनंद व्यक्त केला.

ईडीच्या अधिकाऱ्यांनी ९ सप्टेंबर रोजी सकाळी ७ वाजता बेंगळुरू, बेळगाव, गोकाक आणि गोवा यासह पंधराहून अधिक ठिकाणी एकाच वेळी शोधमोहीम सुरू केली होती. या कारवाईदरम्यान अधिकाऱ्यांनी रात्रंदिवस कागदपत्रे आणि विविध आर्थिक व्यवहारांशी संबंधित नोंदींची तपासणी केली.

मंत्री सतीश जारकीहोळी यांचे नातेवाईक वाय. मंजुनाथ तसेच निकटवर्तीय धरगशेट्टी, नरसन्नवर, डॉ. सोनवळकर आणि मलगौडा पाटील यांच्या निवासस्थानीही चौकशी व तपासणी करण्यात आल्याचे सांगण्यात आले.

दरम्यान, गोकाक येथील हिल्स गार्डनमधील निवासस्थानी इंडियन बँकेचे कर्मचारी मोठ्या पेट्या घेऊन दाखल झाले होते. तेथे बँकेशी संबंधित व्यवहारांची तपासणी करण्यात आल्याचे सांगण्यात आले.

संध्याकाळपर्यंत बेंगळुरू, बेळगाव आणि गोकाक येथील विविध ठिकाणी सुरू असलेली तपासणी पूर्ण करण्यात आली. या कारवाईदरम्यान नेमके काय जप्त करण्यात आले आणि तपासातून कोणती माहिती समोर आली, याबाबत ईडीच्या अधिकृत घोषणेनंतरच स्पष्टता होणार आहे.

दरम्यान, दीर्घकाळ चाललेली ईडीची कारवाई संपल्यानंतर मंत्री सतीश जारकीहोळी निवासस्थानातून बाहेर येताच समर्थकांनी मोठ्या उत्साहात जल्लोष केला.

The post ईडीची कारवाई संपताच सतीश जारकीहोळी यांच्या निवासस्थानासमोर समर्थकांचा जल्लोष appeared first on News 24 Tass Marathi.

बेंगळुरू : राज्याचे सार्वजनिक बांधकाम मंत्री तथा बेळगाव जिल्ह्याचे पालकमंत्री सतीश जारकीहोळी यांच्या बेंगळुरूतील डॉलर्स कॉलनी येथील निवासस्थानी सक्तवसुली संचालनालयाच्या (ईडी) अधिकाऱ्यांनी बुधवारी पहाटे छापा टाकला. दोन वाहनांतून आलेल्या ईडीच्या अधिकाऱ्यांनी निवासस्थानी कागदपत्रांची तपासणी केल्याची माहिती आहे.

उत्पादन शुल्क विभागातील काही अधिकाऱ्यांच्या निवासस्थानी ईडीकडून छापेमारी करण्यात आल्यानंतर जारकीहोळी यांच्या निवासस्थानीही ही कारवाई करण्यात आली. मात्र, या छाप्यामागील नेमके कारण अद्याप स्पष्ट झालेले नाही. या कारवाईबाबत मंत्री सतीश जारकीहोळी किंवा संबंधित अधिकाऱ्यांकडून अधिकृत प्रतिक्रिया देण्यात आलेली नाही.

दरम्यान, बेंगळुरू, बेळगाव, गोवा, गोकाक, महाराष्ट्र यासह एकूण १८ ठिकाणी सतीश जारकीहोळी यांच्या घर आणि कार्यालयांवर ईडीकडून छापे टाकण्यात येत असल्याची माहिती समोर आली आहे.

काही दिवसांपूर्वी ईडीने उत्पादन शुल्क आयुक्त तसेच मंत्री सतीश जारकीहोळी यांचे नातेवाईक असल्याचे सांगितले जाणारे वाय. मंजुनाथ यांच्या निवासस्थानीही छापा टाकला होता. बेकायदेशीर अबकारी प्रकरणाच्या अनुषंगाने मंजुनाथ यांच्यावर ही कारवाई करण्यात आल्याचे सांगितले जात आहे. विनापरवाना बार परवाना दिल्याच्या आरोपांसह अवैध विदेशी गुंतवणूक आणि मनी लाँड्रिंगच्या संशयाच्या पार्श्वभूमीवर ईडीकडून चौकशी सुरू असल्याची माहिती आहे.

