कौटुंबिक वादाला कंटाळून एका तरुणाने किल्ला तलावात उडी घेत आत्महत्या केल्याची धक्कादायक घटना शुक्रवारी सकाळी उघडकीस आली. दोन दिवसांपासून बेपत्ता असलेला हा तरुण मृतावस्थेत आढळल्याने परिसरात हळहळ व्यक्त होत आहे.

सुभाष हलगेकर (वय ३२, रा. घाडी कॉलनी, शहापूर) असे मृत तरुणाचे नाव असून तो बेळगाव महापालिकेत पौरकार्मिक म्हणून कार्यरत होता. अलीकडेच तो नोकरीत कायम झाला होता. मात्र वैवाहिक आयुष्यातील सततच्या वादामुळे तो मानसिक तणावात असल्याची माहिती समोर आली आहे.

घरातील वारंवार भांडणांमुळे त्याची पत्नी माहेरी गेली होती. त्यानंतर सुभाष दोन दिवसांपासून बेपत्ता होता. याबाबत शहापूर पोलीस स्थानकात तक्रारही नोंदविण्यात आली होती.

दरम्यान, शुक्रवारी सकाळी किल्ला तलावात एक मृतदेह तरंगताना आढळून आला. माहिती मिळताच पोलिसांनी घटनास्थळी धाव घेतली. मार्केट पोलीस स्थानकाच्या हद्दीत घडलेल्या या घटनेनंतर सामाजिक कार्यकर्ते अवधूत तुडवेकर, पद्मप्रसाद हुली, शशिकांत आंबेवाडीकर, मायकल पिंटो, राजू टक्केकर आणि अग्निशामक दलाच्या जवानांच्या मदतीने मृतदेह बाहेर काढून पंचनामा करण्यात आला. घटनास्थळी बघ्यांची मोठी गर्दी झाली होती. मृतदेह उत्तरीय तपासणीसाठी सिव्हिल रुग्णालयात पाठविण्यात आला असून या प्रकरणी पोलिसांत गुन्हा नोंद करण्यात आला आहे. पुढील तपास सुरू आहे.

The post कौटुंबिक वादाला कंटाळून तरुणाची किल्ला तलावात आत्महत्या appeared first on News 24 Tass Marathi.

बैलहोंगल / वार्ताहर

बेळगाव जिल्ह्यातील बैलहोंगल तालुक्यातील अनिगोळ गावात मायक्रोफायनान्स कर्जाच्या छळाला कंटाळून एका विवाहित महिलेने आत्महत्या केल्याची हृदयद्रावक घटना घडली आहे.आत्महत्ये पूर्वी तिने घराच्या भिंतीवर डेथनोट लिहल्याची माहिती प्राप्त झाली आहे. भिंतीवर लिहिलेल्या या डेथनोटमुळे या प्रकरणाचे गांभीर्य आणखी वाढले आहे. डेथनोटमध्ये तिने काही व्यक्तींना आपल्या मृत्यूस जबाबदार धरल्याचे समजते.

आत्महत्या करणाऱ्या महिलेचे नाव गौरव्वा निलप्पा केंगानूर (वय ३६) असे आहे. कुटुंबाच्या उदरनिर्वाहासाठी विविध मायक्रोफायनान्स संस्थांकडून सुमारे ७ ते १० लाख रुपयांचे कर्ज घेतले होते. मात्र कर्जफेडीसाठी संबंधित कर्मचाऱ्यांकडून सातत्याने दबाव व त्रास होत असल्याचे कुटुंबीयांनी सांगितले. हा मानसिक ताण सहन न झाल्याने गौरवने टोकाचे पाऊल उचलल्याची माहिती आहे.

मृत्युपत्रात तिने सुमव्वा, मंजप्पा आणि कस्तुरी यांची नावे घेत आपल्या मृत्यूसाठी जबाबदार असल्याचा आरोप केला आहे. तसेच आपल्या मुलांच्या शिक्षण व भवितव्याबाबत शेवटची इच्छा व्यक्त केली आहे.

या प्रकरणी बैलहोंगल पोलीस ठाण्यात गुन्हा दाखल करण्यात आला असून, अधिक तपास सुरू आहे. घटनेनंतर मृताच्या कुटुंबावर दुःखाचा डोंगर कोसळला आहे.

The post मायक्रोफायनान्सच्या छळामुळे डेथनोट लिहून महिलेची आत्महत्या appeared first on News 24 Tass Marathi.

कौटुंबिक वादातून पत्नीची निर्घृण हत्या केल्यानंतर पतीने आत्महत्या केली. बेळगाव जिल्ह्यातील कित्तूर पोलिस स्थानकाच्या हद्दीत ही धक्कादायक घटना
घडली. या घटनेनंतर परिसरात खळबळ उडाली आहे.

याबाबत घटनास्थळावरून प्राप्त माहितीनुसार, यल्लव्वा या महिलेच्या आईचे निधन होऊन अवघा आठवडा झाला होता. धार्मिक विधींसाठी ती माहेरी जाण्याच्या तयारीत होती. मात्र, पती शिवप्पा याने तिला घरी जाऊ नये, असा आग्रह धरल्याने दोघांत किरकोळ वाद झाला. हा वाद तीव्र झाल्यानंतर शिवप्पाने कुऱ्हाडीने यल्लव्वाच्या मानेवर व पाठीवर वार केले. गंभीर जखमांमुळे यल्लव्वाचा जागीच मृत्यू झाला.

पत्नीचा मृत्यू झाल्यानंतर शिवप्पानेही घरातच गळफास लावून आत्महत्या केली. घटनेची माहिती मिळताच कित्तूर पोलिसांनी घटनास्थळी भेट देऊन पंचनामा केला असून पुढील तपास सुरू आहे.

