बेळगाव : भारतीय निवडणूक आयोग आणि राज्याच्या मुख्य निवडणूक अधिकाऱ्यांच्या निर्देशानुसार बेळगाव जिल्ह्यात सुरू असलेल्या विशेष मतदार यादी पुनरावलोकन (SIR) मोहिमेला चांगला प्रतिसाद मिळत असून, आतापर्यंत ८८ टक्के काम पूर्ण झाले आहे. जिल्हाधिकारी तथा जिल्हा निवडणूक अधिकारी मोहम्मद रोशन यांनी ही माहिती दिली.

जिल्ह्यातील एकूण ४१,०७,००० मतदारांपैकी ३५,८८,७५९ मतदारांचे गणना अर्ज संकलित करून त्यांचे डिजिटायझेशन आणि पडताळणीचे काम पूर्ण करण्यात आले आहे. उर्वरित ५,१३,७८६ मतदार अनुपस्थित, स्थलांतरित, मृत किंवा बनावट असल्याच्या प्राथमिक नोंदी एएसडीडी यादीत करण्यात आल्या असून, त्याची पडताळणी बीएलओमार्फत तसेच राजकीय पक्षांच्या प्रतिनिधींच्या सहभागातून सुरू आहे.

जिल्हा प्रशासनाने प्रलंबित असलेल्या ४,४५५ प्रकरणांचे डिजिटायझेशन तातडीने पूर्ण करण्यासाठी आवश्यक उपाययोजना सुरू केल्या आहेत. तसेच मतदार यादीतील नावांची जुळवणी आणि दुरुस्तीची प्रक्रियाही वेगाने सुरू असल्याचे जिल्हाधिकाऱ्यांनी सांगितले.

यापूर्वी मतदार यादीत सुमारे ४.५ लाख त्रुटी होत्या. त्या आता २.१२ लाखांपर्यंत कमी करण्यात यश आले असून, जिल्ह्यातील त्रुटींचे प्रमाण ५.१७ टक्के इतके आहे. हे प्रमाण राज्यातील सर्वात कमी असल्याचा दावा प्रशासनाने केला आहे.

नावांतील स्पेलिंग, जुळवणी आणि इतर तांत्रिक त्रुटींची पडताळणी करण्यासाठी संबंधितांना नोटिसा बजावण्यात येत असून चौकशी सुरू आहे. ही प्रक्रिया मतदारांची नावे वगळण्यासाठी नसून, मतदार यादी अधिक अचूक आणि त्रुटीमुक्त करण्यासाठी राबविण्यात येत असल्याचे जिल्हाधिकारी मोहम्मद रोशन यांनी स्पष्ट केले.

The post बेळगाव जिल्ह्यात एसआयआरचे ८८ टक्के काम पूर्ण appeared first on News 24 Tass Marathi.

बेळगाव : मतदार यादीच्या विशेष सघन पुनरावलोकन (SIR – Special Intensive Revision) मोहिमेचे प्रभावीपणे कामकाज पार पाडणाऱ्या बेळगाव महापालिकेतील अधिकारी आणि कर्मचाऱ्यांचे जिल्हाधिकारी मोहम्मद रोशन यांनी मुक्तकंठाने कौतुक केले. मोहिमेच्या प्रगतीची पाहणी करण्यासाठी त्यांनी बुधवारी सायंकाळी महापालिकेच्या निवडणूक शाखेला आकस्मिक भेट दिली.

यावेळी उत्तर आणि दक्षिण विधानसभा मतदारसंघांत सुरू असलेल्या एसआयआर मोहिमेची तसेच संगणकीकरणाच्या कामाची सविस्तर माहिती त्यांनी संबंधित अधिकाऱ्यांकडून घेतली. मोहिमेच्या यशासाठी विश्रांती न घेता परिश्रम करणाऱ्या अधिकारी व कर्मचाऱ्यांचे अभिनंदन करत त्यांच्या कार्याची प्रशंसा केली.

विशेष म्हणजे, बोलण्यात अडचण असतानाही उत्कृष्ट कामगिरी करणारे कर्मचारी विशाल माविनकट्टी यांच्या समर्पित सेवाभावाचे जिल्हाधिकाऱ्यांनी विशेष कौतुक केले. महापालिका आयुक्त आणि वरिष्ठ अधिकाऱ्यांच्या मार्गदर्शन व समन्वयामुळे एसआयआर मोहिमेत उल्लेखनीय प्रगती साधता आली असून, हे कार्य इतर कर्मचाऱ्यांसाठी प्रेरणादायी असल्याचेही त्यांनी नमूद केले.

