येळ्ळूर : अष्टविनायक नगर, येळ्ळूर आणि विराट गल्ली, येळ्ळूर येथील गणेशोत्सव मंडळांना शिवोली (ता. खानापूर) येथील मूर्ती कुमार माने आणि प्रल्हाद पाटील यांनी प्रत्येकी १,००१ /- रुपयांची देणगी दिली.

देणगीबद्दल कृतज्ञता व्यक्त करण्यासाठी दोन्ही मंडळांच्या वतीने मूर्तीकुमार माने आणि प्रल्हाद पाटील यांचा सन्मान करण्यात आला. मंडळाच्या कार्यासाठी दिलेल्या सहकार्याबद्दल यावेळी त्यांचे आभार मानण्यात आले.

The post येळ्ळूरच्या अष्टविनायक नगर व विराट गल्ली मंडळांना देणगी appeared first on News 24 Tass Marathi.

बेळगाव : उत्तर परिक्षेत्राचे पोलीस महानिरीक्षक संदीप पाटील यांनी चव्हाट गल्ली येथील ‘बेळगावचा राजा’ गणेशोत्सव मंडळाच्या श्रीमंडपाला सदिच्छा भेट देऊन श्री गणरायाचे दर्शन घेतले.

यावेळी मंडळाच्या पदाधिकाऱ्यांनी संदीप पाटील यांचे स्वागत करून सत्कार केला. गणेशोत्सवाच्या पार्श्वभूमीवर शहरातील सुरक्षा व्यवस्था, शांतता आणि उत्सवाच्या नियोजनाबाबत यावेळी चर्चा करण्यात आली. मंडळाच्या पदाधिकाऱ्यांनी संदीप पाटील यांना पुढील कार्यासाठी शुभेच्छा दिल्या.

The post उत्तर परिक्षेत्राचे आयजीपी संदीप पाटील यांची ‘बेळगावच्या राजा’ला सदिच्छा भेट appeared first on News 24 Tass Marathi.

बेळगाव : गणेशोत्सवाच्या पार्श्वभूमीवर शहरातील सुरक्षा व्यवस्था अधिक कडक करण्यात आली असून, शनिवारी खडेबाजार आणि मार्केट पोलीस ठाण्याच्या हद्दीत जलद कृती दलाच्या (RAF) जवानांनी पथसंचलन केले. स्थानिक पोलीस अधिकारी आणि कर्मचाऱ्यांच्या सहभागाने संवेदनशील भागातून हे संचलन करण्यात आले.

गणेशोत्सवाच्या बंदोबस्तासाठी RAFची १४० जवानांची तुकडी बेळगावात दाखल झाली आहे. तुकडी शहरात दाखल झाल्यापासून दररोज सकाळी आणि सायंकाळी वेगवेगळ्या पोलीस ठाण्यांच्या हद्दीत पथसंचलन केले जात आहे.

उत्सव काळात शहरातील शांतता आणि सुव्यवस्था अबाधित राहावी, यासाठी पोलिसांकडून व्यापक बंदोबस्ताचे नियोजन करण्यात आले आहे. विशेषतः श्रीमूर्ती विसर्जन मिरवणुकीदरम्यान जलद कृती दलाचा वापर करण्यात येणार आहे.

RAFच्या अधिकारी आणि जवानांना बेळगाव शहरातील विविध भागांची प्रत्यक्ष माहिती मिळावी, तसेच संवेदनशील ठिकाणांचा परिचय व्हावा, यासाठी वेगवेगळ्या पोलीस ठाण्यांच्या हद्दीत नियमित पथसंचलन केले जात आहे.

शनिवारी झालेल्या पथसंचलनात पोलीस आयुक्त प्रकाश निकम, उपायुक्त नारायण बरमणी यांच्यासह वरिष्ठ पोलीस अधिकारी सहभागी झाले होते. गणेशोत्सव शांततेत पार पडावा, यासाठी पोलिसांकडून सुरक्षा व्यवस्थेचा आढावा घेतला जात आहे.

The post गणेशोत्सवाच्या पार्श्वभूमीवर खडेबाजार – मार्केट परिसरात जलद कृती दलाचे पथसंचलन appeared first on News 24 Tass Marathi.

बेळगाव : गणेशोत्सवाच्या काळात शहरातील वाहतूक सुरळीत ठेवण्यासाठी बेळगाव शहर पोलिसांनी विशेष नियोजन केले आहे. गणेश मंडपांना भेट देण्यासाठी येणाऱ्या नागरिकांना पार्किंगची ठिकाणे शोधताना होणारी गैरसोय टाळण्यासाठी पोलिसांनी GPS आधारित डिजिटल सुविधा उपलब्ध करून दिली आहे.

