पंढरपूर : आषाढी एकादशीनिमित्त विठ्ठल-रुक्मिणी मंदिरात राज्याचे मुख्यमंत्री देवेंद्र फडणवीस आणि त्यांच्या पत्नी अमृता फडणवीस यांच्याहस्ते शनिवारी पहाटे विठुरायाची सपत्नीक शासकीय महापूजा भक्तिभावाने संपन्न झाली. यावेळी राज्यात सर्वत्र समाधानकारक पाऊस पडावा, शेतकरी सुखी-समृद्ध व्हावेत, महाराष्ट्रावर विठुरायाची कृपादृष्टी कायम राहावी आणि जनतेच्या जीवनात आनंद व समाधान नांदावे, अशी प्रार्थना मुख्यमंत्री फडणवीस यांनी विठ्ठलाच्या चरणी केली.

यंदाच्या शासकीय महापूजेसाठी धाराशिव जिल्ह्यातील कळंब तालुक्यातील गौरगाव येथील शेतकरी बाळासाहेब माने आणि त्यांच्या पत्नी प्रभावती माने यांची ‘मनाचे दाम्पत्य’ म्हणून निवड करण्यात आली. त्यांना मुख्यमंत्री दाम्पत्यासमवेत शासकीय महापूजेत सहभागी होण्याचा मान मिळाला.

मुख्यमंत्री देवेंद्र फडणवीस हे शुक्रवारीच पंढरपुरात दाखल झाले होते. शनिवारी पहाटे सुमारे अडीच वाजता विठ्ठलाची शासकीय महापूजा पार पडल्यानंतर रुक्मिणी मातेचीही महापूजा करण्यात आली. त्यानंतर विठ्ठल-रुक्मिणी मंदिर समितीच्या वतीने मुख्यमंत्री आणि अमृता फडणवीस यांचा सत्कार करण्यात आला. विशेष म्हणजे मुख्यमंत्री फडणवीस यांना आषाढी एकादशीनिमित्त विठ्ठल-रुक्मिणीची शासकीय महापूजा करण्याचा मान सहाव्यांदा मिळाला.

महापूजेनंतर प्रसारमाध्यमांशी संवाद साधताना मुख्यमंत्री फडणवीस म्हणाले, “विठ्ठलाच्या मंदिरात आल्यानंतर नवी ऊर्जा मिळते. राज्यात सर्वत्र चांगला पाऊस पडावा, अशीच विठुरायाकडे प्रार्थना केली आहे. तसेच देशातील तरुणाईला योग्य दिशा देण्यासाठी पंतप्रधान नरेंद्र मोदी यांना विठुरायाचा आशीर्वाद लाभावा, अशीही प्रार्थना केली.”

दरम्यान, आषाढी एकादशीनिमित्त पहाटेपासूनच विठ्ठलनगरी भक्तिरसात न्हाऊन निघाली आहे. लाखो वारकरी आणि भाविकांनी विठ्ठलनामाचा गजर करत पंढरपुरात हजेरी लावली आहे. दर्शनासाठी २० ते २५ किलोमीटरपर्यंत रांगा लागल्याचे चित्र पाहायला मिळत असून चंद्रभागा नदीच्या तीरावरही वारकऱ्यांचा जनसागर उसळला आहे.

The post राज्यात भरपूर पाऊस पडू दे ; शेतकरी समृद्ध होऊ दे appeared first on News 24 Tass Marathi.

बेळगाव : आषाढी एकादशीनिमित्त पंढरपूरला जाणाऱ्या भाविकांसाठी दक्षिण पश्चिम रेल्वेकडून धारवाड-बेळगाव-पंढरपूर विशेष रेल्वे आजपासून सुरू करण्यात आली आहे. बेळगाव, धारवाड, हुबळी आणि परिसरातील हजारो भाविकांची दरवर्षी होणारी गैरसोय लक्षात घेऊन ही विशेष सेवा उपलब्ध करून देण्यात आली असून, २३ ते २८ जुलैदरम्यान ही रेल्वे एकूण सहा फेऱ्या करणार आहे.

या विशेष रेल्वेत एकूण १० डबे असून त्यापैकी ८ जनरल आणि २ स्लीपर कोचचा समावेश आहे. बेळगावहून पंढरपूरसाठी थेट रेल्वेची अनेक वर्षांपासून मागणी होत होती. या विशेष सेवेच्या माध्यमातून भाविकांना अधिक सोयीस्कर प्रवासाची सुविधा उपलब्ध होणार आहे.

