बेळगाव : शहरात उष्णतेची लाट दिवसेंदिवस तीव्र होत असून तापमान ३६ ते ३९ अंश सेल्सिअस दरम्यान पोहोचले आहे. नागरिक हैराण झाले असताना कडक उन्हात रस्त्यावर उभे राहून सेवा देणाऱ्या वाहतूक पोलिसांना दिलासा देणारा एक उपाय समोर आला आहे.

वाहतूक पोलीस शैलेश सदलगी यांनी तयार केलेली ‘सोलर कॅप’ सध्या सर्वांचे लक्ष वेधून घेत आहे. या कॅपच्या वर सोलर पॅनल बसवण्यात आले असून, सूर्यप्रकाशातून निर्माण होणाऱ्या ऊर्जेवर छोटा पंखा चालतो. त्यामुळे डोक्याला सतत हवा मिळत राहून उष्णतेपासून काही प्रमाणात संरक्षण मिळते.

कडक उन्हात दीर्घकाळ कर्तव्य बजावणाऱ्या पोलिसांसाठी हा प्रयोग उपयुक्त ठरत असून, उष्माघाताचा धोका कमी करण्यास मदत होत आहे. शैलेश सदलगी यांच्या या कल्पकतेचे आणि सामाजिक बांधिलकीचे विविध स्तरांतून कौतुक होत आहे.

The post कडक उन्हात वाहतूक पोलिसांची ‘सोलर कॅप’ वेधते लक्ष appeared first on News 24 Tass Marathi.

बेळगाव : शहरातील सांस्कृतिक वातावरण समृद्ध करणाऱ्या दहाव्या ‘हसत-खेळत संगीत शिबिरा’ची सांगता मंगळवार (दि. २१) रोजी टिळकवाडी येथील जीजी चिटणीस इंग्लिश मीडियम स्कूल येथे करण्यात आली. अंतिम कार्यक्रमात विद्यार्थ्यांनी सादर केलेल्या सुरेल गायन व सांगीतिक सादरीकरणांनी उपस्थितांची मने जिंकली.

या शिबिरात विविध वयोगटांतील विद्यार्थ्यांनी सहभाग घेत संगीताची प्राथमिक तत्त्वे आत्मसात केली. गायन, ताल-लय, स्वरांची ओळख आणि सादरीकरण कौशल्य यांचे प्रशिक्षण अनुभवी तज्ज्ञांच्या मार्गदर्शनाखाली देण्यात आले. यासोबतच विद्यार्थ्यांमध्ये आत्मविश्वास वाढवणे, मंचावरील भीती दूर करणे आणि समूहात काम करण्याची सवय रुजवण्यावरही भर देण्यात आला.

सांगता समारंभात समूहगायनासह विविध सांगीतिक कार्यक्रमांची मेजवानी रंगली. काही विद्यार्थ्यांनी स्वतंत्र सादरीकरण करत आपली खास कला सादर केली. शिबिराच्या यशस्वी आयोजनाचा आढावा घेत मार्गदर्शकांनी आपले मनोगत व्यक्त केले. संयोजिका चंद्रज्योती देसाई यांच्या मार्गदर्शनाखाली २१ दिवस चाललेल्या या शिबिराला विद्यार्थ्यांचा उत्स्फूर्त प्रतिसाद लाभला.

The post हसत-खेळत संगीत शिबिराची सांगता appeared first on News 24 Tass Marathi.

बेळगाव : बेळगावमध्ये यंदा तापमानाचा पारा ४०.१ अंशांवर पोहोचल्याने उन्हाच्या तीव्र झळा बसत असून, याचा परिणाम मानवी जीवनासोबतच प्राणिसंग्रहालयातील वन्यजीवांवरही मोठ्या प्रमाणात जाणवत आहे.

बेळगाव शहर व परिसरात उष्णतेची लाट आल्याने जनजीवन विस्कळीत झाले आहे. वाढत्या तापमानामुळे ताप, डिहायड्रेशन यांसारख्या आरोग्य समस्या वाढत असून वृद्ध, लहान मुले आणि कामगारांचे हाल होत आहेत. त्याचबरोबर या तीव्र उन्हाचा फटका आता मूक प्राण्यांनाही बसू लागला आहे.

