या उपक्रमांतर्गत प्रत्येक लाभार्थ्याला एका महिन्यासाठी पुरेल असे पोषण किट देण्यात आले. हा उपक्रम सलग सहा महिने राबविण्याचे नियोजन असून, त्याद्वारे लाभार्थ्यांना सातत्याने पोषणविषयक मदत मिळणार आहे. तसेच त्यांचे आरोग्य आणि सर्वांगीण कल्याण सुधारण्यास मदत होणार आहे.

हा उपक्रम यशस्वी करण्यासाठी मोलाचे सहकार्य केल्याबद्दल क्लबतर्फे डॉ. अश्विनी नरसन्नावर, शिवम क्रशर्स आणि पर्याय फाउंडेशन यांचे मनःपूर्वक आभार व्यक्त करण्यात आले.

तसेच कार्यक्रमाच्या यशस्वी आयोजनासाठी समन्वय साधून विशेष परिश्रम घेतल्याबद्दल कार्यक्रमाच्या अध्यक्षा रोटेरियन रक्षा उपाध्ये यांचे विशेष कौतुक करण्यात आले.

या उपक्रमासाठी रोटरी क्लब ऑफ बेळगाव दर्पणच्या अध्यक्षा रोटेरियन डॉ. स्फूर्ती मस्तिहोळी आणि सचिव रोटेरियन ज्योती कुलकर्णी यांचे मार्गदर्शन व सहकार्य लाभले.

The post रोटरी क्लब ऑफ बेळगाव दर्पणतर्फे बैलहोंगल येथे २० लाभार्थ्यांना पोषण किटचे वितरण appeared first on News 24 Tass Marathi.

बैलहोंगल : बेळगाव जिल्ह्यातील बैलहोंगल तालुक्यातील इंचल गावात काम सुरू असताना कामगारांना १४ सोन्याची नाणी सापडल्याची घटना समोर आली आहे. सापडलेली नाणी कोणतीही हयगय न करता कामगारांनी ग्रामपंचायत आणि महसूल विभागाच्या अधिकाऱ्यांकडे सुपूर्द केली. त्यांच्या प्रामाणिकपणाचे सर्वत्र कौतुक होत आहे.

इंचल गावातील शासकीय वसतिगृहाजवळ काही काम सुरू होते. यावेळी माती उकरताना कामगारांना एका मडक्यात सोन्याची नाणी आढळून आली. एकूण १४ नाणी असून त्यांचे वजन सुमारे ५४.८ ग्रॅम आहे. या नाण्यांची किंमत आठ लाख रुपयांहून अधिक असल्याचा प्राथमिक अंदाज आहे.

नाणी सापडताच कामगारांनी ती तातडीने ग्रामपंचायत आणि महसूल अधिकाऱ्यांच्या स्वाधीन केली. महसूल विभागाने घटनास्थळी पंचनामा करून नाणी ताब्यात घेतली. त्यानंतर सवदत्तीचे तहसीलदार मल्लिकार्जुन हेग्गण्णावर यांच्या माध्यमातून हा ऐतिहासिक ठेवा सरकारी तिजोरीत जमा करण्यात आला.

• पश्चिम गंग किंवा विजयनगर काळातील नाणी?

प्राथमिक माहितीनुसार, ही सोन्याची नाणी दहाव्या ते पंधराव्या शतकाच्या कालखंडातील असण्याची शक्यता व्यक्त करण्यात येत आहे. पश्चिम गंग घराणे किंवा विजयनगर साम्राज्याच्या काळाशी त्यांचा संबंध असू शकतो, असा प्राथमिक अंदाज आहे.

या नाण्यांवर हत्तीचे चित्र अंकित असून त्यांना ‘गजपती गद्याण’ किंवा ‘गजपती वराह’ असे संबोधले जाते. नाण्यांचा नेमका कालखंड, ऐतिहासिक पार्श्वभूमी आणि पुरातत्त्वीय महत्त्व निश्चित करण्यासाठी ती तज्ज्ञांकडे तपासणीसाठी पाठवण्यात आली आहेत.

सापडलेला मौल्यवान ऐतिहासिक ठेवा स्वतःकडे न ठेवता प्रशासनाच्या स्वाधीन करणाऱ्या कामगारांच्या प्रामाणिकपणाचे तालुका प्रशासन आणि ग्रामस्थांनी कौतुक केले. त्यांच्या या कृतीबद्दल त्यांचा गौरवही करण्यात आला.

The post इंचलमध्ये कामादरम्यान सापडली १४ सोन्याची नाणी appeared first on News 24 Tass Marathi.

