बेळगाव : गणेशोत्सवाचे आगमन अवघ्या काही दिवसांवर येऊन ठेपले असताना बेळगाव शहरातील रस्त्यांवरील खड्ड्यांचा प्रश्न पुन्हा ऐरणीवर आला आहे. गणेशमूर्तींचे आगमन, मिरवणुका तसेच विसर्जनाच्या मार्गांवर नागरिक, भाविक आणि गणेशोत्सव मंडळांना कोणताही त्रास होऊ नये, यासाठी महानगरपालिकेने युद्धपातळीवर रस्त्यांवरील खड्डे बुजविण्याचे काम हाती घ्यावे, अशी मागणी लोकमान्य टिळक गणेशोत्सव महामंडळाच्या पदाधिकाऱ्यांनी केली आहे.

गणेशोत्सवाच्या पार्श्वभूमीवर बेळगाव शहरातील प्रमुख रस्त्यांची स्थिती आणि उत्सवाच्या तयारीचा आढावा घेण्यासाठी महानगरपालिका आयुक्तांच्या अध्यक्षतेखाली विशेष बैठक बोलावून, त्यामध्ये खड्डे, मिरवणूक मार्ग, विसर्जन मार्ग, विद्युत व्यवस्था, पथदिवे, स्वच्छता आणि विसर्जन घाटांवरील सुविधांचा सविस्तर आढावा घेण्यात यावा, अशी मागणी निवेदनाद्वारे करण्यात आली आहे.

पावसाळ्यात रस्त्यांवर पडलेले खड्डे बुजविताना पारंपरिक पद्धतींबरोबरच प्री-कास्ट तसेच जिओ-पॉलिमर टेक्नो-पॅचसारख्या आधुनिक तंत्रज्ञानाचा वापर करण्याचे निर्देश संबंधित अधिकारी व कंत्राटदारांना द्यावेत. शहरातील प्रमुख रस्ते, अंतर्गत रस्ते तसेच गणेश विसर्जनाच्या मार्गांवरील खड्डे प्राधान्याने बुजविण्यात यावेत, अशी मागणीही करण्यात आली आहे.

शहरातील रस्त्यांवरील खड्ड्यांबाबत नागरिकांकडून मोठ्या प्रमाणावर तक्रारी होत आहेत. त्यामुळे केवळ कागदोपत्री आदेश न काढता महानगरपालिका प्रशासनाने प्रत्यक्ष रस्त्यावर उतरून कामाची पाहणी करावी, अशी अपेक्षा महामंडळाने व्यक्त केली आहे.

गणेशोत्सवाच्या काळात मिरवणूक आणि विसर्जनाचे मार्ग अत्यंत महत्त्वाचे असतात. त्यामुळे संबंधित मार्गांची प्रत्यक्ष पाहणी करून ते पूर्णपणे खड्डेमुक्त करण्यासाठी कालबद्ध कार्यक्रम आखण्यात यावा. विसर्जन घाटांवरील आवश्यक सोयी-सुविधांची तपासणी करून त्या तातडीने पूर्ण कराव्यात, अशी मागणी करण्यात आली आहे.

रस्त्यांवरील खड्ड्यांच्या तक्रारींचे त्वरित निवारण करण्यासाठी स्वतंत्र अधिकारी व पथके नियुक्त करून २४ तास कार्यरत यंत्रणा सज्ज ठेवावी, तसेच नागरिकांकडून प्राप्त होणाऱ्या तक्रारींवर तत्काळ कारवाई करावी. खड्डा बुजवण्यापूर्वी आणि बुजवल्यानंतरचे छायाचित्र प्रसिद्ध करून कामात पारदर्शकता ठेवावी, अशी मागणीही करण्यात आली आहे.

गणेश मिरवणुकीच्या मार्गावरील विद्युत तारांची विशेष तपासणी करून त्या सुरक्षित उंचीवर आहेत की नाही, याची खात्री करावी. विसर्जन मिरवणुकीदरम्यान विद्युत तारांमुळे कोणतीही दुर्घटना घडू नये, यासाठी संबंधित यंत्रणांनी आवश्यक ती खबरदारी घ्यावी, अशी मागणी करण्यात आली आहे.
महानगरपालिकेच्या अखत्यारीबाहेरील रस्त्यांवरील खड्ड्यांचाही प्रश्न तातडीने सोडविण्यात यावा. सार्वजनिक बांधकाम विभाग, संबंधित विकास प्राधिकरणे आणि इतर शासकीय यंत्रणांनी परस्पर समन्वय ठेवून आपल्या अखत्यारीतील रस्त्यांची दुरुस्ती करावी. एखादा रस्ता नागरिकांसाठी धोकादायक ठरत असेल आणि संबंधित यंत्रणेकडून वेळेत दुरुस्ती होत नसेल, तर महानगरपालिकेने पुढाकार घेऊन दुरुस्ती करावी, अशी मागणी करण्यात आली आहे.

