बेळगाव : आषाढी एकादशीनिमित्त पंढरपूरला जाणाऱ्या भाविकांसाठी दक्षिण पश्चिम रेल्वेकडून धारवाड-बेळगाव-पंढरपूर विशेष रेल्वे आजपासून सुरू करण्यात आली आहे. बेळगाव, धारवाड, हुबळी आणि परिसरातील हजारो भाविकांची दरवर्षी होणारी गैरसोय लक्षात घेऊन ही विशेष सेवा उपलब्ध करून देण्यात आली असून, २३ ते २८ जुलैदरम्यान ही रेल्वे एकूण सहा फेऱ्या करणार आहे.

या विशेष रेल्वेत एकूण १० डबे असून त्यापैकी ८ जनरल आणि २ स्लीपर कोचचा समावेश आहे. बेळगावहून पंढरपूरसाठी थेट रेल्वेची अनेक वर्षांपासून मागणी होत होती. या विशेष सेवेच्या माध्यमातून भाविकांना अधिक सोयीस्कर प्रवासाची सुविधा उपलब्ध होणार आहे.

सकाळी ६ वाजता धारवाड येथून सुटणारी विशेष एक्स्प्रेस सकाळी ७.४९ वाजता खानापूर, ८.३० वाजता बेळगाव, ९.३० वाजता घटप्रभा, दुपारी १२.२० वाजता मिरज येथे पोहोचून सायंकाळी ४.५० वाजता पंढरपूर येथे दाखल होईल.

परतीच्या प्रवासात ही रेल्वे सायंकाळी ६.४० वाजता पंढरपूरहून सुटेल. त्यानंतर मध्यरात्री १.२० वाजता बेळगावला, तर पहाटे ४.३० वाजता धारवाडला पोहोचणार आहे.

ही विशेष रेल्वे धारवाड, लोंढा, खानापूर, देसूर, बेळगाव, पाच्छापूर, गोकाक रोड, घटप्रभा, चिकोडी रोड, रायबाग, कुडची, उगार, शेडबाळ, विजापूर, मिरज, अरग, सांगोला आणि पंढरपूर या स्थानकांवर थांबणार असल्याने उत्तर कर्नाटकातील तसेच सीमाभागातील भाविकांना याचा मोठा लाभ होणार आहे.

The post आषाढी एकादशीनिमित्त धारवाड – बेळगाव – पंढरपूर विशेष रेल्वेला आजपासून सुरुवात appeared first on News 24 Tass Marathi.

हुबळी : कर्नाटक राज्य क्रिकेट संघटना (केएससीए)तर्फे प्रथमच आयोजित करण्यात येणाऱ्या १९ वर्षांखालील महिला आंतर-ग्रामीण विभागीय क्रिकेट स्पर्धेसाठी धारवाड विभागीय संघ जाहीर करण्यात आला आहे. या संघाच्या कर्णधारपदी सलामीवीर फलंदाज श्रेया पोटे तर उपकर्णधारपदी झोया इम्तियाज काझी हिची निवड करण्यात आली आहे.

केएससीएचे अध्यक्ष व्यंकटेश प्रसाद यांच्या नेतृत्वाखाली प्रथमच ही स्पर्धा आयोजित करण्यात येत असून, ती २३ जुलै ते १ ऑगस्ट या कालावधीत बंगळुरूत रंगणार आहे. २२ जुलै रोजी महाराणी ट्रॉफी स्पर्धेच्या उद्घाटन सामन्याने या स्पर्धेची सुरुवात होणार असून, ग्रामीण भागातील महिला क्रिकेटपटूंना मोठे व्यासपीठ उपलब्ध करून देण्याच्या दृष्टीने हा महत्त्वाचा उपक्रम मानला जात आहे.

धारवाड विभागाचे निमंत्रित वीरण्णा सवदी यांनी सोमवारी ४१ सदस्यीय संघाची घोषणा केली. अंतिम संघात श्रेया पोटे (कर्णधार), झोया इम्तियाज काझी (उपकर्णधार), आराधना हेब्बीकर, प्रार्थना बी. गौडा (यष्टीरक्षक), अपूर्वा अशोक होसवक्की, सिमरा लोंदेवाले, रिमझिम शुक्ला, अनुषा एस. मेनासिनाके, हर्षिता विक्रम नायक, अन्वी समीर यळ्ळूरकर, वैष्णवी श्रीकांत कांबळे, साक्षी कुबेर मुनवळ्ळी आणि मनुश्री राजेश कुर्थाकोटी यांचा समावेश आहे.

