बेळगाव : ज्येष्ठ अभिनेते नाना पाटेकर यांना बेळगावचे रांगोळी कलाकार अजित औरवाडकर यांनी कृष्णधवल रांगोळीतून भावपूर्ण श्रद्धांजली अर्पण केली आहे. आपल्या कलाकृतीतून त्यांनी नाना पाटेकर यांचे व्यक्तिचित्र साकारले आहे.

वडगाव येथील ज्योती फोटो स्टुडिओमध्ये ही रांगोळी रेखाटण्यात आली असून, ती पूर्ण करण्यासाठी अजित औरवाडकर यांना सुमारे आठ तास लागले. कृष्णधवल रंगसंगतीत साकारलेल्या या कलाकृतीतून त्यांनी आपल्या कलेच्या माध्यमातून श्रद्धांजली व्यक्त केली आहे.

ही रांगोळी सकाळी ८ ते रात्री ८ वाजेपर्यंत ज्योती फोटो स्टुडिओमध्ये पाहण्यासाठी उपलब्ध असेल.

The post रांगोळी कलाकार अजित औरवाडकर यांची नाना पाटेकर यांना रांगोळीतून श्रद्धांजली appeared first on News 24 Tass Marathi.

बेळगाव : बेळगावचे चित्रकार विकास पाटणेकर यांच्या कलाकृतींवर पॅरिस येथे चर्चासत्र आयोजित करण्यात आले. रोक डी अंथेनर सभागृहात झालेल्या या चर्चासत्रात ‘क्रॉसड ग्लानसिस’ या पुस्तकात प्रकाशित झालेल्या विकास पाटणेकर यांच्या चित्रावर विशेष चर्चा करण्यात आली.

या पुस्तकातील त्यांच्या कलाकृतींचे जगभरातील अनेक समीक्षकांनी कौतुक केले आहे. चर्चासत्रात सहभागी समीक्षक आणि चित्रकारांनी विकास पाटणेकर यांच्या चित्रांविषयी आपली मते व्यक्त करत त्यांच्या कलाकृतींची वैशिष्ट्ये विशद केली.

या कार्यक्रमाचे आयोजन बेनेडिक्त जोबे डुवाल यांनी केले होते. पुढील काळात विकास पाटणेकर यांच्या चित्रांचे पॅरिसमध्ये प्रदर्शन आयोजित करण्यात येणार असल्याचे आयोजकांनी जाहीर केले.

The post पॅरिसमध्ये बेळगावचे चित्रकार विकास पाटणेकर यांच्या कलाकृतींवर चर्चासत्र appeared first on News 24 Tass Marathi.

बेळगाव : दक्षिण महाराष्ट्र शिक्षण मंडळ संचलित ज्योती सेंट्रल स्कूल, कॅम्प, बेळगाव येथील विद्यार्थीनींनी डिव्हाईन प्रोव्हिडन्स कॉन्व्हेंट हायस्कूल, टिळकवाडी, बेळगाव आयोजित ‘सेंट मॅग्डालेन स्मृती आंतरशालेय स्पर्धा २०२६–२७’ मध्ये उल्लेखनीय यश संपादन करत प्रथम क्रमांक पटकावला.

कु. आराध्या रेडेकर हिने चित्रकला स्पर्धेत प्रथम क्रमांक मिळवून शाळेचा नावलौकिक वाढविला. तसेच कु. जान्हवी कडेमणी हिनेही आपल्या गटातील स्पर्धेत प्रथम क्रमांक मिळवून उल्लेखनीय कामगिरी केली. दोन्ही विद्यार्थीनींना चषक व प्रशस्तीपत्र देऊन सन्मानित करण्यात आले.

विद्यार्थिनींच्या या यशाबद्दल शालेय एस्.एम्.सी कमिटीचे अध्यक्ष प्रा. श्री. आर. के. पाटील, उपाध्यक्ष प्रो. श्री. आर. एस. पाटील, सचिव प्रा. श्री. नितीन घोरपडे, प्राचार्य श्री. प्रदीप पाटील, उपप्राचार्य श्री. मनोहर करडी, सर्व शिक्षक, शिक्षकेतर कर्मचारी तसेच पालकांनी त्यांचे मनःपूर्वक अभिनंदन करून पुढील वाटचालीस शुभेच्छा दिल्या.

