जिल्हापालक मंत्री सतीश जारकीहोळी यांच्यावतीने मलगौडा पाटील यांनी हा मुद्दा मांडला. माजी आमदार राजेश पाटील म्हणाले की, तिलारी प्रकल्पातील पाणी कोकणात सोडण्याऐवजी ते मार्कंडेय नदीमार्गे राकसकोप जलाशयात आणल्यास दोन्ही राज्यांतील शेतकऱ्यांना फायदा होईल. त्याचप्रमाणे, कर्नाटकातील म्हैसाळ प्रकल्पातून महाराष्ट्रातील जत तालुक्याला पाणीपुरवठा करण्याचा मुद्दाही याच्याशी जोडला जाऊ शकतो. त्यांनी महाराष्ट्र आणि कर्नाटक सरकारला हा प्रकल्प संयुक्त उपक्रम म्हणून हाती घेण्याचे आवाहन केले. या कल्पनेला यापूर्वी दिवंगत नरसिंगराव पाटील आणि माजी खासदार दिवंगत सुरेश अंगडी यांनी पाठिंबा दिला होता. त्यांनी स्पष्ट केले की, आता खासदार जगदीश शेट्टर आणि मंत्री सतीश जारकीहोळी यांच्यामार्फत हा प्रकल्प पुढे नेण्याचे प्रयत्न सुरू आहेत. यापूर्वी खासदार जगदीश शेट्टर यांनी महाराष्ट्राचे उपमुख्यमंत्री देवेंद्र फडणवीस यांना पत्र लिहून या मुद्द्याकडे लक्ष वेधले होते.

माजी महापौर शिवाजीराव सुंठकर म्हणाले की, जानेवारी ते एप्रिल-मे या कालावधीत हिंडलगा पंपिंग स्टेशनमधून पाणी उपसून लक्ष्मी टेकडीकडे वाहून नेले जाईल. त्यामुळे, हा प्रस्तावित प्रकल्प शहराच्या पाणीपुरवठ्यासाठी आणि शेतीसाठी अत्यंत फायदेशीर ठरेल. जिल्हाधिकारी मोहम्मद रोशन यांनी या प्रस्तावावर सखोल अभ्यास करून दुसरी बैठक बोलावण्याचे आश्वासन दिले आहे.

या बैठकीला चंदगडचे माजी आमदार राजेश पाटील, बेळगावचे माजी महापौर शिवाजीराव सुंठकर, केपीसीसी सदस्य मलगौडा पाटील इतर संबंधित पदाधिकारी आणि आजी – माजी नगरसेवक संघटनेचे पदाधिकारी मोठ्या संख्येने उपस्थित होते.

The post तिलारीचे पाणी राकसकोपकडे वळविण्याच्या प्रस्तावावर जिल्हाधिकारी कार्यालयात बैठक appeared first on News 24 Tass Marathi.

राकसकोप जलाशयाच्या पाणलोट क्षेत्रात सातत्याने पाऊस सुरू असल्याने जलाशयात मोठ्या प्रमाणात पाण्याची आवक होत आहे. त्यामुळे पाणीपातळी झपाट्याने वाढून जलाशय पूर्ण क्षमतेने भरले आहे. शहराच्या पिण्याच्या पाण्याची प्रमुख गरज याच जलाशयातून भागविली जात असल्याने जलाशय तुडुंब भरल्यामुळे नागरिकांमध्ये समाधानाचे वातावरण आहे.

पावसाळ्यात जलाशयात मुबलक पाणीसाठा झाल्याने आगामी उन्हाळ्यातही बेळगाव शहराला पाणीटंचाईचा सामना करावा लागणार नाही, असा विश्वास महापौर प्रीती कामकर यांनी व्यक्त केला. पाणीसाठा चांगला झाल्यामुळे शहरातील पाणीपुरवठा सुरळीत ठेवण्यास मोठी मदत होणार असल्याचे त्यांनी सांगितले.

उपमहापौर हनुमंत कोंगाळी यांनी सांगितले की, जलाशयाच्या पाणलोट क्षेत्रात अद्याप पाऊस सुरू असल्याने अधिकारी पाणीपातळी आणि पाण्याच्या आवकेवर सातत्याने लक्ष ठेवून आहेत. खबरदारीचा उपाय म्हणून जलाशय परिसरातही आवश्यक दक्षता घेतली जात आहे.