राखीव खेळाडू म्हणून निधी पाटील, त्रिवेणी गर्लगुंजी आणि दिशा पाटील यांची निवड करण्यात आली आहे. संघाचे प्रशिक्षक मल्लिकार्जुन बी., तर व्यवस्थापक म्हणून प्रद्या खिलारे यांच्यावर जबाबदारी सोपविण्यात आली आहे.

श्रेया पोटे हिला कर्नाटक राज्य क्रिकेट संघटनेचे सदस्य व धारवाड विभागीय क्रिकेट समितीचे माजी सन्मान्वयक अविनाश पोतदार यांचे मार्गदर्शन लाभत आहे. तसेच क्रिकेट प्रशिक्षक फिरोज शेख , फिटनेस प्रशिक्षक ओंकार मोटर आणि सतीश मोरे यांचे सहकार्य लाभले आहे.

The post धारवाड विभागीय महिला क्रिकेट संघाच्या कर्णधारपदी ‘श्रेया पोटे’ appeared first on News 24 Tass Marathi.

खानापूर : बेळगाव – धारवाड नवीन रेल्वे मार्गासाठी प्रस्तावित जमीन अधिग्रहण प्रक्रियेला स्थानिक शेतकऱ्यांनी पुन्हा एकदा तीव्र विरोध दर्शवला आहे. गर्लगुंजी, नंदीहळ्ळी आणि केकेकोप्प या गावांतील २०० हून अधिक शेतकऱ्यांनी केआयडीबीच्या विशेष भूमी अधिग्रहण अधिकाऱ्यांच्या कार्यालयावर धडक देत प्रकल्पाविरोधात लेखी आक्षेप सादर केले.

विशेष भूमी अधिग्रहण अधिकारी मंजुनाथ डोंबर यांनी शेतकऱ्यांचे निवेदन स्वीकारून याबाबत सकारात्मक तोडगा काढण्याचा प्रयत्न केला जाईल, असे आश्वासन दिले.

गेल्या सात वर्षांपासून प्रस्तावित रेल्वे मार्गाला विरोध सुरू असून हा मार्ग अत्यंत सुपीक शेती क्षेत्रातून जात असल्याचा शेतकऱ्यांचा आरोप आहे. या जमिनीत वर्षातून तीन पिके घेतली जातात तसेच मोठ्या प्रमाणात भाजीपाला उत्पादन होते, असे त्यांनी स्पष्ट केले. परिसरात कमी खोलीवर मुबलक पाणी उपलब्ध असल्याने ही जमीन त्यांच्या उपजीविकेचा मुख्य आधार असल्याचे शेतकऱ्यांनी सांगितले.

प्रशासनाने सुपीक जमिनीऐवजी पर्यायी नापीक जमीन वापरण्याचा विचार करावा, अशी मागणी करत शेतकऱ्यांनी “कोणत्याही परिस्थितीत सुपीक जमीन देणार नाही” असा ठाम इशारा दिला.

रेल्वे मार्गामुळे वीजवाहिन्या, जनावरांचे मार्ग, ट्रॅक्टर रस्ते तसेच पाणीपुरवठा पाईपलाईन यावर गंभीर परिणाम होईल, अशीही चिंता त्यांनी व्यक्त केली. यावेळी शेतकरी प्रसाद पाटील यांनी प्रशासनाला उद्देशून राजकीय दबावाखाली निर्णय घेऊन शेतकऱ्यांचे नुकसान करू नये, अशी मागणी केली.

या आंदोलनात प्रसाद पाटील, सुनील पाटील, संतोष पाटील, मारुती लोकूर, किरण लोंढे, राजेंद्र पाटील, पुंडलिक मेलगे, सुरेश जाधव, कृष्णा सिद्धानी, सुधाकर पाटील यांच्यासह गर्लगुंजी, नंदीहळ्ळी, केकेकोप्प, हलगीमर्डी आणि नागेनहट्टी परिसरातील शेतकरी मोठ्या संख्येने सहभागी झाले होते.

The post बेळगाव – धारवाड रेल्वे प्रकल्पाला शेतकऱ्यांचा तीव्र विरोध appeared first on News 24 Tass Marathi.