शहरालगतच्या भुतरामहट्टी येथील राणी चन्नम्मा प्राणीसंग्रहालयातील वन्यजीव वाढत्या तापमानामुळे अस्वस्थ झाले आहेत. नेहमी सक्रिय असणारे वाघ, सिंह आणि बिबट्यासारखे हिंस्र प्राणी सध्या सावलीचा आधार घेत असून त्यांच्या हालचाली मंदावल्या आहेत. अस्वल आणि तरस यांसारखे प्राणीही उन्हामुळे त्रस्त झाले आहेत.

हरण, काळवीट यांसारख्या तृणभक्षक प्राण्यांच्या खाण्यापिण्याच्या सवयींवरही परिणाम झाला असून हे प्राणी कमी अन्न ग्रहण करताना आणि जास्त वेळ विश्रांती घेताना दिसत आहेत. त्याचबरोबर पाण्याचे सेवन वाढल्याचेही निरीक्षण प्रशासनाने नोंदवले आहे.

या परिस्थितीचा विचार करून प्राणिसंग्रहालय प्रशासनाने ‘समर प्रोटोकॉल’ लागू केला आहे. पिंजऱ्यांमध्ये दिवसभर स्प्रिंकलर यंत्रणा सुरू ठेवण्यात आली असून काही प्राण्यांसाठी बर्फाच्या पाण्याचे स्नान (आईस बाथ) देऊन शरीराचे तापमान नियंत्रित करण्याचा प्रयत्न केला जात आहे.

प्राण्यांच्या आहारातही बदल करण्यात आला असून त्यांना शहाळी, थंड फळे आणि इलेक्ट्रोलाईट्स देण्यात येत आहेत. यामुळे शरीरातील पाण्याचे संतुलन राखण्यास मदत होत असल्याचे अधिकाऱ्यांनी सांगितले.

प्राणिसंग्रहालयातील पशुवैद्यक व कर्मचारी प्राण्यांच्या आरोग्यावर सतत लक्ष ठेवून आहेत. प्रत्येक प्राण्याची दैनंदिन नोंद घेतली जात असून, कोणतीही आपत्कालीन परिस्थिती निर्माण झाल्यास तातडीने उपचार देण्यासाठी यंत्रणा सज्ज ठेवण्यात आली आहे. उष्णतेच्या या तीव्र परिस्थितीत मानवाबरोबरच वन्यजीवांचे संरक्षण करणे हे मोठे आव्हान ठरत असल्याचे प्रशासनाने स्पष्ट केले आहे.

The post भुतरामहट्टी राणी चन्नम्मा प्राणीसंग्रहालयात ‘समर प्रोटोकॉल’ जारी appeared first on News 24 Tass Marathi.

बेळगाव : सध्या बेळगाव जिल्हा आणि शहरात पिण्याच्या पाण्याची कोणतीही समस्या नसल्याची माहिती जिल्हाधिकारी मोहम्मद रोशन यांनी दिली. उपलब्ध पाणीसाठा लक्षात घेता पुढील काळासाठीही प्रशासन सज्ज असल्याचे त्यांनी स्पष्ट केले.

बेळगाव येथे पत्रकारांशी बोलताना त्यांनी सांगितले की, राकसकोप जलाशयात सध्या सुमारे दोन महिने पुरेल इतका पाणीसाठा उपलब्ध आहे. त्यामुळे शहरात सध्या टँकरद्वारे पाणीपुरवठा करण्याची गरज भासत नाही. मात्र, भविष्यात पाणीटंचाई निर्माण झाल्यास जिल्हा प्रशासनाने टँकर तसेच खाजगी बोअरवेलच्या माध्यमातून पाणीपुरवठ्याची तयारी करून ठेवली आहे.