The post ज्योती सेंट्रल स्कूलच्या विद्यार्थीनींचा दैदिप्यमान विजय appeared first on News 24 Tass Marathi.

बेळगाव : रोटरी क्लब ऑफ बेळगाव दर्पण आणि बेळगाव टोस्टमास्टर्स सेंटेनरी क्लब यांच्या संयुक्त विद्यमाने १८ जुलै २०२६ रोजी बेळगावात सार्वजनिक वक्तृत्व कला, प्रभावी संवादकौशल्य आणि नेतृत्व विकासावर आधारित प्रेरणादायी ओपन हाऊस कार्यक्रम उत्साहात पार पडला.

सायंकाळी ४ वाजता सुरू झालेल्या या कार्यक्रमात सहभागी आणि उपस्थित पाहुण्यांना सार्वजनिक वक्तृत्वाची प्रभावी शैली, आत्मविश्वासपूर्ण संवाद आणि नेतृत्वगुण विकसित करण्याविषयी प्रत्यक्ष अनुभव घेण्याची संधी मिळाली. विविध सत्रांमधून उपस्थितांना स्वतःच्या अभिव्यक्तीची ताकद ओळखण्याची आणि प्रभावी संवादाच्या माध्यमातून व्यक्तिमत्त्व विकास साधण्याची प्रेरणा मिळाली.

कार्यक्रमाचे नियोजन आणि यशस्वी आयोजन कार्यक्रम अध्यक्षा रोटेरियन दिव्या एम. यांनी केले. त्यांच्या नियोजनामुळे कार्यक्रम सुरळीत आणि प्रभावीपणे पार पडल्याबद्दल त्यांचे विशेष कौतुक करण्यात आले.

यावेळी रोटेरियन राजनंदा गर्गी, रोटेरियन अनुपमा कळ्ळोळ, रोटेरियन रेणुका मोत्रे आणि रोटेरियन सविता वेसणे यांनी सक्रिय सहभाग नोंदवत कार्यक्रमाच्या यशात मोलाचे योगदान दिले.

आत्मविश्वास, नेतृत्वगुण आणि प्रभावी संवादकौशल्य विकसित करण्यासाठी अशा उपक्रमांचे आयोजन भविष्यातही सातत्याने करण्यात येईल, अशी भावना आयोजकांनी व्यक्त केली.

रोटरी क्लब ऑफ बेळगाव दर्पणच्या अध्यक्षा रोटेरियन डॉ. स्फूर्ती मस्तीहोळी आणि सचिव रोटेरियन ज्योती कुलकर्णी यांनी कार्यक्रमाच्या यशस्वी आयोजनासाठी सहकार्य करणाऱ्या सर्वांचे आभार मानले.

The post बेळगावात सार्वजनिक वक्तृत्व कलेवरील प्रेरणादायी ओपन हाऊस कार्यक्रम appeared first on News 24 Tass Marathi.

अक्षय बापट यांनी विद्यार्थ्यांना कला प्रदर्शने, संग्रहालये आणि कलाक्षेत्रातील विविध संधींबाबत माहिती दिली. तसेच त्यांनी चंद्रशेखर रांगणेकर यांच्या कलाप्रवास आणि कलाकृतींविषयीही मार्गदर्शन केले.

या कार्यशाळेमुळे कला विद्यार्थ्यांना एका अनुभवी कलाकाराच्या कार्यपद्धतीबद्दल, त्यांच्या अनुभवांबद्दल आणि विविध माध्यमांमध्ये केलेल्या कामांविषयी जाणून घेण्याची संधी मिळाली. विद्यार्थ्यांनी रांगणेकर यांचे प्रात्यक्षिक उत्सुकतेने पाहिले आणि त्यास उत्स्फूर्त प्रतिसाद दिला. रांगणेकर यांनी लाईव्ह डेमोद्वारे चित्रनिर्मितीची प्रक्रिया समजावून सांगितली. कलाकृती तयार करताना आवश्यक असलेली एकाग्रता, सातत्य आणि निरीक्षणशक्ती यांचे महत्त्व त्यांनी विद्यार्थ्यांना पटवून दिले. कार्यशाळेनंतर प्रश्नोत्तरांचे सत्र आयोजित करण्यात आले, यावेळी विद्यार्थ्यांनी विविध प्रश्न विचारून शंकांचे निरसन करून घेतले. उत्साहपूर्ण वातावरणात पार पडलेल्या या कार्यक्रमास अनेक विद्यार्थी उपस्थित होते.