बेळगावकरांच्या पिण्याच्या पाण्याची गरज भागविण्यात राकसकोप जलाशयाची महत्त्वाची भूमिका आहे. जलाशय पूर्ण भरल्याने आगामी काळातील पाणीपुरवठ्याबाबत नागरिकांना मोठा दिलासा मिळाला आहे.

यावेळी पालिका आयुक्त कार्तिक, पालिका सदस्य गिरीश धोंगडी, मंगेश पवार यांच्यासह इतर मान्यवर उपस्थित होते.

The post राकसकोप जलाशयावर महापौरांच्या हस्ते पारंपरिक गंगापूजन appeared first on News 24 Tass Marathi.

बेळगाव : गेल्या दोन दिवसांपासून सुरू असलेल्या संततधार पावसामुळे बेळगाव शहराची तहान भागवणारा राकसकोप जलाशय अखेर बुधवारी ओव्हरफ्लो झाला. त्यामुळे शहरावरील पाणीटंचाईचे संकट मोठ्या प्रमाणात दूर होण्याची चिन्हे निर्माण झाली असून, नागरिकांना मोठा दिलासा मिळाला आहे.

यंदा मान्सूनने उशिरा जोर धरल्याने राकसकोप जलाशयातील पाणीपातळी चिंताजनकरीत्या घटली होती. जलाशयाने तळ गाठल्यामुळे शहरावर पाणीटंचाईचे गंभीर सावट निर्माण झाले होते. परिणामी, नागरिकांना आठ ते दहा दिवसांच्या अंतराने पाणीपुरवठा केला जात होता.

मात्र, जुलै महिन्यात पावसाने जोरदार पुनरागमन केल्यानंतर जलाशयाच्या पाणलोट क्षेत्रात मोठ्या प्रमाणावर पाऊस झाला आणि पाण्याची आवक सातत्याने वाढत गेली. आठ दिवसांपूर्वी जलाशय पूर्ण भरण्यासाठी सुमारे दहा फूट पाण्याची आवश्यकता होती. सोमवारीही दोन फूट पाण्याची कमतरता होती. मात्र, मुसळधार पावसामुळे जलाशयात वेगाने पाणीसाठा वाढला आणि अखेर बुधवारी राकसकोप जलाशय ओव्हरफ्लो झाला.

बेळगाव शहराचा मुख्य पाणीपुरवठा राकसकोप जलाशयावर अवलंबून आहे. गतवर्षी जलाशय लवकर भरला होता, तर यंदा पावसाच्या विलंबामुळे जुलै अखेरीस तो तुडुंब भरला आहे.

जलाशय ओव्हरफ्लो झाल्याने शहरातील पाणीपुरवठा लवकरच नियमित होण्याची शक्यता व्यक्त केली जात आहे. सध्या आठ ते दहा दिवसांच्या अंतराने होणारा पाणीपुरवठा आता अधिक सुरळीत होईल, अशी अपेक्षा बेळगावकरांकडून व्यक्त केली जात आहे.

The post बेळगावकरांना मोठा दिलासा ; राकसकोप जलाशय अखेर ओव्हरफ्लो appeared first on News 24 Tass Marathi.

बेळगाव : गेल्या काही महिन्यांपासून पाणीटंचाईचा सामना करणाऱ्या बेळगाव शहरासाठी आता दिलासादायक स्थिती निर्माण झाली आहे. गेल्या काही दिवसांपासून सुरू असलेल्या दमदार पावसामुळे शहराला पाणीपुरवठा करणाऱ्या राकसकोप धरणातील पाणीसाठ्यात मोठी वाढ झाली असून धरण पूर्ण क्षमतेच्या जवळ पोहोचले आहे.

यंदा पावसाला झालेल्या विलंबामुळे उन्हाळ्याच्या अखेरीस राकसकोप धरणातील पाणीसाठा मोठ्या प्रमाणात कमी झाला होता. मे महिन्यात धरणातील पाणीपातळी चिंताजनक स्थितीवर पोहोचल्याने बेळगाव शहरावर पाणी संकट ओढवले होते. त्यावेळी उपलब्ध पाणीसाठा केवळ १० ते १५ दिवस पुरेल, अशी परिस्थिती निर्माण झाली होती.