हवामान खात्याच्या अंदाजानुसार येत्या काही दिवसांत पावसाचे प्रमाण कमी राहण्याची शक्यता असल्याने नागरिकांनी पाण्याचा अपव्यय टाळावा, असे आवाहनही त्यांनी केले. जिल्ह्यातील पाणीपुरवठ्यासाठी कृष्णा, घटप्रभा आणि मलप्रभा या नद्यांवर अवलंबून राहावे लागते. या पाण्याच्या वापराबाबत नियोजन करण्यासाठी संबंधित अधिकाऱ्यांची बैठक घेण्यात आल्याचे त्यांनी सांगितले.

हिप्परगी जलाशयात सध्या ६ टीएमसीपैकी २ टीएमसी पाणी शिल्लक असून ते प्राधान्याने पिण्यासाठी वापरले जात आहे. याशिवाय महाराष्ट्रातील कोयना जलाशयातून राजापूर बॅरेजमार्फत कृष्णा नदीत दोन टीएमसी पाणी सोडण्याची विनंती करण्यात येणार असल्याची माहिती त्यांनी दिली.

घटप्रभा नदीच्या डाव्या व उजव्या कालव्यांमध्ये लवकरच पाणी सोडण्यात येणार असून, सध्या सुरू असलेल्या कामांमुळे यासाठी सुमारे दहा दिवसांचा कालावधी लागणार आहे. मलप्रभा नदीचे पाणी धारवाड व रोणा भागातही सोडण्यात येत असल्याचे त्यांनी सांगितले.

दरम्यान, राज्यात उष्णतेची लाट तीव्र होत असल्याने नागरिकांनी विशेष काळजी घ्यावी. दुपारी १ ते २ या वेळेत बाहेर पडणे टाळावे तसेच शरीरातील पाण्याची पातळी राखण्यासाठी पिण्याच्या पाण्यात मीठ-साखर मिसळून सेवन करावे, असा सल्लाही जिल्हाधिकाऱ्यांनी दिला.

The post बेळगाव जिल्ह्यात सध्या पाणीटंचाई नाही appeared first on News 24 Tass Marathi.

बेळगाव : उन्हाळा ऐन मध्यावर आला असल्यामुळे रविवारी (दि. १२) बेळगावचे तापमान ३८ अंशांवर पोहोचले असून साप्ताहिक सुट्टीचा दिवस खऱ्या अर्थाने ‘हॉट संडे’ ठरला. गेल्या सात दिवसांत कमाल तापमानात पाच तर किमान तापमानात तब्बल आठ अंशांनी वाढ झाली आहे.

बेळगावात एप्रिल महिन्यात सरासरी तापमान ३४ ते ३६ अंशांच्या दरम्यान असते. मात्र, यंदा तापमानाने ३८ अंशांचा टप्पा गाठल्याने उष्णतेचा तीव्र त्रास नागरिकांना सहन करावा लागत आहे. वाढत्या तापमानामुळे दुपारच्या वेळेत बाजारपेठांमध्ये शुकशुकाट दिसून येत आहे.

किमान तापमान २४ अंशांवर स्थिर असून त्यातही घट होत नसल्याने उष्णतेचा प्रभाव दिवस-रात्र जाणवत आहे. परिणामी, घरोघरी पंखे आणि वातानुकूलित यंत्रे दिवसभर सुरू ठेवावी लागत आहेत. आगामी काळातही तापमानात वाढ कायम राहण्याची शक्यता वर्तवण्यात येत आहे.

गेल्या सात दिवसांत कमाल तापमानात पाच अंशांनी, तर किमान तापमानात आठ अंशांनी वाढ झाल्याने उकाडा असह्य झाला आहे. अचानक वाढलेल्या उष्णतेमुळे अंगातून घामाच्या धारा वाहत असून नागरिक त्रस्त झाले आहेत.

दरम्यान, उन्हाळ्यात आरोग्याची काळजी घेण्याचे आवाहन डॉक्टरांनी केले आहे. वारंवार पाणी पिणे, प्रखर उन्हात बाहेर पडणे टाळणे, तसेच सैल आणि सुती कपड्यांचा वापर करणे, असा सल्ला देण्यात येत आहे.