The post प्रसिद्ध चित्रकार चंद्रशेखर रांगणेकर यांच्या चित्रकला कार्यशाळेला उत्स्फूर्त प्रतिसाद appeared first on News 24 Tass Marathi.

बेळगाव : संयुक्त महाराष्ट्र चळवळीची ठिणगी बेळगावच्या साहित्य संमेलनातून पडली आणि त्यानंतर महाराष्ट्र राज्याची निर्मिती झाली. त्यामुळे बेळगाव कर्नाटकचे असल्याचे आम्ही कधीही मानत नाही. बेळगाव हे महाराष्ट्राच्या अस्मितेचे धगधगते हृदय असून, येथील मराठी भाषिकांनी संघर्षातून भाषा आणि चळवळ जिवंत ठेवली आहे, असे प्रतिपादन ज्येष्ठ साहित्यिक प्रा. सुनीलकुमार लवटे यांनी केले.

राजारामबापू पाटील ललित कला अकादमी महाराष्ट्र राज्य आणि शब्दगंध कविमंडळ, बेळगाव यांच्या संयुक्त विद्यमाने आयोजित ‘लोकनेते राजारामबापू पाटील राष्ट्रीय ललित कला सन्मान २०२६’ पुरस्कार वितरण सोहळा शनिवारी तुकाराम महाराज सांस्कृतिक भवन येथे झाला. पुरस्कार स्वीकारल्यानंतर प्रा. लवटे बोलत होते. कार्यक्रमाच्या अध्यक्षस्थानी महाराष्ट्राचे माजी मंत्री तथा आमदार जयंत पाटील होते.

प्रारंभी मान्यवरांच्या हस्ते राजारामबापू पाटील यांच्या प्रतिमेचे पूजन आणि दीपप्रज्वलन करण्यात आले. अकादमीचे निमंत्रक प्रा. प्रदीप पाटील तसेच शब्दगंध कविमंडळाचे अध्यक्ष प्रा. अशोक अलगोंडी यांनी प्रास्ताविक केले. माजी कुलगुरू डॉ. माणिकराव साळुंखे आणि प्रा. अशोक चौसाळकर यांच्या हस्ते पुरस्कारांचे वितरण करण्यात आले.

प्रा. लवटे म्हणाले, भाषा नष्ट झाली तर संस्कृतीही नष्ट होते. त्यामुळे भाषा जपणे अत्यंत आवश्यक आहे. राजारामबापू पाटील ललित कला अकादमीच्या माध्यमातून भाषा, साहित्य आणि कलेचे संवर्धन करण्याचे काम सुरू आहे. पुरस्कारांच्या माध्यमातून देश आणि माणसे जोडण्याचे महत्त्वपूर्ण कार्य अकादमी करत आहे. संस्कृतीचे महत्त्व विसरण्याची वेळ आलेल्या काळात अकादमीचे कार्य अधिक मोलाचे असल्याचे त्यांनी सांगितले. राजारामबापू पाटील हे सुसंस्कृत नेतृत्व होते. त्यांच्या कार्याची आठवण जपण्यासाठी पुरस्कारांच्या माध्यमातून सुरू असलेला उपक्रम उल्लेखनीय असल्याचे त्यांनी स्पष्ट केले.

ज्येष्ठ विचारवंत प्रा. अशोक चौसाळकर म्हणाले, संयुक्त महाराष्ट्र स्थापनेनंतर यशवंतराव चव्हाण यांनी महाराष्ट्राच्या विकासाचे मॉडेल उभे केले आणि ते प्रत्यक्षात राबविण्याचे कार्य राजारामबापूंनी केले.

माजी कुलगुरू डॉ. माणिकराव साळुंखे म्हणाले, लोकनेता कसा असावा याचा आदर्श राजारामबापू पाटील यांनी घालून दिला. ते केवळ राजकारणी नव्हते, तर समाजहितासाठी लढणारे खरे लोकनेते होते. सत्ता माणसाला मोठे करत नाही, तर समाजासाठी केलेले कार्य व्यक्तीला मोठेपण प्राप्त करून देते, असेही त्यांनी सांगितले.

