बेळगाव : कॅन्टोन्मेंट परिसरातील बसस्थानके, पदपथ आणि उद्यानांमध्ये वाढत चाललेल्या अस्वच्छतेच्या समस्येकडे लक्ष वेधत कॅन्टोन्मेंट बोर्डाचे मुख्य कार्यकारी अधिकारी सुदाम हरिविजय मंचालवार यांनी पोलीस आणि महापालिका प्रशासनाने संयुक्त पातळीवर उपाययोजना करण्याचे आवाहन केले आहे. आगामी पावसाळ्याच्या पार्श्वभूमीवर सार्वजनिक ठिकाणी वास्तव्यास असलेल्या निराश्रित कुटुंबांच्या सुरक्षित पुनर्वसनाचीही त्यांनी मागणी केली आहे.

सुदाम हरिविजय मंचालवार यांच्या नेतृत्वाखाली स्वच्छता कर्मचाऱ्यांच्या पथकाने बुधवारी पहाटे रेल्वे स्टेशन बसस्थानक, गोगटे सर्कल आणि मिलिटरी महादेव मंदिर परिसराची पाहणी केली. या वेळी अनेक कुटुंबे सार्वजनिक ठिकाणी तात्पुरता आश्रय घेत असल्याचे तसेच परिसरात साचलेल्या कचऱ्यामुळे स्वच्छता आणि आरोग्यविषयक समस्या निर्माण झाल्याचे निदर्शनास आले.

या परिस्थितीचा परिणाम खानापूरसह विविध भागांतून येणारे विद्यार्थी, ज्येष्ठ नागरिक आणि प्रवासी यांच्यावर होत असून स्वच्छता मोहिमांनाही अडथळे निर्माण होत असल्याचे निरीक्षण नोंदविण्यात आले. आर्थिक अडचणी आणि बेरोजगारीमुळे अनेक कुटुंबे सार्वजनिक ठिकाणी राहण्यास मजबूर झाल्याचेही समोर आले आहे.

पावसाळा जवळ आल्याने महिला आणि लहान मुलांच्या आरोग्य व सुरक्षिततेचा प्रश्न अधिक गंभीर बनू शकतो. त्यामुळे जिल्हा पोलीस प्रशासन आणि महापालिकेने संयुक्त पाहणी करून आवश्यक उपाययोजना कराव्यात, अशी मागणी मंचालवार यांनी केली आहे.

तसेच सार्वजनिक ठिकाणी वास्तव्यास असलेल्या नागरिकांचे शासकीय निवारा केंद्रे किंवा अन्य सुरक्षित ठिकाणी स्थलांतर करण्यात यावे आणि सामाजिक संस्थांनीही या पुनर्वसन मोहिमेत सक्रिय सहभाग घ्यावा, असे आवाहन त्यांनी केले.

The post कॅन्टोन्मेंटमधील सार्वजनिक ठिकाणांच्या अस्वच्छतेचा प्रश्न ऐरणीवर appeared first on News 24 Tass Marathi.

बेळगाव : मान्सूनपूर्व काळात शहरातील संभाव्य पूरस्थिती टाळण्यासाठी बेळगाव कॅन्टोन्मेंट बोर्डाने नालेसफाईची विशेष मोहीम हाती घेतली आहे. फोर्ट रोडवरील जिजामाता सर्कलजवळील नाल्यात साचलेला गाळ व कचरा काढण्याचे काम सुरू असून, हे काम प्रभावीपणे पूर्ण करण्यासाठी स्मार्ट सिटी आणि महापालिकेने तातडीने सहकार्य करावे, असे आवाहन कॅन्टोन्मेंट बोर्डाचे मुख्य कार्यकारी अधिकारी सुदाम हरिविजय मंचलवार यांनी केले आहे.