The post कौटुंबिक वादातून पत्नीची हत्या करून पतीची आत्महत्या appeared first on News 24 Tass Marathi.

पाटील गल्ली, रामघाट रोड, गणेशपूर येथील एका महिलेने विहिरीत उडी टाकून आत्महत्या केल्याची घटना रविवारी घडली. कॅम्प पोलीस स्थानकात या घटनेची नोंद अलका पाटील झाली आहे. पोलीस पुढील तपास करीत आहेत.

अलका बसवंत पाटील (वय ५०) असे तिचे नाव आहे. मानसिक अस्वस्थपणामुळे या महिलेने आपले जीवन संपविल्याचे सांगण्यात आले. आरोग्य समस्या व मुलींचे लग्न कसे करायचे? या विचारातून आलेल्या ताणतणावामुळे रविवार दि. २१ डिसेंबर रोजी पहाटे जवळच असलेल्या शेतवडीतील विहिरीत उडी टाकून आपले जीवन संपविले आहे.

घटनेची माहिती समजताच कॅम्पचे पोलीस उपनिरीक्षक जे. एस. मुल्ला व त्यांच्या सहकाऱ्यांनी घटनास्थळी भेट देऊन पंचनामा केला. एचईआरएफ रेस्क्यू पथकाचे प्रमुख बसवराज हिरेमठ, अभिषेक यळ्ळूरकर व त्यांच्या सहकाऱ्यांनाही पाचारण करण्यात आले. केवळ १५ ते २० मिनिटात विहिरीतून मृतदेह बाहेर काढण्यात आला. सिव्हिल हॉस्पिटलमधील शवागारात उत्तरीय तपासणी करून मृतदेह नातेवाईकांच्या ताब्यात देण्यात आला.

The post गणेशपूर येथील महिलेची विहिरीत उडी टाकून आत्महत्या appeared first on News 24 Tass Marathi.

अथणी / वार्ताहर

अथणी तालुक्यातील तमवशी गावात कर्जबाजारी झालेल्या एका तरुण शेतकऱ्याने आत्महत्या केल्याने हळहळ व्यक्त होत आहे.

कांतेश पांडू कुंभार (वय ३५ रा. तमवशी, ता. अथणी) असे मृत शेतकऱ्याचे नाव आहे. गावाबाहेरील कुंभार बाग परिसरात गणेश मंदिराजवळील कडुलिंबाच्या झाडाला गळफास घेऊन त्यांनी आत्महत्या केली, अशी प्राथमिक माहिती पोलिसांनी दिली आहे.

कांतेश गेल्या अनेक महिन्यांपासून प्रचंड कर्जामुळे मानसिक तणावाखाली होता. राष्ट्रीयकृत आणि सहकारी बँकांसह विविध वित्तसंस्थांकडून सुमारे पंधरा लाख रुपयांचे कर्ज त्याच्या नावावर होते, असे त्याच्या नातेवाईकांनी सांगितले.

या घटनेने संपूर्ण गावावर शोककळा पसरली आहे. मृत कांतेशच्या पश्चात पत्नी व तीन कन्या असा परिवार आहे. अचानक कुटुंबाचा आधार गमावलेल्या पत्नीने मुलांच्या भवितव्यासाठी सरकारकडून मदतीची मागणी केली आहे. या प्रकरणी अथणी पोलीस स्थानकात नोंद करण्यात आली असून पुढील तपास सुरु आहे.

The post तमवशीत कर्जबाजारी शेतकऱ्याची गळफास घेऊन आत्महत्या appeared first on News 24 Tass Marathi.

बेळगाव सदाशिवनगर येथील डॉ. बी. आर. आंबेडकर शासकीय मॅट्रिकोत्तर मुलींच्या वसतिगृहात एका नर्सिंग विद्यार्थिनीने गळफास घेऊन आत्महत्या केल्याची धक्कादायक घटना आज सकाळी उघडकीस आली.

सुमित्रा गोकाक (वय १९, रा. मूळ गाव – विजयपूर) असे मृत तरुणीचे नाव असे आहे. मिळालेल्या माहितीनुसार सकाळी नाश्ता करून ती आपल्या खोलीत गेली. दरवाजा आतून बंद करून तिने गळफास घेतला. बराच वेळ दरवाजा न उघडल्याने मैत्रिणींनी दरवाजा तोडून पाहिले असता ही घटना समोर आली.

घटनेची माहिती मिळताच एपीएमसी पोलीस स्थानकाचे अधिकारी तात्काळ वसतिगृहात दाखल झाले व पंचनामा करून तपास सुरू केला.

या घटनेसंदर्भात समाज कल्याण विभागाचे सह-संचालक रामनगौडा कन्नोळी म्हणाले, “सुमित्रा अवघ्या वीस दिवसांपूर्वी वसतिगृहात दाखल झाली होती. आज सकाळी ती सर्वांशी नेहमीप्रमाणे बोलली होती. त्यानंतर दरवाजा उघडत नसल्याने मैत्रिणींना संशय आला. दरवाजा उघडल्यावर तिचा मृतदेह आढळला. पोलिसांनी सीसीटीव्ही तपासणीला सुरुवात केली आहे. तपासानंतरच कारण स्पष्ट होईल.”

या घटनेमुळे परिसरात मोठी खळबळ उडाली असून, पोलिसांचा पुढील तपास सुरू आहे.

The post बेळगावच्या शासकीय वसतिगृहात नर्सिंग विद्यार्थिनीची आत्महत्या appeared first on News 24 Tass Marathi.