कवयित्री सिसिलिया कारव्हालो यांनीही मनोगत व्यक्त केले. व्यासपीठावर मध्यवर्ती महाराष्ट्र एकीकरण समितीचे अध्यक्ष प्रकाश मरगाळे, माजी आमदार मनोहर किणेकर, माजी आमदार दिगंबर पाटील, माजी महापौर मालोजी अष्टेकर, ॲड. राजाभाऊ पाटील यांच्यासह अनेक मान्यवर उपस्थित होते. कार्यक्रमाला महाराष्ट्र, गोवा आणि सीमाभागातील साहित्यप्रेमी व कार्यकर्त्यांची उपस्थिती होती. सूत्रसंचालन अस्मिता देशपांडे यांनी केले, तर आभार प्राचार्य अनिल सावंत यांनी मानले.

• बेळगाव महाराष्ट्राचेच : जयंत पाटील

बेळगावात शेकडो वर्षांपासून मराठी भाषिक वास्तव्यास आहेत. मराठी भाषेवरील प्रेमातूनच सीमाप्रश्नाचा लढा सुरू आहे. त्यामुळे बेळगाव महाराष्ट्राचेच असल्याची भावना आमच्या मनात असल्याचे आमदार जयंत पाटील यांनी सांगितले. साहित्य समाजाला दिशा देण्याचे आणि परिवर्तन घडविण्याचे कार्य करत असते. जिथे मराठी भाषिक आहेत, त्या ठिकाणी साहित्यिक कार्यक्रम घेण्याच्या उद्देशाने बेळगावात पुरस्कार वितरण सोहळा आयोजित करण्यात आल्याची माहिती त्यांनी दिली.

• मान्यवरांचा पुरस्काराने गौरव

यावेळी प्रा. सुनीलकुमार लवटे (कोल्हापूर) यांना एक लाख रुपयांचा जीवनगौरव पुरस्कार प्रदान करण्यात आला. कविता आणि ललित लेखनातील योगदानाबद्दल कवयित्री सिसिलिया कारव्हालो (वसई), दक्षिण भारतातील मराठी भाषेच्या अभ्यासपूर्ण कार्यासाठी संशोधक डॉ. विवेकानंद गोपाल (तंजावर), कथासाहित्यातील योगदानासाठी डॉ. सुरेंद्र दरेकर (अहिल्यानगर), तर समीक्षेतील कार्यासाठी प्रा. डॉ. रणधीर शिंदे (कोल्हापूर) यांना प्रत्येकी २५ हजार रुपयांचे पुरस्कार देण्यात आले. मराठी भाषेच्या प्रसारासाठी कार्य करणारे अनंत कदम (होळसमुद्र, कर्नाटक) यांनाही १५ हजार रुपयांचा पुरस्कार देऊन सन्मानित करण्यात आले.

The post बेळगाव महाराष्ट्राच्या अस्मितेचे धगधगते हृदय appeared first on News 24 Tass Marathi.

• डॉ. सुनीलकुमार लवटे, सिसिलिया कार्व्हालो, विवेकानंद गोपाल, सुरेंद्र दरेकर, रणधीर शिंदे, अनंत कदम यांचा समावेश

बेळगाव : राजारामबापू पाटील ललित कला अकादमी (महाराष्ट्र राज्य) आणि शब्दगंध कवी मंडळ संघ, बेळगाव यांच्या संयुक्त विद्यमाने ‘लोकनेते राजारामबापू पाटील राष्ट्रीय ललित कला सन्मान २०२६’ पुरस्कार वितरण सोहळा उद्या शनिवार दि. १६ मे रोजी सायंकाळी ५ वाजता श्री तुकाराम महाराज सांस्कृतिक भवन येथे होणार आहे. राज्याचे माजी मंत्री तथा आमदार जयंतराव पाटील यांच्या प्रमुख उपस्थितीत विविध क्षेत्रांतील मान्यवरांना राष्ट्रीय पातळीवरील सन्मान प्रदान करण्यात येणार आहेत.

यंदाचा ‘लोकनेते राजारामबापू पाटील राष्ट्रीय ललित कला जीवन गौरव सन्मान’ प्रसिद्ध लेखक, अनुवादक आणि मराठी-हिंदी साहित्याचे अभ्यासक डॉ. सुनीलकुमार लवटे (कोल्हापूर) यांना जाहीर झाला आहे. एक लाख रुपये आणि सन्मानचिन्ह असे या पुरस्काराचे स्वरूप आहे.

