बेळगाव : बेळगाव कॅन्टोन्मेंट परिसर महापालिकेकडे हस्तांतरित करण्याच्या प्रक्रियेला मंत्रिमंडळाकडून अंतिम मंजुरी मिळण्याची शक्यता आहे. कॅन्टोन्मेंट बोर्डाच्या जमिनींच्या हस्तांतरणाबाबत मुख्य कार्यकारी अधिकाऱ्यांचा अहवाल १०० टक्के अचूक असून, त्यावर मंत्रिमंडळात महत्त्वपूर्ण चर्चा होऊन अंतिम निर्णय घेतला जाईल, अशी माहिती जिल्हाधिकारी मोहम्मद रोशन यांनी दिली.

बेळगाव येथे आयोजित पत्रकार परिषदेत ते बोलत होते. कॅन्टोन्मेंट बोर्डाने ११२ एकर जमीन संरक्षण मंत्रालयाकडे पाठविली असून, याबाबत राज्य सरकारचे मत मागविण्यात आले आहे. सरकारच्या निर्देशानुसार जिल्हाधिकाऱ्यांच्या अध्यक्षतेखाली आमदार, खासदार, लष्करी अधिकारी तसेच डीईओ अधिकाऱ्यांचा समावेश असलेली विशेष समिती स्थापन करण्यात येणार आहे. संबंधित सर्व घटकांची मते जाणून घेण्यासाठी बैठक घेऊन पुढील सहा महिन्यांत नगरविकास विभागाला (यूडीडी) सर्वसमावेशक अहवाल सादर केला जाईल, असे त्यांनी सांगितले.

कॅन्टोन्मेंट परिसर केवळ ११२ एकर नागरी क्षेत्रापुरता मर्यादित न ठेवता नागरिकांची वस्ती असलेले सर्व भाग निश्चित करून ते महापालिकेकडे हस्तांतरित करण्यासाठी मार्गदर्शक तत्त्वे तयार करण्यात आली आहेत. यासंदर्भात अभियंता सतीश यांच्याशी चर्चा झाली असून, त्यांनीही या प्रक्रियेला सहमती दर्शविल्याचे जिल्हाधिकाऱ्यांनी स्पष्ट केले.

हस्तांतरण प्रक्रियेमुळे नागरिकांना अधिक प्रशासकीय सुविधा मिळणार आहेत. त्यामुळे सर्व संबंधित घटकांची मते, हरकती आणि तक्रारींचा सखोल अभ्यास करून अहवाल तयार करण्यात येईल. पुढील सहा महिन्यांत विविध बैठका घेऊन मतभेद दूर करण्याचा प्रयत्न केला जाईल. त्यानंतर राज्य सरकारच्या हिताचा विचार करून सर्वसमावेशक अहवाल नगरविकास विभागाकडे सादर केला जाणार आहे.

नगरविकास विभागाचे सचिव या अहवालाचा आढावा घेतील. त्यानंतर कॅन्टोन्मेंट बोर्ड आणि केंद्रीय संरक्षण मंत्रालयाच्या मंजुरीनंतर पुढील प्रक्रिया पूर्ण करून अंतिम निर्णय घेतला जाईल, असे मोहम्मद रोशन यांनी सांगितले.

दरम्यान, कॅन्टोन्मेंट बोर्ड परिसरातील पिण्याच्या पाण्याची समस्या सोडविण्यासाठी पुढील आठवड्यात स्वनिधीतून आर.ओ. प्लांट बसविण्यात येणार आहे. परिसराची पाहणी केलेल्या अधिकाऱ्यांकडून स्वच्छतेसह इतर त्रुटी टप्प्याटप्प्याने दूर करण्यात येतील. शहरी स्थानिक स्वराज्य संस्थांच्या सहकार्याने संयुक्त पाहणी करून नागरिकांच्या समस्यांवर तोडगा काढण्यात येईल, असेही जिल्हाधिकाऱ्यांनी स्पष्ट केले.

The post बेळगाव कॅन्टोन्मेंट परिसर महापालिकेकडे हस्तांतरित होण्याची शक्यता appeared first on News 24 Tass Marathi.