बैलहोंगल : सार्वजनिक ठिकाणी दादागिरी करून नागरिकांना त्रास देणाऱ्या तसेच सरकारी अधिकाऱ्यांना खोट्या गुन्ह्यांत अडकवण्याची धमकी देणाऱ्या कुख्यात गुंडाला बैलहोंगल पोलिसांनी अटक केली आहे. न्यायालयाने वॉरंट बजावूनही फरार असलेल्या आरोपीला गुप्त माहितीच्या आधारे ताब्यात घेण्यात आले.

अटक करण्यात आलेल्या आरोपीचे नाव शिवानंद कोलकार असून, तो बैलहोंगल परिसरात नागरिकांना धमकावणे आणि दहशत निर्माण करण्यासाठी कुख्यात असल्याचे पोलिसांनी सांगितले. सरकारी अधिकाऱ्यांवर जातीवाचक शिवीगाळ केल्याचे खोटे गुन्हे दाखल करण्याची धमकी देत त्यांच्यावर दबाव टाकत असल्याचा त्याच्यावर आरोप आहे.

अनेक गुन्ह्यांमध्ये आरोपीचा सहभाग असून, त्याच्याविरोधात न्यायालयाने वॉरंट जारी केले होते. मात्र, तो पोलिसांना चकवा देत फरार होता. गुप्त माहितीच्या आधारे बैलहोंगल पोलीस ठाण्याच्या पथकाने सापळा रचून त्याला अटक केली.

अटक केलेल्या आरोपीला न्यायालयात हजर करण्यात आले असून, न्यायालयाने त्याची न्यायालयीन कोठडीत रवानगी केली आहे. या कारवाईमुळे परिसरातील नागरिकांनी समाधान व्यक्त केले असून, गुन्हेगारीविरोधात पोलिसांच्या कारवाईचे स्वागत केले आहे.

The post सरकारी अधिकाऱ्यांना धमकावणारा कुख्यात गुंड अटकेत appeared first on News 24 Tass Marathi.

बैलहोंगल : बेळगाव जिल्ह्यातील बैलहोंगल तालुक्यातील बेळवडीजवळ भरधाव कारने मेंढ्यांच्या कळपाला जोरदार धडक दिल्याने ४८ मेंढ्यांचा जागीच मृत्यू झाला. या भीषण अपघातात १५ हून अधिक मेंढ्या गंभीर जखमी झाल्या असून, अपघातानंतर कारचालक वाहन घटनास्थळीच सोडून फरार झाला.

मिळालेल्या माहितीनुसार, बैलहोंगलहून बेळवडीकडे जाणारी भरधाव कार रस्त्यावरून जात असलेल्या मेंढ्यांच्या कळपावर आदळली. या कळपातील मेंढ्या केंगाणूर येथील चंद्रप्पा हित्तलमनी आणि दोडवाड येथील बीरप्पा यांच्या मालकीच्या होत्या.

या अपघातात मेंढपाळांचे लाखो रुपयांचे नुकसान झाले असून, अनेक गाभण मेंढ्यांचाही मृत्यू झाल्याने त्यांना मोठा आर्थिक फटका बसला आहे. अपघातानंतर चालकाने घटनास्थळावरून पळ काढल्याने नागरिकांनी संताप व्यक्त केला.

घटनेची माहिती मिळताच बैलहोंगल पोलिसांनी घटनास्थळी धाव घेऊन पंचनामा केला. निष्काळजीपणामुळे हा अपघात झाल्याचा प्राथमिक अंदाज व्यक्त करण्यात आला असून, फरार चालकाचा शोध सुरू असल्याची माहिती पोलिसांनी दिली.

The post भरधाव कारने मेंढ्यांच्या कळपाला चिरडले appeared first on News 24 Tass Marathi.

बैलहोंगल : येथील नयानगरजवळील मलप्रभा नदीत आत्महत्येच्या उद्देशाने उडी घेतलेल्या एका तरुणीचा जीव सर्पमित्र आणि समाजसेवक मल्लिकार्जुन गाणिगेर यांनी स्वतःचा जीव धोक्यात घालून वाचवला. त्यांच्या धाडसी कृतीमुळे तरुणीला वेळेत बाहेर काढण्यात यश आले असून, परिसरात त्यांच्या शौर्याचे कौतुक होत आहे.