गणेशोत्सवाच्या काळात मिरवणूक मार्गांवर नवीन खड्डे किंवा चर खोदण्यास कोणत्याही यंत्रणेला परवानगी देऊ नये. तसेच मंडळांना आवश्यक परवानग्या देण्याची प्रक्रिया सुलभ व जलद ठेवावी, अशी मागणीही करण्यात आली आहे.

यावेळी लोकमान्य टिळक गणेशोत्सव महामंडळाचे अध्यक्ष विजय जाधव, हेमंत हावळ, सुनील जाधव, अर्जुन राजपूत, गजानन हांगीरगेकर रवी कलघटगी यांच्यासह महामंडळाचे पदाधिकारी व कार्यकर्ते उपस्थित होते.

The post गणेशोत्सवापूर्वी बेळगावातील रस्ते खड्डेमुक्त करा appeared first on News 24 Tass Marathi.

बेळगाव : जिल्ह्यात पावसाअभावी शेती संकटात सापडली असून, अशा परिस्थितीत राज्य सरकारकडून बेळगाव जिल्ह्यावर अन्याय केला जात असल्याचा आरोप ग्रामीण भाजपकडून करण्यात आला आहे. जिल्हा तातडीने दुष्काळग्रस्त घोषित करून शेतकऱ्यांना नुकसानभरपाई द्यावी, अन्यथा तीव्र आंदोलन छेडण्याचा इशारा भाजपच्या जिल्हा व तालुका पदाधिकाऱ्यांनी दिला.

यासंदर्भात भाजपच्या जिल्हा आणि तालुका युनिटच्या वतीने जिल्हाधिकाऱ्यांकडे निवेदन सादर करण्यात आले. पावसाअभावी जिल्ह्यातील अनेक भागांमध्ये शेतीचे मोठे नुकसान झाले असून, परिस्थितीची तातडीने पाहणी करून बेळगाव जिल्ह्याचा दुष्काळग्रस्त क्षेत्रात समावेश करावा, अशी मागणी निवेदनातून करण्यात आली आहे.

ग्रामीण भाजपचे जिल्हाध्यक्ष सुभाष पाटील यांनी राज्य सरकारवर टीका करताना सांगितले की, जिल्ह्यातील एकाही तालुक्याचा दुष्काळग्रस्त यादीत समावेश न केल्याने शेतीवर अवलंबून असलेल्या शेतकऱ्यांवर अन्याय झाला आहे. शेतकऱ्यांनी पिकांच्या पेरणीसाठी प्रति एकर सुमारे २० हजार रुपयांपर्यंत कर्ज घेतले आहे. मात्र, अपेक्षित पाऊस न झाल्याने पिकांचे मोठ्या प्रमाणात नुकसान झाले आहे.

यारगट्टी, सौंदत्ती आणि रामदुर्ग तालुक्यांमध्येही पावसाअभावी शेतीची स्थिती गंभीर असल्याचे त्यांनी सांगितले. अनेक शेतकरी आर्थिक अडचणीत सापडले असून, सरकारने तातडीने परिस्थितीची दखल घेऊन आवश्यक उपाययोजना कराव्यात. जिल्हाधिकाऱ्यांच्या माध्यमातून सरकारकडे निवेदन पाठविण्यात आले असून, मागण्यांकडे दुर्लक्ष झाल्यास आगामी काळात तीव्र आंदोलन छेडण्यात येईल, असा इशाराही सुभाष पाटील यांनी दिला.

भाजप ओबीसी मोर्चाचे जिल्हाध्यक्ष उमेश गणपत पुरी यांनीही सरकारच्या भूमिकेबद्दल नाराजी व्यक्त केली. बेळगाव जिल्ह्याचा भौगोलिक विस्तार मोठा असून, मोठ्या प्रमाणावर नागरिक शेती आणि दुग्धव्यवसायावर अवलंबून आहेत. त्यामुळे दुष्काळाची परिस्थिती लक्षात घेऊन सरकारने विलंब न करता शेतकऱ्यांसाठी दुष्काळ मदत जाहीर करावी आणि आर्थिक सहाय्य उपलब्ध करून द्यावे, अशी मागणी त्यांनी केली.

यावेळी रयत मोर्चाचे जिल्हाध्यक्ष जगदीश बुदिहाळ, युवराज जाधव, सुभाष तुरमुरी, श्रीधर कुलकर्णी, उमेश पुरी, संतोष हडपद, प्रमोद नुगानट्टी, लक्काप्पा करगी, श्वेता जगदाळे यांच्यासह भाजपचे पदाधिकारी व कार्यकर्ते मोठ्या संख्येने उपस्थित होते.

The post बेळगाव जिल्हा दुष्काळग्रस्त जाहीर करा appeared first on News 24 Tass Marathi.

