याबाबत घटनास्थळावरून मिळालेल्या माहितीनुसार, प्रतीक्षा ही तिच्या पाच मैत्रिणींसोबत संजू बागाणे यांच्या मालकीच्या जमिनीत असलेल्या तलावात पोहण्यासाठी गेली होती. यावेळी पोहत असताना अचानक घडलेल्या घटनेत ती पाण्यात बुडाली आणि तिचा मृत्यू झाला.

या घटनेमुळे संपूर्ण गावात शोककळा पसरली असून परिसरात हळहळ व्यक्त केली जात आहे. मृत मुलीच्या पश्चात तिची आई आणि एक भाऊ असा परिवार आहे. या प्रकरणाची नोंद कागवाड पोलीस ठाण्यात करण्यात आली असून पुढील तपास सुरू आहे.

The post शेडबाळ येथे पोहायला गेलेल्या विद्यार्थिनीचा तलावात बुडून मृत्यू appeared first on News 24 Tass Marathi.

कागवाड : एका वर्तुळात अडकलेले शिक्षण महात्मा फुल्यांनी सर्वांसाठी खुले करून बहुजन आणि स्त्रियांसाठी ज्ञानाचे दरवाजे उघडले. त्यांच्या या क्रांतिकारी कार्यामुळे आज समाजातील विविध घटकांचा शिक्षणात सहभाग वाढला असून समाज अधिक एकजिनसी बनला आहे. शिक्षणामुळेच विकास साधता येतो, ही जाणीव आज दलित, आदिवासी, भटके आणि तळागाळातील समाजघटकांमध्ये निर्माण झाली आहे. तळातून झालेली राजकीय घुसळण, धर्मसत्तेला दिले गेलेले आव्हान आणि शेतकरी आंदोलनांचा उदय हे सर्व फुल्यांच्या विचारांवर आधारलेले परिवर्तनाचे टप्पे असल्याचे त्यांनी स्पष्ट केले. हा विचार पुन्हा एकदा जनमानसात रुजविण्याची गरज असल्याचे प्रतिपादन अंतर्गत गुणवत्ता हमी कक्षाचे समन्वयक प्रा. बी. डी. दामन्नवर यांनी केले.

येथील शिवानंद महाविद्यालयातील मराठी विभागातर्फे महात्मा जोतिबा फुले यांच्या द्वीशताब्दी जयंती निमित्त आयोजित कार्यक्रमात प्रा. दामन्नवर हे प्रमुख पाहुणे म्हणून बोलत होते.

प्रारंभी महात्मा जोतिबा फुले यांच्या प्रतिमेला पुष्पहार घालून अभिवादन करण्यात आले. स्वागत व प्रास्ताविक करताना मराठी विभाग प्रमुख प्रा. अशोक आलगोंडी फुल्यांच्या कार्याचा आढावा घेतला. अत्यंत प्रतिकूल रिस्थितीतही फुल्यांनी शिक्षण घेऊन समतेचा, सत्यशोधाचा, स्त्री सन्मानाचा आणि शिक्षणाचा वस्तुपाठ घालून दिला. स्त्री-पुरुष समानता हा फुलेंच्या विचाराचा केंद्रीभूत मुद्दा आहे. ज्योतिबांनी सामाजिक-धार्मिक रितीरिवाजांसह कुटुंबपद्धतीची पुनर्रचना करण्याचे ठरवले. सुरुवातीला फुले यांनी पर्यायी विवाहपद्धतीविषयी विचार करायला सुरुवात केली व सत्यशोधक विवाहपद्धती मांडली. असे ते म्हणाले.

यावेळी मराठी विभागाच्या वतीने महात्मा फुलेंच्या द्वीशताब्दी जयंती वर्षानिमित्त वर्षभर विविध उपक्रम, व्याख्यान आयोजित करण्याचा संकल्प केला गेला. कार्यक्रमाला हिंदी विभाग प्रमुख डॉ. अमोल पाटील यांच्यासह मराठी विभागातील विद्यार्थी मोठ्या संख्येने उपस्थित होते.