कॅन्टोन्मेंट बोर्डाच्या वतीने आज सकाळी ६ वाजल्यापासून जिजामाता सर्कल परिसरात नालेसफाई मोहीम सुरू करण्यात आली. या कामासाठी स्वच्छता कर्मचारी, जेसीबी आणि डंपर वाहनांची मदत घेतली जात आहे. सीबीटी बसस्थानक परिसरातून वाहून येणाऱ्या प्लास्टिकच्या बाटल्या आणि इतर कचऱ्यामुळे नाल्यात अडथळे निर्माण झाले असून पाण्याचा प्रवाह बाधित होत आहे.

मात्र, संबंधित नाला सुमारे सहा फूट खोल असून त्यावर काँक्रीटचा स्लॅब असल्याने प्रत्यक्ष साफसफाईसाठी केवळ तीन फूट जागा उपलब्ध आहे. त्यामुळे जेसीबीद्वारे कचरा काढण्यास मोठ्या अडचणी येत असून लहान बादल्यांच्या सहाय्याने काम करावे लागत आहे. परिणामी साफसफाईची गती मंदावली आहे.

याबाबत बोलताना सीईओ सुदाम मंचलवार म्हणाले की, हा नाला स्मार्ट सिटी प्रकल्पाच्या अखत्यारीत येत असल्याने नाल्यावरील सुमारे १२ फूट काँक्रीट स्लॅब काढून टाकण्याची आवश्यकता आहे. तसेच महापालिकेने अतिरिक्त जेसीबी आणि डंपर उपलब्ध करून दिल्यास संपूर्ण नाला अवघ्या १५ दिवसांत स्वच्छ करता येईल. अन्यथा आगामी पावसाळ्यात या भागातील व्यावसायिक परिसरात पाणी साचण्याचा धोका निर्माण होऊ शकतो.

स्वच्छता कामगारांना कोणत्याही परिस्थितीत नाल्यात उतरवू नये आणि सर्व काम यंत्रसामग्रीच्या सहाय्यानेच करावे, असेही त्यांनी स्पष्ट केले. नालेसफाई मोहीम यशस्वी करण्यासाठी स्मार्ट सिटी आणि महापालिकेने तातडीने सहकार्य करावे, अशी विनंती त्यांनी केली.

The post पूरस्थिती टाळण्यासाठी कॅन्टोन्मेंट बोर्डाची मान्सूनपूर्व नाला स्वच्छता मोहीम appeared first on News 24 Tass Marathi.

बेळगाव : मराठा लाईट इन्फंट्री रेजिमेंटल सेंटरचे कमांडंट तसेच कॅन्टोन्मेंट बोर्डाचे नूतन अध्यक्ष ब्रिगेडियर गिरीष उपाध्याय यांच्या उपस्थितीत सोमवारी कॅन्टोन्मेंट बोर्डाची पहिली बैठक पार पडली. बैठकीस सीईओ सुदाम मंचलवार, आमदार आसिफ सेठ तसेच सरकारनियुक्त सदस्य सुधीर तुपेकर उपस्थित होते. प्रारंभी ब्रिगेडियर उपाध्याय यांना शपथ देण्यात आली आणि विविध मान्यवरांकडून त्यांचे स्वागत करण्यात आले.

बैठकीत बेळगाव रेल्वे स्थानक कॅन्टोन्मेंट हद्दीत येत असल्याने विविध कर आणि दंडापोटी रेल्वेकडून सुमारे १६ कोटी रुपये थकीत असल्याचा मुद्दा चर्चिला गेला. ही रक्कम वसूल करण्यासाठी नैऋत्य रेल्वेच्या वरिष्ठ अधिकाऱ्यांना पत्र पाठविण्यात आले असून पुढील पाठपुरावा केला जाणार असल्याचे सांगण्यात आले.

यावेळी लाच स्वीकार प्रकरणात निलंबित करण्यात आलेल्या एका महिला अधिकाऱ्याबाबतही चर्चा झाली. संबंधित कर्मचाऱ्याचे ५० टक्के वेतन कपात करून उर्वरित वेतन देण्याचा निर्णय बैठकीत घेण्यात आला.