बेळगाव : बेळगाव कॅन्टोन्मेंट परिसरातील तीन प्रमुख रस्ते लष्कराकडे हस्तांतरित करण्यास तसेच दोन रस्त्यांवर बॅरिकेड्स उभारण्याच्या प्रस्तावाला बेळगाव कॅन्टोन्मेंट रेसिडेन्शियल वेल्फेअर असोसिएशनने (बीसीआरडब्ल्यूए) तीव्र विरोध दर्शविला आहे. यासंदर्भात सोमवारी कॅन्टोन्मेंटच्या मुख्य कार्यकारी अधिकाऱ्यांकडे १४,१३६ सह्यांचे निवेदन सादर करण्यात आले.

१७ जुलै रोजी झालेल्या कॅन्टोन्मेंट बोर्डाच्या बैठकीतील ठराव क्रमांक २६ आणि २७ नुसार अल्बर्ट एक्का रोड, स्मार्ट रोड आणि क्वीन्स गार्डन रोड हे तीन रस्ते लष्कराकडे सोपविण्याबाबत नागरिकांकडून मते मागविण्यात आली आहेत. त्याचबरोबर इंडिपेंडन्स रोड आणि जिमखाना रोडवर उंच बॅरिकेड्स उभारण्याचा प्रस्तावही मांडण्यात आला आहे.

या प्रस्तावांमुळे सार्वजनिक वाहतुकीवर परिणाम होण्याची शक्यता असल्याने बीसीआरडब्ल्यूएने जनजागृती मोहीम राबवून नागरिकांच्या सह्या घेतल्या. या मोहिमेला मोठा प्रतिसाद मिळाला असून, नागरिकांची नावे, पत्ते, दूरध्वनी क्रमांक आणि सह्यांसह निवेदन कॅन्टोन्मेंट सीईओंकडे सादर करण्यात आले.

शेतकरी, कामगार, विद्यार्थी, शिक्षक, कर्मचारी, व्यावसायिक, गृहिणी, वकील, डॉक्टर यांच्यासह समाजातील विविध घटकांनी या मोहिमेला पाठिंबा दिल्याचे संघटनेने सांगितले.

कॅन्टोन्मेंट परिसरातील रस्ते बंद केल्यास शहरातील दळणवळणावर परिणाम होऊन स्थानिक नागरिकांच्या रोजगारासह बेळगावच्या आर्थिक विकासालाही फटका बसू शकतो, असा आक्षेप बीसीआरडब्ल्यूएने नोंदविला आहे. तसेच बेळगावचा स्मार्ट सिटी म्हणून विकास करण्याच्या उद्दिष्टाशीही अशा प्रकारची रस्तेबंदी विसंगत असल्याचे संघटनेचे म्हणणे आहे.

अनेक दशकांपासून नागरिकांच्या वापरात असलेले कॅन्टोन्मेंटमधील रस्ते कोणत्याही प्रकारे बंद किंवा अडवू नयेत, अशी मागणी संघटनेने केली. उच्च न्यायालय, सर्वोच्च न्यायालय, संरक्षण मंत्रालय तसेच लष्कर मुख्यालयाने दिलेल्या आदेशांचे योग्य प्रकारे पालन करण्यात यावे, अशी मागणीही निवेदनातून करण्यात आली आहे.

जनतेच्या मागणीचा विचार करून लष्कर आणि कॅन्टोन्मेंट बोर्डाने रस्ते बंद करण्याचा तसेच बॅरिकेड्स उभारण्याचा प्रस्ताव मागे घ्यावा, असे आवाहन बीसीआरडब्ल्यूएने केले आहे.

यावेळी माजी आमदार अनिल बेनके, बेळगाव कॅन्टोन्मेंट रेसिडेन्शियल वेल्फेअर असोसिएशनचे अध्यक्ष फारुक नवाब, सचिव रंजन शेट्टी, डॉ. नितीन खोत, अजय पै, साजिद शेख, कॅन्टोन्मेंट सदस्य सुधीर तुपेकर, डॉ. सोनाली खोत, डॉ. राहिला शेख, नयना नेरली, ॲड. सुलतानपुरे तसेच बार असोसिएशनचे प्रतिनिधी आणि कॅन्टोन्मेंट परिसरातील नागरिक मोठ्या संख्येने उपस्थित होते.

The post बेळगाव कॅन्टोन्मेंटमधील रस्ते बंद करण्यास नागरिकांचा विरोध appeared first on News 24 Tass Marathi.

बेळगाव : बेळगाव रेल्वे स्थानकाच्या दक्षिण प्रवेशद्वाराला जोडणारा आणि डेक्कन हॉस्पिटलसमोरील अत्यंत महत्त्वाचा असलेला ‘न्यू गुड्स शेड रोड’ गेल्या अनेक वर्षांपासून अत्यंत दयनीय अवस्थेत आहे. या रस्त्याची तातडीने आणि कायमस्वरूपी दुरुस्ती करण्यात यावी, तसेच रस्त्याच्या दोन्ही बाजूंना योग्य गटारींचे बांधकाम करण्यात यावे, या मागणीसाठी आज बेळगाव शहर महानगरपालिका आयुक्तांना जाहीर निवेदन देण्यात आले.

