गोकाक : तालुक्यातील कोन्नूरजवळ वायव्य कर्नाटक राज्य रस्ते वाहतूक मंडळाच्या (एनडब्ल्यूकेएसआरटीसी) बस आणि दुचाकीमध्ये झालेल्या भीषण अपघातात चार वर्षांच्या चिमुकलीसह तिघांचा जागीच दुर्दैवी मृत्यू झाला. तर एका बालकावर खासगी रुग्णालयात उपचार सुरू आहेत.

मिळालेल्या माहितीनुसार, हिडकल येथून गोकाककडे जाणारी एनडब्ल्यूकेएसआरटीसीची बस आणि गोकाक फॉल्स परिसरातील पॉर्बस शाळेतून कोन्नूरकडे निघालेली दुचाकी यांच्यात हा भीषण अपघात झाला.

या दुर्घटनेत सैफ मुल्ला (२९), त्यांची चार वर्षांची मुलगी सिजा मुल्ला (४) आणि त्यांचा मित्र इम्तियाज बडगाव (३५) यांचा जागीच मृत्यू झाला. दुचाकीवरील जिहान शाहरुख कुडचीकर हे बालक गंभीर जखमी झाले असून त्याला तातडीने खासगी रुग्णालयात दाखल करण्यात आले आहे.

अपघातानंतर बसचालक वाहनासह घटनास्थळावरून पसार झाल्याची माहिती समोर आली आहे. घटनेची माहिती मिळताच गोकाक ग्रामीण पोलिसांनी घटनास्थळी धाव घेऊन पंचनामा केला.

या प्रकरणी गोकाक ग्रामीण पोलीस ठाण्यात गुन्हा दाखल करण्यात आला असून, फरार बसचालकाचा शोध सुरू आहे. तसेच अपघाताच्या नेमक्या कारणांचा पोलीस तपास सुरू आहे.

The post कोन्नूरजवळ बस-दुचाकीच्या भीषण अपघातात चिमुकलीसह तिघांचा मृत्यू appeared first on News 24 Tass Marathi.

गोकाक : गोकाक शहरातील एका खासगी कोचिंग सेंटरमध्ये शिकवणाऱ्या शिक्षकावर दोन अल्पवयीन विद्यार्थिनींवर लैंगिक अत्याचार केल्याचा आरोप करण्यात आला असून, या धक्कादायक घटनेमुळे परिसरात संतापाची लाट उसळली आहे. प्रकरणाची माहिती मिळताच गोकाक शहर पोलिसांनी तातडीने कारवाई करत संशयित शिक्षकाला ताब्यात घेतले असून, पुढील तपास सुरू आहे.

घटना उघडकीस आल्यानंतर पीडित विद्यार्थिनींचे पालक आणि स्थानिक नागरिक मोठ्या संख्येने कोचिंग सेंटरसमोर जमले. आरोपीविरुद्ध कठोर कारवाईची मागणी करत त्यांनी जोरदार आंदोलन केले. या घटनेमुळे परिसरात काही काळ तणावाचे वातावरण निर्माण झाले होते.

घटनास्थळी वरिष्ठ पोलीस अधिकारी दाखल झाल्यानंतर पीडित विद्यार्थिनीच्या आईने अधिकाऱ्यांच्या पाया पडून आपल्या मुलीला न्याय मिळवून देण्याची भावनिक विनंती केली. या घटनेने उपस्थित नागरिकही हळहळ व्यक्त करताना दिसून आले.

प्रकरणाचे गांभीर्य लक्षात घेऊन गोकाक शहर पोलीस ठाण्यात संबंधित कायद्यांनुसार गुन्हा नोंदविण्यात आला आहे. संशयित आरोपी शिक्षकाला ताब्यात घेण्यात आले असून, सर्व संबंधित बाबींची सखोल चौकशी सुरू असल्याची माहिती पोलिसांनी दिली आहे.

या प्रकरणात पीडित अल्पवयीन मुलींच्या ओळखीचे संरक्षण करण्याचे आवाहन प्रशासनाने केले असून, कायद्यानुसार पुढील प्रक्रिया सुरू आहे.

The post गोकाकमधील कोचिंग सेंटरमध्ये अल्पवयीन विद्यार्थिनींवरील लैंगिक अत्याचाराचा आरोप appeared first on News 24 Tass Marathi.