बेळगाव शहराला दररोज सुमारे १३० ते १३५ दशलक्ष लिटर पाण्याची गरज भासते. शहराच्या पाणीपुरवठ्यासाठी राकसकोप आणि हिडकल या दोन्ही जलस्रोतांवर मोठ्या प्रमाणात अवलंबून राहावे लागते.

सध्या झालेल्या पावसामुळे मार्कंडेय नदी आणि जांबूळा कालव्यातून राकसकोप धरणात मोठ्या प्रमाणात पाण्याची आवक सुरू आहे. २७ जुलै रोजी धरणाची पाणीपातळी २४७०.३ फूट नोंदवण्यात आली असून धरणाची पूर्ण क्षमतेची पातळी २४७७ फूट आहे. त्यामुळे धरण पूर्ण भरण्यासाठी अजून काही फूट पाण्याची आवश्यकता आहे.

राकसकोप धरण पूर्ण क्षमतेने भरल्यास बेळगाव शहराच्या पाणीपुरवठ्याला मोठा आधार मिळणार आहे. उपलब्ध साठ्यामुळे पावसाळ्यानंतरच्या काळात शहराला काही महिन्यांसाठी पुरेसा पाणीपुरवठा करता येण्याची शक्यता आहे. मात्र, उन्हाळ्यातील बाष्पीभवन, पाण्याचा वापर आणि हिडकल धरणातून होणारा पुरवठा यावर पाणीसाठ्याचा कालावधी अवलंबून राहणार आहे.

दरम्यान, पावसाचा जोर कायम राहिल्यास राकसकोप धरण ओव्हरफ्लो होण्याची शक्यता व्यक्त केली जात आहे. मात्र, धरणाचे दरवाजे उघडण्याबाबत प्रशासनाकडून अद्याप कोणतीही अधिकृत घोषणा करण्यात आलेली नाही.

काही आठवड्यांपूर्वी पाण्यासाठी संघर्ष करणाऱ्या बेळगाव शहरवासीयांसाठी आता राकसकोप धरणातील वाढता पाणीसाठा मोठा दिलासा ठरत आहे. धरण पूर्ण क्षमतेने भरण्याची प्रतीक्षा शहरवासीयांना लागली आहे.

The post राकसकोप धरण भरण्याच्या उंबरठ्यावर appeared first on News 24 Tass Marathi.

बेळगाव : शहराला पिण्याचे पाणीपुरवठा करणाऱ्या राकसकोप जलाशयाच्या पाणीपातळीत हळूहळू वाढ होत असली तरी जलाशय पूर्ण क्षमतेने भरण्यासाठी अद्याप १०.०८ फूट पाण्याची आवश्यकता आहे. जलाशयाच्या पाणलोट क्षेत्रासह बेळगाव शहर आणि तालुक्यात अधूनमधून पावसाच्या सरी कोसळत असल्याने पाणीसाठ्यात वाढ होत असून, शेतकऱ्यांच्या पिकांनाही त्याचा काहीसा दिलासा मिळत आहे.

सध्या राकसकोप जलाशयाची पाणीपातळी २४६४.७० फूट इतकी नोंदविण्यात आली असून, जलाशय पूर्ण भरावयास आणखी १०.०८ फूट पाण्याची गरज आहे. यंदा जून महिनाभर समाधानकारक पाऊस न झाल्याने जलाशयातील पाणीसाठा मोठ्या प्रमाणात घटला होता. त्यामुळे शहराच्या पाणीपुरवठ्याबाबत चिंता व्यक्त केली जात होती.

मात्र, जुलै महिन्याच्या प्रारंभी सलग आठ दिवस झालेल्या मुसळधार पावसामुळे जलाशयाच्या पाणलोट क्षेत्रात मोठ्या प्रमाणात पाणी जमा झाले आणि जलाशयाची पाणीपातळी वेगाने वाढली. त्यामुळे शहरवासीयांसह शेतकऱ्यांनाही मोठा दिलासा मिळाला.