गणेशोत्सवात शहरातील प्रमुख रस्ते आणि मंडपांच्या परिसरात मोठ्या प्रमाणात गर्दी होते. त्यातून वाहतूक कोंडी निर्माण होण्याची शक्यता असते. ही परिस्थिती लक्षात घेऊन पोलिसांनी गणेश मंडप तसेच त्यांच्या जवळील निर्धारित पार्किंगची ठिकाणे डिजिटल पद्धतीने उपलब्ध करून दिली आहेत.

नागरिकांना ganeshdarshan.belagavicitvpolice.in या लिंकवरून संबंधित गणेश मंडप आणि जवळील पार्किंगची माहिती मिळणार आहे. GPS नेव्हिगेशनच्या माध्यमातून इच्छित ठिकाणी पोहोचण्यासाठी मार्गदर्शनही मिळणार असल्याने नागरिकांना पार्किंग शोधणे अधिक सोपे होणार आहे.

पोलीस आयुक्त प्रकाश निकम यांनी नागरिकांनी या सुविधेचा अधिकाधिक वापर करण्याचे आवाहन केले आहे. गणेश मंडपांना भेट देताना पोलिसांनी निश्चित केलेल्या पार्किंगच्या ठिकाणीच वाहने उभी करावीत. रस्त्यावर किंवा वाहतुकीला अडथळा निर्माण होईल अशा ठिकाणी वाहने पार्क करू नयेत, असेही त्यांनी स्पष्ट केले.

गणेशोत्सव काळात वाहतूक व्यवस्थेसोबतच शहरातील सार्वजनिक सुव्यवस्था आणि सुरक्षिततेवरही पोलिसांकडून विशेष लक्ष ठेवण्यात येणार आहे. उत्सव शांततेत पार पाडण्यासाठी नागरिकांनी पोलिसांना सहकार्य करावे, असे आवाहन करण्यात आले आहे.

The post बेळगाव पोलिसांकडून गणेशोत्सवासाठी वाहतुकीचे विशेष व्यवस्थापन appeared first on News 24 Tass Marathi.

सुळगा (हिं.) : गणरायाच्या आगमनानंतर आता घराघरांत गौरी आगमनाचा मंगलसोहळा सुरू झाला आहे. गौरी आवाहनानिमित्त महिलांनी पारंपरिक पद्धतीने गौरीचे स्वागत करून विधिवत पूजन केले. गौरीच्या आगमनाने घराघरांत भक्ती, उत्साह आणि चैतन्याचे वातावरण निर्माण झाले आहे.

गणेशोत्सवातील गौरी पूजनाला धार्मिक आणि सांस्कृतिकदृष्ट्या विशेष महत्त्व आहे. गौरीला महालक्ष्मीचे स्वरूप मानले जाते. सौभाग्य, समृद्धी, आरोग्य आणि सुख-शांतीचे प्रतीक म्हणून गौरीची पूजा केली जाते. त्यामुळे गौरीच्या स्वागतासाठी घरांची स्वच्छता करून आकर्षक सजावट, रांगोळी आणि फुलांची आरास करण्यात आली.

काही घरांमध्ये गौरीला पारंपरिक साडी, दागिने आणि विविध अलंकारांनी सजवून तिचे मनोहारी रूप साकारण्यात आले. आवाहनाच्या वेळी महिलांनी मंगलाष्टके, गौरीची गाणी आणि पारंपरिक ओव्या म्हणत भक्तिभावाने पूजन केले. हळद-कुंकू, अक्षता, फुले, फळे आणि नैवेद्य अर्पण करून गौरीचे स्वागत करण्यात आले.

‘गौरी आली, सुख-समृद्धी घेऊन आली’, या श्रद्धेने महिलांनी आपल्या कुटुंबाच्या सुख-शांतीसाठी प्रार्थना केली. गौरी पूजनाच्या निमित्ताने सुवासिनींच्या भेटीगाठी, हळदी-कुंकू कार्यक्रम तसेच पारंपरिक खाद्यपदार्थांची देवाणघेवाण सुरू झाली असून, त्यामुळे उत्सवाला आणखी रंगत आली आहे.

घरातील ज्येष्ठ महिलांकडून गौरी पूजनाच्या परंपरा आणि विधी पुढील पिढीला समजावून सांगितले जात आहेत. त्यामुळे गौरी उत्सवाच्या माध्यमातून धार्मिक श्रद्धेसोबतच संस्कृती आणि परंपरेचा वारसाही जपला जात आहे.