भेटीदरम्यान जिल्हाधिकाऱ्यांनी महापालिका आवारातील डॉ. बाबासाहेब आंबेडकर यांच्या पुतळ्याला भेट देऊन परिसरातील उद्यानाच्या सुस्थितीबद्दल समाधान व्यक्त केले.

महापालिकेचे महसूल विभागाचे उपआयुक्त तथा दक्षिण विधानसभा मतदारसंघाचे सहाय्यक मतदार नोंदणी अधिकारी डॉ. सिद्धू हुल्लोळी यांनी जिल्हाधिकाऱ्यांना एसआयआर मोहिमेच्या प्रगतीचा आढावा सादर केला. यावेळी महापालिकेतील अधिकारी, पर्यवेक्षक तसेच एसआयआर मोहिमेतील कर्मचारी उपस्थित होते.

The post एसआयआर मोहिमेतील उत्कृष्ट कामगिरीबद्दल महापालिका कर्मचाऱ्यांचे जिल्हाधिकाऱ्यांकडून कौतुक appeared first on News 24 Tass Marathi.

बेळगाव : एसआयआर प्रक्रियेसाठी मराठीतील अर्ज उपलब्ध करून देण्याच्या मागणीवर अखेर तब्बल २५ दिवसांनंतर जिल्हा प्रशासनाने स्पष्टीकरण दिले आहे. प्रत्येक मतदान केंद्रावर अर्ज भरण्यासाठी कन्नड अर्जाची मराठी भाषांतरित प्रत उपलब्ध करून दिली जाईल, असे प्रशासनाने स्पष्ट केले आहे. मात्र, मराठीत मूळ अर्ज उपलब्ध करून देण्याच्या मागणीबाबत कोणताही निर्णय जाहीर करण्यात आलेला नाही.

भारतीय निवडणूक आयोगाने २००२ मध्ये भाषिक अल्पसंख्याक असलेल्या मतदारसंघांमध्ये संबंधित भाषेत निवडणुकीसाठी आवश्यक साहित्य उपलब्ध करून देण्याचे निर्देश दिले होते. तसेच महाराष्ट्र एकीकरण युवा समितीने केलेल्या तक्रारीची दखल घेत केंद्रीय भाषिक अल्पसंख्याक आयोगाने कर्नाटक निवडणूक अधिकाऱ्यांना मराठीत अर्ज उपलब्ध करून देण्याच्या सूचना दिल्याचा दावा करण्यात आला आहे. मात्र, त्यावर आजपर्यंत कोणतीही कार्यवाही झालेली नसल्याचे सांगण्यात आले आहे.

वेळेत मराठीत मूळ अर्ज उपलब्ध झाले असते, तर बेळगावातील मराठी भाषिक मतदारांना अनावश्यक मनस्ताप सहन करावा लागला नसता. या संपूर्ण प्रकरणावर जिल्हा प्रशासनाने दीर्घकाळ मौन बाळगल्याची टीकाही करण्यात आली आहे.

मराठीत मूळ अर्ज उपलब्ध करून देण्याच्या मागणीवर आपण ठाम असल्याचे सांगण्यात आले असून, एसआयआर प्रक्रियेच्या अंतिम टप्प्यात तरी मराठी अर्ज उपलब्ध करून द्यावेत. तसेच त्यानंतर होणाऱ्या प्रत्येक प्रक्रियेसाठीचे अर्ज आणि सुधारित मतदार याद्याही मराठी भाषेत उपलब्ध करून द्याव्यात, अशी मागणी करण्यात आली आहे.

The post मराठी अर्जांऐवजी भाषांतरित प्रत appeared first on News 24 Tass Marathi.

बेळगाव : बेळगाव जिल्ह्यात सुरू असलेल्या विशेष संक्षिप्त मतदार यादी पुनरीक्षण मोहिमेला वेग आला असून, सर्व १८ विधानसभा मतदारसंघांमध्ये मतदारांना अर्ज वाटपाचे काम शंभर टक्के पूर्ण झाले आहे. जिल्हाधिकारी मोहम्मद रोशन यांनी ही माहिती देत प्रत्येक मतदाराने आपल्या नावाची आणि मतदान केंद्राची खातरजमा करणे आवश्यक असल्याचे आवाहन केले.