The post बेळगावचा पारा ३८ अंशांवर ; उकाड्याने नागरिक हैराण appeared first on News 24 Tass Marathi.

बेळगाव : मुलांमधील सांगीतिक कौशल्याला वाव देण्यासाठी बेळगावातील प्रथितयश गायिका आणि संगीत शिक्षिका सौ. चंद्रज्योती देसाई आयोजित ‘हसत- खेळत’ संगीत शिबिराचे बुधवार दि. १ एप्रिल रोजी शानदार उद्घाटन करण्यात आले.

बुधवार पेठ, टिळकवाडी येथील जी. जी. चिटणीस इंग्लिश मीडियम स्कूलमध्ये पार पडलेल्या या उद्घाटन सोहळ्याला विख्यात व्यंगचित्रकार जगदीश कुंटे, भजन सम्राट तथा महाराष्ट्र भूषण शंकर पाटील आणि शाळेच्या प्राचार्या नविना शेट्टीगार हे प्रमुख पाहुणे म्हणून उपस्थित होते.

कार्यक्रमाची सुरुवात मान्यवरांच्याहस्ते दीपप्रज्वलन, सरस्वती व भारतमाता प्रतिमेचे पूजन तसेच तबला व हार्मोनियम पूजनाने करण्यात आली. यानंतर शिबिराच्या संचालिका सौ. चंद्रज्योती देसाई आणि शंकर पाटील यांच्याहस्ते मान्यवरांचे पुष्पगुच्छ देऊन स्वागत करण्यात आले.

यावेळी मनोगत व्यक्त करताना जगदीश कुंटे यांनी संगीताचे महत्त्व अधोरेखित करत संगीत ही सर्व कलांची पायाभूत शक्ती असल्याचे सांगितले. संगीतामुळे मानसिक ताण कमी होतो, दुःखात दिलासा मिळतो तसेच आरोग्य सुधारण्यास मदत होते, असे ते म्हणाले. मुलांमध्ये संगीताची आवड निर्माण व्हावी या हेतूने आयोजित शिबिर यशस्वी ठरेल, असा विश्वास त्यांनी व्यक्त केला.

भजन सम्राट शंकर पाटील यांनी संगीतामुळे मुलांचा सर्वांगीण विकास होत असल्याचे सांगून पालकांनी मुलांचा शिबिरात सहभाग नोंदवावा, असे आवाहन केले.

प्रास्ताविकात सौ. चंद्रज्योती देसाई यांनी पाहुण्यांचा परिचय करून देत शिबिराचा उद्देश स्पष्ट केला. श्री. किशोर काकडे यांनी खास शैलीत कार्यक्रमाचे सूत्रसंचालन केले व आभार मानले. कार्यक्रमास शिबिरातील विद्यार्थी, पालक आणि संगीतप्रेमी मोठ्या संख्येने उपस्थित होते.

The post ‘हसत-खेळत’ संगीत शिबिराचा थाटात शुभारंभ appeared first on News 24 Tass Marathi.

बेळगाव : मुलांमधील सांगीतिक कौशल्याला वाव देण्यासाठी सौ. चंद्रज्योती देसाई यांच्या वतीने ‘हसत-खेळत संगीत शिबीर’ आयोजित करण्यात आले आहे. या शिबिराचा भव्य शुभारंभ सोहळा बुधवार, दिनांक १ एप्रिल २०२६ रोजी सायंकाळी ठीक ५ वाजता संपन्न होणार आहे.

जी. जी. चिटणीस इंग्लिश मीडियम हायस्कूल येथे आयोजित या उद्घाटन सोहळ्याला विख्यात व्यंगचित्रकार श्री. जगदीश कुंटे, भजन सम्राट आणि महाराष्ट्र भूषण श्री. शंकर पाटील, जी. जी. चिटणीस शाळेच्या प्राचार्या श्रीमती नविना शेट्टीगार आणि ज्ञानप्रबोधन शाळेच्या प्राचार्या सौ. मंजिरी रानडे हे प्रमुख पाहुणे म्हणून उपस्थित राहणार आहेत.