रामकृष्ण मिशन यांच्याकडून हॉस्पिटल उभारणीसाठी परवानगी मागण्यात आली असून आवश्यक नियमांची पूर्तता झाल्यानंतर बांधकाम परवाना देण्याबाबत विचार करण्यात येणार आहे. तसेच सातवा वेतन आयोग लागू झाल्यानंतर उर्वरित वेतन फरकाची रक्कम कर्मचाऱ्यांना देण्याचाही निर्णय घेण्यात आला.

इंडिपेंडिंग रोड आणि हावलॉक रोड जंक्शनचे सुशोभीकरण करण्याबरोबरच एल अँड टी कंपनीने जलवाहिन्यांसाठी केलेल्या खोदाईनंतर रस्त्यांची दुरुस्ती न केल्याने नागरिकांमध्ये नाराजी असल्याचा मुद्दाही बैठकीत उपस्थित करण्यात आला.

बकरी ईदच्या पार्श्वभूमीवर कॅन्टोन्मेंट परिसरातील कत्तलखान्यासह इतर कोणत्याही ठिकाणी गोहत्या होऊ नये यासाठी प्रशासनाने दक्षता घ्यावी, अशी सूचना सरकारनियुक्त सदस्य सुधीर तुपेकर यांनी केली.

दरम्यान, एसएफसी निधीत यावर्षी केवळ पाच लाख रुपयांचे अनुदान मिळाल्याने विकासकामांवर मर्यादा येत असल्याचे सांगण्यात आले. त्यामुळे राज्य सरकारकडे वाढीव निधीची मागणी केली जाणार आहे.

केंद्र सरकारकडून कॅन्टोन्मेंट बोर्डाला सुमारे १४ कोटी रुपयांचा निधी मिळणार असून, त्यातून कायमस्वरूपी महसूल निर्माण करणारे प्रकल्प राबविण्याची योजना आहे. बी. के. मॉडेलसमोरील मोकळ्या जागेत बेंगळुरू विमानतळाच्या धर्तीवर फूड स्टॉल उभारण्याचा प्रस्ताव सीईओ सुदाम मंचलवार यांनी मांडला. तसेच रेल्वे स्थानक परिसरात स्टॉल्स आणि इनडोअर स्टेडियम उभारणीबाबतही प्राथमिक चर्चा करण्यात आली.

The post रेल्वेकडून कॅन्टोन्मेंट बोर्डाचे १६ कोटी रुपये थकीत appeared first on News 24 Tass Marathi.

बेळगाव : बेळगाव कॅन्टोन्मेंट बोर्डाने परिसर प्लास्टिकमुक्त आणि स्वच्छ ठेवण्यासाठी विशेष स्वच्छता मोहीम सुरू केली आहे. कॅन्टोन्मेंट बोर्डाचे नूतन अध्यक्ष ब्रिगेडियर गिरीश उपाध्याय यांच्या मार्गदर्शनाखाली आणि सीईओ सुदाम विजय मंचळकर यांच्या नेतृत्वाखाली सोमवारी पहाटेपासून व्यापक स्वच्छता अभियान राबवण्यात आले. यावेळी नियमांचे उल्लंघन करणाऱ्या आणि रस्त्यांवर अतिक्रमण करणाऱ्यांना कडक इशाराही देण्यात आला.

ब्रिगेडियर गिरीश उपाध्याय, आमदार आसिफ (राजू) सेठ आणि कॅन्टोन्मेंट बोर्ड सदस्य सुधीर कुप्पेकर यांच्या उपस्थितीत झालेल्या बैठकीत या मोहिमेचा निर्णय घेण्यात आला होता.  त्यानुसार सकाळी सहा वाजल्यापासून प्लास्टिक कचरा निर्मूलनासाठी विशेष मोहीम सुरू करण्यात आली.