गणरायाच्या भक्तिमय वातावरणात गौरीच्या आगमनाने घराघरांत सौभाग्य, समृद्धी आणि मंगलमय आनंदाची चाहूल लागली आहे. गौरीच्या चरणी कुटुंबाच्या सुख-शांतीसाठी प्रार्थना करत भक्तिभावाने हा उत्सव साजरा केला जात आहे.

The post ‘सोनं पावलांनी’ गौराईचे आगमन ; घराघरांत मंगलमय वातावरण appeared first on News 24 Tass Marathi.

बेळगाव : शाहपूर येथील नार्वेकर गल्लीतील बाल गणेश मंडळातर्फे रविवार, २० सप्टेंबर रोजी भव्य गणहोम, श्री सत्यनारायण महापूजा आणि महाप्रसादाचे आयोजन करण्यात आले आहे.

कार्यक्रमाला सकाळी ७ वाजता भव्य गणहोमाने प्रारंभ होईल. सकाळी ११ वाजता श्री सत्यनारायण महापूजा होणार असून, दुपारी १२ वाजल्यानंतर महाप्रसादाचे आयोजन करण्यात आले आहे.

या धार्मिक कार्यक्रमासाठी बेळगावचे नवनियुक्त पोलीस आयुक्त प्रकाश निकम यांना मंडळाच्या वतीने विशेष निमंत्रण देण्यात आले आहे. मध्यवर्ती सार्वजनिक श्री गणेश महामंडळाचे जनसंपर्क प्रमुख (PRO) विकास कलघटगी, बाल गणेश मंडळाचे उत्सव अध्यक्ष सागर पाटील आणि ‘हॉकी बेळगाव’चे सेक्रेटरी सुधाकर चाळके यांनी पोलीस आयुक्तांची भेट घेऊन त्यांना निमंत्रण सुपूर्द केले.

पोलीस आयुक्त प्रकाश निकम यांनी निमंत्रणाचा स्वीकार करून कार्यक्रमाला उपस्थित राहून महाप्रसादाचा लाभ घेण्याची ग्वाही दिली आहे.

The post शाहपूरच्या बाल गणेश मंडळातर्फे पोलीस आयुक्त प्रकाश निकम यांना गणेशोत्सवाचे निमंत्रण appeared first on News 24 Tass Marathi.

सुळगा (हिं.) : येथील ब्रह्मलिंग गल्ली सार्वजनिक श्री गणेशोत्सव मंडळाने गेल्या ३५–४० वर्षांपासून सुरू असलेली हलता देखावा सादर करण्याची परंपरा यंदाही उत्साहात कायम ठेवली आहे. यंदा मंडळातर्फे ‘वारी सोहळा’ या भक्तिमय प्रसंगाची आकर्षक मांडणी करण्यात आली आहे.

या देखाव्यात श्री गणेश आणि श्री विठ्ठल भगवान फुगडी खेळतानाचा भक्तिमय प्रसंग साकारण्यात आला आहे. वारकरी भक्तीभावाने वारी करत पंढरपूरच्या दिशेने जातात आणि आषाढी एकादशीला पांडुरंगाचे दर्शन घेऊन समाधानाने घरी परततात. याच भक्तिभावाचे सुंदर दर्शन हलत्या देखाव्यातून घडविण्यात आले आहे.

वारी सोहळ्याचा आनंद घेतल्यानंतर पुढे ‘श्री विठ्ठल दर्शन’ हा सजीव देखावाही भक्तांना अनुभवता येणार आहे. हा देखावा आजपासून सर्व गणेशभक्तांसाठी खुला करण्यात आला आहे.

गावातील तसेच पंचक्रोशीतील सर्व गणेशभक्तांनी या भक्तिमय आणि मनमोहक देखाव्याला आवर्जून भेट देऊन श्री विठ्ठल-रखुमाईचे दर्शन घ्यावे व देखाव्याचा आनंद घ्यावा, असे आवाहन मंडळाच्या वतीने करण्यात आले आहे.

The post सुळगा (हिं.) ब्रह्मलिंग गल्ली येथे ‘वारी सोहळ्या’चा भक्तिमय हलता देखावा appeared first on News 24 Tass Marathi.

कंग्राळी (खुर्द) : रामदेव गल्ली येथील सार्वजनिक श्री गणेशोत्सव मंडळाचा ‘कंग्राळीचा महाराजा’ यंदा ४१ व्या वर्षात पदार्पण करीत आहे. यानिमित्त मंडळातर्फे गणहोम व महाप्रसादाचे आयोजन करण्यात आले आहे.