जिल्ह्यातील एकूण ४१.०७ लाख मतदारांसाठी राबविण्यात येत असलेल्या या मोहिमेत आज दुपारी ३ वाजेपर्यंत अर्ज वाटपाची प्रक्रिया पूर्ण करण्यात आली आहे. मतदार यादी अधिक अचूक आणि त्रुटीमुक्त करण्यासाठी बूथ लेव्हल अधिकारी (बीएलओ) घरोघरी जाऊन अर्ज आणि स्टिकर्सचे वितरण करत असून, अनुपस्थित, स्थलांतरित, मृत तसेच दुबार मतदारांची माहिती संकलित केली जात आहे.

मतदार यादीच्या डिजिटायझेशनचे कामही वेगाने सुरू असून, जिल्ह्यात आतापर्यंत ७६ टक्के माहिती ऑनलाइन करण्यात आली आहे. बेळगाव दक्षिण मतदारसंघात ६० टक्के, तर उत्तर मतदारसंघात ५१ टक्के डिजिटायझेशन पूर्ण झाले आहे. बीएलओ सुविधा केंद्रांवर प्राप्त होणारे अर्ज तातडीने ऑनलाइन नोंदवले जात असून, आवश्यक असल्यास अंतिम मतदार यादी जाहीर करण्यापूर्वी आणखी एक आठवड्याचा अवधी दिला जाईल, असे जिल्हाधिकाऱ्यांनी स्पष्ट केले.

जे मतदार अर्ज वितरणावेळी घरी उपलब्ध नव्हते किंवा ज्यांचे निवासस्थान बदलले आहे, तसेच मतदान केंद्राबाबत माहिती हवी आहे, त्यांनी आपल्या परिसरातील बीएलओशी संपर्क साधावा. प्रत्येक मतदान केंद्राला ‘बीएलओ सुविधा केंद्र’ म्हणून घोषित करण्यात आले असून, नागरिकांना तेथे जाऊन आवश्यक अर्ज सादर करण्याची सुविधा उपलब्ध करून देण्यात आली आहे.

मृत, स्थलांतरित आणि दुबार मतदारांची यादी राजकीय पक्षांच्या प्रतिनिधी आणि पदाधिकाऱ्यांनाही उपलब्ध करून देण्यात आली आहे. मतदार यादीत एखादी त्रुटी आढळल्यास किंवा जिवंत असलेल्या व्यक्तीची नोंद चुकून मृत म्हणून झाल्यास, ती दुरुस्त करण्यासाठी ८ ऑगस्टपर्यंत मुदत देण्यात आली आहे.

मतदार यादी अचूक आणि अद्ययावत करण्यासाठी नागरिकांनी तसेच सर्व राजकीय पक्षांनी सक्रिय सहभाग नोंदवावा, असे आवाहन जिल्हाधिकारी मोहम्मद रोशन यांनी केले आहे.

The post बेळगावात मतदार यादी पुनरीक्षण मोहिमेला वेग appeared first on News 24 Tass Marathi.

बेळगाव : मतदार यादी पुनरिक्षण मोहिमेदरम्यान बूथ लेव्हल अधिकारी (बीएलओ) आणि बूथ लेव्हल एजंट (बीएलए) यांना भेडसावणाऱ्या विविध अडचणींबाबत भारतीय जनता पक्षाचे नेते किरण जाधव यांनी खासदार जगदीश शेट्टर यांची भेट घेऊन सविस्तर निवेदन सादर केले.

या भेटीत बीएलओ आणि बीएलए कर्मचाऱ्यांना प्रत्यक्ष सर्वेक्षणादरम्यान येणाऱ्या प्रशासकीय अडचणी, नागरिकांशी समन्वय साधताना निर्माण होणाऱ्या समस्या तसेच मतदार यादी पुनरिक्षण मोहीम अधिक प्रभावीपणे राबविण्यासाठी आवश्यक उपाययोजनांवर सविस्तर चर्चा करण्यात आली.

किरण जाधव यांनी या सर्व समस्या संबंधित अधिकाऱ्यांच्या निदर्शनास आणून त्यावर तातडीने तोडगा काढण्याची मागणी केली. निवेदन स्वीकारल्यानंतर खासदार जगदीश शेट्टर यांनी बीएलओ आणि बीएलए कर्मचाऱ्यांच्या न्याय्य मागण्या गांभीर्याने विचारात घेतल्या जातील, अशी ग्वाही दिली.

