बेळगाव : शहरात विना नंबरप्लेट किंवा सदोष नंबर प्लेट असलेल्या दुचाकींचा वाढता वापर लक्षात घेऊन वाहतूक पोलिसांनी विशेष तपासणी मोहीम राबवत नियमभंग करणाऱ्या वाहनचालकांविरुद्ध कठोर कारवाई केली. या मोहिमेत एकूण १०५ दुचाकी चालकांवर मोटार वाहन कायद्यानुसार दंडात्मक कारवाई करण्यात आली.

२३ जुलै २०२६ रोजी राबविण्यात आलेल्या या विशेष मोहिमेदरम्यान वाहतूक पोलिसांनी नोंदणी क्रमांक नसलेल्या, नंबर प्लेट लपवलेल्या तसेच वाहनाच्या पुढील किंवा मागील बाजूस नंबर प्लेट नसलेल्या दुचाकींची तपासणी केली. नियमांचे उल्लंघन करणाऱ्या सर्व वाहनचालकांवर दंड आकारण्यात आला.

यावेळी वाहनचालकांना वाहतूक नियमांचे महत्त्व समजावून सांगण्यात आले. तसेच नियमानुसार नंबर प्लेट बसवल्यानंतरच संबंधित वाहने सोडण्यात आल्याची माहिती वाहतूक पोलिसांनी दिली.

बेळगाव शहरात विना नंबरप्लेट किंवा सदोष नंबर प्लेट असलेल्या वाहनांविरोधातील ही विशेष मोहीम आगामी काळातही सुरू राहणार असल्याचे पोलिसांनी स्पष्ट केले आहे. वाहतूक नियमांचे उल्लंघन करणाऱ्यांवर मोटार वाहन कायद्यानुसार कठोर कायदेशीर कारवाई करण्यात येणार असल्याचा इशाराही देण्यात आला आहे.

सर्व वाहनमालक आणि वाहनचालकांनी आपल्या वाहनांवर शासनाने निर्धारित केलेली नोंदणी क्रमांकाची नंबर प्लेट बसवून वाहतूक नियमांचे काटेकोर पालन करावे, असे आवाहन वाहतूक पोलिसांनी केले आहे.

The post बेळगावात विना नंबरप्लेट दुचाकींवर कारवाई appeared first on News 24 Tass Marathi.

बेळगाव : शहरातील वाहतूक व्यवस्था सुरळीत ठेवण्यासाठी वाहतूक पोलिसांनी नियमभंग करणाऱ्यांविरोधात विशेष मोहीम सुरू केली आहे. या मोहिमेअंतर्गत विना हेल्मेट दुचाकी चालविणाऱ्यांसोबतच नो पार्किंगमध्ये वाहने उभी करणाऱ्यांवरही कठोर कारवाई करण्यात येत आहे. शनिवारी जिल्हाधिकारी कार्यालयाच्या मागील परिसरात नो पार्किंगमध्ये उभी करण्यात आलेली अनेक वाहने टोईंग करून जप्त करण्यात आली.

वाहतूक नियमांचे पालन व्हावे यासाठी हेल्मेट सक्तीची मोहीम सुरू असतानाच चुकीच्या पद्धतीने वाहने पार्क करणाऱ्यांवरही पोलिसांनी लक्ष केंद्रित केले आहे. जिल्हाधिकारी कार्यालयाच्या मागील रस्त्यावर नो पार्किंगचा फलक असतानाही अनेक वाहनचालकांनी वाहने उभी केल्याचे आढळून आले. त्यानंतर वाहतूक पोलिसांनी टोईंग व्हॅनच्या सहाय्याने ही वाहने हटवून पोलीस ठाण्यात जमा केली.

शहरातील वाढती वाहतूक कोंडी कमी करण्यासाठी आणि रस्त्यांवरील वाहतूक सुरळीत ठेवण्यासाठी विविध ठिकाणी बॅरिकेड्स उभारण्यात आले आहेत. मात्र, काही वाहनचालकांकडून नियमांकडे दुर्लक्ष करून नो पार्किंगच्या जागेत वाहने उभी केली जात असल्याने वाहतुकीला अडथळा निर्माण होत आहे.