सकाळी ६ वाजता धारवाड येथून सुटणारी विशेष एक्स्प्रेस सकाळी ७.४९ वाजता खानापूर, ८.३० वाजता बेळगाव, ९.३० वाजता घटप्रभा, दुपारी १२.२० वाजता मिरज येथे पोहोचून सायंकाळी ४.५० वाजता पंढरपूर येथे दाखल होईल.

परतीच्या प्रवासात ही रेल्वे सायंकाळी ६.४० वाजता पंढरपूरहून सुटेल. त्यानंतर मध्यरात्री १.२० वाजता बेळगावला, तर पहाटे ४.३० वाजता धारवाडला पोहोचणार आहे.

ही विशेष रेल्वे धारवाड, लोंढा, खानापूर, देसूर, बेळगाव, पाच्छापूर, गोकाक रोड, घटप्रभा, चिकोडी रोड, रायबाग, कुडची, उगार, शेडबाळ, विजापूर, मिरज, अरग, सांगोला आणि पंढरपूर या स्थानकांवर थांबणार असल्याने उत्तर कर्नाटकातील तसेच सीमाभागातील भाविकांना याचा मोठा लाभ होणार आहे.

The post आषाढी एकादशीनिमित्त धारवाड – बेळगाव – पंढरपूर विशेष रेल्वेला आजपासून सुरुवात appeared first on News 24 Tass Marathi.

पंढरपूर : श्री विठ्ठल-रुक्मिणी मंदिरातील व्हीआयपी दर्शन व्यवस्था बंद करण्यात आल्याने दर्शनरांगेतील भाविकांना मोठा दिलासा मिळाला आहे. पूर्वी पदस्पर्श दर्शनासाठी आठ ते दहा तास प्रतीक्षा करावी लागत असताना आता ही प्रतीक्षा सुमारे चार तासांवर आली असून भाविकांना अधिक सुलभ आणि जलद दर्शनाचा लाभ मिळत आहे.

२५ जुलै रोजी होणाऱ्या आषाढी शुद्ध एकादशीच्या पार्श्वभूमीवर पंढरपुरात भाविकांची मोठी गर्दी होत आहे. वाढती गर्दी लक्षात घेऊन दर्शनरांगेतील भाविकांना कोणताही अडथळा न येता दर्शन मिळावे, यासाठी राज्य शासनाच्या निर्णयानुसार आणि आपत्ती व्यवस्थापन कायद्यांतर्गत जिल्हाधिकारी एस. कार्तिकेयन यांनी व्हीआयपी दर्शन सुविधा बंद करण्याचे आदेश दिले आहेत.

या निर्णयाची प्रभावी अंमलबजावणी होत आहे का, याची पाहणी करण्यासाठी जिल्हाधिकारी एस. कार्तिकेयन यांनी स्वेरी महाविद्यालयापासून श्री विठ्ठल-रुक्मिणी मंदिरापर्यंत पायी पाहणी केली. यावेळी त्यांनी मंदिर समितीने दर्शनरांग आणि पत्राशेड परिसरात भाविकांसाठी उपलब्ध करून दिलेल्या सुविधांचा आढावा घेतला.

दर्शनासाठी आलेल्या भाविकांशी संवाद साधत त्यांनी दर्शन व्यवस्थेबाबत तसेच उपलब्ध सुविधांबाबत प्रत्यक्ष माहिती जाणून घेतली. दर्शनरांगेत घुसखोरी होऊ नये, यासाठी आवश्यक त्या ठिकाणी सुरक्षा रक्षकांची नियुक्ती करून व्यवस्था अधिक काटेकोर करण्याच्या सूचनाही त्यांनी मंदिर समितीला दिल्या.

व्हीआयपी दर्शन बंद झाल्यामुळे सामान्य भाविकांना जलद दर्शन मिळत असल्याचे समाधान अनेकांनी व्यक्त केले असून, आषाढी यात्रेदरम्यानही ही व्यवस्था प्रभावीपणे कायम ठेवण्याची अपेक्षा भाविकांकडून व्यक्त होत आहे.

The post विठ्ठल दर्शनाची प्रतीक्षा आता चार तासांवर appeared first on News 24 Tass Marathi.

येळ्ळूर : आषाढी वारीनिमित्त येळ्ळूर येथील वैष्णव सदन आश्रमाच्या वतीने पंढरपूरकडे निघालेली पारंपरिक पायी दिंडी दुसऱ्या दिवशीही अभंग, टाळ-मृदुंगाच्या गजरात मार्गक्रमण करत पुढे सरकली. गेली १५ वर्षे अखंड सुरू असलेली ही दिंडी यंदा १६ व्या वर्षात प्रवेश करत असून, शेकडो वारकरी मोठ्या उत्साहाने सहभागी झाले आहेत.