The post महात्मा जोतिबा फुले यांच्या विचारांची आजही समाजपरिवर्तनासाठी गरज – प्रा. बी. डी. दामन्नवर appeared first on News 24 Tass Marathi.

कागवाड : बेळगाव जिल्ह्यातील कागवाड तालुक्यात मंगसुळी गावात रिक्षा स्टँडवर नंबर लावण्याच्या किरकोळ वादातून रिक्षाचालक अशोक वड्डर यांची निर्घृण हत्या करण्यात आली. या प्रकरणी पोलिसांनी वेगवान कारवाई करत अवघ्या काही तासांत तीन संशयित आरोपींना अटक करून त्यांना हिंडलगा कारागृहात रवानगी केली.

मंगसुळी गावात रिक्षा उभी करण्याच्या कारणावरून भाऊबंदकीतील जुना वाद पुन्हा उफाळून आला होता. सागर संभाजी वड्डर, शिवा संभाजी वड्डर आणि विनोद संभाजी वड्डर यांनी अशोक वड्डर यांच्यावर जीवघेणा हल्ला करून त्यांची हत्या केली. गुन्हा लपवण्यासाठी आरोपींनीच पोलीस ठाण्यात जाऊन ‘भांडण सुरू आहे’ अशी खोटी माहिती दिल्याचे उघड झाले.

मृताच्या नातेवाईकांपूर्वीच आरोपी तक्रार देण्यासाठी पोहोचल्याने पोलिसांना संशय आला. जिल्हा पोलीस अधीक्षक के. रामराजन यांच्या मार्गदर्शनाखाली सखोल चौकशी करण्यात आली असता आरोपींनी गुन्ह्याची कबुली दिली. न्यायालयाने तिघांना न्यायालयीन कोठडी सुनावली आहे.

रिक्षा नंबर लावण्यासारख्या शुल्लक कारणावरून तरुणाचा बळी गेल्याने कागवाड परिसरात हळहळ व्यक्त होत आहे. पोलिसांनी जलद गतीने तपास पूर्ण करत आरोपींना जेरबंद केल्याबद्दल पोलीस पथकाचे विशेष कौतुक करण्यात आले आहे. या प्रकरणात आणखी कोणाचा सहभाग आहे का, याचा तपास सुरू असल्याची माहिती पोलीस अधीक्षकांनी दिली.

The post कागवाडमधील रिक्षाचालकाच्या हत्येचा छडा appeared first on News 24 Tass Marathi.

कागवाड : बेळगाव जिल्ह्याच्या कागवाड तालुक्यातील मंगसूळी येथे रिक्षा उभ्या करण्याच्या रांगेवरून झालेल्या वादातून एका तरुण रिक्षाचालकाची हत्या झाल्याची घटना समोर आली आहे. पोलिसांनी या प्रकरणी तात्काळ कारवाई करत तीन संशयितांना अटक केली असून पुढील तपास सुरू आहे.

मृत तरुणाचे नाव अशोक वडर (वय २७, रा. मंगसूळी) असे आहे. रिक्षा थांब्यावर गाड्या लावण्याच्या क्रमावरून अशोक आणि इतर चालकांमध्ये काही दिवसांपासून वाद सुरू होते. या वादातूनच परस्परांमध्ये वैर निर्माण झाले होते.

या पार्श्वभूमीवर आरोपी शिवा वडर, सागर वडर आणि विनोद वडर यांनी अशोकवर डोक्यात प्राणघातक हल्ला करून त्याचा खून केल्याचे समोर आले आहे. दोन दिवसांपूर्वी घडलेली ही घटना उशिरा उघडकीस आली. माहिती मिळताच कागवाड पोलिसांनी घटनास्थळी भेट देत पंचनामा केला.

या प्रकरणी तिन्ही आरोपींना ताब्यात घेऊन त्यांच्याविरोधात गुन्हा नोंद करण्यात आला आहे. किरकोळ कारणावरून झालेल्या या घटनेमुळे मंगसूळी परिसरात भीतीचे वातावरण निर्माण झाले आहे.

The post मंगसुळीत रिक्षा रांगेच्या वादात रिक्षाचालकाची हत्या appeared first on News 24 Tass Marathi.