गोकाक : गोकाक परिसरात सायंकाळी फिरण्यासाठी गेलेल्या एका युवकाचा पाय घसरून पाण्यात पडल्याने त्याचा दुर्दैवी मृत्यू झाला. घटनेची माहिती मिळताच बेळगाव येथील सोशल वर्कर रेस्क्यू टीम, राज्य आपत्ती प्रतिसाद दल (एसडीआरएफ) आणि गोकाक अग्निशमन दलाने संयुक्तपणे शोधमोहीम हाती घेत मृतदेह बाहेर काढण्यात यश मिळवले.

घटनेची माहिती मिळताच रात्री उशिरा सोशल वर्कर रेस्क्यू टीम घटनास्थळी दाखल झाली. त्यानंतर एसडीआरएफ आणि अग्निशमन दलाच्या जवानांसह समन्वय साधत शोधकार्य सुरू करण्यात आले. अंधार, पाण्याचा वेग आणि प्रतिकूल परिस्थिती असूनही सर्व यंत्रणांनी अथक प्रयत्न करत युवकाचा मृतदेह शोधून बाहेर काढला.

या बचाव मोहिमेत सोशल वर्कर रेस्क्यू टीमचे अवधूत तुडवेकर, पद्मप्रसाद हुली, निलेश हिरेहोळी आणि मायकेल पिंटो यांनी धाडस, तत्परता आणि सेवाभावाचे उत्कृष्ट उदाहरण घालून दिले. त्यांच्या कार्याचे स्थानिक नागरिकांसह प्रशासनानेही कौतुक केले.

या दुर्दैवी घटनेनंतर बचाव पथकाने नागरिक आणि पर्यटकांना पावसाळ्यात जलाशय परिसरात विशेष सावधगिरी बाळगण्याचे आवाहन केले आहे. धबधबे, नद्या, तलाव किंवा इतर पाणवठ्यांच्या परिसरात अनावश्यक धाडस टाळावे, पाण्याचा वेग आणि खोलीचा अंदाज नसल्यास पाण्यात उतरू नये तसेच प्रशासनाने जारी केलेल्या सुरक्षा सूचनांचे काटेकोरपणे पालन करावे, असे आवाहन करण्यात आले आहे.

The post गोकाकमध्ये पाण्यात बुडालेल्या युवकाचा मृतदेह शोधण्यात यश appeared first on News 24 Tass Marathi.

बेळगाव : बेळगाव-गोकाक मार्गावरील भीषण हिट अँड रन प्रकरणाचा मारिहाळ पोलिसांनी यशस्वीपणे छडा लावत अपघातास कारणीभूत ठरलेल्या टिप्परसह चालकाला अटक केली आहे. सीसीटीव्ही फुटेज आणि तांत्रिक तपासाच्या आधारे आरोपीपर्यंत पोहोचण्यात पोलिसांना यश आले.

१ जुलै रोजी सकाळी चंदगड येथील राजू रामा अष्टेकर (वय ४६) हे मुच्चंडी गावाजवळील फळांच्या दुकानासमोरून पायी जात असताना भरधाव टिप्परने त्यांना जोरदार धडक दिली. अपघातानंतर चालक घटनास्थळावरून पसार झाला. या भीषण अपघातात अष्टेकर यांचा जागीच मृत्यू झाला.

या प्रकरणी मृताच्या नातेवाईक लक्ष्मीबाई गंगाप्पा कुकडोळी (रा. लक्ष्मीगल्ली, सुळेभावी) यांनी दिलेल्या फिर्यादीवरून मारिहाळ पोलीस ठाण्यात गुन्हा दाखल करण्यात आला. तपासादरम्यान पोलिसांनी घटनास्थळ परिसरातील सीसीटीव्ही फुटेजची बारकाईने पडताळणी केली. त्यामध्ये पोपटी रंगाचे इंजिन आणि लाल रंगाची बॉडी असलेला KA-22/B-1610 क्रमांकाचा टिप्पर अपघातास कारणीभूत असल्याचे निष्पन्न झाले.

त्यानंतर पोलिसांनी तातडीने कारवाई करून खानापूर तालुक्यातील प्रभुनगर येथील रहिवासी व सध्या कणबर्गी येथे वास्तव्यास असलेल्या टिप्पर चालक आदृश्यप्पा गंगाय्या मास्तमर्डी याला अटक केली. चौकशीदरम्यान त्याने गुन्ह्याची कबुली दिल्याची माहिती पोलिसांनी दिली.