यावेळी रमाकांत कोंडुस्कर, विकास कलघटगी, गणेश दड्डीकर, प्राचार्य आनंद आपटेकर, विशाल देशपांडे, प्रसाद मरगाळे, राजू बेर्जे, संजय शिंदे, विनायक गुंजटकर, सुनील बोकडे, संकेत पेडणेकर, डेक्कन हॉस्पिटलचे कर्मचारी आणि स्थानिक नागरिक मोठ्या संख्येने उपस्थित होते.

• प्रशासनाच्या दिरंगाईवर नागरिकांचा तीव्र संताप  

नागरिकांनी दिलेल्या निवेदनानुसार, यापूर्वी १० जून २०२६ रोजी आणि त्यानंतर ३ जुलै २०२६ रोजी स्मरणपत्र देऊनही महापालिका प्रशासनाने यावर कोणतीही कारवाई केलेली नाही. इतकेच नव्हे तर, १४ ऑगस्ट २०२६ रोजी जिल्हाधिकारी आणि १८ ऑगस्ट २०२६ रोजी बेळगावचे खासदार जगदीश शेट्टर यांनाही याबाबत साकडे घालण्यात आले होते. लोकप्रतिनिधी व वरिष्ठ अधिकाऱ्यांनी निर्देश देऊनही महापालिका प्रशासन ढिम्म राहिल्याने नागरिकांमधून तीव्र संताप व्यक्त होत आहे.

• जेसीबीने केवळ मलमपट्टी ; रस्ता बनला मृत्यूचा सापळा

महापालिकेने काही दिवसांपूर्वी केवळ जेसीबीच्या साहाय्याने रस्ता खरवडून आणि सपाटीकरण करून तात्पुरती मलमपट्टी केली होती. मात्र, यामुळे हा रस्ता पूर्वीपेक्षा अधिक धोकादायक बनला असून वाहनचालक आणि पादचाऱ्यांसाठी मृत्यूचा सापळा ठरत आहे. पावसाळा संपून हवामान अनुकूल झाले असतानाही प्रशासन कोणतीही ठोस पावले उचलत नसल्याने आश्चर्य व्यक्त केले जात आहे.

• शाळकरी मुले आणि रुग्णांचे हाल

हा रस्ता परिसरातील शाळा, महाविद्यालये, डेक्कन हॉस्पिटल तसेच रेल्वे स्थानकासाठी एकमेव मुख्य संपर्क मार्ग आहे. खराब रस्त्यामुळे शाळकरी मुले, ज्येष्ठ नागरिक आणि रुग्णवाहिकांची मोठी कोंडी होत आहे. ‘आता प्रशासनाला आणखी किती अपघातांची प्रतीक्षा आहे?’ असा संतप्त सवाल नागरिकांनी केला आहे.

“बेळगावच्या जनतेला पोकळ आश्वासने नको, तर सुरक्षित रस्ते हवेत,” अशा शब्दांत नागरिकांनी प्रशासनाला सुनावले असून, यावेळेस त्वरित डांबरीकरण आणि पाणी उपशाची योग्य व्यवस्था न झाल्यास तीव्र आंदोलन छेडण्याचा इशारा उपस्थित नागरिकांनी दिला.

The post बेळगावात न्यू गुड्स शेड रोडच्या कायमस्वरूपी दुरुस्तीसाठी महापालिका आयुक्तांना निवेदन appeared first on News 24 Tass Marathi.

मुंबई : सांगली जिल्ह्यातील कुपवाड येथील केसरेकर दाम्पत्य दुहेरी हत्याकांडातील मुख्य आरोपीला कठोरात कठोर शिक्षा देण्यासह पीडित कुटुंबातील अनाथ मुलांना शासकीय मदत आणि कायदेशीर संरक्षण मिळावे, अशी मागणी समस्त मराठा समाज बेळगावच्या शिष्टमंडळाने महाराष्ट्राच्या उपमुख्यमंत्र्यांकडे केली. यासंदर्भात शिष्टमंडळाने मुंबईत उपमुख्यमंत्र्यांची भेट घेऊन मागण्यांचे निवेदन सादर केले.

