गोकाक : राज्यात मान्सूनने जोर धरताच बेळगावचा ‘नायगारा’ म्हणून ओळखला जाणारा गोकाक धबधबा पुन्हा एकदा खळाळत कोसळू लागला आहे. सततच्या पावसामुळे धबधब्यातील पाण्याचा प्रवाह मोठ्या प्रमाणात वाढला असून, निसर्गाचे हे मनमोहक रूप पाहण्यासाठी पर्यटकांची मोठी गर्दी होत आहे.

गेल्या काही दिवसांपासून धबधब्याच्या परिसरात झालेल्या मुसळधार पावसामुळे पाण्याची आवक वाढली असून, धबधबा पूर्ण जोमात वाहत आहे. खळाळत कोसळणाऱ्या पाण्याचा गडगडाट आणि परिसरातील हिरवळ यामुळे पर्यटकांना निसर्गसौंदर्याची अनोखी मेजवानी मिळत आहे. राज्याच्या विविध भागांतून पर्यटक गोकाक धबधब्याकडे आकर्षित होत आहेत.

दरम्यान, पाण्याची पातळी वाढल्याने जिल्हा प्रशासनाने सुरक्षेच्या दृष्टीने आवश्यक उपाययोजना केल्या आहेत. पर्यटकांनी धोकादायक ठिकाणी जाणे टाळावे, सेल्फीच्या मोहापायी जीव धोक्यात घालू नये तसेच मुलांसह येणाऱ्या पालकांनी विशेष दक्षता घ्यावी, असे आवाहन करण्यात आले आहे. स्थानिक पोलीस व पर्यटन विभागाने घालून दिलेल्या सुरक्षा सूचनांचे पालन करण्याचेही प्रशासनाने आवाहन केले आहे.

The post खळाळत कोसळणारा गोकाक धबधबा पर्यटकांना खुणावतोय appeared first on News 24 Tass Marathi.

बेळगाव / प्रतिनिधी

बेळगाव महानगरपालिकेच्या सदस्यांचे शिष्टमंडळ भारतातील सर्वात स्वच्छ शहर म्हणून प्रसिद्ध असलेल्या इंदूर शहराच्या अभ्यास दौऱ्यावर गेले आहे. या दौऱ्यादरम्यान शिष्टमंडळाने तेथील घनकचरा व्यवस्थापन, स्वच्छतेच्या आधुनिक पद्धती आणि नागरिकांचा सहभाग याबाबत सविस्तर माहिती घेतली.

महापौर मंगेश पवार, उपमहापौर वाणी जोशी, सत्ताधारी पक्षाचे नेते हणमंत कोंगाळी तसेच सर्व नगरसेवकांनी या अभ्यास दौर्‍यात सहभाग घेतला. इंदूर महापालिकेच्या अधिकाऱ्यांनी बेळगावच्या प्रतिनिधींना स्वच्छता टिकवून ठेवण्यासाठी राबविण्यात येणाऱ्या योजना, तांत्रिक उपाययोजना आणि जनजागृती उपक्रमांची माहिती दिली. शिष्टमंडळातील सदस्यांनी इंदूरमधील कचरा–ते–संसाधन प्रकल्प, विभक्त कचरा संकलन प्रणाली, आणि शहराच्या स्वच्छतेसाठी वापरल्या जाणाऱ्या प्रगत तंत्रज्ञानाचा प्रत्यक्ष अनुभव घेतला.

या अभ्यास दौऱ्यामुळे बेळगाव शहरातील स्वच्छता व्यवस्थापन अधिक सक्षम आणि परिणामकारक करण्यासाठी नवीन कल्पना मिळाल्या असून, इंदूरमधील सर्वोत्तम पद्धती बेळगावमध्ये राबविण्याचा मनोदय सदस्यांनी व्यक्त केला. शिष्टमंडळाचा हा दौरा बेळगावला स्वच्छ आणि सुंदर शहर बनविण्याच्या दिशेने एक महत्त्वपूर्ण टप्पा मानला जात आहे.

The post बेळगाव महापालिकेच्या शिष्टमंडळाचा इंदूर अभ्यासदौरा appeared first on News 24 Tass Marathi.

कंग्राळी खुर्द (ता. बेळगाव) येथील सुमारे ३६ युवकांनी सर्वांचं भलं व्हावं या उद्देशाने एकत्र येऊन नुकतीच तिरुपती बालाजी यात्रा पूर्ण केली. तत्पूर्वी बुधवार दि. ९ जुलै रोजी रामदेव गल्ली कंग्राळी खुर्द येथून यात्रेला प्रारंभ केल्यानंतर दि. १० जुलै रोजी ते तिरुपती येथे पोहोचले. यानंतर चार तासात १४ किमी अंतर पार करताना ३५५० पायऱ्या चढून त्यांनी त्रिदर्शन घेतले. दर्शनासाठी सुमारे १४ तासांचा कालावधी लागला.