त्या कारवाईदरम्यान मिळालेल्या माहितीनंतर जारकीहोळी यांच्या निवासस्थानी स्वतंत्रपणे तपासणी करण्यात आल्याचे सांगितले जात आहे. ईडीच्या या कारवाईमुळे राजकीय वर्तुळात चर्चेला उधाण आले असून, छाप्याचे नेमके कारण आणि तपासाची दिशा अधिकृत माहिती समोर आल्यानंतरच स्पष्ट होणार आहे.

The post मंत्री सतीश जारकीहोळी यांच्या निवासस्थानी ईडीचा छापा appeared first on News 24 Tass Marathi.

बेळगाव : बेळगाव ग्रामीण मतदारसंघाच्या दौऱ्यावर असलेल्या माजी मंत्री तथा आमदार लक्ष्मी हेब्बाळकर यांनी दुचाकी अपघातात जखमी झालेल्या बेक्किनकेरी गावचे नेते नारायण बेळगावकर यांच्या पत्नी शांता यांची भेट घेऊन त्यांच्या प्रकृतीची विचारपूस केली. अपघाताची माहिती मिळताच त्यांनी तातडीने घटनास्थळी धाव घेत जखमी शांता यांना धीर दिला.

नारायण बेळगावकर हे पत्नी शांता यांच्यासोबत दुचाकीवरून जात असताना अपघात झाला. यात शांता जखमी झाल्या. घटनेची माहिती मिळताच हेब्बाळकर यांनी तातडीने घटनास्थळी पोहोचून त्यांची विचारपूस केली.

यावेळी हेब्बाळकर यांनी शांता यांच्याशी आपुलकीने संवाद साधत काळजी करण्याचे कारण नसल्याचे सांगून त्यांना धीर दिला. तसेच त्यांच्या कुटुंबीयांकडूनही प्रकृतीची माहिती घेतली.

शांता यांना पुढील उपचार व वैद्यकीय तपासणीची आवश्यकता लक्षात घेऊन हेब्बाळकर यांनी त्यांच्या सहकाऱ्यांसह त्यांना रुग्णालयात पाठविण्याची व्यवस्था केली. त्यांनी डॉक्टरांशी संपर्क साधून जखमीवर तातडीने आवश्यक उपचार व योग्य वैद्यकीय सेवा उपलब्ध करून देण्याच्या सूचना दिल्या.

शांता यांनी लवकरात लवकर बरे व्हावे, अशी सदिच्छा व्यक्त करताना, नागरिक अडचणीत असताना तातडीने मदत करणे हे आपले कर्तव्य असल्याचे आमदार हेब्बाळकर यांनी सांगितले. यावेळी स्थानिक नेते, कार्यकर्ते आणि कुटुंबीय उपस्थित होते.

The post अपघातात जखमी महिलेच्या प्रकृतीची आमदार लक्ष्मी हेब्बाळकरांकडून विचारपूस appeared first on News 24 Tass Marathi.

बेळगाव येथे आयोजित पत्रकार परिषदेत ते बोलत होते. नागेंद्र यांच्या राजीनाम्यामुळे पक्षाची काही प्रमाणात अडचण झाली हे मान्य आहे. मात्र, पक्षाची आणखी बदनामी होऊ नये म्हणून त्यांनी पदाचा राजीनामा दिला आहे. त्यामुळे या विषयावर आता अधिक चर्चा करण्याची आवश्यकता नाही, असे जारकीहोळी यांनी स्पष्ट केले. नागेंद्र यांच्या रिक्त झालेल्या जागेवर त्यांच्या समाजातील व्यक्तीला संधी दिली जाईल. मात्र, त्याबाबतचा निर्णय योग्य वेळी सरकारकडून घेतला जाईल, असेही त्यांनी सांगितले.