मौनानंद तुकाराम महाराज मुरगोड यांच्या मार्गदर्शनाखाली आणि धामणे येथील हभप मारुती महाराज सांबरेकर यांच्या नेतृत्वाखाली ही दिंडी निघाली आहे. वैष्णव सदन आश्रमात विधीवत पादुका पूजनानंतर भव्य मिरवणुकीने यात्रेला प्रारंभ झाला. ९० वर्षांवरील ज्येष्ठ वारकऱ्यांपासून ते लहान मुलांपर्यंत विविध वयोगटातील भाविकांनी पायी वारीत सहभाग नोंदविला.

यावेळी युवा नेते मृणाल हेब्बाळकर यांनी दिंडीची भेट घेऊन वारकऱ्यांशी संवाद साधला. राज्यातील जनतेच्या सुख-समृद्धीसाठी तसेच उत्तम पिकपाण्यासाठी विठ्ठल चरणी प्रार्थना करण्याची विनंती त्यांनी वारकऱ्यांना केली. दरवर्षी दिंडीत सहभागी होणे आणि वारकऱ्यांची सेवा करणे ही आपल्या कुटुंबाची परंपरा असल्याचे सांगत, पुढील वर्षी स्वतःही पायी वारीत सहभागी होण्याची इच्छा त्यांनी व्यक्त केली.

गतवर्षी दिंडीच्या वाहनांना महामार्गावरील टोल नाक्यांवर वाहतुकीच्या अडचणींचा सामना करावा लागला होता. ही बाब लक्षात घेऊन यंदा आमदार लक्ष्मी हेब्बाळकर आणि मृणाल हेब्बाळकर यांच्या सहकार्याने दिंडीच्या वाहनांसाठी टोल नाक्यांवर सुलभ आणि टोलमुक्त प्रवासाची व्यवस्था करण्यात आली. या सहकार्याबद्दल दिंडी समितीने हेब्बाळकर कुटुंबाचे आभार व्यक्त केले.

The post येळ्ळूर येथील वैष्णव सदन आश्रमाच्या दिंडीचे पंढरपूरकडे प्रस्थान appeared first on News 24 Tass Marathi.

बेळगाव : पंढरपूर येथील श्री विठ्ठल-रुक्मिणी मंदिरात बेळगावातील १९ भजनी मंडळांतील ४७५ महिलांनी एकत्र येत हरिनामाचा गजर केला. १८ जून रोजी झालेल्या या विशेष भजन कार्यक्रमात महिलांनी अभंग गायन सादर करत मंदिर परिसर भक्तिरसाने भारावून टाकला.

हा कार्यक्रम श्री विठ्ठल-रुक्मिणी मंदिर समितीचे उपाध्यक्ष ह.भ.प. गहिनीनाथ महाराज औसेकर यांचे शिष्य धनंजय जवंजाळ यांच्या पुढाकारातून आयोजित करण्यात आला होता. गहिनीनाथ महाराज औसेकर, मंदिर ट्रस्ट समिती यांची अनुमती तसेच बेळगाव येथील शंकर लक्ष्मण पाटील यांच्या मार्गदर्शनाखाली हा धार्मिक उपक्रम यशस्वीपणे पार पडला.

कार्यक्रमाची सुरुवात रुपावलीने करण्यात आली. त्यानंतर ‘गोड गोड तुझे नाम’, ‘गणेश शारजा’, ‘त्रिशुळावरी काशीपुरी’, ‘काय सांगू आता संतांचे उपकार’ यांसह एकूण १५ अभंगांचे सादरीकरण करण्यात आले. सुमारे तीन तास चाललेल्या या कार्यक्रमात उपस्थित भाविकांनीही मोठ्या उत्साहाने सहभाग घेत हरिनामात तल्लीन होण्याचा अनुभव घेतला.

भजन गायनामुळे मंदिर परिसरात संपूर्ण वेळ भक्तिमय वातावरण निर्माण झाले होते. कार्यक्रमाचे सूत्रसंचालन माधुरी कोल्हटकर यांनी केले.

The post पंढरपूरच्या श्री विठ्ठल-रुक्मिणी मंदिरात बेळगावच्या ४७५ महिलांचा हरिनामाचा गजर appeared first on News 24 Tass Marathi.