कागवाड / वार्ताहर

कागवाड तालुक्यातील मूळे गावात अंधश्रद्धेचा धक्कादायक प्रकार समोर आला आहे. सिद्राय नावाच्या व्यक्तीने आपल्या बुद्धिमंद मुलीला अनेक वर्षे घरात साखळीने बांधून ठेवले, असे समजते.

माहितीनुसार, ही तरुणी दहा वर्षांपूर्वी नियमित कॉलेजला जात होती, परंतु तिच्या विचित्र वर्तनामुळे कुटुंबीयांना भानामतीची भीती वाटू लागली. त्यांनी एका स्वामीजींचा सल्ला घेतला, ज्यांनी भानामती दूर करण्यासाठी मोठा खर्च लागेल असे सांगितले. त्यामुळे उपचार न करता तिला घरात कैद करून ठेवण्यात आले.

कुटुंबीयांच्या म्हणण्यानुसार, “साखळी काढल्यास ती लोकांवर दगड फेकते किंवा पळून जाते,” म्हणून तिला असे बांधले होते. हा अमानुष प्रकार कागवाड पोलीस ठाण्याच्या हद्दीत घडला असून, पोलीस तपास सुरू आहेत.

The post भानामतीच्या भीतीने मुलीवर अमानुष अत्याचार appeared first on News 24 Tass Marathi.

कागवाड : साहित्य म्हणजे वेदनेच्या जमिनीवरून आनंदाच्या आकाशाकडील प्रतिभेचा प्रवास हा साहित्य निर्मितीचा इतिहास असतो. सुखाचा त्याग, दुःखाचा भोग, विसंगतीचा योग खऱ्या प्रतिभेला जाग आणत असतात. माणसाला दुःख अटळ आहे. ते कुणालाही चुकलेले नाही. परंतु त्या दुःखाला केवळ कवटाळून बसण्याला काही अर्थ नाही. सुखाचा त्याग आणि दुःखाचा भोग ही कोणत्याही प्रतिभेची प्रेरणा ठरायला हवी. मराठी भाषा गौरव दिवस हा प्रतिभा जागवायचा दिवस आहे. कुसुमाग्रजानी ज्या अंतप्रेरणेने प्रगल्भ असे साहित्य लिहून मराठी भाषेची सेवा केली; तशी आजच्या पिढीने, विद्यार्थ्याने लिहिले पाहिजे. सगळे पुन्हा मिळू शकेल पण वेळ गेलेली कधीच पुन्हा मिळणार नाही. त्यामुळे या वेळेचा सदुपयोग करून तुम्ही चांगले वाचा, चांगले लिहा. हे काम इथल्या मराठी विभागात होतं आहे याचे मला प्रचंड समाधान वाटते आहे. असे प्रतिपादन ज्येष्ठ साहित्यिक प्रा. डॉ. विनोद गायकवाड यांनी केले.

येथील शिवानंद महाविद्यालयात मराठी विभाग आणि मराठी पत्रकार संघातर्फे मराठी भाषा गौरव दिनानिमित्त विद्यार्थ्यासाठी एकदिवसीय कार्यशाळा आयोजित करण्यात आली होती. यावेळी प्रमुख वक्ते म्हणून डॉ. विनोद गायकवाड बोलत होते.

बोलताना पुढे डॉ. गायकवाड म्हणाले, तारुण्याचा काळ हा फार महत्वाचा आहे. जॉर्ज बर्नार्ड शॉ म्हणायचे सगळ्यात विषेश काळ आयुष्यातला कोणता तर तो तारुण्याचा काळ असतो. तो काळ तरुणांकडे असतो पण दुर्दैवाने ते त्यांनाच माहीत नसते. शिरवाडकर यांनी अशा तारुण्यात कितीतरी कविता लिहिल्या. विनायक सावरकरांनी याच वयेत मराठीला असंख्य नवीन शब्द देऊन मराठी भाषेची समृध्दी वाढविली. असे काहीतरी आपल्याला करता आले पाहिजे. बहिणाबाई चौधरी तर निरक्षर असतानाही किती प्रतिभावान काव्य लेखन त्यांनी केलं. चांगलं वाचलं की चांगलं लिहिता येते. रोजची वर्तमानपत्रे मासिके वाचा. तूम्ही समृध्द व्हाल. असे ते म्हणाले.