• बेळगाव जिल्ह्याचा अद्याप दुष्काळग्रस्त यादीत समावेश नाही 

केंद्र सरकारच्या नियमांनुसार दुष्काळग्रस्त भाग निश्चित करण्याची प्रक्रिया केली जाते. सध्या केंद्रीय मार्गदर्शक तत्त्वांनुसार यारागत्ती आणि सौंदत्ती तालुक्यांचा दुष्काळग्रस्त यादीत समावेश झालेला नाही. मात्र, पुढील आठवड्यात याबाबत काही बदल होण्याची शक्यता आहे.

दुष्काळासंदर्भातील केंद्रीय मार्गदर्शक तत्त्वांमध्ये आवश्यक सुधारणा करण्याची मागणी करण्यात आली आहे. तसेच केंद्रीय पथकाने प्रत्यक्ष पाहणी करून अहवाल सादर केल्यानंतर पुढील कार्यवाही केंद्र सरकारकडून केली जाईल. या प्रक्रियेला काही वेळ लागणार असल्याचे जारकीहोळी यांनी सांगितले.

काही शेतकऱ्यांनी पीक विमा घेतला आहे, तर काही शेतकरी विम्याच्या कक्षेत नाहीत. मात्र, शेतकऱ्यांनी याबाबत चिंता करण्याचे कारण नाही. यापूर्वीही केंद्राच्या मदतीची प्रतीक्षा न करता राज्य सरकारने स्वतःच्या माध्यमातून नुकसानभरपाई वितरित केली होती. यावेळीही शेतकऱ्यांच्या हितासाठी आवश्यक निर्णय घेतले जातील, असे त्यांनी स्पष्ट केले.

• नोव्हेंबरपासून पाणी सोडण्याच्या कामाचा दुसरा टप्पा  

जिल्हाधिकाऱ्यांच्या नेतृत्वाखाली अधिकारी पाणीपुरवठ्याच्या परिस्थितीवर योग्य पद्धतीने लक्ष ठेवून आहेत. हिडकल जलाशय पूर्ण क्षमतेने भरला असून, सध्या दोन कालव्यांमधून पाणी सोडले जात आहे.

कालव्यांमध्ये पाणी सोडण्याच्या प्रक्रियेचा दुसरा टप्पा नोव्हेंबरपासून सुरू करण्यात येणार आहे. काही कारणांमुळे कालव्यांच्या शेवटच्या टोकापर्यंत अपेक्षित प्रमाणात पाणी पोहोचत नसल्याचेही त्यांनी नमूद केले.

• उपमुख्यमंत्रीपदासाठी सर्वच इच्छुक 

काँग्रेसमध्ये उपमुख्यमंत्रीपदाबाबत सध्या कोणतीही चर्चा झालेली नाही. मुख्यमंत्री डी. के. शिवकुमार यांनी निर्णय घेतल्यास तुम्ही उपमुख्यमंत्रीपद स्वीकाराल का, असा प्रश्न विचारण्यात आला असता जारकीहोळी यांनी पक्षातील अनेक नेते या पदासाठी इच्छुक असल्याचे सांगितले.

पूर्वी राज्यात एक उपमुख्यमंत्री होते आणि सध्या देखील एकच उपमुख्यमंत्री आहेत. योग्य वेळ आल्यावर याबाबत निर्णय घेतला जाईल. आगामी काळात पक्ष आणखी दोन निवडणुका लढवणार असल्याचे त्यांनी सांगितले.

एकाच वेळी चार-पाच जणांना उपमुख्यमंत्री केले, तर या पदाचे महत्त्वच कमी होईल, असे मतही जारकीहोळी यांनी व्यक्त केले.

• रमेश जारकीहोळींची मुख्यमंत्र्यांसोबतची भेट नियमित 

माजी मंत्री रमेश जारकीहोळी यांनी मुख्यमंत्री सिद्धरामय्या यांची भेट घेतल्याबाबत विचारले असता सतीश जारकीहोळी यांनी ही भेट नियमित असल्याचे सांगितले. रमेश जारकीहोळी साधारण सहा महिन्यांतून एकदा मुख्यमंत्र्यांची भेट घेतात. त्यामुळे या भेटीत विशेष काही नसल्याचे त्यांनी स्पष्ट केले.