तथापि, गेल्या दहा दिवसांपासून पावसाने पुन्हा विश्रांती घेतल्याने पाणीपातळीतील वाढीचा वेग मंदावला आहे. पावसाने दडी मारल्यामुळे खरीप हंगामातील पिकांबाबत शेतकऱ्यांची चिंता पुन्हा वाढू लागली असून, जलाशय पूर्ण क्षमतेने भरण्यासाठी आगामी काही दिवसांत चांगल्या पावसाची आवश्यकता असल्याचे चित्र आहे.

हवामानातील बदलत्या परिस्थितीकडे प्रशासन आणि नागरिकांचे लक्ष लागले असून, आगामी काळात पावसाचा जोर कायम राहिल्यास राकसकोप जलाशय लवकरच पूर्ण क्षमतेने भरेल, अशी अपेक्षा व्यक्त केली जात आहे.

The post राकसकोप जलाशय पूर्ण भरण्यास अजून १०.०८ फूट पाण्याची गरज appeared first on News 24 Tass Marathi.

बेळगाव : शहरातील वारंवार उद्भवणाऱ्या पाणीटंचाईवर कायमस्वरूपी तोडगा काढण्यासाठी महाराष्ट्रातील तिलारी जलाशयातील अतिरिक्त पाणी राकसकोप जलाशयात वळविण्याच्या प्रस्तावाला नव्याने गती मिळाली आहे. या मागणीसंदर्भात बेळगावच्या माजी नगरसेवकांच्या संघटनेने खासदार जगदीश शेट्टर यांची भेट घेऊन सविस्तर निवेदन सादर केले. या प्रस्तावाबाबत खासदार शेट्टर यांनी सकारात्मक भूमिका घेत पुढील पाठपुरावा करण्याचे आश्वासन दिले.

सर्किट हाऊसमध्ये झालेल्या बैठकीत शहरातील पाणीपुरवठ्याची सद्यस्थिती आणि भविष्यातील उपाययोजनांवर चर्चा करण्यात आली. दरवर्षी मे ते जुलै या कालावधीत राकसकोप आणि हिडकल जलाशयांतील पाणीसाठा कमी झाल्याने बेळगाव शहराला तीव्र पाणीटंचाईला सामोरे जावे लागते. यावर दीर्घकालीन उपाय म्हणून चंदगड तालुक्यातील तिलारी जलाशय आणि राकसकोप जलाशय यांची ‘राष्ट्रीय नदी जोड प्रकल्पा’अंतर्गत जोडणी करण्याची मागणी माजी नगरसेवकांनी केली.

माजी नगरसेवक संघटनेचे अध्यक्ष शिवाजीराव सुंठकर यांनी सांगितले की, तिलारी जलाशयात वीज निर्मितीनंतर मे ते जुलै या काळात मोठ्या प्रमाणावर अतिरिक्त पाणी उपलब्ध असते. हे पाणी राकसकोप जलाशयात वळविल्यास बेळगाव शहरासह परिसरातील पिण्याच्या पाण्याचा प्रश्न मोठ्या प्रमाणात सुटू शकतो. याशिवाय मार्कंडेय नदीच्या पात्रातून शेतीसाठीही या पाण्याचा लाभ होईल.

माजी नगरसेवक लतीफ खान पठाण यांनी सांगितले की, या योजनेसाठी यापूर्वीही विविध स्तरांवर प्रयत्न झाले आहेत. तिलारीचे पाणी बेळगावला उपलब्ध व्हावे यासाठी जिल्ह्याच्या पालकमंत्र्यांशी चर्चा करून हा विषय संसदेच्या पावसाळी अधिवेशनातही उपस्थित केला जाणार आहे. हा प्रश्न भाषा किंवा सीमावादाशी न जोडता केवळ जनहिताच्या दृष्टीने मार्गी लावावा, अशी अपेक्षाही त्यांनी व्यक्त केली.

खासदार जगदीश शेट्टर यांनी या प्रस्तावाचे स्वागत करत संसदेचे पावसाळी अधिवेशन संपल्यानंतर महाराष्ट्राचे मुख्यमंत्री देवेंद्र फडणवीस यांची भेट घेऊन या विषयावर चर्चा करणार असल्याचे सांगितले. तसेच चंदगडचे आमदार शिवाजी पाटील यांच्यासमवेत तिलारी जलाशय परिसराची संयुक्त पाहणी करून प्रकल्प पुढे नेण्यासाठी आवश्यक ती पावले उचलण्याचे आश्वासन त्यांनी दिले.

