बेळगाव : बेळगावशहरातील शिवजयंती उत्सव आणि भव्य चित्ररथ मिरवणूक यंदा उत्साहात आणि पूर्णतः शांततेत पार पडली. या यशामागे अनेकांचे योगदान असून, त्यामध्ये शिवजयंती मंडळ आणि प्रशासनात समन्वय साधणारे विकास आर. कलघटगी यांची भूमिका विशेष ठरली आहे. त्यांच्या या कार्याची दखल घेत पोलीस विभागाने त्यांचे कौतुक करत प्रशंसापत्र प्रदान केले आहे.

२१ एप्रिल २०२६ च्या सायंकाळपासून २२ एप्रिल रोजी सकाळी ६ वाजेपर्यंत शहरात विविध ठिकाणी मिरवणुका आणि सांस्कृतिक कार्यक्रम मोठ्या उत्साहात पार पडले. या कालावधीत कोणतीही अनुचित घटना घडू नये यासाठी प्रशासन आणि नागरिकांनी समन्वय साधला.

विशेषतः स्थानिक परिस्थितीबाबत वेळोवेळी सूचना व मार्गदर्शन करून विकास कलघटगी यांनी पोलीस यंत्रणेला मोलाचे सहकार्य केले. पोलिस आयुक्त बोरसे यांनी कलघटगी यांना यावेळी प्रशस्तीपत्र पुस्तिका देऊन गौरव केला आहे. यापूर्वीही गणेशोत्सव काळात त्यांनी अशाच प्रकारे सहकार्य केल्याचे नमूद करत पोलीस आयुक्त बोरसे भूषण गुलाबराव (आयपीएस) यांनी त्यांच्या समाजाभिमुख कार्याचे कौतुक केले आहे. तसेच पुढील काळातही असेच सहकार्य मिळेल, अशी अपेक्षाही व्यक्त करण्यात आली आहे.

The post विकास कलघटगी यांचे पोलीस विभागाकडून कौतुक appeared first on News 24 Tass Marathi.

नगरसेवक रवी साळुंके व माजी नगरसेवक मनोहर हलगेकर यांच्या नेतृत्वाखालील शिष्टमंडळाने गुरुवारी सकाळी पोलीस आयुक्तालयात भेट देत पोलीस आयुक्त भूषण गुलाबराव बोरसे यांना मानाची शाल व पुष्पगुच्छ देऊन सन्मानित केले. मिरवणूक शांततेत पार पाडण्यासाठी प्रशासनाने केलेल्या नियोजनाबद्दल यावेळी त्यांचे आभार मानण्यात आले.

त्यानंतर कायदा व सुव्यवस्था विभागाचे पोलीस उपायुक्त नारायण बरमनी यांचाही शाल व पुष्पगुच्छ देऊन सत्कार करण्यात आला. यंदाची तब्बल १३ तास चाललेली मिरवणूक शिस्तबद्ध पद्धतीने पार पडण्यासाठी पोलीस प्रशासनाने महिनाभरापासून नियोजनबद्ध बैठका घेत जनजागृती केली होती. त्याचा सकारात्मक परिणाम मिरवणुकीत दिसून आला, अशी भावना व्यक्त करण्यात आली. गेल्या १०७ वर्षांची परंपरा कायम ठेवत यंदाही मिरवणूक उत्साहात आणि शांततेत पार पडली असून यासाठी पोलीस, महानगरपालिका व इतर विभागांचे उत्तम सहकार्य लाभल्याचे नगरसेवक रवी साळुंके यांनी सांगितले.

यावर्षी प्रथमच डॉल्बीमुक्त शिवजयंती साजरी झाल्याने मिरवणुकीत सकारात्मक बदल जाणवला. कोणताही अनुचित प्रकार न घडता संपूर्ण मिरवणूक सुरळीत पार पडली. मंडळांना शिस्त लावण्याचे काम पोलीस आयुक्तांनी कौशल्याने केले, अशी प्रतिक्रिया मनोहर हलगेकर यांनी व्यक्त केली. याप्रसंगी राजू सावंत, अनंत बिर्जे, जोतिबा शहापूरकर, प्रसाद मुतगेकर यांसह अनेक कार्यकर्ते उपस्थित होते.