बेळगाव : बेळगाव कॅन्टोन्मेंट परिसर महापालिकेकडे हस्तांतरित करण्याच्या चर्चेमुळे नागरिक आणि कंत्राटदारांनी चिंता करण्याची गरज नाही. सध्या केवळ ११२ एकर क्षेत्र कॅन्टोन्मेंटच्या हद्दीतून वगळण्याचा प्रस्ताव राज्य सरकारकडे पाठविण्यात आला आहे. मात्र, त्याला राज्य सरकारची अद्याप कोणतीही अधिकृत लेखी संमती किंवा मंजुरी मिळालेली नाही. अंतिम निर्णयाचा अधिकार केंद्र सरकारच्या संरक्षण मंत्रालयाकडेच असल्याचे कॅन्टोन्मेंटचे मुख्य कार्यकारी अधिकारी सुदाम हरिविजय मंचलवार यांनी स्पष्ट केले.

बुधवारी आयोजित पत्रकार परिषदेत त्यांनी कॅन्टोन्मेंट क्षेत्रातील जमिनीच्या हस्तांतरणासंदर्भातील स्थिती स्पष्ट केली. कॅन्टोन्मेंट मंडळाने ११२ एकर जमीन वगळण्याचा प्रस्ताव राज्य सरकारकडे पाठविला आहे. मात्र, या प्रस्तावावर राज्य सरकारकडून अद्याप अधिकृत निर्णय झालेला नसल्याचे त्यांनी सांगितले.

दरम्यान, बेळगावचे जिल्हाधिकारी आणि महापालिकेकडून ७५६ एकर जमीन हस्तांतरित करण्याचा स्वतंत्र प्रस्ताव प्राप्त झाला आहे. या प्रस्तावाला डीओ (DO) तसेच स्थानिक लष्करी अधिकाऱ्यांनी तीव्र आक्षेप नोंदविल्याची माहिती मंचलवार यांनी दिली.

• अंतिम निर्णय संरक्षण मंत्रालयाकडून 

कॅन्टोन्मेंट परिसराच्या हस्तांतरणाची संपूर्ण प्रक्रिया केंद्र सरकारच्या संरक्षण मंत्रालयाच्या निर्णयावर अवलंबून आहे. राज्य सरकारने आपला प्रस्ताव संरक्षण मंत्रालयाकडे पाठविल्यानंतरच पुढील कार्यवाहीला दिशा मिळणार असल्याचे मंचलवार यांनी स्पष्ट केले.

• कंत्राटदारांना देयके मिळणार

कॅन्टोन्मेंट परिसरातील विकासकामे करणाऱ्या कंत्राटदार आणि निविदाकारांनी आपल्या देयकांबाबत कोणतीही चिंता करू नये. त्यांनी केलेल्या कामाचा योग्य मोबदला नियमानुसार देण्यात येईल, असे आश्वासन मुख्य कार्यकारी अधिकाऱ्यांनी दिले.

तसेच, आगामी काळात घेतला जाणारा प्रत्येक निर्णय नागरिक, कंत्राटदार आणि संबंधित हितधारकांच्या हिताचा विचार करूनच घेतला जाईल, असेही त्यांनी स्पष्ट केले.

The post कॅन्टोन्मेंट परिसर सध्या महापालिकेकडे हस्तांतरित होणार नाही appeared first on News 24 Tass Marathi.

बेळगाव : बेळगाव कॅन्टोन्मेंट परिसरातील तीन प्रमुख रस्ते लष्कराकडे हस्तांतरित करण्यास तसेच दोन रस्त्यांवर बॅरिकेड्स उभारण्याच्या प्रस्तावाला बेळगाव कॅन्टोन्मेंट रेसिडेन्शियल वेल्फेअर असोसिएशनने (बीसीआरडब्ल्यूए) तीव्र विरोध दर्शविला आहे. यासंदर्भात सोमवारी कॅन्टोन्मेंटच्या मुख्य कार्यकारी अधिकाऱ्यांकडे १४,१३६ सह्यांचे निवेदन सादर करण्यात आले.