या बैठकीला नेताजी जाधव, दीपक वाघेला, वंदना बेळगुंदकर, रेणू किल्लेकर, सुधा भातकांडे, संजीव प्रभू, मोहम्मद पिरजादे यांच्यासह माजी नगरसेवक मोठ्या संख्येने उपस्थित होते.

The post तिलारी जलाशयाचे अतिरिक्त पाणी राकसकोपकडे वळवण्याची मागणी appeared first on News 24 Tass Marathi.

चंदगड : बेळगाव शहरातील वाढत्या पाणीटंचाईवर कायमस्वरूपी तोडगा काढण्यासाठी तिलारी धरणातील अतिरिक्त पाणी राकसकोप जलाशयात वळविण्याची मागणी पुन्हा जोर धरू लागली आहे. यासंदर्भात बेळगाव महापालिकेच्या माजी नगरसेवक संघटनेच्या शिष्टमंडळाने चंदगडचे आमदार शिवाजीराव पाटील यांची भेट घेऊन निवेदन सादर केले.

निवेदनात तिलारी धरणातील अतिरिक्त पाणी मार्कंडेय नदीमार्गे राकसकोप जलाशयात वळविण्याची योजना राबविण्याची मागणी करण्यात आली आहे. हा प्रकल्प साकार झाल्यास बेळगाव शहराच्या पिण्याच्या पाण्याचा प्रश्न मोठ्या प्रमाणात सुटण्याबरोबरच परिसरातील शेतकऱ्यांच्या सिंचनाच्या गरजाही प्रभावीपणे पूर्ण होऊ शकतील, असा दावा शिष्टमंडळाने केला आहे.

बेळगावच्या वाढत्या लोकसंख्येमुळे भविष्यातील पाणीपुरवठा लक्षात घेऊन या योजनेचा गांभीर्याने विचार करून आवश्यक पावले उचलावीत, अशी मागणीही निवेदनातून करण्यात आली.

The post तिलारीचे अतिरिक्त पाणी राकसकोपमध्ये वळविण्याची मागणी appeared first on News 24 Tass Marathi.

बेळगाव : जुलैच्या पहिल्या तारखेपासून पावसाने जोरदार हजेरी लावल्याने राकसकोप जलाशयातील पाणीपातळीत समाधानकारक वाढ झाली आहे. गेल्या आठ दिवसांत पाणीपातळी १३ फुटांनी वाढली आहे. गुरुवारी (दि.९) जलाशयात पातळी २,४५८.८० फूट पाणी होते. गतवर्षी याच दिवशी पाणीपातळी २,४७४ फूट होती. जलाशय तुडुंब होण्यासाठी आणखी १६ फूट पाण्याची गरज आहे.

जलाशय परिसरात आतापर्यंत एकूण ९३८.५ मिमी पाऊस झाला आहे. गुरुवारी पहाटे संपलेल्या चोवीस तासांत ९२.५ मिमी पावसाची नोंद झाली. सतत दहा दिवस झालेल्या पावसामुळे जलाशय परिसरातील नाले प्रवाहीत झाल्याने मृत साठ्यांपेक्षा कमी पातळी गाठलेल्या राकसकोप जलाशयात १३ फूट पाणीसाठा जमा झाला. त्यामुळे, पाणीपातळी २,४५९ फुटांपर्यंत पोचली आहे. मात्र, गतवर्षीच्या तुलनेत जलाशयात ११ फूट कमी पाणीसाठा आहे. गतवर्षी या महिन्यात जलाशय तीनवेळा तुडुंब झाले होते. यंदा हे जलाशय भरण्यासाठी १६ फूट पाण्याची आवश्यक्ता आहे. त्यासाठी मोठ्या पावसाची आवश्यक्ता आहे. मात्र, गुरुवारपासून पावसाचे प्रमाण कमी झाल्याने जलाशय भरण्यास आणखी प्रतीक्षा करावी लागण्याची शक्यता आहे.