बेंगळूरू : धारवाड येथील भाजप नेते योगेश गौडा यांच्या हत्या प्रकरणात बेंगळूरू येथील लोकप्रतिनिधींच्या विशेष न्यायालयाने आज ऐतिहासिक निकाल देत माजी मंत्री तथा विद्यमान काँग्रेस आमदार विनय कुलकर्णी यांच्यासह एकूण १६ जणांना जन्मठेपेची शिक्षा सुनावली आहे.

या खटल्यातील शेवटच्या आरोपींपैकी पोलीस अधिकारी चन्नकेशव टिंगरीकर याला ७ वर्षांच्या साध्या कारावासाची शिक्षा ठोठावण्यात आली आहे. न्यायाधीश संतोष गजानना भट यांनी प्रदीर्घ सुनावणीनंतर हा निकाल जाहीर केला.

जन्मठेप सुनावण्यात आलेल्या आरोपींमध्ये विक्रम, कीर्ती कुमार, संदीप सवदत्ती, विनायक कटगी, महाबळेश्वर होंगल उर्फ मुडका, संतोष सवदत्ती, एम. दिनेश, एस. अश्वथ, के.एस. सुनील, नझीर अहमद, शनवाज, के. नूथन, सी. हर्षित, चंद्रशेखर इंदिकलबुर्ग आणि इतरांचा समावेश आहे.

न्यायालयाने सर्व आरोपींना भारतीय दंड संहितेच्या कलम ३०२ (खून) अंतर्गत जन्मठेप आणि कलम १२०(ब) (गुन्हेगारी कट) अंतर्गत ७ वर्षांची सक्त कैद अशी शिक्षा सुनावली आहे. दोन्ही शिक्षा एकत्र भोगाव्या लागतील, असे आदेशात स्पष्ट करण्यात आले आहे.

सीबीआयने दाखल केलेल्या आरोपपत्रावर आधारित सुनावणीनंतर न्यायालयाने बुधवारी सर्व आरोपींना दोषी ठरवले होते. आज शिक्षा जाहीर झाल्याने प्रकरणाचा दीर्घ न्यायप्रक्रियेचा अध्याय पूर्ण झाला आहे.

The post योगेश गौडा हत्या प्रकरणी आमदार विनय कुलकर्णी यांच्यासह १६ जणांना जन्मठेप appeared first on News 24 Tass Marathi.

बेंगळूर : लोकप्रतिनिधींच्या विशेष न्यायालयाने बुधवारी धारवाडचे माजी जिल्हा पंचायत सदस्य योगेश गौडा यांच्या हत्या प्रकरणात निकाल जाहीर करत आमदार विनय कुलकर्णी यांच्यासह १७ जणांना दोषी ठरवले.

गेल्या १० वर्षांपासून या प्रकरणाचा तपास सुरू होता. लोकप्रतिनिधी न्यायालयाचे न्यायाधीश संतोष गजानन भट यांनी हा महत्त्वपूर्ण निकाल दिला. न्यायालयाने सर्व दोषींना तात्काळ ताब्यात घेण्याचे आदेश सीबीआय पोलिसांना दिले आहेत.

दरम्यान, दोषी आमदार विनय कुलकर्णी यांना बेंगळूरमधील परप्पन अग्रहार कारागृह येथे हलवण्यात येणार असून, गुरुवारी शिक्षेची घोषणा केली जाणार आहे.

१५ जून २०१६ रोजी धारवाड येथील सप्तापूर कॉलनीतील ‘उदय जिम’मध्ये योगेश गौडा वर्तमानपत्र वाचत असताना काही हल्लेखोरांनी त्यांच्यावर हल्ला केला. त्यांच्या डोळ्यात मिठाची पूड टाकून प्राणघातक शस्त्रांनी वार करत त्यांची निर्घृण हत्या करण्यात आली होती. या प्रकरणात विनय कुलकर्णी यांच्यासह चंद्रशेखर इंडी, बसवराज मुथगी, विनायक काटगी, शिवानंद बागवाडी, संदीप सावदत्ती, महंतेश सिरियन्नवर आणि नवीन मुद्दपूर यांच्यासह एकूण १७ जणांचा समावेश आहे.

योगेश गौडा यांच्या नातेवाईकांनी या निकालानंतर समाधान व्यक्त करत “कायद्यापेक्षा कोणीही मोठा नाही” असे सांगितले. तसेच या लढ्यात साथ देणाऱ्या सर्वांचे आभार मानले असून, दोषींना जन्मठेपेची शिक्षा व्हावी अशी मागणी त्यांनी केली आहे.