१७ जुलै रोजी झालेल्या कॅन्टोन्मेंट बोर्डाच्या बैठकीतील ठराव क्रमांक २६ आणि २७ नुसार अल्बर्ट एक्का रोड, स्मार्ट रोड आणि क्वीन्स गार्डन रोड हे तीन रस्ते लष्कराकडे सोपविण्याबाबत नागरिकांकडून मते मागविण्यात आली आहेत. त्याचबरोबर इंडिपेंडन्स रोड आणि जिमखाना रोडवर उंच बॅरिकेड्स उभारण्याचा प्रस्तावही मांडण्यात आला आहे.

या प्रस्तावांमुळे सार्वजनिक वाहतुकीवर परिणाम होण्याची शक्यता असल्याने बीसीआरडब्ल्यूएने जनजागृती मोहीम राबवून नागरिकांच्या सह्या घेतल्या. या मोहिमेला मोठा प्रतिसाद मिळाला असून, नागरिकांची नावे, पत्ते, दूरध्वनी क्रमांक आणि सह्यांसह निवेदन कॅन्टोन्मेंट सीईओंकडे सादर करण्यात आले.

शेतकरी, कामगार, विद्यार्थी, शिक्षक, कर्मचारी, व्यावसायिक, गृहिणी, वकील, डॉक्टर यांच्यासह समाजातील विविध घटकांनी या मोहिमेला पाठिंबा दिल्याचे संघटनेने सांगितले.

कॅन्टोन्मेंट परिसरातील रस्ते बंद केल्यास शहरातील दळणवळणावर परिणाम होऊन स्थानिक नागरिकांच्या रोजगारासह बेळगावच्या आर्थिक विकासालाही फटका बसू शकतो, असा आक्षेप बीसीआरडब्ल्यूएने नोंदविला आहे. तसेच बेळगावचा स्मार्ट सिटी म्हणून विकास करण्याच्या उद्दिष्टाशीही अशा प्रकारची रस्तेबंदी विसंगत असल्याचे संघटनेचे म्हणणे आहे.

अनेक दशकांपासून नागरिकांच्या वापरात असलेले कॅन्टोन्मेंटमधील रस्ते कोणत्याही प्रकारे बंद किंवा अडवू नयेत, अशी मागणी संघटनेने केली. उच्च न्यायालय, सर्वोच्च न्यायालय, संरक्षण मंत्रालय तसेच लष्कर मुख्यालयाने दिलेल्या आदेशांचे योग्य प्रकारे पालन करण्यात यावे, अशी मागणीही निवेदनातून करण्यात आली आहे.

जनतेच्या मागणीचा विचार करून लष्कर आणि कॅन्टोन्मेंट बोर्डाने रस्ते बंद करण्याचा तसेच बॅरिकेड्स उभारण्याचा प्रस्ताव मागे घ्यावा, असे आवाहन बीसीआरडब्ल्यूएने केले आहे.

यावेळी माजी आमदार अनिल बेनके, बेळगाव कॅन्टोन्मेंट रेसिडेन्शियल वेल्फेअर असोसिएशनचे अध्यक्ष फारुक नवाब, सचिव रंजन शेट्टी, डॉ. नितीन खोत, अजय पै, साजिद शेख, कॅन्टोन्मेंट सदस्य सुधीर तुपेकर, डॉ. सोनाली खोत, डॉ. राहिला शेख, नयना नेरली, ॲड. सुलतानपुरे तसेच बार असोसिएशनचे प्रतिनिधी आणि कॅन्टोन्मेंट परिसरातील नागरिक मोठ्या संख्येने उपस्थित होते.

The post बेळगाव कॅन्टोन्मेंटमधील रस्ते बंद करण्यास नागरिकांचा विरोध appeared first on News 24 Tass Marathi.

बेळगाव : समाजातील बालकांच्या आरोग्य संवर्धनासाठी राबविण्यात येत असलेल्या “ॲनिमिया मुक्त बेळगाव” या उपक्रमांतर्गत रोटरी क्लब ऑफ बेळगाव दर्पण आणि हॅपीहार्ट फाउंडेशन यांच्या संयुक्त विद्यमाने कॅन्टोनमेंट बोर्ड उर्दू शाळेत ॲनिमिया तपासणी व जनजागृती शिबिर यशस्वीरीत्या आयोजित करण्यात आले.