याशिवाय काही मालवाहू वाहनेही रस्त्याच्या कडेला अथवा नो पार्किंग क्षेत्रात उभी केली जात असल्याचे निदर्शनास आले. त्यामुळे अशा वाहनांवरही पोलिसांनी कारवाईचा बडगा उगारत ती जप्त केली आहेत. वाहतूक नियमांचे पालन करून शहरातील वाहतूक व्यवस्था सुरळीत ठेवण्यासाठी नागरिकांनी सहकार्य करावे, असे आवाहन वाहतूक विभागाकडून करण्यात आले आहे.

The post जिल्हाधिकारी कार्यालय परिसरात ‘नो पार्किंग’मधील वाहनांवर कारवाई appeared first on News 24 Tass Marathi.

बेळगाव : शहरातील रखडलेल्या रस्ते विकास कामांमुळे नागरिक त्रस्त झाले असताना, वाहतूक पोलिसांनी पुढाकार घेत रस्त्यावरील खड्डे बुजवण्याचे काम करून वाहनधारकांना दिलासा दिला. संबंधित विभागाकडून दखल घेतली जात नसल्याने पोलिसांनी स्वतःच रस्ते दुरुस्तीचे काम हाती घेतल्याने नागरिकांतून त्यांच्या तत्परतेचे कौतुक होत आहे.

मंगळवारी शनि मंदिर परिसरात रस्त्यावरील मोठ्या खड्ड्यांमुळे वाहतुकीला अडथळा निर्माण होत असल्याचे लक्षात येताच वाहतूक पोलिसांनी तातडीने कारवाई केली. संबंधित विभागाच्या कर्मचाऱ्यांची प्रतीक्षा न करता पोलिसांनी स्वतः कुदळ-फावडी घेऊन माती टाकत रस्ता समतल केला. त्यामुळे काही प्रमाणात वाहतूक सुरळीत झाली आणि वाहनधारकांना दिलासा मिळाला.

शहरातील विविध भागांत रस्ते विकासाच्या नावाखाली खोदकाम करण्यात आले आहे. मात्र, अनेक ठिकाणी कामे अर्धवट अवस्थेत पडून असल्याने वाहनधारकांना धूळ, खड्डे आणि वाहतूक कोंडीचा सामना करावा लागत आहे. पादचाऱ्यांनाही यामुळे मोठ्या अडचणींना सामोरे जावे लागत असून सुरक्षिततेचा प्रश्न गंभीर बनला आहे.

दरम्यान, वाहतूक पोलिसांनी केलेल्या या कामाचे नागरिकांकडून स्वागत होत असले तरी, रस्ते विकास कामांतील दिरंगाईबद्दल प्रशासनाविरोधात नाराजी व्यक्त केली जात आहे. शहरातील रखडलेली कामे तातडीने पूर्ण करून नागरिकांना दिलासा द्यावा, अशी मागणी आता जोर धरू लागली आहे.

The post वाहतूक पोलिसांनी बुजवले रस्त्यांवरील खड्डे appeared first on News 24 Tass Marathi.

बेळगाव : शहरात उष्णतेची लाट दिवसेंदिवस तीव्र होत असून तापमान ३६ ते ३९ अंश सेल्सिअस दरम्यान पोहोचले आहे. नागरिक हैराण झाले असताना कडक उन्हात रस्त्यावर उभे राहून सेवा देणाऱ्या वाहतूक पोलिसांना दिलासा देणारा एक उपाय समोर आला आहे.

वाहतूक पोलीस शैलेश सदलगी यांनी तयार केलेली ‘सोलर कॅप’ सध्या सर्वांचे लक्ष वेधून घेत आहे. या कॅपच्या वर सोलर पॅनल बसवण्यात आले असून, सूर्यप्रकाशातून निर्माण होणाऱ्या ऊर्जेवर छोटा पंखा चालतो. त्यामुळे डोक्याला सतत हवा मिळत राहून उष्णतेपासून काही प्रमाणात संरक्षण मिळते.

कडक उन्हात दीर्घकाळ कर्तव्य बजावणाऱ्या पोलिसांसाठी हा प्रयोग उपयुक्त ठरत असून, उष्माघाताचा धोका कमी करण्यास मदत होत आहे. शैलेश सदलगी यांच्या या कल्पकतेचे आणि सामाजिक बांधिलकीचे विविध स्तरांतून कौतुक होत आहे.

The post कडक उन्हात वाहतूक पोलिसांची ‘सोलर कॅप’ वेधते लक्ष appeared first on News 24 Tass Marathi.