‘लोकनेते राजारामबापू पाटील राष्ट्रीय ललित कला सन्मान’ पुरस्कारासाठी कवयित्री व लेखिका सिसिलिया कार्व्हालो (वसई), दक्षिण भारतातील मराठी भाषेच्या अभ्यासपूर्ण योगदानाबद्दल संशोधक डॉ. विवेकानंद गोपाल (तंजावर, तामिळनाडू), कथासाहित्यातील योगदानाबद्दल कथाकार व कादंबरीकार डॉ. सुरेंद्र दरेकर (अहिल्यानगर) आणि समकालीन मराठी समीक्षेतील योगदानाबद्दल समीक्षक प्रा. डॉ. रणधीर शिंदे (शिवाजी विद्यापीठ) यांची निवड करण्यात आली आहे. प्रत्येकी २५ हजार रुपये आणि सन्मानचिन्ह असे या पुरस्काराचे स्वरूप आहे.

‘लोकनेते राजारामबापू पाटील राष्ट्रीय ललित कला विशेष सन्मान’ लेखन व मराठी भाषेच्या प्रसारासाठी अनंत कदम (होळसमुद्र, कर्नाटक) यांना प्रदान करण्यात येणार असून, या पुरस्काराचे स्वरूप १५ हजार रुपये आणि सन्मानचिन्ह असे आहे.

प्रसिद्ध विचारवंत आणि संत साहित्याचे अभ्यासक डॉ. सदानंद मोरे यांच्या निवड समितीने पुरस्कारार्थींची निवड केली आहे. राष्ट्रीय पातळीवरील साहित्य, समीक्षा, संशोधन आणि मराठी भाषेच्या जतनासाठी कार्य करणाऱ्या मान्यवरांचा गौरव या सोहळ्यात करण्यात येणार असल्याने साहित्य क्षेत्रात उत्सुकता निर्माण झाली आहे.

राजारामबापू पाटील ललित कला अकादमीतर्फे स्व. राजारामबापू पाटील यांच्या स्मृतिप्रीत्यर्थ गेल्या चार वर्षांपासून राष्ट्रीय स्तरावर हे सन्मान प्रदान केले जात आहेत. यापूर्वी पुणे, बडोदा आणि गोवा येथे पुरस्कार वितरण सोहळे पार पडले आहेत.

The post बेळगावात उद्या राजारामबापू पाटील राष्ट्रीय ललित कला सन्मान पुरस्कार वितरण सोहळा appeared first on News 24 Tass Marathi.

बेळगाव : “व्यंगचित्र ही केवळ हास्यनिर्मिती करणारी कला नसून मनोरंजनातून समाजप्रबोधन घडवणारी प्रभावी अभिव्यक्ती आहे. म्हणूनच व्यंगचित्रकला ही सर्वात उत्क्रांत कला मानली जाते,” असे प्रतिपादन ज्येष्ठ व्यंगचित्रकार जगदीश कुंटे यांनी केले. येथील ज्येष्ठ नागरिक संघात आयोजित कार्यक्रमात ‘व्यंगचित्र : एक बोलकी कला’ या विषयावरील प्रात्यक्षिकासह व्याख्यानात ते बोलत होते.

बेळगावातील ज्येष्ठ नागरिक संघात आयोजित कार्यक्रमात कुंटे यांनी क्षणार्धात विविध चेहरे आणि भावरेषा साकारत उपस्थितांना मंत्रमुग्ध केले. व्यंगचित्र म्हणजे काय, ती कशी सुचतात, त्यामागील निरीक्षणशक्ती, अभ्यास, विविध प्रकार आणि व्यंगचित्रांची प्रभावीता याचे त्यांनी अत्यंत रंजक शैलीत विवेचन केले.

यावेळी उद्योगपती शिरीष गोगटे यांनी कुंटे यांचा सत्कार करताना, “जगदीश कुंटे यांच्या कलेचा आम्हाला अभिमान वाटतो. पुण्यात त्यांचा मोठा गौरव झाला, मग बेळगावकरांनी का मागे राहायचे? समस्त बेळगावकर आणि गोगटे कुटुंबातर्फे आम्ही त्यांचा सन्मान करीत आहोत,” असे सांगितले.