The post योगेश गौडा हत्या प्रकरणी आमदार विनय कुलकर्णी यांच्यासह १७ जण दोषी appeared first on News 24 Tass Marathi.

धारवाड : धारवाड शहर पोलिसांनी सार्वजनिक ठिकाणी पार्क केलेल्या दुचाकी चोरी करणाऱ्या एका सराईत गुन्हेगाराला अटक केली असून, त्याच्याकडून ७ दुचाकी जप्त केल्या आहेत. आरोपीची कारागृहात रवानगी करण्यात आली आहे.

शिवानंद माने (रा. कमलापूर, धारवाड) असे अटक केलेल्या चोरट्याचे नाव आहे. धारवाड शहर पोलीस स्थानकात दुचाकी चोरीच्या तक्रारी नोंदवल्यानंतर, पोलीस निरीक्षक गुरुनाथ चव्हाण यांच्या नेतृत्वाखालील पथकाने तपास सुरू केला.

सखोल चौकशीदरम्यान आरोपीने विविध ठिकाणाहून दुचाकी चोरी केल्याची कबुली दिली. त्याच्या ताब्यातून २,३५,००० रुपये किमतीच्या ७ दुचाकी जप्त करण्यात आल्या आहेत. चौकशी पूर्ण झाल्यानंतर आरोपीला न्यायालयासमोर हजर करून कारागृहात रवानगी दिली गेली. याप्रकरणी धारवाड शहर पोलीस स्थानकात गुन्हा दाखल करण्यात आला असून पुढील तपास सुरू आहे.

The post धारवाडमध्ये सराईत दुचाकी चोरट्याला अटक appeared first on News 24 Tass Marathi.

केएससीए धारवाड विभागाचे निमंत्रक अविनाश पोतदार यांच्या हस्ते आज मंगळवारी माजी भारतीय क्रिकेटपटू सुनील जोशी यांचा हुबळी येथे म्हैसूरी पगडी व शाल घालण्यासह विभागाचे शताब्दी स्मृतिचिन्ह देऊन सत्कार करण्यात आला. याप्रसंगी अविनाश वैद्य, वीरण्णा सवदी, अल्ताफ कित्तूर, दयानंद शेट्टी, वसंत मुर्डेश्वर आदी उपस्थित होते.

The post केएससीए धारवाड विभागातर्फे माजी क्रिकेटपटू सुनील जोशी यांचा सत्कार appeared first on News 24 Tass Marathi.

हुबळी : कर्नाटक उच्च न्यायालयाच्या धारवाड खंडपीठाला पुन्हा एकदा बॉम्बने उडवून देण्याची धमकी मिळाल्याने परिसरात खळबळ उडाली आहे. अज्ञात व्यक्तीने ई-मेलद्वारे पाठवलेल्या या धमकीनंतर पोलीस आणि सुरक्षा यंत्रणांनी तातडीने हालचाली सुरू केल्या.

न्यायालयाच्या प्रशासनाला प्राप्त झालेल्या ई-मेलची माहिती मिळताच बॉम्ब शोधक व नाशक पथक तसेच श्वान पथकाकडून संपूर्ण न्यायालयीन संकुलाची कसून तपासणी करण्यात येत आहे. खबरदारीचा उपाय म्हणून गरग पोलिसांनी न्यायालयाच्या मुख्य प्रवेशद्वारावर कडक नाकेबंदी केली असून, येणाऱ्या-जाणाऱ्या प्रत्येक व्यक्तीची सखोल चौकशी केली जात आहे.

न्यायालयीन कामकाजावर कोणताही परिणाम होऊ नये, यासाठी परिसरात मोठा पोलीस बंदोबस्त तैनात करण्यात आला आहे. विशेष म्हणजे, गेल्या महिन्यातही अशाच प्रकारे न्यायालयाला लक्ष्य करत धमकी देण्यात आली होती. त्यामुळे सुरक्षा व्यवस्थेवर प्रश्नचिन्ह निर्माण झाले आहे.

दरम्यान, न्यायालय परिसरात संशयास्पद वस्तू अथवा व्यक्ती आढळल्यास तातडीने पोलिसांना कळवावे, असे आवाहन प्रशासनाने केले आहे. या धमकीमागील सूत्रधाराचा शोध घेण्यासाठी पोलिसांकडून तपास सुरू आहे.