कुसुमाग्रजांच्या प्रतिमेला अभिवादन करून कार्यक्रमाची सुरुवात झाली. प्राचार्य डॉ. एस. पी. तळवार यांच्या अध्यक्षतेखाली पार पडलेल्या कार्यक्रमाच्या सभामांचावर मराठी पत्रकार संघाचे अध्यक्ष प्रभाकर गोंधळी, महाविद्यालयातील गुणवत्ता मानांकन केंद्राचे समन्वय अधिकारी प्रा. बी. डी. दामन्नवर, मराठी विभाग प्रमुख प्रा. अशोक आलगोंडी, कार्यक्रमाचे संयोजक प्रा. मनोज कोरे आदी उपस्थित होते.

डॉ. एस. पी. तळवार यांनी अध्यक्षीय मनोगतात म्हणाले, कोणतीही भाषा माणूस जोडण्याचे काम करते. भाषेच्या विकासात साहित्यिक योगदान देत असतात. शिरवाडकर यांनी मराठी भाषेला फार मोठे योगदान दिले आहे. डॉ. गायकवाड यांच्या विचारांनी प्रेरित होऊन विद्यार्थ्यांनी आपला सृजनात्मक आविष्कार साहित्य लेखनातून करावा.

उपस्थितांचे स्वागत प्रा. मनोज कोरे यांनी केले तर प्रास्ताविक आणि परिचय प्रा. अशोक आलगोंडी यांनी करून दिला. यावेळी मराठी भाषा गौरव दिनाचे औचित्य साधून कविता लेखन, निबंध लेखन व पोस्टर बनवणे स्पर्धा घेतल्या होत्या. विजेत्या विद्यार्थ्यांना पारितोषिक वितरण करण्यात आले. यामध्ये कविता लेखन स्पर्धेत प्रथम क्रमांक कु शुभम बोरगावे, व्दितीय क्रमांक श्वेता बाबर, तृतीय क्रमांक अनन्या कुलकर्णी आणि उत्तेजनार्थ प्रतीक्षा पाटील, अश्विनी माळी, प्रीती मुळीक यांना मिळाला. निबंध लेखन स्पर्धेत प्रथम स्नेहा करव, व्दितीय वैष्णवी माळी, तृतीय महेक अपराज आणि उत्तेजनार्थ पूजा भगत, निर्जरा पाटील, अक्काताई पाटील यांना मिळाले. पोस्टर बनवणे स्पर्धेत प्रथम सानिया गायकवाड, व्दितीय माधुरी माने, तृतीय शुभम बोरगावे आणि उत्तेजनार्थ वैष्णवी माळी, साक्षी पाटील, स्नेहल पाटील यांनी मिळवले.

यावेळी डॉ. अमोल पाटील, प्रा. साजिद इनामदार, प्रा. शिवानंद आवटी, प्रा. अशोक पाटील, प्रा. सोनाली फडतरे, मराठी पत्रकार संघाचे पत्रकार लक्ष्मण सुर्यवंशी, सचिन माने, अरुण जोशी आदींसह मोठ्या संख्येने प्राध्यापक आणि विद्यार्थी उपस्थित होते. कार्यक्रमाचे सूत्रसंचालन कु शुभम बोरगावे व सानिया बिलगी यांनी केले तर आभार गणित विषयाच्या प्रा. जास्मिन राजापूरे यांनी केले.

The post वेदनेच्या जमिनीवरून आनंदाच्या आकाशाकडील प्रवास हा साहित्य निर्मितीचा इतिहास – डॉ. विनोद गायकवाड appeared first on News 24 Tass Marathi.

कागवाड / वार्ताहर

शिरगुप्पी परिसरात दुचाकीस्वाराला बंदुकीचा धाक दाखवून लाखो रुपयांची लूट करणाऱ्या आरोपीला कागवाड पोलिसांनी अवघ्या चार तासांत अटक करत कर्तृत्वाची झलक दाखवली आहे. पोलिसांच्या या झटपट कारवाईमुळे स्थानिक नागरिकांत समाधान व्यक्त होत आहे.