• लवकरच महिला मंत्र्यांची नियुक्ती  

राज्यातील काँग्रेस सरकार स्थिर असून पुढेही स्थिर राहील, असा पुनरुच्चार जारकीहोळी यांनी केला. पक्षाच्या निर्णयानुसार लवकरच महिला मंत्र्यांची नियुक्ती करण्यात येईल. तसेच विविध महामंडळे आणि मंडळांच्या अध्यक्षपदांवर पक्षाच्या सामान्य कार्यकर्त्यांना संधी देण्यात येणार असल्याचे त्यांनी सांगितले. बेळगाव शहर काँग्रेस अध्यक्षपदासाठी इच्छुकांची यादी दिल्लीला पाठवण्यात आली असून, लवकरच नव्या अध्यक्षांची निवड केली जाईल, अशी माहितीही त्यांनी दिली.

पत्रकार परिषदेला जिल्हाधिकारी मोहम्मद रोशन, पोलीस आयुक्त भूषण गुलाबराव बोरसे, जिल्हा पोलीस अधीक्षक के. रामराजन आणि जिल्हा पंचायत मुख्य कार्यकारी अधिकारी राहुल शिंदे उपस्थित होते.

The post नागेंद्र यांच्या राजीनाम्याचा विषय आता संपला ; मंत्री सतीश जारकीहोळी appeared first on News 24 Tass Marathi.

बेळगाव : राज्य सरकारने बेळगाव उत्तरचे आमदार आसिफ (राजू) सेठ यांची बेळगाव शहरी विकास प्राधिकरणाच्या (बुडा) अध्यक्षपदी नियुक्ती केली आहे. मंत्रीपदाच्या शर्यतीत असलेल्या सेठ यांच्यावर सरकारने महत्त्वाची जबाबदारी सोपवली आहे.

बुडाचे विद्यमान अध्यक्ष लक्ष्मणराव चिंगळे यांच्या जागी आसिफ सेठ यांची नियुक्ती करण्यात आली आहे. सरकारच्या सचिव लता के. यांनी मंगळवारी यासंदर्भातील अधिकृत आदेश जारी केला असून, नियुक्ती तात्काळ प्रभावाने लागू करण्यात आली आहे.

बेळगाव शहरातील विविध विकासकामे, नियोजन आणि पायाभूत सुविधांशी संबंधित महत्त्वाची जबाबदारी आता आमदार आसिफ सेठ यांच्याकडे आली आहे. त्यांच्या नियुक्तीमुळे शहराच्या विकासकामांना अधिक गती मिळण्याची अपेक्षा व्यक्त केली जात आहे.

The post आमदार आसिफ (राजू) सेठ यांची बुडा अध्यक्षपदी नियुक्ती appeared first on News 24 Tass Marathi.

डॉ. डी. वाय. पाटील यांच्या निधनानंतर लक्ष्मी हेब्बाळकर यांनी त्यांच्या निवासस्थानी जाऊन कुटुंबीयांची भेट घेतली. यावेळी त्यांनी डॉ. पाटील यांना श्रद्धांजली वाहून त्यांचे ज्येष्ठ पुत्र आणि विधान परिषद सदस्य सतेज पाटील यांचे सांत्वन केले.

यावेळी लक्ष्मी हेब्बाळकर यांनी डॉ. डी. वाय. पाटील यांच्या साधेपणा, सभ्यपणा आणि शिक्षण व समाजसेवेतील योगदानाचा उल्लेख केला. हजारो विद्यार्थ्यांचे भविष्य घडविण्यात त्यांनी दिलेले योगदान सदैव स्मरणात राहील, असे त्यांनी सांगितले.

डॉ. पाटील यांचे शैक्षणिक आणि सामाजिक कार्य पुढील पिढ्यांसाठी प्रेरणादायी राहील, असेही त्यांनी नमूद केले. तसेच दिवंगत आत्म्यास शांती लाभो, अशी प्रार्थना त्यांनी केली.

The post कर्नाटकच्या माजी मंत्री लक्ष्मी हेब्बाळकर यांच्याकडून दिवंगत डॉ. डी. वाय. पाटील यांच्या कुटुंबीयांचे सांत्वन appeared first on News 24 Tass Marathi.