मिळालेल्या माहितीनुसार, नयानगरजवळील मलप्रभा नदीच्या पुलावरून एका तरुणीने अचानक नदीत उडी घेतली. नदीतील पाण्याचा प्रवाह तीव्र असल्याने घटनास्थळी उपस्थित असलेल्या नागरिकांमध्ये घबराट पसरली. परिस्थिती गंभीर असूनही कोणीही नदीत उतरण्याचे धाडस करत नव्हते.

घटनेची माहिती मिळताच सर्पमित्र व समाजसेवक मल्लिकार्जुन गाणिगेर तातडीने घटनास्थळी पोहोचले. कोणताही विलंब न करता त्यांनी नदीत उडी घेत बुडणाऱ्या तरुणीपर्यंत पोहोचून तिला सुखरूप बाहेर काढले. त्यानंतर तिला तातडीने प्राथमिक उपचार देण्यात आले आणि पुढील कार्यवाहीसाठी पोलीस ठाण्यात नेण्यात आले.

या धाडसी बचावकार्याबद्दल पोलीस निरीक्षक प्रमोद यलीगार यांनी मल्लिकार्जुन गाणिगेर यांच्या शौर्याचे आणि प्रसंगावधानाचे कौतुक केले. अशा प्रकारचे समाजसेवक समाजासाठी प्रेरणादायी असल्याचे त्यांनी सांगितले.

मल्लिकार्जुन गाणिगेर यांच्या तत्परता, धाडस आणि सेवाभावी वृत्तीमुळे एका तरुणीचा जीव वाचल्याने उपस्थित नागरिकांनीही त्यांच्या कार्याचे मनापासून कौतुक केले.

The post मलप्रभा नदीत उडी घेतलेल्या तरुणीला जीवदान appeared first on News 24 Tass Marathi.

बैलहोंगल : बैलहोंगल तालुक्यातील चिवतगुंडी गावात घडलेल्या घरफोडीच्या गुन्ह्याचा पोलिसांनी अवघ्या २४ तासांत छडा लावत आरोपीला अटक केली. आरोपीकडून चोरीस गेलेले सोन्याचे दागिने आणि रोख रक्कम असा सुमारे ५ लाख ९७ हजार रुपयांचा मुद्देमाल जप्त करण्यात आला आहे.

महांतेश बसप्पा बोगूर आणि त्यांचे कुटुंबीय शेतात कामासाठी गेले असताना त्याच गावातील प्रकाश रायप्पा मुल्ला (वय ४०) याने त्यांच्या घरात घुसून चोरी केली. आरोपीने घरातील सुमारे ५८ ग्रॅम वजनाचे अंदाजे ५.४९ लाख रुपये किमतीचे सोन्याचे दागिने तसेच ४८ हजार रुपयांची रोकड लंपास केली होती.

याप्रकरणी महांतेश बोगूर यांनी बैलहोंगल पोलीस ठाण्यात तक्रार दाखल केल्यानंतर पोलीस उपअधीक्षक डॉ. वीरय्या हिरेमठ यांच्या मार्गदर्शनाखाली पोलीस निरीक्षक प्रमोद सी. यलिगार आणि त्यांच्या पथकाने तपास सुरू केला.

तांत्रिक माहिती आणि गोपनीय सूत्रांच्या आधारे पोलिसांनी अवघ्या २४ तासांत आरोपीचा माग काढत त्याला अटक केली. त्याच्याकडून चोरीस गेलेले सर्व सोन्याचे दागिने आणि रोख रक्कम जप्त करण्यात आली आहे.

या जलद आणि प्रभावी कारवाईबद्दल बेळगाव जिल्ह्याचे पोलीस अधीक्षक के. रामराजन यांनी बैलहोंगल पोलीस पथकाचे अभिनंदन करून त्यांच्या कामगिरीचे कौतुक केले.

The post बैलहोंगल पोलिसांकडून अवघ्या २४ तासांत चोरीचा छडा appeared first on News 24 Tass Marathi.

बेळगाव : जिल्ह्यातील बैलहोंगल तालुक्यातील वण्णूर गावात मुलगा झाल्याच्या आनंदात पार्टी मागितल्याच्या कारणावरून झालेल्या वादातून एका तरुणाने आपल्या मित्राची दगडाने ठेचून हत्या केल्याची धक्कादायक घटना उघडकीस आली आहे. या प्रकरणातील फरार आरोपीला नेसरगी पोलिसांनी अवघ्या ४८ तासांत अटक केली असल्याची माहिती जिल्हा पोलीस अधीक्षक के. रामराजन यांनी पत्रकार परिषदेत दिली.