रविवार, २० सप्टेंबर २०२६ रोजी दुपारी १२ ते ३ या वेळेत हा कार्यक्रम होणार आहे. परिसरातील सर्व गणेशभक्तांनी महाप्रसादाचा लाभ घ्यावा, असे आवाहन सार्वजनिक श्री गणेशोत्सव मंडळातर्फे करण्यात आले आहे.

The post कंग्राळीचा महाराजा सार्वजनिक गणेशोत्सव मंडळाचे ४१ व्या वर्षात पदार्पण appeared first on News 24 Tass Marathi.

बेळगाव : गणेशोत्सव उत्साहात साजरा करताना शहरात कोणताही अनुचित प्रकार घडू नये, यासाठी सर्वांनी दक्षता बाळगावी, असे आवाहन महापालिकेच्या महापौर प्रीती कामकर यांनी केले.

महापालिकेत प्रतिष्ठापना करण्यात आलेल्या गणेशमूर्तीची नगरसेवक व प्रशासनाच्या प्रतिनिधींच्या उपस्थितीत पूजा केल्यानंतर त्या बोलत होत्या. यावेळी विघ्नहर्त्याने चांगला पाऊस पाडून जनतेला सुख, शांती आणि समृद्धी द्यावी, अशी प्रार्थना केल्याचे त्यांनी सांगितले.

उपमहापौर हनुमंत कोंगाली म्हणाले, गणेशोत्सवापूर्वी जिल्हाधिकारी, पोलीस विभाग तसेच विविध विभागांच्या अधिकाऱ्यांसोबत आणि उत्सव मंडळांच्या पदाधिकाऱ्यांसोबत अनेक बैठका घेण्यात आल्या आहेत. या बैठकीत ठरविण्यात आलेल्या नियमांनुसार गणेशोत्सव शिस्तबद्ध पद्धतीने पार पाडण्यासाठी आवश्यक उपाययोजना करण्यात आल्या आहेत.

बेळगावचा गणेशोत्सव हा राज्यासाठी आदर्श आहे. त्यामुळे सर्वांनी श्रद्धा आणि भक्तीभावाने उत्सवात सहभागी व्हावे, असे आवाहनही त्यांनी केले.

यावेळी आयुक्त कार्तिक एम., सत्ताधारी पक्ष नेते संतोष पेडणेकर, स्थायी समिती अध्यक्ष श्रेयस नाकाडी, रमेश मैलुगोळ, राजू भातकांडे, सारिका पाटील यांच्यासह नगरसेवक आणि महापालिका कर्मचारी उपस्थित होते.

The post गणेशोत्सव साजरा करताना अनुचित प्रकार टाळण्यासाठी दक्षता घ्या appeared first on News 24 Tass Marathi.

बेळगाव : पर्यावरणपूरक गणेशोत्सवासाठी ओळखल्या जाणाऱ्या बेळगावच्या नानावाडी गणेशोत्सव मंडळाने यंदाही अभिनव उपक्रम राबवत सलग चौदाव्या वर्षी ईको फ्रेंडली गणेशमूर्ती साकारली आहे. यंदा मंडळाने तब्बल १८ हजार १०२ सुपाऱ्यांपासून ८ फूट उंच गणेशमूर्ती तयार केली आहे.

शाडू माती आणि गवतापासून मूर्तीचा सांगाडा तयार करून त्यावर सुपाऱ्या चिकटवण्यात आल्या आहेत. मंडळाच्या कार्यकर्त्यांनी स्वतः हे काम केले आहे. मूर्तिकार मारुती कुमार यांनी ही सुबक मूर्ती घडवली आहे.

विशेष म्हणजे बेळगाव शहरात फटाके आणि डीजे न वाजवता गणेशोत्सव साजरा करणारे आदर्श मंडळ म्हणून नानावाडी मंडळाची ओळख आहे. पर्यावरणपूरक उत्सवाची ही परंपरा मंडळाने यंदाही कायम ठेवली आहे.

गेल्या १४ वर्षांत मंडळाने फुले, वाळू, सुका मेवा, धान्य, तळलेले मोदक, रुद्राक्ष, तुळशीमाळा अशा विविध पर्यावरणपूरक साहित्याचा वापर करून गणेशमूर्ती साकारल्या आहेत. यंदाची १८,१०२ सुपाऱ्यांपासून साकारलेली गणेशमूर्तीही नागरिकांचे लक्ष वेधून घेत आहे.

The post बेळगावात सलग १४ व्या वर्षी नानावाडी मंडळाचा ईको फ्रेंडली गणेशोत्सव appeared first on News 24 Tass Marathi.