या मोहिमेत ८४ स्वच्छता कर्मचारी सहभागी झाले असून नाले, गटारी आणि खेळाच्या मैदानांमधून आतापर्यंत सुमारे एक टन प्लास्टिक कचरा हटवण्यात आला आहे. मात्र, बोगरवेस नाल्याजवळ प्लास्टिक पिशव्यांमध्ये टाकलेला वैद्यकीय कचरा तसेच हॉटेलमधील कचरा आढळून आल्याने प्रशासनाची चिंता वाढली आहे. कॅन्टोन्मेंट परिसरातील काही भागांमध्ये बाहेरील व्यक्तींकडून रस्त्याकडेला बेकायदेशीररीत्या कचरा टाकला जात असल्याचेही निदर्शनास आले.

सीईओ सुदाम विजय मंचळकर यांनी प्लास्टिक कचऱ्यामुळे गटारे तुंबणे, डासांची वाढ होणे तसेच डेंग्यू, मलेरिया आणि चिकुनगुनियासारख्या आजारांचा धोका वाढत असल्याचे सांगितले.

दरम्यान, स्वच्छता मोहिमेदरम्यान काही नागरिकांनी घरांसमोर लोखंडी शेड आणि इतर बांधकामे करून रस्त्यांवर अतिक्रमण केल्याचे उघड झाले. या अतिक्रमणांमुळे अग्निशमन दल, रुग्णवाहिका आणि स्वच्छता वाहनांच्या हालचालींना अडथळा निर्माण होत असल्याचे प्रशासनाने स्पष्ट केले. अनधिकृत बांधकामे तातडीने हटवावीत, अन्यथा कठोर कायदेशीर कारवाई करण्यात येईल, असा इशारा कॅन्टोन्मेंट बोर्डाकडून देण्यात आला आहे. तसेच नागरिकांनी सार्वजनिक ठिकाणी कचरा न टाकता तो थेट कचरा संकलन वाहनांकडेच द्यावा, असे आवाहनही प्रशासनाने केले आहे.

The post बेळगाव कॅन्टोन्मेंट परिसरात प्लास्टिकमुक्त स्वच्छता अभियान appeared first on News 24 Tass Marathi.

बेळगाव : बेळगाव कॅन्टोन्मेंट बोर्डच्या अतिक्रमण हटाव पथकाने सोमवारी कॅम्प परिसरासह हिंडलगा रोड आणि गणेशपूर रोडपर्यंत विविध ठिकाणी रस्त्यांवर, झाडांवर तसेच विजेच्या खांबांवर लावलेले बेकायदेशीर बॅनर व होर्डिंग्ज हटविण्याची व्यापक मोहीम राबवली.

या कारवाईत सकाळी मिलिटरी महादेव मंदिर परिसर, सेंट पॉल्स हायस्कूल, सेंट जोसेफ हायस्कूल रोड, फिश मार्केट, गवळी गल्ली, ई. डब्ल्यू. फर्नांडिस रोड, मार्केट स्ट्रेट तसेच पिकेट रोड ते गणेशपूर रोड या मार्गावरील विविध ठिकाणांवरील अनधिकृत जाहिरात फलक काढण्यात आले.

दुपारच्या सत्रात वनिता विद्यालय परिसर, सेंट झेवियर हायस्कूल ते महात्मा गांधी सर्कल (हिंडलगा रोड) आणि बिस्किट महादेव मंदिर ते शौर्य सर्कल दरम्यानच्या भागातही कारवाई सुरू ठेवण्यात आली. या मोहिमेत रस्त्यांच्या कडेला लावलेले मोठ्या प्रमाणातील बॅनर व होर्डिंग्ज हटवण्यात आले.