या शिबिरात एकूण ५१६ विद्यार्थ्यांची हिमोग्लोबिन (Hb) तपासणी करण्यात आली. तपासणीत ॲनिमियाचे निदान झालेल्या विद्यार्थ्यांना तत्काळ लोहयुक्त (आयर्न) गोळ्यांचे वितरण करण्यात आले. विद्यार्थ्यांमधील ॲनिमियाचे लवकर निदान करून योग्य वेळी उपचार सुरू करणे, तसेच त्यांच्या उत्तम आरोग्य आणि शैक्षणिक प्रगतीला चालना देणे हा या उपक्रमाचा प्रमुख उद्देश असल्याचे आयोजकांनी सांगितले.

शिबिराचे नियोजन आणि आयोजन कार्यक्रम अध्यक्षा रोटेरियन शीला पाटील यांनी प्रभावीपणे केले. उपक्रमाच्या यशस्वीतेसाठी सहकार्य करणाऱ्या शाळेचे मुख्याध्यापक, शिक्षकवृंद, आरोग्य कर्मचारी, स्वयंसेवक तसेच रोटरी क्लबच्या सर्व सदस्यांचे आयोजकांनी आभार मानले.

हा उपक्रम रोटेरियन डॉ. स्फूर्ती मस्तिहोळी यांच्या अध्यक्षतेखाली आणि रोटेरियन ज्योती कुलकर्णी यांच्या सचिवपदाच्या नेतृत्वात पार पडला. बेळगावातील विद्यार्थ्यांचे आरोग्य अधिक सक्षम करण्यासाठी आणि ॲनिमियामुक्त समाज घडविण्याच्या उद्देशाने अशा समाजोपयोगी उपक्रमांची मालिका भविष्यातही सुरू ठेवण्यात येणार असल्याचे रोटरी क्लब ऑफ बेळगाव दर्पणतर्फे सांगण्यात आले.

The post कॅन्टोनमेंट बोर्ड उर्दू शाळेत ‘ॲनिमिया मुक्त बेळगाव’ शिबिराला उत्स्फूर्त प्रतिसाद appeared first on News 24 Tass Marathi.

बेळगाव : महाराष्ट्र एकीकरण युवा समिती आणि राज्य मराठी विकास संस्थेच्या संयुक्त विद्यमाने बेळगाव येथील कॅन्टोन्मेंट बोर्ड मराठी प्राथमिक शाळेत विद्यार्थ्यांना शैक्षणिक साहित्याचे वितरण करण्यात आले. मराठी माध्यमातील शिक्षणाला प्रोत्साहन देण्याच्या उद्देशाने हा उपक्रम आयोजित करण्यात आला.

कार्यक्रमाच्या प्रारंभी शाळेचे मुख्याध्यापक प्रशांत बिर्जे यांनी उपस्थितांचे स्वागत करत महाराष्ट्र एकीकरण युवा समितीच्या शैक्षणिक उपक्रमाचे कौतुक केले.

यावेळी समितीचे अध्यक्ष अंकुश केसरकर यांनी सांगितले की, गेल्या नऊ वर्षांपासून युवा समिती मराठी शाळांचे संवर्धन, पटसंख्या वाढविणे आणि विद्यार्थ्यांना प्रोत्साहन देण्यासाठी सातत्याने शैक्षणिक साहित्याचे वाटप करत आहे. “मराठी शाळा टिकल्या तरच मातृभाषा टिकेल आणि मातृभाषा टिकली तरच आपली संस्कृती जपली जाईल,” असे त्यांनी आपल्या मनोगतात नमूद केले.

यानंतर महाराष्ट्र एकीकरण युवा समितीचे कार्याध्यक्ष सचिन केळवेकर, खजिनदार विनायक कावळे, सरचिटणीस श्रीकांत कदम, तसेच पदाधिकारी सुरज कुडुचकर आणि अक्षय बांबरकर यांच्या हस्ते इयत्ता पहिलीच्या विद्यार्थ्यांना वह्या, पेन, पेन्सिल आणि अन्य आवश्यक शैक्षणिक साहित्याचे वितरण करण्यात आले.