संगीतासारख्या विषयाची गोडी मुलांमध्ये निर्माण व्हावी आणि त्यांनी आनंदी वातावरणात कला आत्मसात करावी, या उद्देशाने या शिबिराचे आयोजन करण्यात आले आहे. या उपक्रमाचे सर्वत्र कौतुक होत असून, उद्घाटन सोहळ्याला मोठ्या संख्येने उपस्थित राहण्याचे आवाहन आयोजक सौ. चंद्रज्योती देसाई यांनी केले आहे.

The post ‘हसत-खेळत’ संगीत शिबीराचा शुभारंभ सोहळा बुधवारी appeared first on News 24 Tass Marathi.

टिळकवाडी, बेळगाव येथील संस्कृती एज्युकेअर संस्थेतर्फे ११ वर्षांवरील मुलांसाठी स्वयं-विकास शिबिराचे आयोजन २ एप्रिल २०२६ पासून करण्यात आले आहे. सदर शिबिर पंचवटी प्लाझा देशमुख रोड टिळकवाडी बेळगाव येथे दि. २ एप्रिल ते १६ एप्रिल आणि दि. १ मे ते १५ मे या कालावधीत दोन बॅचेसमध्ये घेतले जाणार आहे.

दररोज सकाळी १० ते दुपारी २ वाजेपर्यंत शिबिर घेतले जाईल. शिबिराचे केंद्रित विषय नैतिक मूल्ये, सामाजिक वर्तन, सांघिक कार्य, कौशल्य व व्यक्तिमत्व विकास, संवाद कौशल्य, सकारात्मक विचार, भावनांचे व्यवस्थापन, आर्थिक साक्षरता, सार्वजनिक भाषण, ध्यान, नकार पचवणे, विशेष सहली, खेळ व मनोरंजक उपक्रम, संगीतोपचार अशा विषयांवर असतील.

शिबिराच्या समारोपावर मुलांसाठी विशेष भेटवस्तू तसेच सर्व सहभागींसाठी दुपारचे जेवण दिले जाईल. पालकांनी आपल्या मुलांना या शिबिराचा लाभ घेण्यास प्रोत्साहित करावे, असे आवाहन मानसशास्त्रज्ञ आणि मार्गदर्शक तेजस कोळेकर यांनी केले आहे. अधिक माहितीसाठी ९९१६८३५५५० किंवा ६३६००८४२८६ क्रमांकावर संपर्क साधता येईल.

The post संस्कृती एज्युकेअरतर्फे २ एप्रिलपासून मुलांसाठी स्वयं-विकास शिबिर appeared first on News 24 Tass Marathi.

बेळगाव : शहरातील प्रसिद्ध गायिका, हार्मोनियम वादक आणि संगीत शिक्षिका सौ. चंद्रज्योती देसाई यांच्यावतीने दरवर्षीप्रमाणे यंदाही ‘हसत खेळत संगीत शिबिर’ या विशेष उन्हाळी शिबिराचे आयोजन करण्यात आले आहे. गेल्या दहा वर्षांपासून या शिबिराच्या माध्यमातून लहान मुलांमध्ये संगीताची आवड निर्माण करत त्यांच्यावर संस्कार करण्याचे कार्य सातत्याने सुरू आहे. आतापर्यंत सुमारे १००० हून अधिक मुलांना त्यांनी सहज, सोप्या आणि खेळकर पद्धतीने संगीताचे प्राथमिक धडे दिले आहेत.

यंदाचे दहावे ‘हसत खेळत संगीत शिबिर’ १ एप्रिल ते २१ एप्रिल २०२६ या कालावधीत चिटणीस इंग्लिश मिडीयम स्कूल येथे दररोज सायंकाळी ३ ते ६ या वेळेत आयोजित करण्यात येणार आहे. विशेष म्हणजे, यावर्षी ‘वंदे मातरम्’च्या शतकोत्तर सुवर्णमहोत्सवी वर्षानिमित्त शिबिरार्थींना विविध गाण्यांसोबत ‘वंदे मातरम्’ची सर्व पाच कडवी शिकवून त्याचा जाहीर कार्यक्रम सादर करण्याचा संकल्प आयोजकांनी केला आहे.