The post शिवजयंती मिरवणूक शांततेत पार पाडल्याबद्दल पोलीस आयुक्त – उपायुक्तांचा सत्कार appeared first on News 24 Tass Marathi.

बेळगावची शिवजयंती मिरवणूक अनेक तास चालणारी असल्याने, उन्हाळ्यात शिवभक्तांची होणारी गैरसोय लक्षात घेऊन युवा सेनेने हुतात्मा चौक परिसरात विशेष काउंटर उभारला. येथे थंडगार ताक तसेच पुलावाचे वाटप करण्यात आले. या उपक्रमाचा सुमारे ३००० हून अधिक शिवभक्तांनी लाभ घेतला.

गेल्या काही वर्षांपासून युवा सेना बेळगावतर्फे मिरवणुकीदरम्यान शीतपेय वाटपाचा उपक्रम सातत्याने राबवला जात असून, यंदाही मोठ्या प्रमाणावर प्रतिसाद मिळाला. मिरवणूक पाहण्यासाठी आलेल्या नागरिकांसह कार्यकर्त्यांनाही या उपक्रमामुळे दिलासा मिळाला.

हा उपक्रम यशस्वी करण्यासाठी युवा सेना बेळगावचे विनायक हुलजी, मल्हारी पावशे, वैभव कामत, श्वेत तवनशेट्टी, संदेश तवनशेट्टी, विजय मोहिते, अद्वैत चव्हाण-पाटील, ओमकार बैलूरकर, श्रेय मिठारी, सक्षम कंग्राळकर, निलेश पाटील, अथर्व जाधव, विद्येश बडसकर, सुरज तेली, प्रज्वल मुद्दापुरे, स्वयं कपिलेश्वरी, आदित्य गावडे, साई नायडू यांच्यासह अनेक कार्यकर्त्यांनी परिश्रम घेतले. शिवभक्तांनी या उपक्रमाचे कौतुक करत समाधान व्यक्त केले.

The post युवासेना बेळगावतर्फे शिवजयंती मिरवणुकीत शीतपेय – अल्पोपाहाराचे वाटप appeared first on News 24 Tass Marathi.

मिरवणूक राणी कित्तूर चन्नम्मा सर्कल, काकतीवेस, कॉलेज रोड, पिंपळकट्टा आदी मार्गांवरून पुढे जात नरगुंदकर भावे चौक, मारुती गल्ली, हुतात्मा चौक, रामदेव गल्ली, समादेवी गल्ली, धर्मवीर संभाजी चौक, रामलिंगखिंड गल्ली, सम्राट अशोक चौक, टिळक चौक, हेमू कलानी चौक, शनिमंदिरमार्गे कपिलेश्वर उड्डाणपुलाजवळ कपिलेश्वर मंदिर येथे संपन्न होणार आहे.

दरम्यान, किल्ला तलाव, अशोक स्तंभ सर्कल, आरटीओ सर्कलहून राणी चन्नम्मा सर्कलकडे जाणारी वाहतूक संगोळ्ळी रायण्णा सर्कलपासून एसपी ऑफिसमार्गे कोल्हापूर सर्कल, सदाशिवनगर, लक्ष्मी कॉम्प्लेक्स, विश्वेश्वरय्यानगर, गांधी सर्कल (अरगन तलाव), शौर्य चौक, केंद्रीय विद्यालय क्र. २, शरकत पार्क, ग्लोब थिएटर सर्कलमार्गे खानापूर रोडकडे वळविण्यात आली आहे.