संबंधित विभाग आणि शासनाकडे या विषयाचा पाठपुरावा करून आवश्यक ती कार्यवाही केली जाईल, असे आश्वासन देतानाच मतदार यादी पुनरिक्षणाचे महत्त्वाचे काम प्रामाणिकपणे पार पाडणाऱ्या सर्व कर्मचाऱ्यांच्या कार्याचे त्यांनी कौतुक केले. यावेळी हनुमंत कागलेकर, राजन जाधव, गणेश देधे, पार्थ भोसले आणि विनायक शिंगावकर उपस्थित होते.

The post मतदार यादी पुनरिक्षणातील समस्यांबाबत खासदार शेट्टर यांच्याशी किरण जाधव यांची चर्चा appeared first on News 24 Tass Marathi.

बेळगाव : राज्य सरकारच्या एन.एस.आय.आर. नोंदणी मोहिमेचा लाभ घेत प्रत्येक पात्र नागरिकाने मतदार यादीत आपले नाव निश्चित करावे, असे आवाहन केपीसीसीच्या कित्तूर कर्नाटक प्रभारी डॉ. अंजली निंबाळकर यांनी केले. मतदार नोंदणीमुळे मतदानाचा अधिकार अबाधित राहण्याबरोबरच विविध शासकीय योजनांचा लाभ मिळवणे अधिक सुलभ होईल, असेही त्यांनी सांगितले.

बेळगाव येथील जिल्हा काँग्रेस कमिटी कार्यालयात आयोजित पत्रकार परिषदेत त्यांनी जिल्ह्यात सुरू असलेल्या डिजिटल मतदार नोंदणी मोहिमेचा आढावा घेतला. जिल्ह्यात आतापर्यंत सुमारे ७० टक्के नोंदणीचे काम पूर्ण झाले असून उर्वरित प्रक्रिया लवकरात लवकर पूर्ण करण्याच्या सूचना संबंधितांना देण्यात आल्याचे त्यांनी सांगितले.

मतदार यादीत नाव नसलेल्या नागरिकांनी आवश्यक कागदपत्रांसह फॉर्म क्रमांक ६ भरून नोंदणी करावी. स्थानिक स्तरावर संबंधित अधिकारी उपलब्ध नसल्यास थेट तहसीलदारांशी संपर्क साधावा, असे आवाहन त्यांनी केले.

मतदानाचा अधिकार सुरक्षित राखण्यासाठी मतदार नोंदणी अत्यंत आवश्यक असल्याचे नमूद करत त्यांनी केंद्र सरकारच्या काही धोरणांवर टीकाही केली. राज्य सरकारच्या पाचही गॅरंटी योजनांचा लाभ आणि संबंधित आर्थिक मदत थेट बँक खात्यात जमा होण्यासाठी मतदार यादीत नाव असणे आवश्यक असल्याचे त्यांनी सांगितले.

नागरिकांनी कोणतीही दिरंगाई न करता मतदार नोंदणी प्रक्रिया पूर्ण करून लोकशाही प्रक्रियेत सक्रिय सहभाग नोंदवावा, असे आवाहन डॉ. अंजली निंबाळकर यांनी केले. या पत्रकार परिषदेला जिल्हाध्यक्ष विनय नावलगट्टी, विविध ब्लॉक काँग्रेस अध्यक्ष तसेच पक्षाचे पदाधिकारी उपस्थित होते.

The post शासकीय योजनांचा लाभ मिळवण्यासाठी मतदार नोंदणी महत्त्वाची – डॉ. अंजली निंबाळकर appeared first on News 24 Tass Marathi.

बेळगाव : विशेष मतदार यादी फेरनिरीक्षण (एसआयआर) प्रक्रियेसाठी मराठी भाषेतील गणना अर्ज उपलब्ध करून देण्याबाबत महाराष्ट्र एकीकरण युवा समितीने केलेल्या तक्रारीची केंद्रीय भाषिक अल्पसंख्याक आयोगाने गंभीर दखल घेतली आहे. या संदर्भात कर्नाटकच्या मुख्य निवडणूक अधिकाऱ्यांना आवश्यक ती कार्यवाही करून अहवाल सादर करण्याचे निर्देश देण्यात आले आहेत.