या शिबिरात मुलांना संगीताचे प्राथमिक शिक्षण, ताल-लय, गाणी आणि सादरीकरणाची संधी अशा विविध अंगांनी मार्गदर्शन केले जाणार आहे. त्यामुळे मुलांच्या सर्वांगीण विकासासाठी हे शिबिर उपयुक्त ठरणार आहे.

आपल्या मुलांना संगीताची गोडी लागावी आणि त्यांचा आत्मविश्वास वाढावा, यासाठी पालकांनी या शिबिरात जास्तीत जास्त सहभाग नोंदवावा, असे आवाहन संयोजिका सौ. चंद्रज्योती देसाई यांनी केले आहे. इच्छुकांनी दिलेल्या व्हॉट्सअॅप लिंकवर क्लिक करून शिबिराच्या गटात सहभागी व्हावे, असेही त्यांनी नमूद केले आहे.

The post बेळगावात १ ते २१ एप्रिल दरम्यान ‘हसत खेळत’ उन्हाळी संगीत शिबीर appeared first on News 24 Tass Marathi.

बेळगाव : विद्यार्थ्यांच्या सुप्त गुणांना वाव मिळावा आणि उन्हाळ्याच्या सुट्टीत त्यांच्या व्यक्तिमत्वाचा सर्वांगीण विकास व्हावा, या उद्देशाने दक्षिण महाराष्ट्र शिक्षण मंडळ संचलित, ज्योती सेंट्रल स्कूल, कॅम्प बेळगाव येथे ‘समर कॅम्प’चे अत्यंत उत्साहात आयोजन करण्यात आले आहे.

या शिबिराच्या यशस्वी आयोजनासाठी एसएमसी कमिटीचे सदस्य अरविंद संगोळ्ळी यांचे विशेष सहकार्य व मोलाचे मार्गदर्शन लाभले आहे. शाळेच्या मुख्याध्यापिका श्रीमती सोनाली कंग्राळकर यांच्या नियोजनाखाली हे शिबिर प्रगतीपथावर आहे.

यंदाच्या शिबिरात हॉर्स रायडिंग हे मुख्य आकर्षण ठरत असून, घोड्यावर स्वार होऊन रपेट मारताना विद्यार्थ्यांमध्ये कमालीचा उत्साह पाहायला मिळत आहे. या साहसी खेळामुळे मुलांमध्ये आत्मविश्वास आणि शिस्त निर्माण होत आहे. तसेच, वाढत्या उन्हाच्या पार्श्वभूमीवर स्विमिंग या उपक्रमाचाही विद्यार्थी मनमुराद आनंद लुटत आहेत.

केवळ खेळच नव्हे, तर मुलांच्या बौद्धिक आणि शारीरिक विकासासाठी योगासने, तायक्वांदो, संगीत, नृत्य आणि आर्ट अँड क्राफ्ट यांसारख्या विविध उपक्रमांचा यात समावेश आहे. विद्यार्थ्यांचा अभ्यासाचा पाया मजबूत करण्यासाठी ‘बेसिक क्लासेस’चेही आयोजन करण्यात आले आहे.

शाळेने घेतलेल्या या स्तुत्य उपक्रमाचे पालकांनी विशेष कौतुक केले असून, मुलांच्या आरोग्यासाठी आणि व्यक्तिमत्व विकासासाठी हे शिबिर अत्यंत लाभदायक ठरत असल्याचे मत व्यक्त केले आहे. हे शिबिर २४ मार्चपर्यंत सुरू राहणार असून, शाळेतील शिक्षक आणि कर्मचारी वर्ग शिबिर यशस्वी करण्यासाठी विशेष परिश्रम घेत आहेत.

The post ज्योती सेंट्रल स्कूलमध्ये ‘समर कॅम्प’चा जल्लोष appeared first on News 24 Tass Marathi.