या उपक्रमाला शाळेचे शिक्षक, विद्यार्थी, पालक आणि युवा समितीचे कार्यकर्ते मोठ्या संख्येने उपस्थित होते. मराठी शाळांप्रती विद्यार्थ्यांमध्ये आणि पालकांमध्ये सकारात्मक वातावरण निर्माण करण्यासाठी अशा उपक्रमांची गरज असल्याची भावना यावेळी व्यक्त करण्यात आली.

The post कॅन्टोन्मेंट बोर्ड मराठी प्राथमिक शाळेत शैक्षणिक साहित्याचे वितरण appeared first on News 24 Tass Marathi.

बेळगाव : बेळगाव कॅन्टोन्मेंट हद्दीतील उर्वरित ६४३.६३ एकर नागरी क्षेत्र महापालिकेकडे हस्तांतरित करण्याच्या फेज-२ प्रस्तावाला पुन्हा एकदा खीळ बसली आहे. कॅन्टोन्मेंट बोर्डाने या प्रस्तावावर नव्याने विचार करण्यास नकार देत, या प्रकरणाचा पुढील पाठपुरावा कर्नाटक सरकारने थेट संरक्षण मंत्रालयाकडे (एमओडी) करावा, असा निर्णय घेतला आहे.

१७ जुलै २०२६ रोजी झालेल्या कॅन्टोन्मेंट बोर्डाच्या बैठकीत मुख्य कार्यकारी अधिकारी मंचलवार सुदाम हरिविजय यांनी ६ जुलै २०२६ रोजी जिल्हाधिकाऱ्यांकडून प्राप्त झालेल्या पत्राची माहिती दिली. या पत्राद्वारे उर्वरित ६४३.६३ एकर नागरी क्षेत्राच्या फेज-२ हस्तांतरणाचा प्रस्ताव बोर्डासमोर विचारार्थ मांडण्याची विनंती करण्यात आली होती.

मात्र, या विषयावर बोर्डाने यापूर्वीच भूमिका स्पष्ट केल्याचे नमूद करण्यात आले. २८ जून २०२४ रोजीच्या डीजीडीईच्या मार्गदर्शक सूचनांनुसार ६ जुलै २०२४ रोजी झालेल्या विशेष बैठकीत फेज-१ अंतर्गत ११२.६८७ एकर क्षेत्र हस्तांतरणास मंजुरी देण्यात आली होती. त्या निर्णयाचा अहवाल संबंधित अधिकाऱ्यांकडे पाठविण्यात आल्याने या विषयावर पुन्हा चर्चा करण्याचे कारण नसल्याचे बोर्डाने स्पष्ट केले.

पुढील निर्णय घेण्याचा अधिकार संरक्षण मंत्रालयाकडे असल्याने, राज्य सरकारने उर्वरित हस्तांतरणाबाबत थेट मंत्रालयाशी समन्वय साधावा, असा ठराव बैठकीत मंजूर करण्यात आला.

दरम्यान, देशभरातील कॅन्टोन्मेंट पुनर्रचना प्रक्रियेच्या पार्श्वभूमीवर बेळगाव कॅन्टोन्मेंटमधील नागरी भाग महापालिकेकडे हस्तांतरित करण्याचा मुद्दा अनेक वर्षांपासून प्रलंबित आहे. सुरुवातीला सुमारे १,७६३ एकर कॅन्टोन्मेंट क्षेत्रापैकी केवळ ११२.६८७ एकर नागरी क्षेत्र हस्तांतरित करण्याचा प्रस्ताव होता. मात्र, जिल्हा प्रशासन, लोकप्रतिनिधी आणि विविध नागरिक संघटनांनी अधिक व्यापक नागरी क्षेत्र महानगरपालिकेकडे देण्याची सातत्याने मागणी केली असून, संयुक्त सर्वेक्षण आणि विविध बैठकींमध्ये त्यावर चर्चा झाली आहे. नवीन निर्णयामुळे फेज-२ हस्तांतरणाचा प्रश्न पुन्हा एकदा अनिश्चिततेत अडकला आहे.

The post कॅन्टोन्मेंट हस्तांतरण पुन्हा लांबणीवर appeared first on News 24 Tass Marathi.