पोलिसांनी दिलेल्या माहितीनुसार, २६ जून २०२६ रोजी वण्णूर गावातील हनुमंतप्पा यमनप्पा इतापी याने त्याचा मित्र विश्वनाथ सिद्धय्या पूजेरी (वय २९) याच्याकडे मुलगा झाल्याच्या आनंदात पार्टीची मागणी केली होती. यावरून दोघांमध्ये वाद झाला. वादाचे रूपांतर हाणामारीत झाल्यानंतर संतापलेल्या विश्वनाथने हनुमंतप्पाच्या डोक्यावर दगडाने वार केला. या हल्ल्यात हनुमंतप्पाचा घटनास्थळीच मृत्यू झाला. त्यानंतर आरोपी घटनास्थळावरून फरार झाला.

या घटनेप्रकरणी मृताच्या वडिलांनी दिलेल्या फिर्यादीवरून नेसरगी पोलीस ठाण्यात खुनाचा गुन्हा दाखल करण्यात आला. प्रकरणाचे गांभीर्य लक्षात घेऊन जिल्हा पोलीस अधीक्षक के. रामराजन, अप्पर पोलीस अधीक्षक रामुगोंडा बसरगी आणि बैलहोंगलचे उपविभागीय पोलीस अधिकारी डॉ. वीरय्या हिरेमठ यांच्या मार्गदर्शनाखाली नेसरगीचे पोलीस निरीक्षक गजानन नाईक यांच्या नेतृत्वाखाली विशेष तपास पथकाची स्थापना करण्यात आली.

तपास पथकाने वेगाने तपासाची चक्रे फिरवत तांत्रिक आणि गोपनीय माहितीच्या आधारे २८ जून २०२६ रोजी आरोपी विश्वनाथ पूजेरी याला अटक केली. त्याची न्यायालयीन कोठडीत रवानगी करण्यात आली असून, अवघ्या ४८ तासांत आरोपीला जेरबंद करणाऱ्या पोलीस पथकाचे जिल्हा पोलीस अधीक्षकांनी विशेष कौतुक केले आहे.

The post मुलगा झाल्याची पार्टी मागितल्याच्या वादातून मित्राची दगडाने ठेचून हत्या appeared first on News 24 Tass Marathi.

बेळगाव : बैलहोंगल तालुक्यातील हन्निकेरी गावात पारंपरिक यात्रेदरम्यान एक धक्कादायक घटना घडली. गावातील जुने राजकीय वैमनस्य या घटनामागील मुख्य कारण असल्याचे पोलिसांनी सांगितले. यात्रेदरम्यान गावातील रहिवासी संगनगौडा पाटील, (वय ५० वर्ष) आपल्या विरोधकांच्या घरासमोर नाचत होते, तेव्हाच त्यांच्या विरोधकांनी त्यांच्यावर हल्ला केला.

याबाबत घटना स्थळावरून प्राप्त माहितीनुसार, यात्रेची मिरवणूक सुरू असताना संगनगौडा पाटील त्यांच्या विरोधकांच्या घरासमोर नाचत होते. यावरून आरोपी गटाने त्यांना “आमच्या घरासमोर नाचू नका, पुढे व्हा” असे सांगितले. या छोट्याशा वादाचा परिणाम आरोपींचा गट अचानक हल्ला करण्यास उतरला आणि कोयते, कुऱ्हाडी, साखळ्या, काठ्या आणि उसाच्या काठ्या यांसारख्या प्राणघातक शस्त्रांचा वापर करून संगनगौडा यांच्यावर निर्घृण हल्ला केला. रक्ताच्या थारोळ्यात अडकलेल्या संगनगौडा यांना तातडीने जिल्हा रुग्णालयात नेण्याचा प्रयत्न झाला, परंतु वाटेतच त्यांचा मृत्यू झाला. या घटनेमुळे हन्निकेरी गावात तणावाचे वातावरण निर्माण झाले.

घटनेच्या त्वरित पाठपुराव्यानंतर पोलीसांनी आठ आरोपींना अटक केली आहे. अटक केलेल्यांची नावे अशी आहेत: देमप्पा बालगन्नवर, मंजुनाथ बालगन्नवर, रुद्रप्पा बालगन्नवर, विजया बालगन्नवर, सुरप्पा बालगन्नवर, सिद्धप्पा सिंगडी, नागराज बालगन्नवर आणि बसवंतप्पा बालगन्नवर.

जिल्हा पोलीस अधीक्षक के. रामराजन यांनी पत्रकार परिषदेत सांगितले की, जुने वैर या घटनेचे मूळ कारण आहे आणि गावात शांतता राखण्यासाठी पोलीस बंदोबस्त तैनात करण्यात आला आहे.