मूळचे बेळगाव जिल्ह्यातील खानापूर तालुक्यातील हेब्बाळ गावचे रहिवासी असलेले मोहन नागाप्पा केसरेकर (वय ४५) आणि त्यांच्या पत्नी मनीषा मोहन केसरेकर (वय ३५) हे उदरनिर्वाहासाठी सांगली जिल्ह्यातील कुपवाड येथे स्थायिक झाले होते. १५ ऑगस्ट २०२६ रोजी कचरा टाकण्याच्या किरकोळ कारणावरून झालेल्या वादातून शेजारी राहणाऱ्या फरीद शेख याने त्यांच्यावर चाकू आणि हातोड्याने हल्ला केल्याचा आरोप आहे. या घटनेत मनीषा आणि मोहन केसरेकर यांचा उपचारादरम्यान मृत्यू झाला. त्यांच्या दोन लहान मुलांवर पालकांचे छत्र हरपल्याने त्यांच्यासमोर मोठे संकट उभे राहिले आहे.

या पार्श्वभूमीवर शिष्टमंडळाने संवेदनशील प्रकरणाचा जलदगतीने तपास करून आरोपीवर कठोर कारवाई करण्याची मागणी केली. या वेळी रमाकांत दादा कोंडुसकर, प्राचार्य आनंद आपटेकर, गुणवंत पाटील, सागर पाटील, मुकेश बारदेश, नंदू इंदलकर, गणेश कदम, कपिल भोसले, विनोद बिर्जे, निलेश मुदगेकर आणि विराज मोरकुंबे उपस्थित होते.

शिष्टमंडळाने उपमुख्यमंत्र्यांकडे या प्रकरणासाठी विशेष सरकारी वकील नियुक्त करण्याची मागणी केली. तसेच खटला जलदगती न्यायालयात चालवून कायद्यानुसार आरोपीला कठोरातील कठोर शिक्षा मिळावी, अशी मागणी करण्यात आली.

प्रकरणाचा तपास विशेष तपास पथकाकडे (एसआयटी) सोपवून लवकरात लवकर दोषारोपपत्र दाखल करावे, अशीही मागणी करण्यात आली. याशिवाय पालक गमावलेल्या दोन्ही मुलांना राज्य सरकारने आर्थिक मदत द्यावी आणि त्यांच्या शिक्षण व भवितव्याची जबाबदारी स्वीकारावी, अशी विनंती निवेदनातून करण्यात आली.

मुख्य फिर्यादी, तिचा भाऊ आणि इतर प्रमुख साक्षीदारांच्या सुरक्षेचा प्रश्न लक्षात घेऊन त्यांना तातडीने पोलीस संरक्षण देण्यात यावे, अशी मागणीही शिष्टमंडळाने केली.

उपमुख्यमंत्र्यांनी निवेदनाची गांभीर्याने दखल घेत पीडित कुटुंबाला लवकर न्याय मिळवून देण्यासाठी आवश्यक कार्यवाही करण्याचे तसेच प्रकरण जलदगती न्यायालयात चालविण्याबाबत सकारात्मक आश्वासन दिल्याचे शिष्टमंडळाने सांगितले. केसरेकर कुटुंबीयांच्या पाठीशी समाज ठामपणे उभा असल्याचेही यावेळी स्पष्ट करण्यात आले.

The post कुपवाड दुहेरी हत्याकांडातील आरोपीला फाशी द्या appeared first on News 24 Tass Marathi.

बेळगाव : बेळगाव महापालिका बरखास्त करण्याच्या प्रस्तावामुळे प्रशासकीय पातळीवरील वातावरण तापले असून, महापौर प्रीती कामकर यांनी या निर्णयाला तीव्र विरोध दर्शविला आहे. प्रादेशिक आयुक्तांनी सरकारकडे महापालिका बरखास्त करण्याची शिफारस केल्यानंतर महापौरांनी त्यांच्याकडे विनंती अर्ज सादर करून महापालिकेची सद्यस्थिती स्पष्ट केली आहे.

महापौर प्रीती विनायक कामकर यांनी आपल्या अर्जातून महापालिका कन्नड भाषेप्रती कटिबद्ध असल्याचे स्पष्ट केले. कन्नड समर्थक संघटनांच्या कृती समितीच्या मागणीवरून तसेच महाराष्ट्र-कर्नाटक सीमाप्रश्न सर्वोच्च न्यायालयात प्रलंबित असल्याच्या पार्श्वभूमीवर महापालिकेच्या परिषद बैठकीत कर्नाटक सीमाभागाच्या हिताचे रक्षण करण्यासाठी सरकारकडून कायदेशीर मत घेण्यासंदर्भात दुरुस्ती ठराव मंजूर करण्यात आला होता. मात्र, या पार्श्वभूमीवर महापालिका बरखास्त करण्याचा प्रस्ताव योग्य नसल्याचे महापौरांनी म्हटले आहे.

महापालिकेत अधिकारी आणि कर्मचाऱ्यांची मोठी कमतरता असतानाही प्रशासनाचे कामकाज सुरू असून, मागील पाच महिन्यांत स्थायी समितीच्या १८ प्रमुख बैठका घेण्यात आल्याचा दावा महापौरांनी केला आहे. या बैठकींमध्ये जनहिताच्या विविध विकासकामांना मंजुरी देण्यात आली आहे.