महाराष्ट्र एकीकरण युवा समितीचे अध्यक्ष अंकुश केसरकर यांनी यापूर्वी कर्नाटकचे मुख्य निवडणूक अधिकारी, भारताचे मुख्य निवडणूक आयुक्त तसेच केंद्रीय भाषिक अल्पसंख्याक आयोगाकडे निवेदन सादर केले होते. त्यामध्ये बेळगाव, बिदर आणि उत्तर कन्नड (कारवार) जिल्ह्यांतील अधिसूचित विधानसभा मतदारसंघांमध्ये मराठी भाषेतील एसआयआर गणना अर्ज तातडीने उपलब्ध करून देण्याची मागणी करण्यात आली होती.

या निवेदनाची दखल घेत केंद्रीय भाषिक अल्पसंख्याक आयुक्तालयाने अधिकृत पत्राद्वारे कर्नाटकच्या मुख्य निवडणूक अधिकाऱ्यांना हा प्रश्न तातडीने निकाली काढण्याच्या सूचना दिल्या आहेत. तसेच या प्रकरणात करण्यात आलेल्या कार्यवाहीचा सविस्तर अहवाल आयोगाकडे पाठविण्याचे निर्देशही देण्यात आले आहेत.

युवा समितीने आपल्या निवेदनात नमूद केले आहे की, भारतीय निवडणूक आयोगाने १६ सप्टेंबर २००८ रोजी जारी केलेल्या निर्देशांनुसार बेळगाव, बिदर आणि उत्तर कन्नड (कारवार) जिल्ह्यांतील अधिसूचित विधानसभा मतदारसंघांमध्ये मतदार यादी, निवडणुकीशी संबंधित अर्ज, फॉर्म, सूचना आणि अन्य साहित्य मराठी भाषेत उपलब्ध करून देणे बंधनकारक आहे. मात्र, सध्या सुरू असलेल्या विशेष मतदार फेरनिरीक्षण मोहिमेत केवळ कन्नड भाषेतील गणना अर्ज उपलब्ध असल्याने मराठी भाषिक मतदारांना अडचणींचा सामना करावा लागत असल्याचा दावा समितीने केला आहे.

या प्रश्नाची गंभीरता लक्षात घेऊन मध्यवर्ती महाराष्ट्र एकीकरण समितीनेही बेळगावच्या जिल्हाधिकाऱ्यांकडे मराठीतील गणना अर्ज उपलब्ध करून देण्याची मागणी केली होती. तसेच खानापूर तालुका महाराष्ट्र एकीकरण समितीनेही तहसीलदारांकडे निवेदन सादर करून मराठी भाषेतील अर्ज तातडीने उपलब्ध करण्याची मागणी केली आहे.

केंद्रीय भाषिक अल्पसंख्याक आयोगाने दिलेले निर्देश हे मराठी भाषिक मतदारांच्या घटनात्मक आणि भाषिक अधिकारांच्या संरक्षणाच्या दृष्टीने महत्त्वाचे पाऊल मानले जात आहे. अधिसूचित विधानसभा मतदारसंघांमध्ये मराठी भाषेतील गणना अर्ज, मतदार यादी आणि निवडणुकीशी संबंधित इतर आवश्यक साहित्य तातडीने उपलब्ध करून भारतीय निवडणूक आयोगाच्या १६ सप्टेंबर २००८ च्या निर्देशांची प्रभावी अंमलबजावणी करावी, अशी मागणी महाराष्ट्र एकीकरण युवा समितीने केली आहे.

The post मराठीतील मतदार फेरनिरीक्षण अर्जाच्या मागणीची केंद्रीय स्तरावर दखल appeared first on News 24 Tass Marathi.

सीमाभागात सुरू असलेला SIR प्रक्रियेच्या पार्श्वभूमीवर अनेक नागरिकांना अद्याप बीएलओ (BLO) कडून ‘SIR’ चे अर्ज मिळालेले नाहीत, किंवा कुटुंबातील काही व्यक्तींना अर्ज मिळाले आहेत तर काहींना मिळाले नाहीत, संबंधित अधिकाऱ्यांकडे अर्जाची मागणी केली असता आपल्याकडे इतर अर्ज आले नाहीत अशी उत्तरे देत आहेत. तसेच अनेकांना आपले बी.एल.ओ. कोण आहेत? मतदान केंद्र किंवा भागसंख्या काय आहे, याची माहिती नाही.