दिवसभर चाललेल्या या मोहिमेत सुमारे ५० बेकायदेशीर बॅनर आणि होर्डिंग्ज काढून जप्त करण्यात आल्याची माहिती देण्यात आली. शहराच्या सौंदर्याला बाधा आणणाऱ्या या फलकांवर कारवाई झाल्याने स्थानिक नागरिकांनी समाधान व्यक्त केले.

The post कॅन्टोन्मेंट बोर्डकडून कॅम्प परिसरात अतिक्रमण हटाव मोहीम appeared first on News 24 Tass Marathi.

बेळगाव : बेळगाव कॅन्टोन्मेंट बोर्डाच्या अध्यक्षपदाची जबाबदारी स्वीकारल्यानंतर ब्रिगेडियर गिरीश उपाध्ये यांनी तातडीने प्रशासकीय बैठकीचे आयोजन करत विविध नागरी समस्यांचा आढावा घेतला. यावेळी शहरातील स्वच्छता, रस्त्यांची दुरवस्था आणि प्लास्टिकमुक्ती मोहिमेबाबत अधिकाऱ्यांना स्पष्ट सूचना देण्यात आल्या.

सोमवारी कॅन्टोन्मेंट सभागृहात झालेल्या प्रगती आढावा बैठकीत मुख्य कार्यकारी अधिकारी मंचलवार हरीविजय यांनी शहरातील खराब रस्त्यांचा प्रश्न उपस्थित केला. एल अँड टी कंपनीकडून अनेक भागांत रस्ते खोदून कामे अर्धवट ठेवण्यात आल्याने नागरिकांना मोठ्या अडचणींना सामोरे जावे लागत असल्याचे त्यांनी सांगितले.

या प्रकाराची गंभीर दखल घेत ब्रिगेडियर उपाध्ये यांनी संबंधित कंपनीच्या निष्काळजीपणामुळे अपघातांची शक्यता वाढत असल्याचे नमूद करत खोदकाम झालेल्या सर्व रस्त्यांची तातडीने दुरुस्ती करण्याचे आदेश अधिकाऱ्यांना दिले.

बैठकीत कॅन्टोन्मेंट परिसर प्लास्टिकमुक्त करण्यावर विशेष भर देण्यात आला. असद खान दर्ग्यासह अनेक ऐतिहासिक आणि पर्यटनस्थळे या भागात असल्यामुळे सुट्टीच्या दिवशी मोठ्या प्रमाणात पर्यटक येथे भेट देतात. पर्यटकांकडून वापरण्यात येणारे प्लास्टिक परिसरात टाकले जात असल्याने स्वच्छतेची समस्या गंभीर होत असल्याचे ब्रिगेडियर उपाध्ये यांनी निदर्शनास आणून दिले.

यासाठी “प्लास्टिकमुक्त कॅन्टोन्मेंट” अशा संदेशांचे जनजागृती फलक असद खान दर्ग्यासह विविध सार्वजनिक ठिकाणी उभारण्याच्या सूचना त्यांनी अधिकाऱ्यांना दिल्या. तसेच घनकचरा व्यवस्थापन अधिक प्रभावी करण्यासाठी कचरा संकलन आणि विल्हेवाट प्रक्रियेवर नियमित देखरेख ठेवण्याचे निर्देशही बैठकीत देण्यात आले. परिसर स्वच्छ आणि सुस्थितीत ठेवण्यासाठी संबंधित अधिकाऱ्यांनी आपल्या विभागात विशेष लक्ष घालावे, असेही त्यांनी स्पष्ट केले.

The post कॅन्टोन्मेंट परिसर प्लास्टिकमुक्त करण्यासाठी उपाययोजना राबवा appeared first on News 24 Tass Marathi.