The post धारवाड उच्च न्यायालयाला पुन्हा बॉम्बची धमकी appeared first on News 24 Tass Marathi.

बेळगाव / प्रतिनिधी

बेळगाव बार असोसिएशनचे अध्यक्ष ॲड. एस. एस. किवडसन्नावर यांच्यावरील अविश्वास ठराव कर्नाटक उच्च न्यायालयाच्या धारवाड खंडपीठाने रद्दबातल ठरवला आहे. या निकालामुळे ॲड. किवडसन्नावर पुढेही बार असोसिएशनच्या अध्यक्षपदी कायम राहणार आहेत.

गेल्या २० सप्टेंबर २०२५ रोजी किवडसन्नावर यांच्याविरोधात अविश्वास ठराव मंजूर करण्यात आला होता. या ठरावाला आव्हान देत त्यांनी उच्च न्यायालयात याचिका दाखल केली होती. सुनावणीदरम्यान ॲड. किवडसन्नावर यांच्यावतीने ॲड. विजयकुमार शीलवंत, तर बार असोसिएशनतर्फे ॲड. नयना निर्ली यांनी युक्तिवाद केला. दोन्ही बाजूंचे म्हणणे ऐकून घेतल्यानंतर न्यायालयाने अविश्वास ठराव अवैध ठरवत तो रद्द केला.

या प्रकरणाची पार्श्वभूमी अशी की, बेळगाव न्यायालयात काही बोगस वकील प्रॅक्टिस करत असल्याच्या तक्रारीवर अध्यक्षांनी कारवाई न केल्याचा आरोप करण्यात आला होता. या मुद्द्यावरून ४५५ वकिलांनी अविश्वास ठरावाची मागणी केली होती. त्यानंतर उच्च न्यायालयाच्या आदेशानुसार विशेष सर्वसाधारण सभा घेऊन मतदान झाले होते आणि उपाध्यक्ष ॲड. बसवराज मुगळी यांची प्रभारी अध्यक्ष म्हणून नियुक्ती करण्यात आली होती.

मात्र, आता उच्च न्यायालयाने ही संपूर्ण प्रक्रिया रद्द ठरवत अविश्वास ठराव बाद केला आहे. न्यायालयाच्या आदेशानंतर किवडसन्नावर यांच्या समर्थकांनी न्यायालय परिसरात आनंदोत्सव साजरा केला. मंगळवारी सकाळी बेळगाव न्यायालयात त्यांचे अभिनंदन करण्यात आले.

या निर्णयावर प्रतिक्रिया देताना ॲड. किवडसन्नावर म्हणाले की, न्यायालयाने त्यांच्यावरील सर्व आक्षेप दूर करून पुन्हा एकदा वकील बांधवांची सेवा करण्याची संधी दिली आहे. सर्व वरिष्ठ व सहकारी वकिलांना विश्वासात घेऊन बेळगाव बार असोसिएशनच्या १५० व्या वर्धापन दिनाच्या तयारीसाठी प्रयत्न करणार असल्याचे त्यांनी सांगितले. त्यांनी या निकालासाठी सर्व सहकारी व वरिष्ठ वकिलांचे आभारही मानले.

The post ॲड. एस. एस. किवडसन्नावर यांच्यावरील अविश्वास ठराव रद्द appeared first on News 24 Tass Marathi.

बेळगाव : हुबळी येथे धारवाड जिल्हा शरीरसौष्ठव संघटना व कर्नाटक राज्य शरीरसौष्ठव संघटना पंचमुखी हनुमान समिती यांच्या संयुक्त विद्यमाने आयोजित राज्यस्तरीय मि.कर्नाटक बजरंगी शरीरसौष्ठव स्पर्धेत दावणगेरीच्या राहुल मेहरवाडेने आपल्या पिळदार शरीराच्या जोरावर मि. कर्नाटक बजरंगी हा किताब पटकाविला. बेळगावच्या रोनक गवसला उपविजेत्यापदावर समाधान मानावे लागले. तर बेळगावचा उमेश गंगणे उत्कृष्ट पोझर ठरला. हुबळी येथील बजरंगी मैदानावर आयोजित राज्यस्तरीय शरीरसौष्ठव स्पर्धेत राज्यातील जवळपास ११० स्पर्धकांनी भाग घेतला होता.

The post मि. कर्नाटक बजरंगी शरीरसौष्ठव स्पर्धेत राहुल मेहरवाडे विजेता appeared first on News 24 Tass Marathi.