वैज्ञानिक तपासपद्धती, सीसीटीव्ही विश्लेषण आणि तांत्रिक पुराव्यांच्या आधारे अवघ्या काही दिवसांत या हिट अँड रन प्रकरणाचा उलगडा करणाऱ्या मारिहाळ पोलीस पथकाचे शहर पोलीस आयुक्त, पोलीस उपायुक्त आणि वरिष्ठ अधिकाऱ्यांनी विशेष कौतुक केले आहे.

The post हिट अँड रन प्रकरणाचा छडा ; टिप्पर चालकाला अटक appeared first on News 24 Tass Marathi.

गोकाक : राज्यात मान्सूनने जोर धरताच बेळगावचा ‘नायगारा’ म्हणून ओळखला जाणारा गोकाक धबधबा पुन्हा एकदा खळाळत कोसळू लागला आहे. सततच्या पावसामुळे धबधब्यातील पाण्याचा प्रवाह मोठ्या प्रमाणात वाढला असून, निसर्गाचे हे मनमोहक रूप पाहण्यासाठी पर्यटकांची मोठी गर्दी होत आहे.

गेल्या काही दिवसांपासून धबधब्याच्या परिसरात झालेल्या मुसळधार पावसामुळे पाण्याची आवक वाढली असून, धबधबा पूर्ण जोमात वाहत आहे. खळाळत कोसळणाऱ्या पाण्याचा गडगडाट आणि परिसरातील हिरवळ यामुळे पर्यटकांना निसर्गसौंदर्याची अनोखी मेजवानी मिळत आहे. राज्याच्या विविध भागांतून पर्यटक गोकाक धबधब्याकडे आकर्षित होत आहेत.

दरम्यान, पाण्याची पातळी वाढल्याने जिल्हा प्रशासनाने सुरक्षेच्या दृष्टीने आवश्यक उपाययोजना केल्या आहेत. पर्यटकांनी धोकादायक ठिकाणी जाणे टाळावे, सेल्फीच्या मोहापायी जीव धोक्यात घालू नये तसेच मुलांसह येणाऱ्या पालकांनी विशेष दक्षता घ्यावी, असे आवाहन करण्यात आले आहे. स्थानिक पोलीस व पर्यटन विभागाने घालून दिलेल्या सुरक्षा सूचनांचे पालन करण्याचेही प्रशासनाने आवाहन केले आहे.

The post खळाळत कोसळणारा गोकाक धबधबा पर्यटकांना खुणावतोय appeared first on News 24 Tass Marathi.

गोकाक : बेळगाव जिल्ह्याच्या गोकाक तालुक्यातील ग्रामीण पोलीस ठाण्याच्या पथकाने दुचाकी चोरीच्या प्रकरणाचा यशस्वी छडा लावत बाईक चोरणाऱ्या आरोपींना अटक केली आहे. आरोपींकडून विविध पोलीस ठाण्यांच्या हद्दीतून चोरी करण्यात आलेल्या आठ मोटारसायकली जप्त करण्यात आल्या असून, या कारवाईमुळे दुचाकी चोरीच्या अनेक गुन्ह्यांचा उलगडा झाला आहे.

पोलिसांनी दिलेल्या माहितीनुसार, अटक करण्यात आलेल्या आरोपींची कसून चौकशी केली असता त्यांनी विविध ठिकाणांहून मोटारसायकली चोरी केल्याची कबुली दिली. त्यानुसार पोलिसांनी आरोपींकडून चोरीच्या एकूण आठ मोटारसायकली जप्त केल्या. जप्त करण्यात आलेल्या वाहनांची किंमत लाखो रुपयांच्या घरात असल्याचे सांगण्यात आले आहे.

गोकाक ग्रामीण पोलीस ठाण्याचे अधिकारी आणि कर्मचाऱ्यांनी समन्वयाने ही यशस्वी कारवाई केली. अटक करण्यात आलेल्या आरोपींना न्यायालयासमोर हजर केले असता त्यांची न्यायालयीन कोठडीत रवानगी करण्यात आली असून, या प्रकरणाचा पुढील तपास गोकाक ग्रामीण पोलीस करत आहेत.

The post गोकाक ग्रामीण पोलिसांकडून दुचाकी चोरट्यांना अटक appeared first on News 24 Tass Marathi.