आळंदी ते पंढरपूर वारीतील मानाच्या अश्वांची परंपरा शितोळे घराण्याकडे असून, अनेक वर्षांपासून ही परंपरा जपली जात आहे. यंदाचे वारीचे १९४ वे वर्ष असून त्यानिमित्त आवश्यक नियोजन करण्यात आले आहे. शनिवार, २७ जून रोजी सकाळी दहा वाजता अंकली येथील शितोळे सरकार राजवाड्यातून मानाच्या अश्वांचे प्रस्थान होणार आहे. या वेळी वारकरी, ग्रामस्थ आणि भाविक मोठ्या संख्येने उपस्थित राहणार आहेत. अंकली ते आळंदी हा प्रवास सुमारे अकरा दिवसांचा असणार असून अश्वांसोबत २० ते २५ जणांचा लवाजमा सहभागी होणार आहे. ७ जुलै रोजी हे अश्व आळंदी येथे पोहोचतील.

The post माऊलींच्या मानाच्या अश्वांचे २७ जूनला अंकलीहून आळंदीकडे प्रस्थान appeared first on News 24 Tass Marathi.

हल्याळ : कोविडनंतर बंद पडलेली हुबळी–लोंढा–मिरज–पंढरपूर रेल्वे सेवा तात्काळ सुरू करण्यात यावी, अशी मागणी माजी मंत्री तथा आमदार आर. व्ही. देशपांडे यांनी केंद्रीय रेल्वे राज्यमंत्री व्ही. सोमण्णा यांच्याकडे केली आहे.

दांडेली दौऱ्यावर आलेल्या मंत्री सोमण्णा यांना दिलेल्या निवेदनात देशपांडे यांनी नमूद केले की, या मार्गावरील रेल्वे सेवा बंद झाल्यामुळे उत्तर कर्नाटकातील नागरिक, विद्यार्थी, व्यापारी तसेच विठ्ठल भक्तांची मोठी गैरसोय होत आहे. कोविडपूर्व काळात ही रेल्वे नियमित धावत होती आणि दोन्ही राज्यांतील प्रवाशांसाठी ती अत्यंत उपयुक्त ठरत होती.

पंढरपूरच्या विठोबाच्या दर्शनासाठी जाणाऱ्या लाखो भाविकांसाठी हा मार्ग महत्त्वाचा असल्याचे त्यांनी अधोरेखित केले. यात्रा व उत्सव काळात विशेषतः हजारो भक्त या सेवेचा लाभ घेत असत. सेवा बंद झाल्याने धार्मिक, शैक्षणिक आणि व्यावसायिक हालचालींवर परिणाम झाला आहे.

ही रेल्वे पुन्हा सुरू झाल्यास कर्नाटक–महाराष्ट्र संपर्क अधिक सक्षम होईल, पर्यटनाला चालना मिळेल आणि लघुउद्योग व व्यापारालाही फायदा होईल, असा विश्वास देशपांडे यांनी व्यक्त केला. रेल्वे मंत्रालयाने याबाबत सकारात्मक निर्णय घेऊन वरिष्ठ अधिकाऱ्यांना आवश्यक सूचना द्याव्यात, अशी विनंती त्यांनी केली आहे.

The post हुबळी-पंढरपूर रेल्वे तातडीने पूर्ववत सुरू करा appeared first on News 24 Tass Marathi.

अगरबत्ती पॅकिंगच्या गृहोद्योगाच्या नावाखाली शेकडो महिलांची लाखो रुपयांची फसवणूक केल्याच्या प्रकरणातील प्रमुख आरोपीला बेळगाव न्यायालयाने जामीन मंजूर केला असून, त्यामुळे त्याची कारागृहात रवानगी न होता थेट सुटका झाली आहे.

जामीन मिळालेल्या आरोपीचे नाव बाबासाहेब लक्ष्मण कोळेकर (वय ३५, रहिवासी पंढरपूर) असे आहे. ‘बी. एम. ग्रुप महिला गृहोद्योग समूह’ या नावाने महिलांना घरबसल्या अगरबत्ती पॅकिंगचे काम मिळेल असे सांगून त्याने मोठ्या प्रमाणात पैसा गोळा केला होता.

ओळखपत्रासाठी प्रत्येक महिलेकडून २,५०० रुपये घेऊन त्याने मोठी रक्कम जमा केली. कामानंतर ३,००० रुपये वेतन देण्याचे आश्वासन दिले होते; मात्र प्रत्यक्षात ना पगार दिला, ना परतावा. या फसवणुकीसंबंधी खासबाग-शहापूर येथील लक्ष्मी आनंद कांबळे यांनी २५ ऑक्टोबर रोजी शहापूर पोलीस ठाण्यात तक्रार दाखल केली होती.