उगार (बी.के.) गावातील शांतू तवक्कर हे दुचाकीवरून शिरगुप्पी गावाच्या बाहेरील भागातून जात असताना आरोपी सागर सनदी याने त्यांना अडवले. बंदुकीचा धाक दाखवत त्याच्याकडील सुमारे २ लाख ८१ हजार २८० रुपये रोख रक्कम लुटून आरोपी घटनास्थळावरून पसार झाला.

घटनेची माहिती मिळताच कागवाड पोलिसांनी तातडीने तपास सुरू करून विविध ठिकाणी शोधमोहीम राबवली. अखेर अवघ्या चार तासांत आरोपी सागर सनदी याला अटक करण्यात पोलिसांना यश आले. या जलद कारवाईमुळे कागवाड पोलिसांच्या कार्यक्षमतेचे सर्वत्र कौतुक होत असून स्थानिक नागरिकांनीही पोलिसांचे अभिनंदन केले आहे. कायदा व सुव्यवस्था राखण्यात पोलिसांनी दाखवलेल्या तत्परतेबद्दल समाधान व्यक्त केले जात आहे.

The post बंदुकीच्या धाकाने लूट ; अवघ्या चार तासात आरोपी गजाआड appeared first on News 24 Tass Marathi.

कागवाड / प्रतिनिधी

कागवाड (कर्नाटक) येथे सामाजिक परिवर्तनाची नवी दिशा दर्शवणारा जटा निर्मूलनाचा महत्त्वपूर्ण उपक्रम आज यशस्वीरित्या पार पडला. सौ. कमल आण्णाप्पा वाघमोरे या देवदासी मावशींची तब्बल १५ वर्षांपासून वाढत गेलेली सुमारे ६ फूट लांबीची आणि अंदाजे ६ किलो वजनाची जट अत्यंत संयम, काळजी आणि वैद्यकीय दक्षता पाळून काढण्यात आली. धार्मिक समजुती आणि अंधश्रद्धेमुळे दीर्घकाळ जपली गेलेली ही जट काढण्याचा निर्णय हा सामाजिक धाडस आणि नव्या विचारांचा प्रेरणादायी नमुना ठरला आहे.

या उपक्रमासाठी राष्ट्र सेवा दल चे ज्येष्ठ कार्यकर्ते तसेच शिरोळ तालुका अंधश्रद्धा निर्मूलन समिती (अनिस) चे मार्गदर्शक बाबासाहेब नदाफ यांनी पुढाकार घेतला. त्यांच्या मार्गदर्शनाखाली शिरोळ तालुका कार्याध्यक्ष खंडेराव हेरवाडे आणि तालुका कार्यवाह सचेतन बनसोडे यांनी सक्रिय सहभाग नोंदवला. यासोबतच प्रा. अशोक आलगोंडी (कागवाड) आणि प्रा. संजय माने (कवठे गुलंद) यांचे विशेष सहकार्य लाभले. गडहिंग्लज येथील सेवादल कार्यकर्ते व अनिसचे मार्गदर्शक अरविंद बारदेस्कर यांनी या उपक्रमाबाबत माहिती दिली होती. बाबासाहेब नदाफ म्हणाले, “जटा निर्मूलन हा केवळ केस कापण्याचा कार्यक्रम नसून तो सामाजिक बंधनांपासून मुक्त होण्याचा आणि आरोग्यदायी जीवनाचा स्वीकार करण्याचा संदेश देणारा उपक्रम आहे.”

जट काढण्यापूर्वी संबंधित महिलेची समुपदेशनाद्वारे मानसिक तयारी करण्यात आली. कुटुंबीयांचा विश्वास संपादन करून आरोग्याच्या दृष्टीने होणारे फायदे समजावून सांगण्यात आले. दीर्घकाळ जपलेली जट काढल्यानंतर सौ. कमल वाघमोरे यांनी हलकेपणा आणि समाधान व्यक्त केले. याप्रसंगी त्यांचे पती श्री. आण्णाप्पा वाघमोरे, मुलगी अनिता आनंद बोबडे, नातू ऋत्विक आनंद बोबडे तसेच नाती कु. गार्गी श्रावण वाघमोरे आणि कु. परी श्रावण वाघमोरे उपस्थित होते. कुटुंबीयांच्या पाठिंब्यामुळे हा निर्णय अधिक दृढ झाला आणि उपक्रम यशस्वीरीत्या पूर्णत्वास गेला.