बेळगाव : जिल्ह्यातील हुक्केरी तालुक्यात मालमत्ता विक्रीच्या वादातून सख्ख्या मोठ्या भावाने लहान भावाची दगडाने ठेचून आणि गळा आवळून हत्या केल्याची धक्कादायक घटना उघडकीस आली आहे. या प्रकरणातील मुख्य आरोपी मोठ्या भावाला पोलिसांनी ताब्यात घेतल्याची माहिती जिल्हा पोलीस अधीक्षक के. रामराजन यांनी पत्रकार परिषदेत दिली.

मृताचे नाव राजू सिद्धप्पा रुद्रप्पगोळ (वय ४५) असे असून, त्याचा मोठा भाऊ संजू रुद्रप्पगोळ (वय ४९) हा या प्रकरणातील मुख्य आरोपी आहे. पोलिसांनी दिलेल्या माहितीनुसार, घोडगेरी गावातील तीन एकर जमीन विक्रीच्या कारणावरून दोन्ही भावांमध्ये वाद सुरू होता. या वादाचे पर्यवसान तीव्र भांडणात झाले. संतापाच्या भरात आरोपी संजूने लहान भाऊ राजूच्या डोक्यात दगडाने जोरदार प्रहार केला. त्यानंतर गळा आवळून त्याची हत्या केल्याचा आरोप आहे.

हे दोन्ही भाऊ मूळचे हुक्केरी तालुक्यातील घोडगेरी गावचे असले तरी गोकाक तालुक्यातील अंकलगी गावातील एका पडक्या इमारतीत वास्तव्यास होते. मोलमजुरी करून ते उदरनिर्वाह करत होते. दररोज रात्री अंकलगी मठात जेवण करून ते मुक्कामासाठी त्या इमारतीत परतत असत.

या घटनेप्रकरणी सुरुवातीला दोन्ही कुटुंबीयांकडून कोणतीही तक्रार दाखल करण्यात आली नव्हती. मात्र, पोलिसांनी घटनेची माहिती मिळाल्यानंतर तपास सुरू करून पुढील कायदेशीर कारवाई हाती घेतली असल्याची माहिती जिल्हा पोलीस अधीक्षक के. रामराजन यांनी दिली.

The post जमीन विक्रीचा वाद जीवावर बेतला appeared first on News 24 Tass Marathi.

गोकाक : बेळगाव जिल्ह्याच्या गोकाक तालुक्यातील बेंडिगेरी गावात एका तरुणाने आत्महत्येपूर्वी लिहिलेल्या पत्रात पोलीस अधिकाऱ्यांसह कर्जदारांची नावे नमूद करत गळफास घेऊन जीवन संपवल्याची धक्कादायक घटना उघडकीस आली आहे. कर्जदारांकडून जीवे मारण्याच्या धमक्या मिळत असून पोलिसांकडूनही न्याय मिळाला नसल्याचा आरोप या पत्रात करण्यात आला आहे.

मृताचे नाव रवींद्र दानव्वागोळ असे असून त्यांनी राहत्या घरी गळफास घेऊन आत्महत्या केली. आत्महत्येपूर्वी लिहिलेल्या पत्रात लक्ष्मण चंदरगी आणि भरमप्पा पूजारी यांच्याकडून आठ लाख रुपयांचे कर्ज घेतल्याचा उल्लेख करण्यात आला आहे. कर्जाची रक्कम परत मागितल्यानंतर संबंधितांकडून जीवे मारण्याच्या धमक्या दिल्या जात असल्याचा आरोप त्यांनी केला आहे.

यासंदर्भात पोलिसांकडे तक्रार करूनही कोणतीही दखल घेतली गेली नाही, असेही पत्रात नमूद करण्यात आले आहे. तसेच पीएसआय आनंद आणि तत्कालीन डीवायएसपी मुल्ला यांच्याकडूनही अन्याय झाल्याचा आरोप रवींद्र यांनी केला आहे.

घटनेची माहिती मिळताच मूडलगी पोलीस ठाण्याचे अधिकारी घटनास्थळी दाखल झाले. मृताच्या पत्नीने दिलेल्या तक्रारीवरून गुन्हा नोंद करण्यात आला असून आत्महत्येच्या पत्रातील आरोप, त्याची सत्यता आणि संबंधित परिस्थितीचा पोलीस सखोल तपास करत आहेत. या घटनेमुळे परिसरात मोठी खळबळ उडाली आहे.

The post ‘डेथ नोट’ लिहून तरुणाची आत्महत्या appeared first on News 24 Tass Marathi.