जनगणना, जात प्रमाणपत्र वितरण यासह अन्य अतिरिक्त जबाबदाऱ्या अधिकाऱ्यांवर असल्याने काही अधिकारी महापालिकेच्या बैठकींना अनुपस्थित राहत असल्याचे सांगण्यात आले. संबंधित अधिकाऱ्यांवर शिस्तभंगाची कारवाई करण्याची मागणी नगरविकास विभागाकडे करण्यात आल्याचेही महापौरांनी स्पष्ट केले.

दरम्यान, महापालिकेने स्वतःच्या प्रयत्नातून १५व्या वित्त आयोगाअंतर्गत मिळणारे अनुदान १८ कोटी रुपयांवरून ३४ कोटी रुपयांपर्यंत वाढविल्याचा दावा करण्यात आला आहे. तसेच नागरिकांना दिल्या जाणाऱ्या सार्वजनिक सेवांमध्ये कोणताही खंड पडलेला नसल्याचे महापालिका प्रशासनाकडून स्पष्ट करण्यात आले.

महापालिकेसमोरील प्रशासकीय अडचणी दूर करण्यासाठी सरकारने आवश्यक मनुष्यबळ आणि निधी उपलब्ध करून द्यावा. महापालिकेला सहकार्य करण्याऐवजी बरखास्तीचा प्रस्ताव पुढे नेणे योग्य नाही, अशी भूमिका उपमहापौर हनुमंत कोंगाली यांनी मांडली. त्यामुळे सरकार आणि प्रशासनाने महापालिका बरखास्तीच्या निर्णयाचा फेरविचार करावा, अशी मागणी त्यांनी केली.

The post बेळगाव महापालिका बरखास्तीच्या प्रस्तावाला महापौरांचा विरोध appeared first on News 24 Tass Marathi.

येळ्ळूर : येळ्ळूर रस्त्यावरील केएलई रुग्णालयाजवळ मोठ्या प्रमाणात कचरा टाकून त्याचे वर्गीकरण केले जात असल्याने परिसरात दुर्गंधी आणि भटक्या कुत्र्यांचा उपद्रव वाढला आहे. या कचऱ्यामुळे वाहनचालक, शेतकरी तसेच रुग्णालयात येणाऱ्या नागरिकांना त्रास सहन करावा लागत असून, कचरा टाकण्याचे व वर्गीकरणाचे काम तातडीने बंद करावे, अशी मागणी समाज सारथी संघटनेच्या वतीने करण्यात आली.

यासंदर्भात संघटनेच्या पदाधिकाऱ्यांनी सोमवारी (दि. २४) महापालिका आयुक्त कार्तिक एम. यांची भेट घेऊन निवेदन दिले. येळ्ळूर रस्त्याच्या कडेला मोठ्या प्रमाणात कचरा साचल्याने वाहतुकीस अडथळा निर्माण होत आहे. परिसरात शेती असल्याने शेतकरी या मार्गावरून ये-जा करतात. कचऱ्यामुळे भटक्या कुत्र्यांची संख्या वाढली असून, ही कुत्री अचानक दुचाकीस्वार व नागरिकांच्या अंगावर धावून जात असल्याने अपघाताचा धोका निर्माण झाला आहे.मुख्य रस्त्यालगतच कचऱ्याचे वर्गीकरण केले जात असल्याने दुर्गंधीचा त्रास होत आहे. परिसरात केएलई रुग्णालय असल्याने रुग्ण, त्यांचे नातेवाईक तसेच रुग्णालयातील कर्मचाऱ्यांनाही याचा त्रास सहन करावा लागत आहे. त्यामुळे नागरिकांच्या आरोग्याच्या दृष्टीनेही या ठिकाणी कचरा टाकणे तातडीने बंद करून परिसराची स्वच्छता करावी, अशी मागणी निवेदनातून करण्यात आली.

आयुक्त कार्तिक एम. यांनी निवेदन स्वीकारून येळ्ळूर रस्त्यालगत कचरा टाकण्याचे काम तातडीने बंद करण्याचे आश्वासन दिले. तसेच संबंधित अधिकारी हणमंत कलादगी यांना समस्या सोडविण्याच्या सूचना केल्या. उपमहापौर हणमंत कोंगाली यांनाही यावेळी निवेदन देण्यात आले.

यावेळी समाज सारथी संघटनेचे अध्यक्ष प्रा. सी. एम. गोरल, सचिव बी. एन. मजुकर, गोविंद काळसेकर, शिवाजी सायनेकर, अनिल हुंदरे, डॉ. तानाजी पावले, सतीश पाटील, दत्ता उघाडे, प्रकाश पाटील, सूरज गोरल, हणमंत पाटील, गंगाधर पाटील, बाळकृष्ण पाटील, यल्लुप्पा पाटील, आनंद कुंडेकर, रमेश मोनापा धामणेकर, कृष्णा बिजगरकर, रमेश धामणेकर, आदी उपस्थित होते.