जटा निर्मूलन हा महिलांच्या आरोग्य, स्वच्छता आणि सन्मानाच्या दृष्टीने अत्यंत महत्त्वाचा विषय आहे. जटेमुळे डोकेदुखी, त्वचारोग, जंतुसंसर्ग यांसारख्या समस्या उद्भवण्याची शक्यता असते. अशा उपक्रमांमुळे महिलांमध्ये आरोग्याबाबत जागरूकता वाढते आणि अंधश्रद्धेविरुद्ध सकारात्मक वातावरण निर्माण होते. कागवाड येथे झालेल्या या उपक्रमामुळे परिसरात सामाजिक जागृतीचा संदेश पोहोचला असून, अंधश्रद्धा निर्मूलनाच्या चळवळीला अधिक बळ मिळणार आहे. समाजप्रबोधनाच्या दिशेने उचललेले हे पाऊल निश्चितच प्रेरणादायी ठरत आहे.

The post “१५ वर्षांची जट कापून अंधश्रद्धेला छेद ; कागवाडमध्ये परिवर्तनाची नवी पहाट” appeared first on News 24 Tass Marathi.

कागवाड, दि. ६ जानेवारी २०२६ : पत्रकारितेचे व्रत हे विश्वासार्हतेवर टिकून असते. समाजाला दिशा देण्याचे महत्त्वपूर्ण कार्य पत्रकार करीत असतात. मराठी वृत्तपत्राचा प्रारंभ करणारे बाळशास्त्री जांभेकर यांनी सुरू केलेल्या ‘दर्पण’ या वृत्तपत्राच्या नावातच प्रबोधनाचा आशय दडलेला आहे. समाजाचे वास्तव चित्र समाजासमोर ठेवणारा आरसा म्हणून त्यांनी पत्रकारितेकडे पाहिले. हीच भूमिका कायम ठेवून पत्रकारांनी आपले कार्य प्रामाणिकपणे आणि निष्ठेने करत राहिले पाहिजे, असे प्रतिपादन शिवानंद महाविद्यालयाचे प्राचार्य डॉ. एस. पी. तळवार यांनी केले.

येथील कागवाड तालुका पत्रकार संघाच्या वतीने मराठी पत्रकार दिन उत्साहात साजरा करण्यात आला. या कार्यक्रमात प्राचार्य डॉ. एस. पी. तळवार प्रमुख पाहुणे म्हणून बोलत होते. कार्यक्रमाच्या अध्यक्षस्थानी जिल्हा पत्रकार संघाचे संचालक सुकुमार बन्नूरे होते. प्रमुख उपस्थितांमध्ये शिवानंद महाविद्यालयाचे मराठी विभाग प्रमुख प्रा. अशोक आलगोंडी, ॲड.राहुल कटेगेरी यांचा समावेश होता. प्रारंभी मान्यवरांच्या हस्ते मराठी पत्रकारितेचे जनक बाळशास्त्री जांभेकर यांच्या प्रतिमेला पुष्पहार अर्पण करून अभिवादन करण्यात आले.

प्राचार्य डॉ. तळवार पुढे म्हणाले की, लोकशाही व्यवस्थेत पत्रकारिता चौथा स्तंभ म्हणून कार्यरत आहे. पत्रकारांची ताकद ही सत्तेची निर्मितीही करू शकते आणि सत्तेला आव्हान देण्याचे सामर्थ्यही तिच्यात आहे. आजच्या एआय व डिजिटल युगात पत्रकारांनी स्वतःला अद्ययावत ठेवणे अत्यंत आवश्यक आहे. कागवाड तालुक्यातील पत्रकार एकत्र येऊन मराठी पत्रकार दिन साजरा करतात, हे एकात्मतेचे व सामाजिक सलोख्याचे उत्तम उदाहरण असून ते विशेष महत्त्वाचे आहे.