​मतदारांची हीच अडचण दूर करण्यासाठी युवा समितीने ‘विशेष सहाय्य वाहिनी’ (हेल्पलाइन) सुरू केली आहे. या हेल्पलाइनद्वारे नागरिकांना मार्गदर्शन केले जाईल. आपले बी.एल.ओ कोण आहेत? आपला संबंधित अर्ज कोणाकडे मिळेल, याची माहिती दिली जाईल. सीमाभागातील एकाही मराठी बांधवाचे नाव या प्रक्रियेतून सुटू नये, या उद्देशाने ही मोहीम हाती घेण्यात आली आहे.

तसेच मागील महानगर पालिकेच्या निवडणुकीत प्रभागांच्या गोंधळामुळे एका घरातील मते वेगवेगळ्या प्रभागात विभागली गेली होती, त्याचा फटका आता SIR प्रक्रिया राबविताना मतदारांना बसत आहे, पत्ता वेगळा आणि प्रभाग वेगळा असल्याने यामुळे बी.एल.ओ सुद्धा गोंधळून गेले आहेत. या गोंधळातून कुठल्याही व्यक्तीचे नाव मतदारयादीतून बाद केले जाऊ नये यासाठी खबरदारी घेणे गरजेचे असून त्याचसाठी म्हणून युवा समितीच्या माध्यमातून हेल्पलाइन सुरू करण्यात येत आहे.

तरी ​नागरिकांनी SIR अर्जांच्या अडचणीसाठी खालील क्रमांकांवर संपर्क साधावा , असे आवाहन महाराष्ट्र एकीकरण युवा समितीने केले आहे.

​📞 मदतीसाठी संपर्क क्रमांक :  अंकुश केसरकर 97399 63229 ; श्रीकांत कदम 9611756529 , सूरज कुडूचकर 8762764593 , प्रतीक पाटील 7338145673 , आशिष कोचेरी 9886103373

The post ‘SIR’ अर्जां संदर्भात मतदारांच्या मदतीसाठी ‘महाराष्ट्र एकीकरण युवा समिती’ची सहाय्य वाहिनी (हेल्पलाईन) appeared first on News 24 Tass Marathi.

बेळगाव : भारत सरकार आणि निवडणूक आयोगाच्या वतीने सध्या देशभरात राबविल्या जाणाऱ्या विशेष संक्षिप्त पुनरिक्षण मोहिमेच्या पार्श्वभूमीवर, बेळगाव जिल्ह्यातील मराठी भाषिक मतदारांना येणाऱ्या अडचणी दूर व्हाव्यात यासाठी सकल मराठा समाजाचे नेते किरण जाधव यांनी, बेळगावचे जिल्हाधिकारी मोहम्मद रोशन यांची भेट घेतली. या भेटीदरम्यान त्यांनी जिल्हाधिकाऱ्यांना एक महत्त्वपूर्ण निवेदन सादर करत, निवडणूक प्रक्रियेतील फॉर्म्स कन्नडसोबतच मराठी भाषेतही उपलब्ध करून देण्याची आग्रही विनंती केली.

मराठी भाषिकांच्या सोयीसाठी अर्जाच्या मागील बाजूस मराठी भाषेत फॉर्म द्या यासंदर्भात जिल्हाधिकाऱ्यांशी चर्चा करताना किरण जाधव म्हणाले की, बेळगाव जिल्हा हा सीमावर्ती भाग असून येथे अनेक वर्षांपासून मराठी आणि कन्नड भाषिक लोक अत्यंत गुण्यागोविंदाने आणि सलोख्याने राहत आहेत. या भागातील बहुतांश नागरिकांनी आपले शिक्षण मराठी शाळांमधून पूर्ण केले आहे. त्यामुळे निवडणूक आयोगाच्या वतीने सुरू असलेल्या या मोहिमेअंतर्गत मिळणारे अर्ज समजून घेताना आणि ते भरताना मराठी भाषिकांना भाषेची अडचण येऊ शकते. ही प्रक्रिया अधिक सुलभ आणि सोयीची व्हावी, यासाठी प्रशासनाने जे कन्नड भाषेतील फॉर्म्स आहेत, त्याच्याच पाठीमागील बाजूला मराठी भाषेतील फॉर्म उपलब्ध करून द्यावा, जेणेकरून कोणत्याही मतदाराची गैरसोय होणार नाही,आणि सरकार ला तसेच बूथ लेव्हल ऑफिर्सनापण अर्ज भरण्यासाठी सोईस्कर होईल.