कोल्हापूर येथील आध्यात्मिक ऊर्जा भाविकांसाठी दिव्य प्रदक्षिणा पूर्ण करते, म्हूणन तिरुपती बालाजीचे दर्शन घेतल्यानंतर कोल्हापूरच्या महालक्ष्मीचे दर्शन घेणे अध्यात्मिक दृष्ट्या फलदायी मानले जाते. त्यामुळे परतीच्या प्रवासात दि. १३ जुलै रोजी सदर युवकांनी कोल्हापूर येथील श्री महालक्ष्मीचेही दर्शन घेतले, पुढे रामदेव गल्ली कंग्राळी खुर्द गावात पोहोचल्यानंतर यात्रेची सांगता झाली.

या यात्रेत अमर काटे, अमर, राहुल, नागेश, तेजस, बसू , विशाल, भावकन्ना, अशोक, परशुराम, चंद्रकांत, किरण, प्रशांत, प्रदीप, रुतुराज, प्रवीण, उद्धव, योगेश, चैतन्य, विजयकुमार, गजानन, शिवाजी, विष्णू, विकी, राकेश, ओम, साईराज, श्रेयस, विनित, राजू, एकनाथ, आशीर्वाद, सागर, प्रज्वल, ईश्वर, प्रशांत सुतार आदि सहभागी झाले होते.

The post कंग्राळी खुर्द येथील युवकांची तिरुपती यात्रा appeared first on News 24 Tass Marathi.

वायव्य कर्नाटक परिवहन मंडळाच्या वतीने आठवड्याला एकदा वीकेंड स्पेशल बेळगाव ते हिडकल डॅम , गोडचिनमलकी आणि गोकाक फॉल्स अशी बससेवा सुरू केली आहे. दि. ६ जुलै पासून या विशेष बस सेवेचा प्रारंभ होणार आहे. बेळगावच्या मध्यवर्ती बस स्थानकापासून सकाळी ९ वाजता ही बस सुटणार असून सायंकाळी ७ वाजता परत येणार आहे. ५० प्रवाशांच्या आसन क्षमतेची बस असून यासाठी प्रत्येकी २१० रुपये तिकीट दर असणार आहे.

The post बेळगाव परिवहनच्यावतीने वीकेंड स्पेशल बससेवा appeared first on News 24 Tass Marathi.

चंदगड : पश्चिम घाट प्रदेशात सुरू असलेल्या मुसळधार पावसामुळे बेळगाव जिल्ह्यातील धबधबे निसर्गप्रेमींना आकर्षित करत आहेत. याचप्रमाणे कर्नाटक-महाराष्ट्र सीमेलगत निसर्गाच्या कुशीत असलेला किटवाड धबधबा सध्या पर्यटकांना खुणावत आहे.

हा धबधबा बेळगाव जिल्ह्यापासून अवघ्या २० किलोमीटर अंतरावर आहे. कठीण खडकाळ दरडींमधून दुधाच्या प्रवाहाप्रमाणे खाली कोसळणाऱ्या या मनोहारी दृश्याने पर्यटकांना भुरळ घातली आहे.

युवक-युवती धबधब्यासमोर उभे राहून सेल्फी काढत, नाचत-बागडत आनंद साजरा करत आहेत. केवळ बेळगावच नव्हे, तर गोवा, महाराष्ट्र आणि राज्याच्या विविध भागांतून पर्यटक निसर्ग सौंदर्याचा आस्वाद घेण्यासाठी येथे भेट देत आहेत. महाराष्ट्रामधून बेळगाव जिल्ह्यातील नैसर्गिक सौंदर्याचा अनुभव घेण्यासाठी येणारे पर्यटकही सीमेवरील किटवाड धबधब्याला भेट देऊन इथल्या सौंदर्यावर मोहित झाले आहेत, असे पाहायला मिळत आहे.

The post किटवाड धबधबा वर्षा पर्यटनासाठी घालतोय साद appeared first on News 24 Tass Marathi.

पावसाळ्याच्या पार्श्वभूमीवर खानापूर (जि. बेळगाव) तालुक्यातील चिकले धबधबा पर्यटकांसाठी प्रवेश शुल्कासह पुन्हा खुला करण्यात आला आहे. सदर धबधबा प्रवेश शुल्कासह खुला करण्यात आला असला तरी योग्य देखरेखीअभावी सुरक्षिततेचा प्रश्न निर्माण झाला आहे. कारण कांही अतिउत्साही पर्यटक काठाजवळ धोकादायक सेल्फी घेताना दिसत आहेत.

चिकले धबधबा पाहण्यासाठी प्रवेश शुल्क पुढील प्रमाणे आहे : प्रौढांसाठी 60 रुपये, मुलांसाठी 30 रुपये, पार्किंग शुल्क 40 रुपये (दुचाकी), 60 रुपये (चारचाकी), 100 रुपये (बसगाड्या), कॅमेरा शुल्क 50 रुपये आहे. सदर शुल्काची आकारणी स्थानिक वन समितीकडून केली जाते.

The post खानापूर येथील चिकले धबधबा पर्यटकांसाठी खुला appeared first on News 24 Tass Marathi.