कॅन्टोन्मेंट बोर्डाचे मुख्य कार्यकारी अधिकारी (सीईओ) विशाल सारस्वत यांनी आपल्या पदाचा राजीनामा दिला असून लवकरच ते उत्तर प्रदेशातील मुख्यमंत्री कार्यालयात नवे पदभार स्वीकारणार आहेत. संघ लोकसेवा आयोगामार्फत त्यांची निवड झाल्यानंतर त्यांनी संरक्षण मंत्रालयाकडे राजीनामा सादर केला होता. राजीनामा मंजूर होताच ते नव्या सेवेत रुजू होणार आहेत.

विशाल सारस्वत हे इंडियन डिफेन्स इस्टेट सर्व्हिस (IDES) मध्ये कार्यरत असून बेळगाव कॅन्टोन्मेंट बोर्डात त्यांची ही दुसरी बदली होती. अडीच महिन्यांच्या कार्यकाळात त्यांनी सीईओ म्हणून विविध प्रशासकीय जबाबदाऱ्या सांभाळल्या. त्यांच्या निवृत्तीनंतर पुन्हा एकदा बेळगाव कॅन्टोन्मेंट बोर्डाचे सीईओ पद रिक्त झाले आहे.

The post कॅन्टोन्मेंट सीईओ विशाल सारस्वत यांचा राजीनामा appeared first on News 24 Tass Marathi.

बेळगाव कॅन्टोन्मेंट बोर्डाच्या (Belgaum Cantonment Board) हद्दीतील एका महत्त्वाच्या रस्त्याच्या नामांतराचा तिढा अखेर सुटला आहे. कॅम्प परिसरात असलेला ‘हाय स्ट्रीट’ (High Street) हा जुना रस्ता आता ‘छत्रपती शिवाजी महाराज मार्ग’ (Chhatrapati Shivaji Maharaj Marg) म्हणून ओळखला जाईल. या रस्त्याच्या नामफलकाचे अनावरण गुरुवारी करण्यात आले, ज्यामुळे शिवप्रेमींमध्ये उत्साहाचे वातावरण आहे.

कॅन्टोन्मेंट बोर्डाचे सरकार-नियुक्त सदस्य सुधीर तुपेकर यांनी हा महत्त्वाकांक्षी बदल घडवून आणण्यासाठी गेली तीन वर्षे अथक प्रयत्न केले. ब्रिटीश राजवटीनंतरही कॅन्टोन्मेंट हद्दीतील अनेक रस्ते आणि विभागांना जुलमी ब्रिटीश अधिकाऱ्यांची नावे तशीच होती. यामुळे, तुपेकर यांनी कॅन्टोन्मेंट बोर्डातील एकूण ३४ ब्रिटीशकालीन रस्त्यांची नावे बदलण्याचा प्रस्ताव बोर्डासमोर ठेवला होता.

या नामांतरासाठी त्यांनी केंद्रीय संरक्षण मंत्रालयाशी (Ministry of Defence) सतत पत्रव्यवहार केला. वर्षभरापूर्वी कॅन्टोन्मेंट बोर्डाच्या बैठकीत या नामबदलास मंजुरी मिळाली होती. मात्र, कॅम्प परिसरातील अत्यंत महत्त्वाच्या ‘हाय स्ट्रीट’ला छत्रपती शिवाजी महाराजांचे नाव देण्यावरून काही मतभेद निर्माण झाले होते, ज्यामुळे हे काम काही काळ रखडले.

बोर्डाच्या बैठकीत अंतिम मंजुरी मिळाल्यानंतर हा अडथळा दूर झाला आणि रस्त्याला छत्रपती शिवाजी महाराज मार्ग असे अधिकृत नाव देण्याचा मार्ग मोकळा झाला. त्यानुसार गुरुवारी या रस्त्यावर नामफलक लावण्यात आले आहेत. या नामफलकांचे औपचारिक उद्घाटन लवकरच करण्यात येईल, अशी अपेक्षा आहे.

The post कॅम्प परिसरातील ‘हाय स्ट्रीट’चे ‘छत्रपती शिवाजी महाराज मार्ग’ असे नामकरण appeared first on News 24 Tass Marathi.