बेळगाव : शहरातील सार्वजनिक रस्ते आणि फूटपाथ अतिक्रमणमुक्त करून वाहतूक सुरळीत करण्याच्या उद्देशाने कॅन्टोन्मेंट बोर्डाने सोमवारी विशेष अतिक्रमण हटाव मोहीम राबवली. बोर्डाच्या अलीकडील बैठकीत झालेल्या निर्णयानुसार ही कारवाई करण्यात आली असून, नागरिक आणि वाहनचालकांना होणारा त्रास कमी करण्यासाठी विविध भागांतील अनधिकृत बांधकामांवर हातोडा चालवण्यात आला.

मोहीमेच्या पहिल्या टप्प्यात टिळकवाडी येथील पहिल्या रेल्वे गेट परिसरातील रस्त्यांच्या कडेला उभारण्यात आलेली अनधिकृत दुकाने, तात्पुरती बांधकामे आणि अतिक्रमणे हटवण्यात आली. पादचाऱ्यांच्या वावरात अडथळा ठरणारी शेड आणि इतर संरचनाही यावेळी हटवण्यात आल्या.

यानंतर कॅन्टोन्मेंट बोर्डाच्या पथकाने बेळगाव मध्यवर्ती बसस्थानक परिसरातही अतिक्रमणविरोधी कारवाई केली. मुख्य रस्ते आणि फूटपाथ व्यापून व्यवसाय करणाऱ्या व्यापाऱ्यांना सार्वजनिक जागांवर अतिक्रमण न करण्याच्या कडक सूचना देण्यात आल्या.

यापुढे सार्वजनिक रस्ते, फूटपाथ किंवा इतर जागांवर अतिक्रमण करणाऱ्यांविरुद्ध नियमानुसार कठोर कायदेशीर कारवाई करण्यात येईल, असा इशाराही संबंधित अधिकाऱ्यांनी दिला आहे.

The post टिळकवाडी आणि मध्यवर्ती बसस्थानक परिसरात कॅन्टोन्मेंट बोर्डाची अतिक्रमण हटाव मोहीम appeared first on News 24 Tass Marathi.

बेळगाव : कॅन्टोन्मेंट परिसरातील बसस्थानके, पदपथ आणि उद्यानांमध्ये वाढत चाललेल्या अस्वच्छतेच्या समस्येकडे लक्ष वेधत कॅन्टोन्मेंट बोर्डाचे मुख्य कार्यकारी अधिकारी सुदाम हरिविजय मंचालवार यांनी पोलीस आणि महापालिका प्रशासनाने संयुक्त पातळीवर उपाययोजना करण्याचे आवाहन केले आहे. आगामी पावसाळ्याच्या पार्श्वभूमीवर सार्वजनिक ठिकाणी वास्तव्यास असलेल्या निराश्रित कुटुंबांच्या सुरक्षित पुनर्वसनाचीही त्यांनी मागणी केली आहे.

सुदाम हरिविजय मंचालवार यांच्या नेतृत्वाखाली स्वच्छता कर्मचाऱ्यांच्या पथकाने बुधवारी पहाटे रेल्वे स्टेशन बसस्थानक, गोगटे सर्कल आणि मिलिटरी महादेव मंदिर परिसराची पाहणी केली. या वेळी अनेक कुटुंबे सार्वजनिक ठिकाणी तात्पुरता आश्रय घेत असल्याचे तसेच परिसरात साचलेल्या कचऱ्यामुळे स्वच्छता आणि आरोग्यविषयक समस्या निर्माण झाल्याचे निदर्शनास आले.

या परिस्थितीचा परिणाम खानापूरसह विविध भागांतून येणारे विद्यार्थी, ज्येष्ठ नागरिक आणि प्रवासी यांच्यावर होत असून स्वच्छता मोहिमांनाही अडथळे निर्माण होत असल्याचे निरीक्षण नोंदविण्यात आले. आर्थिक अडचणी आणि बेरोजगारीमुळे अनेक कुटुंबे सार्वजनिक ठिकाणी राहण्यास मजबूर झाल्याचेही समोर आले आहे.