बेळगाव दक्षिणचे आमदार अभय पाटील यांनी सरकारवर जोरदार टीका करत मंत्री नागेंद्र यांच्या राजीनाम्यापर्यंत आंदोलन मागे घेतले जाणार नसल्याचे स्पष्ट केले. सरकारमधील कथित भ्रष्टाचार जनतेसमोर आणण्यासाठी आपण रात्रीही आंदोलनस्थळी मुक्काम करणार असल्याचे त्यांनी सांगितले.

माजी आमदार संजय पाटील यांनी राज्यात भ्रष्टाचाराला खतपाणी घातले जात असल्याचा आरोप केला. मंत्री नागेंद्र यांनी राजीनामा न दिल्यास रस्त्यावर तसेच विधानसभेत तीव्र आंदोलन छेडण्यात येईल, असा इशाराही त्यांनी दिला.

माजी आमदार अनिल बेनके यांनी आर. अशोक यांच्या नेतृत्वाखाली राज्यातील प्रत्येक जिल्ह्यात अहोरात्र आंदोलन सुरू करण्यात आल्याचे सांगितले. वाल्मीकी समाजासाठी असलेला निधी गैरमार्गाने वापरल्याचा आरोप करत त्यांनी सरकारच्या कारभाराचा निषेध केला.

माजी खासदार अण्णासाहेब जोल्ले यांनी गंभीर भ्रष्टाचाराचे आरोप असलेल्या व्यक्तींना मंत्रिमंडळात स्थान देऊ नये, हीच आंदोलनाची प्रमुख मागणी असल्याचे सांगितले. तसेच अपंगांचे भत्ते, दुष्काळ आणि पीक नुकसानीची भरपाई देण्यात सरकार अपयशी ठरल्याचा आरोप त्यांनी केला.

या आंदोलनात माजी आमदार महेश कुमठळ्ळी यांच्यासह भाजपचे अनेक प्रमुख नेते व कार्यकर्ते सहभागी झाले आहेत.

The post मंत्री नागेंद्र यांच्या हकालपट्टीच्या मागणीसाठी बेळगावात भाजपचे अहोरात्र धरणे आंदोलन appeared first on News 24 Tass Marathi.

२००६ मध्ये खानापुरात आयोजित करण्यात आलेल्या मराठी भाषिकांच्या महामेळाव्यात रामदास कदम आणि नितीन बानुगडे-पाटील यांनी कन्नड व मराठी भाषिकांमध्ये तेढ निर्माण करणारी तसेच प्रक्षोभक वक्तव्ये केल्याचा आरोप पोलिसांनी केला होता. त्यांच्या भाषणानंतर परिसरातील वातावरण तणावपूर्ण बनल्याचा दावा करण्यात आला होता. खानापूर तसेच आसपासच्या भागात दगडफेकीच्या घटना घडल्याचेही पोलिसांनी नमूद केले होते.

या प्रकरणी खानापूर पोलीस ठाण्यात भारतीय दंड संहितेच्या कलम १५३ आणि १५३ (अ) अंतर्गत गुन्हा दाखल करण्यात आला होता. तत्कालीन पोलीस निरीक्षक जी. आर. पाटील यांनी ही कारवाई केली होती. भगव्याबाबत आक्षेपार्ह वक्तव्ये केल्यासह तत्कालीन कर्नाटकचे मुख्यमंत्री एच. डी. कुमारस्वामी यांच्याविरोधात रामदास कदम यांनी चिथावणीखोर भाषण केल्याचा आरोपही ठेवण्यात आला होता.

या प्रकरणाची न्यायालयीन प्रक्रिया तब्बल दोन दशके सुरू होती. सरकारी पक्षाकडून करण्यात आलेले आरोप पुराव्यांच्या आधारे सिद्ध करण्यात अपयश आल्याने न्यायालयाने रामदास कदम आणि नितीन बानुगडे-पाटील यांची निर्दोष मुक्तता केली. त्यामुळे २० वर्षांपासून सुरू असलेल्या या खटल्याला अखेर पूर्णविराम मिळाला आहे.

The post खानापूर महामेळाव्यातील प्रक्षोभक भाषण प्रकरणी रामदास कदम , नितीन बानुगडे-पाटील निर्दोष appeared first on News 24 Tass Marathi.