The post येळ्ळूर रस्त्यावरील कचरा तातडीने हटवा appeared first on News 24 Tass Marathi.

मुंबई : सांगली जिल्ह्यातील कुपवाड येथे झालेल्या केसरेकर दाम्पत्याच्या दुहेरी हत्याकांडातील आरोपीला कठोरात कठोर शिक्षा द्यावी, तसेच मृत दाम्पत्याच्या अनाथ मुलांना शासकीय मदत व संरक्षण मिळावे, अशी मागणी समस्त मराठा समाज बेळगावच्या शिष्टमंडळाने महाराष्ट्राचे मुख्यमंत्री देवेंद्र फडणवीस यांच्याकडे केली.

बेळगाव जिल्ह्यातील खानापूर तालुक्यातील हेब्बाळ येथील मूळ रहिवासी असलेले मोहन नागाप्पा केसरेकर (वय ४५) आणि त्यांच्या पत्नी मनीषा मोहन केसरेकर (वय ३५) हे उपजीविकेसाठी सांगलीतील कुपवाड येथे वास्तव्यास होते. १५ ऑगस्ट २०२६ रोजी कचरा टाकण्याच्या किरकोळ कारणावरून झालेल्या वादातून शेजारी राहणाऱ्या फरीद शेख याने चाकू आणि हातोड्याने त्यांच्यावर हल्ला केल्याचा आरोप आहे. या हल्ल्यात दोघांचा उपचारादरम्यान मृत्यू झाला. त्यामुळे त्यांची दोन मुले मनाली आणि मनोज यांच्यावर पालकांचे छत्र हरपले आहे.

या घटनेची गंभीर दखल घेत समस्त मराठा समाज बेळगावच्या शिष्टमंडळाने मुंबईत मुख्यमंत्र्यांची भेट घेऊन विविध मागण्यांचे निवेदन सादर केले. या प्रकरणासाठी विशेष सरकारी वकील नियुक्त करावा, खटला जलदगती न्यायालयात चालवावा आणि तपासासाठी विशेष तपास पथकाची नियुक्ती करावी, अशी मागणी करण्यात आली.

केसरेकर दाम्पत्याच्या मुलांना राज्य सरकारने आर्थिक मदत द्यावी, त्यांचे पालकत्व स्वीकारून प्रत्येक मुलाला दरमहा १० हजार रुपयांची मदत सुरू करावी, तसेच शिक्षण पूर्ण झाल्यानंतर शासकीय सेवेत संधी देण्याबाबत लेखी आश्वासन द्यावे, अशी मागणीही करण्यात आली.

याशिवाय मुख्य फिर्यादी मनाली, तिचा भाऊ मनोज आणि इतर प्रमुख साक्षीदारांना पोलीस संरक्षण देण्यात यावे, अशी मागणी शिष्टमंडळाने केली. आरोपीविरुद्धचा तपास वेगाने पूर्ण करून न्यायालयात दोषारोपपत्र दाखल करावे, अशीही मागणी करण्यात आली.

यावेळी रमाकांत दादा कोंडुसकर, प्राचार्य आनंद आपटेकर, गुणवंत पाटील, सागर पाटील, मुकेश बारदेश, नंदू इंदलकर, गणेश कदम, कपिल भोसले, विनोद बिर्जे, निलेश मुदगेकर आणि विराज मोरकुंबे यांच्यासह शिष्टमंडळातील सदस्य उपस्थित होते.

मुख्यमंत्री देवेंद्र फडणवीस यांनी निवेदनाची गांभीर्याने दखल घेत पीडित कुटुंबाला न्याय मिळवून देण्यासाठी आवश्यक कार्यवाही करण्याचे आश्वासन दिल्याची माहिती शिष्टमंडळाने दिली.

The post सांगली येथील कुपवाड दुहेरी हत्याकांड प्रकरणातील आरोपीला फाशीची शिक्षा द्या appeared first on News 24 Tass Marathi.

बेळगाव : कुपवाड येथे १५ ऑगस्ट रोजी घडलेल्या दुर्दैवी घटनेत मृत्यू झालेल्या मोहन नागप्पा केसरेकर आणि त्यांच्या पत्नी मनीषा मोहन केसरेकर यांच्या कुटुंबीयांना तातडीने आर्थिक मदत व नुकसानभरपाई देण्यात यावी, अशी मागणी खानापूर तालुका महाराष्ट्र एकीकरण समितीने केली आहे. यासंदर्भात समितीच्या वतीने बेळगाव जिल्हाधिकाऱ्यांना निवेदन सादर करण्यात आले.