गणपतीची मूर्ती, छत्रपती शिवाजी महाराज आणि लोकमान्य टिळक यांच्या प्रतिमांची फ्रेम तसेच भेटवस्तू देऊन कुंटे यांचा सत्कार करण्यात आला. संघाचे अध्यक्ष विश्वास धुराजी यांनीही त्यांचा गौरव केला. कार्यक्रमाला मोठ्या संख्येने ज्येष्ठ नागरिक उपस्थित होते. काही सदस्यांनी पदे सादर करून कार्यक्रमात रंगत आणली.

सुरेंद्र देसाई यांनी स्वागत व प्रास्ताविक केले. शिवराज पाटील यांनी कुंटे यांचा परिचय करून दिला. के. एल. मजुकर यांनी आभार मानले.

The post मनोरंजनातून प्रबोधन करणारी ‘व्यंगचित्रकला’ हीच सर्वात उत्क्रांत कला appeared first on News 24 Tass Marathi.

या दिनाचे औचित्य साधून काही ज्येष्ठ व्यंगचित्रकारांचा सत्कार करण्यात आला. त्यात बेळगावच्या जगदीश कुंटे यांच्या खेरीज वैजनाथ दुलंगे, श्रीनिवास प्रभुदेसाई, अवि जाधव, राजीव गायकवाड, रवींद्र बाळापुरे आणि खलील खान यांचा समावेश आहे.

याशिवाय दोन दिवसात नामवंत व्यंगचित्रकारांची प्रात्यक्षिके आणि प्रदर्शने, छोट्यांसाठी कार्यशाळा असा भरगच्च कार्यक्रम आयोजित केला गेला. या दोन दिवसाच्या महोत्सवाचे उद्घाटन ज्येष्ठ कवी, वात्रटिकाकार रामदास फुटाणे यांच्या हस्ते झाले. हा संपूर्ण कार्यक्रम महाराष्ट्र व्यंगचित्रकार ग्रुप, कार्टून कट्टा आणि महाराष्ट्र नवनिर्माण विद्यार्थी सेनेच्या वतीने आयोजित करण्यात आला.

The post जागतिक व्यंगचित्रकार दिनानिमित्त जगदीश कुंटे यांचा सत्कार appeared first on News 24 Tass Marathi.

संवादिनी कला मंचचे अध्यक्ष श्री. संतोष घंटे यांच्या संकल्पनेतून साकार झालेला हा कार्यक्रम रसिकांना हार्मोनियमच्या समृद्ध परंपरेचा आणि विविध वाद्यांच्या सुरेल संगमाचा आगळावेगळा अनुभव देणारा ठरला. निगडी प्राधिकरण येथील ग. दि. माडगूळकर नाट्यगृहात हा कार्यक्रम पार पडला. कार्यक्रमाची सुरुवात प्रख्यात हार्मोनियमवादक डॉ. पं. सुधांशु कुलकर्णी यांच्या विशेष सत्कार व पुरस्कार प्रदान समारंभाने झाली. यानंतर सुप्रसिद्ध गायिका डॉ. राधिका जोशी यांनी सादर केलेल्या शास्त्रीय गायनाने रसिक मंत्रमुग्ध झाले. त्यांच्या गायनाला हार्मोनियमवर श्री. सुरेश फडतरे तर तबल्यावर पार्थ ताराबादकर यांनी समर्थ साथसंगत दिली.

त्यानंतर डॉ. पं. सुधांशु कुलकर्णी यांचे विशेष हार्मोनियम वादन रंगले. त्यांच्या वादनाला तबल्यावर श्री. विनायक गुरव यांनी प्रभावी साथ दिली. कार्यक्रमाच्या प्रारंभी डॉ. राधिका जोशी, राकेश श्रीवास्तव, डॉ. अवंतिका सिन्हा, संतोष घंटे, डॉ. सुधांशु कुलकर्णी आदी मान्यवरांच्या हस्ते दीपप्रज्वलन करण्यात आले.

‘या पुरस्कारासाठी माझी निवड करण्यात आली हे माझे भाग्य समजतो. मी अजूनही विद्यार्थीच आहे आणि साधक म्हणून हा प्रवास असाच पुढे होत राहील” अशा शब्दात पं. सुधांशु कुलकर्णी यांनी पुरस्कार स्वीकारल्यावर प्रतिक्रिया व्यक्त केली.

The post संवादिनी वादक पं. सुधांशु कुलकर्णीना कै. पं. आप्पासाहेब जळगांवकर पुरस्कार प्रदान appeared first on News 24 Tass Marathi.