किरण जाधव यांनी मांडलेली ही समस्या आणि त्यावरील उपाय ऐकताच बेळगावचे जिल्हाधिकारी मोहम्मद रोशन यांनी निवडणूक आयोगाला संपर्क साधून या विषयाचा पाठपुरावा केला जाईल. तसेच, मराठी भाषिकांच्या सोयीसाठी यावर विचार केला जाईल, असे आश्वासन किरण जाधव यांना दिले.

यावेळी बोलताना किरण जाधव यांनी केंद्र व राज्य सरकारच्या वतीने राबविल्या जाणाऱ्या या मोहिमेचे जाहीर कौतुक केले. देशात होणारे दुबार मतदान रोखण्यासाठी आणि निवडणूक प्रक्रिया पारदर्शक करण्यासाठी सरकारने उचललेले हे पाऊल अत्यंत कौतुकास्पद असल्याचे त्यांनी सांगितले. बेळगावचे नागरिक या देशहिताच्या मोहिमेला प्रशासनाला पूर्ण आणि सकारात्मक प्रतिसाद देतील, असा विश्वासही त्यांनी यावेळी व्यक्त केला. प्रशासनाने मराठी भाषिकांची अडचण दूर करून मराठी मतदारांना सहकार्य करावे, अशी विनंती सकल मराठा समाज नेते किरण जाधव यांनी जिल्हाधिकाऱ्यांकडे केली आहे.

The post एसआयआर फॉर्म कन्नडसह मराठी भाषेतही उपलब्ध करून द्या appeared first on News 24 Tass Marathi.

सीमाभागात राबविण्यात येत असलेल्या एसआयआर प्रक्रियेचे अर्ज केवळ कन्नड भाषेत उपलब्ध करून दिले जात असल्याने, ही प्रक्रिया मराठी भाषेतही राबविण्यात यावी, यासह विविध मागण्यांसाठी महाराष्ट्र एकीकरण समितीच्या प्रतिनिधी आणि माजी नगरसेवकांनी शुक्रवारी बेळगाव दक्षिण व उत्तर मतदारसंघाचे निवडणूक प्रभारी असलेल्या महापालिका आयुक्त व उपायुक्त यांची भेट घेतली होती.

यावेळी समितीने राष्ट्रीय पक्षांप्रमाणे महाराष्ट्र एकीकरण समितीलाही एसआयआर प्रक्रियेची माहिती देण्यात यावी, तसेच समितीच्या प्रभागनिहाय प्रतिनिधींना या प्रक्रियेत सहभागी करून घ्यावे, अशी मागणी केली. त्यावर मतदान केंद्रनिहाय प्रतिनिधी (बीएलए/पोलिंग एजंट) यांची यादी प्रशासनाकडे सादर केल्यास संबंधित प्रतिनिधींना प्रक्रियेत सहभागी करून घेतले जाईल, अशी ग्वाही महापालिका आयुक्तांनी दिल्याचे समितीने सांगितले.

या पार्श्वभूमीवर आयोजित बैठकीस बेळगाव दक्षिण व उत्तर मतदारसंघातील समितीचे कार्यकर्ते, लोकप्रतिनिधी, आजी-माजी नगरसेवक, आजी-माजी ग्रामपंचायत सदस्य, आजी-माजी जिल्हा पंचायत सदस्य तसेच मराठी भाषिक नागरिकांनी मोठ्या संख्येने उपस्थित राहावे, असे आवाहन करण्यात आले आहे.

तसेच, मतदान केंद्रनिहाय प्रतिनिधी (पोलिंग एजंट) म्हणून कार्य करण्यास इच्छुक असलेल्या कार्यकर्त्यांनी आपल्या भागातील प्रतिनिधींची यादी सोबत आणावी, असे आवाहन मध्यवर्ती महाराष्ट्र एकीकरण समितीचे अध्यक्ष प्रकाश मरगाळे, सरचिटणीस मालोजीराव अष्टेकर, कार्याध्यक्ष तथा माजी आमदार मनोहर किणेकर, एम. जी. पाटील आणि अमर येळ्ळूरकर यांनी केले आहे.

The post “एसआयआर” संदर्भात महाराष्ट्र एकीकरण समितीची उद्या महत्त्वपूर्ण बैठक appeared first on News 24 Tass Marathi.