The post राकसकोप जलाशयात आठ दिवसांत १३ फूट पाणीसाठा appeared first on News 24 Tass Marathi.

बेळगाव : बेळगावसह खानापूर, निपाणी आणि चिक्कोडी तालुक्यांत गेल्या चार दिवसांपासून सुरू असलेल्या संततधार पावसामुळे जनजीवन विस्कळीत झाले आहे. मुसळधार पावसामुळे जिल्ह्यातील कृष्णा, वेदगंगा, दूधगंगा आदी नद्यांच्या पाणीपातळीत लक्षणीय वाढ झाली असून, शहराला पाणीपुरवठा करणाऱ्या राकसकोप जलाशयातील पाणीसाठाही दोन फुटांनी वाढला आहे.

सततच्या पावसामुळे जिल्ह्यात अनेक ठिकाणी घरांची पडझड झाली असून, झाडे कोसळण्याच्या घटनाही घडल्या आहेत. काही भागांमध्ये सखल परिसरात पाणी साचल्याने नागरिकांना अडचणींचा सामना करावा लागत आहे.

बुधवारी सकाळपासूनही पावसाचा जोर कायम असून, हवामान विभागाने आणखी पावसाचा अंदाज व्यक्त केला आहे. या पार्श्वभूमीवर विद्यार्थ्यांच्या सुरक्षिततेचा विचार करून जिल्हाधिकाऱ्यांनी सलग दुसऱ्या दिवशीही शाळा आणि महाविद्यालयांना सुट्टी जाहीर केली आहे.

दरम्यान, बेळगाव शहराला पाणीपुरवठा करणाऱ्या राकसकोप आणि हिडकल जलाशयांतील पाणीपातळीत समाधानकारक वाढ झाल्याने शहराच्या पाणीपुरवठ्याबाबतचा तात्पुरता दिलासा मिळाला आहे. प्रशासनाने मात्र नदीकाठच्या आणि पूरप्रवण भागातील नागरिकांना सतर्क राहण्याचे आवाहन केले आहे.

The post बेळगाव परिसरात मुसळधार पाऊस appeared first on News 24 Tass Marathi.

बेळगाव : गेल्या दोन दिवसांतील पावसामुळे बेळगाव शहराच्या पाणीपुरवठ्याचा प्रमुख स्रोत असलेल्या राकसकोप जलाशयाच्या पाणीपातळीत एका फुटाची वाढ झाली असली, तरी जलाशय अद्यापही डेड स्टॉकच्या पातळीखाली असल्याने शहरासाठी डेड स्टॉकमधूनच पाणीउपसा सुरू आहे.

गतवर्षी जुलैच्या सुरुवातीलाच मुसळधार पावसामुळे राकसकोप जलाशय वेगाने भरू लागला होता. मात्र यंदा मान्सून उशिराने सक्रिय झाल्याने जलाशयातील पाणीसाठा चिंताजनक स्थितीत आहे. गतवर्षी याच दिवशी जलाशयाची पाणीपातळी २,४७१.७० फूट होती, तर यंदा ती केवळ २,४४७ फूट इतकी नोंदविण्यात आली आहे. म्हणजेच गतवर्षीच्या तुलनेत तब्बल २४ फूट कमी पाणीसाठा जलाशयात आहे.

गेल्या दोन दिवसांच्या पावसामुळे पाणीपातळीत काहीशी वाढ झाली असली, तरी ती अद्याप डेड स्टॉकच्या वर पोहोचलेली नाही. त्यामुळे शहराचा नियमित पाणीपुरवठा सध्या डेड स्टॉकमधील पाण्यावरच अवलंबून आहे.

हवामान खात्याने येत्या काही दिवसांत चांगल्या पावसाचा अंदाज व्यक्त केला असून, राकसकोप जलाशयाच्या पाणीसाठ्यात लवकरच लक्षणीय वाढ होईल, अशी अपेक्षा व्यक्त केली जात आहे. मात्र तोपर्यंत उपलब्ध पाण्याचा काटकसरीने वापर करण्याची गरज प्रशासनाकडून व्यक्त करण्यात येत आहे.

The post राकसकोप जलाशयाच्या पाणीपातळीत एक फुटाने वाढ appeared first on News 24 Tass Marathi.