यानंतर शहापूर पोलिसांनी ४ नोव्हेंबर २०२५ रोजी कोळेकरला ताब्यात घेतले. त्याच्यावर कलम ३१६ आणि ३१८ अन्वये गुन्हा दाखल करण्यात आला होता. अटकेनंतर त्याने तात्पुरत्या जामिनासाठी अर्ज केला व त्यावर सुनावणी होऊन तात्पुरता दिलासा मिळाला. पुढे ६ नोव्हेंबर रोजी मुख्य जामीन अर्जावरही सुनावणी झाली आणि न्यायालयाने कायम जामीन मंजूर केला.

यामुळे अटक असूनही त्याची तुरुंगात रवानगी टळली. आरोपीची बाजू वकील प्रताप यादव, हेमराज बेंचन्नावर आणि स्वप्नील नाईक यांनी न्यायालयात मांडली. तृतीय प्रथमवर्गीय न्यायालयाने जामीन अर्जाला मंजुरी दिली.

The post अगरबत्ती घोटाळ्यातील आरोपीला न्यायालयाकडून जामीन appeared first on News 24 Tass Marathi.

अगरबत्ती व्यवसाय सुरू करून चांगला नफा मिळेल, अशा आमिषाने अनेक महिलांची फसवणूक करणाऱ्या बाबासाहेब लक्ष्मण कोळेकर या मुख्य आरोपीला अखेर पोलिसांनी अटक केली आहे. काही महिन्यांपूर्वी या प्रकरणात कोळेकर याने महिलांकडून लाखो रुपयांची गुंतवणूक करून घेतली होती. त्यानंतर ना व्यवसाय सुरू ठेवला, ना पैसे परत दिले, अशा तक्रारींचा भडिमार पोलिसांकडे झाला होता.

या पार्श्वभूमीवर पोलिसांनी सखोल तपास सुरू केला होता. आरोपी फरार होता, मात्र पोलिस अधिकाऱ्यांनी तपास करत अखेर त्याला ताब्यात घेतले आहे. आरोपीकडून आणखी माहिती मिळवून त्याने फसवलेल्या रकमेचा व इतर सहभागींचा शोध सुरू आहे. पोलिसांनी नागरिकांना आवाहन केले आहे की, अशा आकर्षक व्यावसायिक योजनांमध्ये पैसे गुंतवताना पूर्ण खात्री करूनच व्यवहार करावेत.

The post अगरबत्ती व्यवसाय फसवणूक प्रकरणातील आरोपी गजाआड appeared first on News 24 Tass Marathi.

पंढरपूर : प्रसिद्ध कीर्तनकार तसेच अरुणा मध्यम प्रकल्प संघर्ष कृती समिती मुंबईचे सचिव ह.भ.प. दत्ताराम सीताराम नागप महाराज (वय ६०) यांचे शुक्रवार दि. ३१ ऑक्टोबर रोजी पहाटे पंढरपूर येथे हृदयविकाराच्या झटक्याने निधन झाले.

कार्तिकी वारीनिमित्त ते बुधवारी (२९ ऑक्टोबर) मुंबईहून परिवारासह पंढरपूरात दाखल झाले होते. वारीतील कीर्तनसेवा संपवून निवासस्थानी परतल्यावर पहाटे त्यांची अचानक प्रकृती बिघडली. वैद्यकीय मदत मिळण्याआधीच त्यांचे निधन झाले.

महाराजांचे मूळ वास्तव्य मांगवली तिठा परिसरातील आखवणे-भोम-नागपवाडी पुनर्वसन गावठाणात असून, ते मुंबईत संपूर्ण कुटुंबासह स्थायिक होते. त्यांचे वडीलही कीर्तनकार होते आणि त्यांच्या पश्चात दत्ताराम महाराजांनीच हा वसा पुढे नेला. मुंबई ‘बेस्ट’मध्ये उच्च पदावर सेवा करून दोन वर्षांपूर्वी ते सेवानिवृत्त झाले होते.

धार्मिक, सामाजिक, सांस्कृतिक आणि शैक्षणिक उपक्रमांत त्यांनी सक्रिय सहभाग ठेवला होता. त्यांच्या अकाली निधनाने गावात शोककळा पसरली आहे. पंढरपूरातून पार्थिव मुंबईत नेऊन अंत्यसंस्कार करण्यात आले. त्यांच्या पश्चात पत्नी, मुलगा, मुलगी तसेच भाऊ-बहिणी असा मोठा परिवार आहे.

The post ह.भ.प. दत्ताराम नागप महाराजांचे पंढरपुरात निधन appeared first on News 24 Tass Marathi.