बेळगाव : आई-वडिलांच्या तीव्र विरोधाला न जुमानता लग्न केलेल्या गोकाक येथील प्रेमीयुगुलाने आज बेळगाव जिल्हा पोलीस अधीक्षक कार्यालयात धाव घेत संरक्षणाची मागणी केली आहे. “जात वेगळी असली तरी प्रेम एकच आहे,” असे म्हणत या जोडप्याने आपल्या सुरक्षिततेसाठी पोलिसांचे सहकार्य मागितले.

गोकाक फॉल्स परिसरातील शिवाप्पा मूकगोळ आणि विमला भोवी हे गेल्या दोन वर्षांपासून प्रेमसंबंधात होते. कुटुंबीयांच्या परवानगीशिवाय त्यांनी मंदिरात विवाह केला. मात्र विवाहाची माहिती मिळताच मुलीच्या कुटुंबीयांनी तिच्यावर घरातच नजरकैद केल्याचा आरोप करण्यात आला आहे. नजरकैदेत असतानाही विमलाने घरातून सुटका करून थेट एसपी कार्यालय गाठले आणि आपल्या पतीसह संरक्षणाची मागणी केली.

यावेळी विमलाने सांगितले की, ती बी.ए. प्रथम वर्षात शिक्षण घेत आहे. “शिवाप्पाच्या घरच्यांनी आमच्या लग्नाला मान्यता दिली आहे, पण माझ्या कुटुंबीयांनी मला घराबाहेर जाऊ दिले नाही. मी कशीबशी तिथून पळून आले,” अशी तिने आपली व्यथा मांडली.

अनुसूचित जातीतील असलेल्या या नवविवाहित जोडप्याने त्यांच्या वैवाहिक आयुष्यात कुटुंबीयांकडून कोणताही अडथळा येऊ नये, यासाठी पोलिस संरक्षण देण्याची मागणी केली आहे.

The post आई-वडिलांच्या विरोधात लग्न appeared first on News 24 Tass Marathi.

एसपी के. रामराजन यांनी पत्रकार परिषदेत स्पष्ट केले की, काही लोक अवैध धंद्यांवर पोलिसांनी पायबंद घालल्यामुळे सूडबुद्धीने कर्मचाऱ्यांविरोधात खोट्या तक्रारी करत आहेत. अशा तक्रारींची सत्यता पडताळल्यानंतरच योग्य ती कारवाई केली जाईल.

नागरिकांनी चोरीला गेलेले दागिने किंवा मोबाईल न घाबरता स्थानिक पोलिस ठाण्यात तातडीने फिर्याद द्यावी, असे आवाहन प्रशासनाकडून करण्यात आले आहे. रायबाग व कागवाड तालुक्यात सुरू असलेल्या मटका व्यवसाय, रेशन तांदळाची तस्करी आणि अवैध दारू विक्रीविषयी माहिती मिळताच कठोर कायदेशीर कारवाई करण्याचे आदेश एसपींनी दिले आहेत.

गोकाकमध्ये बेकायदेशीर सावकारी (मीटर व्याज) संदर्भात आलेल्या तक्रारींच्या चौकशीसाठी पोलिसांनी व्याजाच्या नावाखाली मालमत्तांची चुकीची नोंदणी रद्द करण्याचे आश्वासन दिले. पीडितांनी थेट पोलिसांकडे येऊन तक्रार करावी, असेही त्यांनी सांगितले. आरबीआयच्या नियमांचे उल्लंघन करून व्याज वसुली करणाऱ्यांवर नवीन व जुन्या कायद्यानुसार कडक कारवाई केली जाईल, असा इशारा त्यांनी दिला.

एसपींनी गोकाक उपविभागातील पोलिसांनी रात्रंदिवस मेहनत घेऊन चोरीचा मुद्देमाल हस्तगत केल्याबद्दल पथकाचे कौतुक केले. पत्रकार परिषदेला गोकाकचे डीएसपी रवी नायक, सीपीआय आर. सुरेशबाबू, श्रीशैल बॅकूड, पीएसआय के. वालीकार, कुरण मोहिते, यमनप्पा मांग, आनंद, निखिल कांबळे यांच्यासह इतर पोलीस कर्मचारी उपस्थित होते.

The post गोकाक पोलिसांकडून चोरीचा मुद्देमाल मूळ मालकांना सुपूर्द appeared first on News 24 Tass Marathi.