पावसाळा जवळ आल्याने महिला आणि लहान मुलांच्या आरोग्य व सुरक्षिततेचा प्रश्न अधिक गंभीर बनू शकतो. त्यामुळे जिल्हा पोलीस प्रशासन आणि महापालिकेने संयुक्त पाहणी करून आवश्यक उपाययोजना कराव्यात, अशी मागणी मंचालवार यांनी केली आहे.

तसेच सार्वजनिक ठिकाणी वास्तव्यास असलेल्या नागरिकांचे शासकीय निवारा केंद्रे किंवा अन्य सुरक्षित ठिकाणी स्थलांतर करण्यात यावे आणि सामाजिक संस्थांनीही या पुनर्वसन मोहिमेत सक्रिय सहभाग घ्यावा, असे आवाहन त्यांनी केले.

The post कॅन्टोन्मेंटमधील सार्वजनिक ठिकाणांच्या अस्वच्छतेचा प्रश्न ऐरणीवर appeared first on News 24 Tass Marathi.

बेळगाव : मान्सूनपूर्व काळात शहरातील संभाव्य पूरस्थिती टाळण्यासाठी बेळगाव कॅन्टोन्मेंट बोर्डाने नालेसफाईची विशेष मोहीम हाती घेतली आहे. फोर्ट रोडवरील जिजामाता सर्कलजवळील नाल्यात साचलेला गाळ व कचरा काढण्याचे काम सुरू असून, हे काम प्रभावीपणे पूर्ण करण्यासाठी स्मार्ट सिटी आणि महापालिकेने तातडीने सहकार्य करावे, असे आवाहन कॅन्टोन्मेंट बोर्डाचे मुख्य कार्यकारी अधिकारी सुदाम हरिविजय मंचलवार यांनी केले आहे.

कॅन्टोन्मेंट बोर्डाच्या वतीने आज सकाळी ६ वाजल्यापासून जिजामाता सर्कल परिसरात नालेसफाई मोहीम सुरू करण्यात आली. या कामासाठी स्वच्छता कर्मचारी, जेसीबी आणि डंपर वाहनांची मदत घेतली जात आहे. सीबीटी बसस्थानक परिसरातून वाहून येणाऱ्या प्लास्टिकच्या बाटल्या आणि इतर कचऱ्यामुळे नाल्यात अडथळे निर्माण झाले असून पाण्याचा प्रवाह बाधित होत आहे.

मात्र, संबंधित नाला सुमारे सहा फूट खोल असून त्यावर काँक्रीटचा स्लॅब असल्याने प्रत्यक्ष साफसफाईसाठी केवळ तीन फूट जागा उपलब्ध आहे. त्यामुळे जेसीबीद्वारे कचरा काढण्यास मोठ्या अडचणी येत असून लहान बादल्यांच्या सहाय्याने काम करावे लागत आहे. परिणामी साफसफाईची गती मंदावली आहे.

याबाबत बोलताना सीईओ सुदाम मंचलवार म्हणाले की, हा नाला स्मार्ट सिटी प्रकल्पाच्या अखत्यारीत येत असल्याने नाल्यावरील सुमारे १२ फूट काँक्रीट स्लॅब काढून टाकण्याची आवश्यकता आहे. तसेच महापालिकेने अतिरिक्त जेसीबी आणि डंपर उपलब्ध करून दिल्यास संपूर्ण नाला अवघ्या १५ दिवसांत स्वच्छ करता येईल. अन्यथा आगामी पावसाळ्यात या भागातील व्यावसायिक परिसरात पाणी साचण्याचा धोका निर्माण होऊ शकतो.

स्वच्छता कामगारांना कोणत्याही परिस्थितीत नाल्यात उतरवू नये आणि सर्व काम यंत्रसामग्रीच्या सहाय्यानेच करावे, असेही त्यांनी स्पष्ट केले. नालेसफाई मोहीम यशस्वी करण्यासाठी स्मार्ट सिटी आणि महापालिकेने तातडीने सहकार्य करावे, अशी विनंती त्यांनी केली.

The post पूरस्थिती टाळण्यासाठी कॅन्टोन्मेंट बोर्डाची मान्सूनपूर्व नाला स्वच्छता मोहीम appeared first on News 24 Tass Marathi.