मृत दांपत्याचे मूळ गाव खानापूर तालुक्यातील हेब्बाळ असल्याने या घटनेनंतर त्यांच्या कुटुंबीयांवर मोठे आर्थिक संकट ओढवले आहे. अंत्यविधी तसेच वैद्यकीय आणि कायदेशीर प्रक्रिया, प्रवास व इतर आवश्यक बाबींवर कुटुंबीयांना अनपेक्षित खर्चाचा सामना करावा लागत आहे.

या पार्श्वभूमीवर मानवी दृष्टिकोनातून शासनाने तातडीने सानुग्रह अनुदान मंजूर करावे, अशी मागणी समितीने केली आहे. तसेच लागू असलेल्या व्हिक्टिम कॉम्पन्सेशन स्कीमअंतर्गत मिळणारी नुकसानभरपाई मृतांच्या कायदेशीर वारसांना लवकरात लवकर मिळावी, यासाठी आवश्यक प्रशासकीय कार्यवाही करावी, अशी विनंतीही निवेदनातून करण्यात आली आहे.

केसरेकर कुटुंबीय सध्या आर्थिक आणि सामाजिक संकटातून जात असल्याने शासनाने या प्रकरणाची तातडीने दखल घेऊन आवश्यक मदत उपलब्ध करून द्यावी, अशी भूमिका समितीने मांडली आहे.

The post केसरेकर कुटुंबीयांना तातडीची मदत द्या appeared first on News 24 Tass Marathi.

बेळगाव : आगामी गणेशोत्सवाच्या पार्श्वभूमीवर ग्रामीण भागातील रस्त्यांची दुरवस्था, गणेशोत्सव मंडळांना आवश्यक सुविधा आणि तात्पुरत्या वीज जोडणीसंदर्भातील विविध मागण्यांसाठी तालुका महाराष्ट्र एकीकरण समितीच्या शिष्टमंडळाने जिल्हाधिकारी मोहम्मद रोशन यांची भेट घेतली.

गणेशोत्सवापूर्वी ग्रामीण बेळगाव तालुक्यातील रस्त्यांवरील खड्डे तातडीने बुजवून आवश्यक डागडुजी करण्यात यावी, अशी प्रमुख मागणी समितीने केली. तालुक्यातील अनेक गावांमधील रस्त्यांची अवस्था अत्यंत खराब झाली असून, गणेशोत्सवाच्या काळात नागरिक आणि गणेशभक्तांना मोठ्या अडचणींचा सामना करावा लागू शकतो, असे समितीने जिल्हाधिकाऱ्यांच्या निदर्शनास आणून दिले.

शहरातील सार्वजनिक गणेशोत्सव मंडळांना उपलब्ध करून दिल्या जाणाऱ्या सवलती आणि सुविधा ग्रामीण भागातील सार्वजनिक गणेशोत्सव मंडळांनाही देण्यात याव्यात, अशी मागणी करण्यात आली. गणेशोत्सवाचे आयोजन करणाऱ्या युवक मंडळांना तात्पुरती वीज जोडणी मोफत देण्यात यावी आणि त्यासाठी कोणतीही सुरक्षा ठेव आकारू नये, अशी मागणीही समितीने केली.

पावसाळा संपल्यानंतर दसरा आणि दिवाळीच्या कालावधीत गावांमधील रस्त्यांचे कायमस्वरूपी डांबरीकरण व काँक्रिटीकरण करण्यात यावे, अशी मागणी समितीने केली. रस्त्यांची कामे रखडल्यास व्यापक आंदोलन छेडण्याचा इशाराही शिष्टमंडळाने दिला.

दरम्यान, गणेशोत्सवापूर्वी रस्त्यांवरील खड्डे बुजवून आवश्यक डागडुजीची कामे पूर्ण करण्यासाठी संबंधित विभागांना तातडीने निर्देश देण्यात येतील, असे आश्वासन जिल्हाधिकारी मोहम्मद रोशन यांनी दिले. ज्या गावांमध्ये रस्त्यांची मोठ्या प्रमाणात दुरवस्था झाली आहे, अशा गावांची यादी प्रशासनाकडे सादर करण्याची सूचना त्यांनी समितीला केली. त्यानुसार संबंधित विभागांच्या समन्वयाने आवश्यक दुरुस्तीची कामे हाती घेण्यात येणार आहेत.

गणेशोत्सव मंडळांवरील आर्थिक भार कमी करण्यासाठी तात्पुरत्या वीज जोडणीसाठी आकारण्यात येणाऱ्या सुरक्षा ठेवीच्या धोरणाचाही आढावा घेण्यात येईल, असे प्रशासनाकडून सांगण्यात आले.

यावेळी माजी आमदार मनोहर किणेकर, समितीचे आर. एम. चौगुले यांच्यासह शिष्टमंडळातील इतर पदाधिकारी आणि कार्यकर्ते उपस्थित होते.

The post ग्रामीण भागातील रस्त्यांच्या दुरवस्थेवर तालुका म. ए. समिती आक्रमक appeared first on News 24 Tass Marathi.