The post बैलहोंगल तालुक्यातील हन्निकेरी यात्रेत पूर्व वैमनस्यातून संगनगौडा पाटील यांची हत्या appeared first on News 24 Tass Marathi.

बेळगाव / प्रतिनिधी

बेळगाव जिल्ह्यातील बैलहोंगल तालुक्यातील गोवनकोप्प येथे चारित्र्याच्या संशयातून पतीने पत्नीची दगडाने ठेचून हत्या केल्याची धक्कादायक घटना उघडकीस आली आहे.

या प्रकरणाचा तपास करताना जिल्हा पोलीस अधीक्षक के. रामराजन यांनी पत्रकार परिषदेत माहिती दिली की, गोवनकोप्प येथील रहिवासी बसवराज गिरेप्पा जोडाळ्ळी याने पत्नी शिवक्का हिची हत्या केल्याचे स्पष्ट झाले आहे. या दांपत्याचा प्रेमविवाह झाला असून त्यांना तीन मुले आहेत. गेल्या सहा वर्षांपासून आरोपी पत्नीच्या चारित्र्यावर संशय घेऊन तिला मानसिक व शारीरिक त्रास देत होता. या त्रासाला कंटाळून शिवक्का दोन मुलांसह माहेरी राहत होती. आरोपीने तिला यापूर्वी जीवे मारण्याच्या धमक्या दिल्याची तक्रार दोडवाड पोलीस ठाण्यात नोंदवण्यात आली होती.

शनिवारी सकाळी साडेसातच्या सुमारास आरोपी माहेरी जाऊन शिवक्काला शिवीगाळ करत घराबाहेर ओढून आणले. त्यानंतर भररस्त्यात तिच्यावर हल्ला करून मोठा दगड डोक्यावर व पायावर मारत तिची जागीच हत्या केली. या घटनेमुळे परिसरात खळबळ उडाली.

घटनेनंतर दोडवाड पोलिसांनी तत्काळ कारवाई करत काही तासांतच आरोपीला अटक केली. ही कारवाई जिल्हा पोलीस अधीक्षक के. रामराजन यांच्या मार्गदर्शनाखाली करण्यात आली असून तपास पथकाचे कौतुक होत आहे.

The post चारित्र्याच्या संशयातून पतीकडून पत्नीची दगडाने ठेचून हत्या appeared first on News 24 Tass Marathi.

बैलहोंगल / वार्ताहर

बैलहोंगल तालुक्यातील दोडवाड येथे घडलेल्या खून प्रकरणाचा उलगडा करण्यात पोलिसांना अवघ्या एका दिवसात यश मिळाले आहे. घरासमोरील रस्त्याच्या वापरावरून निर्माण झालेल्या किरकोळ वादातूनच नातेवाईकाची हत्या करून पळ काढणाऱ्या आरोपीला पोलिसांनी तात्काळ अटक केली.

कोप्प अगसी परिसरात राहणारे महेश बसय्या उपनिमठ यांचा १७ मार्च रोजी सायंकाळच्या सुमारास खून करण्यात आला होता. या घटनेप्रकरणी रुद्रय्या बसय्या उपनिमठ (वय ३६) याला पोलिसांनी अटक केली आहे.

मिळालेल्या माहितीनुसार, आरोपी आणि मृत महेश यांच्यात काही दिवसांपासून रस्त्याच्या वापरावरून वाद सुरू होता. घटनेच्या दिवशी चिकन सेंटरजवळ दोघांमध्ये पुन्हा वादावादी झाली. त्या वेळी महेश यांनी वाद मिटवण्याचा प्रयत्न केला; मात्र आरोपीने त्याचा राग मनात ठेवत नंतर संधी साधून कोयत्याने हल्ला करून त्यांचा जीव घेतला.

घटनेनंतर पोलिसांनी तातडीने तपास सुरू केला. जिल्हा पोलीस अधीक्षकांच्या मार्गदर्शनाखाली सीपीआय शिवानंद गुडगनट्टी आणि पीएसआय एच. के. पाटील यांच्या पथकाने जलद हालचाली करत १८ मार्च रोजी आरोपीला अटक करण्यात यश मिळवले.

न्यायालयात हजर केल्यानंतर आरोपीला न्यायालयीन कोठडी सुनावण्यात आली आहे. या वेगवान कारवाईमुळे पोलिसांच्या कामगिरीचे सर्वत्र कौतुक होत आहे.

The post दोडवाड खूनप्रकरणाचा २४ तासांत उलगडा appeared first on News 24 Tass Marathi.