बेळगाव : मराठा लाईट इन्फंट्री रेजिमेंटल सेंटरचे कमांडंट तसेच कॅन्टोन्मेंट बोर्डाचे नूतन अध्यक्ष ब्रिगेडियर गिरीष उपाध्याय यांच्या उपस्थितीत सोमवारी कॅन्टोन्मेंट बोर्डाची पहिली बैठक पार पडली. बैठकीस सीईओ सुदाम मंचलवार, आमदार आसिफ सेठ तसेच सरकारनियुक्त सदस्य सुधीर तुपेकर उपस्थित होते. प्रारंभी ब्रिगेडियर उपाध्याय यांना शपथ देण्यात आली आणि विविध मान्यवरांकडून त्यांचे स्वागत करण्यात आले.

बैठकीत बेळगाव रेल्वे स्थानक कॅन्टोन्मेंट हद्दीत येत असल्याने विविध कर आणि दंडापोटी रेल्वेकडून सुमारे १६ कोटी रुपये थकीत असल्याचा मुद्दा चर्चिला गेला. ही रक्कम वसूल करण्यासाठी नैऋत्य रेल्वेच्या वरिष्ठ अधिकाऱ्यांना पत्र पाठविण्यात आले असून पुढील पाठपुरावा केला जाणार असल्याचे सांगण्यात आले.

यावेळी लाच स्वीकार प्रकरणात निलंबित करण्यात आलेल्या एका महिला अधिकाऱ्याबाबतही चर्चा झाली. संबंधित कर्मचाऱ्याचे ५० टक्के वेतन कपात करून उर्वरित वेतन देण्याचा निर्णय बैठकीत घेण्यात आला.

रामकृष्ण मिशन यांच्याकडून हॉस्पिटल उभारणीसाठी परवानगी मागण्यात आली असून आवश्यक नियमांची पूर्तता झाल्यानंतर बांधकाम परवाना देण्याबाबत विचार करण्यात येणार आहे. तसेच सातवा वेतन आयोग लागू झाल्यानंतर उर्वरित वेतन फरकाची रक्कम कर्मचाऱ्यांना देण्याचाही निर्णय घेण्यात आला.

इंडिपेंडिंग रोड आणि हावलॉक रोड जंक्शनचे सुशोभीकरण करण्याबरोबरच एल अँड टी कंपनीने जलवाहिन्यांसाठी केलेल्या खोदाईनंतर रस्त्यांची दुरुस्ती न केल्याने नागरिकांमध्ये नाराजी असल्याचा मुद्दाही बैठकीत उपस्थित करण्यात आला.

बकरी ईदच्या पार्श्वभूमीवर कॅन्टोन्मेंट परिसरातील कत्तलखान्यासह इतर कोणत्याही ठिकाणी गोहत्या होऊ नये यासाठी प्रशासनाने दक्षता घ्यावी, अशी सूचना सरकारनियुक्त सदस्य सुधीर तुपेकर यांनी केली.

दरम्यान, एसएफसी निधीत यावर्षी केवळ पाच लाख रुपयांचे अनुदान मिळाल्याने विकासकामांवर मर्यादा येत असल्याचे सांगण्यात आले. त्यामुळे राज्य सरकारकडे वाढीव निधीची मागणी केली जाणार आहे.

केंद्र सरकारकडून कॅन्टोन्मेंट बोर्डाला सुमारे १४ कोटी रुपयांचा निधी मिळणार असून, त्यातून कायमस्वरूपी महसूल निर्माण करणारे प्रकल्प राबविण्याची योजना आहे. बी. के. मॉडेलसमोरील मोकळ्या जागेत बेंगळुरू विमानतळाच्या धर्तीवर फूड स्टॉल उभारण्याचा प्रस्ताव सीईओ सुदाम मंचलवार यांनी मांडला. तसेच रेल्वे स्थानक परिसरात स्टॉल्स आणि इनडोअर स्टेडियम उभारणीबाबतही प्राथमिक चर्चा करण्यात आली.

The post रेल्वेकडून कॅन्टोन्मेंट बोर्डाचे १६ कोटी रुपये थकीत appeared first on News 24 Tass Marathi.