यावेळी ॲड. राहुल कटेगेरी यांनी पत्रकारांनी बातमी प्रसिद्ध करताना तिची सत्यता पडताळून पाहणे अत्यंत गरजेचे असल्याचे सांगितले. बातमीची अचूकता व पुरावे यांची खातरजमा केल्यास भविष्यात कायदेशीर अडचणींना सामोरे जावे लागणार नाही, असे त्यांनी नमूद केले.

प्रमुख उपस्थित प्रा. अशोक आलगोंडी यांनी भारतातील मुद्रण कलेचा इतिहास उलगडून सांगताना म्हटले की, प्रारंभी भारतीय भाषांतील वृत्तपत्रे स्वातंत्र्य चळवळीचा प्रसार आणि समाजप्रबोधन या उद्देशाने चालविली जात होती. आजच्या पत्रकारितेसमोर वेगळी आव्हाने उभी आहेत. विशेषतः डिजिटल माध्यमांच्या वाढत्या प्रभावात विश्वासार्हता टिकून राहते आहे की नाही, याकडे गांभीर्याने पाहणे आवश्यक आहे.

कार्यक्रमाचे प्रास्ताविक समाजसेवक अरुण जोशी यांनी केले. कागवाड तालुक्यातील ज्येष्ठ पत्रकार रंगनाथ देशिंगकर, तरुण भारतचे सुकुमार बन्नूरे, सकाळचे पत्रकार लक्ष्मण सूर्यवंशी आणि लोकमतचे पत्रकार संदीप परांजपे यांनी आपले मनोगत व्यक्त करून पत्रकारितेच्या सामाजिक भूमिकेवर प्रकाश टाकला.

यावेळी सिद्दया हिरेमठ यांची कागवाड तालुका पत्रकार संघाच्या अध्यक्षपदी व प्रभाकर गोंधळी यांची उपाध्यक्षपदी निवड झाल्याबद्दल संघाच्या वतीने त्यांचा सत्कार करण्यात आला. कार्यक्रमास संजय काटकर, सचिन कांबळे, बसवराज तारदाळ, अमर कांबळे, महांतेश अडकेरी, शिवाजी पाटील, इरसार अथनिकर, पिंटू अरळे यांच्यासह विविध दैनिकांचे पत्रकार मोठ्या संख्येने उपस्थित होते.

The post “डिजिटल युगातही पत्रकारितेची विश्वासार्हता अबाधित ठेवावी” appeared first on News 24 Tass Marathi.

कागवाड / वार्ताहर

कागवाड मतदारसंघातील काँग्रेस आमदार व वायव्य कर्नाटक रस्ते वाहतूक महामंडळाचे अध्यक्ष राजू कागे यांच्या कन्येने सरकारी वाहनाचा खासगी कामासाठी वापर केल्याचा आरोप समोर आला असून, या प्रकरणामुळे सोशल मीडियावर तीव्र चर्चा रंगली आहे.

चिक्कोडी शहरात आमदारांना देण्यात आलेले सरकारी वाहन तृप्ती कागे चालवत असल्याचे स्थानिकांनी टिपलेले व्हिडिओ व्हायरल झाले आहेत. नियमानुसार अशी वाहने केवळ शासकीय कामकाज किंवा आमदारांच्या अधिकृत दौऱ्यांसाठी वापरण्याची मुभा असते. मात्र, खासगी कारणासाठी वाहन वापरल्याने सत्तेच्या गैरवापराचा आरोप होत आहे.

स्थानिक नागरिकांनी या प्रकाराबद्दल संताप व्यक्त केला असून, जबाबदार पदावर असलेल्या आमदारांच्या कुटुंबाकडून नियमांचे उल्लंघन झाल्याचा आरोप केला जात आहे. या घटनेमुळे सार्वजनिक मालमत्तेच्या वापराबाबत पारदर्शकतेचा मुद्दा पुन्हा ऐरणीवर आला आहे.

The post आमदाराच्या कन्येकडून सरकारी वाहनाचा खासगी वापर appeared first on News 24 Tass Marathi.