खानापूरहून काँग्रेस रोडमार्गे शहरात येणारी तसेच रेल्वे उड्डाणपुलावरून येणारी वाहने ग्लोब थिएटर सर्कलमार्गे गवळी गल्ली क्रॉस, शरकत पार्क, गांधी सर्कल, हिंडलगा गणेश मंदिर, हनुमाननगर डबल रोडवरून बॉक्साईट रोडकडे वळविण्यात येणार आहेत. गोगटे सर्कलहून स्टेशन रोड, हेडपोस्ट ऑफिस, शनिमंदिरकडे जाणारी वाहतूक गोवावेस सर्कल, नाथ पै सर्कल, खासबाग बसवेश्वर सर्कल, संभाजी गल्लीमार्गे वळविण्यात येणार आहे.

नाथ पै सर्कलहून कपिलेश्वर उड्डाणपुलाकडे जाणारी वाहतूक खासबाग बसवेश्वर सर्कल व संभाजी गल्लीमार्गे वळविली जाणार आहे. तसेच जिजामाता सर्कलहून देशपांडे पेट्रोलपंप, नरगुंदकर भावे चौकमार्गे जाणारी वाहतूक थेट मध्यवर्ती बसस्थानक किंवा जुन्या पी. बी. रोडकडे वळविण्यात येणार आहे.

जुना पी. बी. रोड, यश हॉस्पिटल, महाद्वार रोडमार्गे कपिलेश्वर मंदिराकडे जाणारी वाहतूक डाव्या बाजूने वळवून व्हीआरएल लॉजिस्टिकमार्गे पुन्हा जुन्या पी. बी. रोडवर नेण्यात येणार आहे. गुड्सशेड रोडमार्गे येणारी वाहतूक मराठा मंदिर व गोवावेस सर्कलकडे वळविण्यात येणार आहे.

मिरवणूक मार्गावर जिथे डबल रोड आहे, तेथे एक बाजू पूर्णपणे मिरवणुकीसाठी राखीव ठेवण्यात येणार आहे. हे बदल मंगळवारी दुपारी २ वाजल्यापासून बुधवारी मिरवणूक संपेपर्यंत लागू राहणार आहेत.

• वाहने उभी करण्यास प्रतिबंध :

वाहन पार्किंगवरही निर्बंध घालण्यात आले असून राणी चन्नम्मा सर्कलपासून काकतीवेस, गणपत गल्ली, कपिलेश्वर मंदिर परिसर, हॅवलॉक रोड, कॅटल रोड, यंदे खूट सिग्नल ते कॉलेज रोडपर्यंत मिरवणूक संपेपर्यंत वाहन उभे करण्यास बंदी असेल. पार्किंगसाठी महिला पोलीस ठाण्याच्या पाठीमागील जागा तसेच संभाजी उद्यान परिसर येथे व्यवस्था करण्यात आली आहे.

The post शिवजयंती मिरवणुकीनिमित्त आज बेळगावातील वाहतूक मार्गात बदल appeared first on News 24 Tass Marathi.

बेळगाव : बेळगावात आज मंगळवारी पारंपारिक शिवजयंती मिरवणूक संपन्न होत आहे. या पार्श्वभूमीवर कायदा व सुव्यवस्था अबाधित राखण्यासाठी तसेच मिरवणूक सुरळीत पार पाडण्यासाठी पोलीस प्रशासनाने व्यापक नियोजन केले आहे. जनतेच्या सुरक्षेसाठी शहरात तब्बल २२०० पोलिसांचा बंदोबस्त तैनात करण्यात आला आहे, अशी माहिती पोलीस आयुक्त भूषण बोरसे यांनी दिली. तसेच शिवाजी जयंती सोहळ्याचा एक भाग म्हणून, विविध जिल्ह्यांतून आलेल्या पोलीस अधिकारी आणि कर्मचाऱ्यांना त्यांनी बंदोबस्ताबाबत योग्य मार्गदर्शन केले.

मिरवणुकीच्या पार्श्वभूमीवर अधिक माहिती देताना पोलीस आयुक्त बोरसे म्हणाले, शहरातील प्रमुख मार्गांवरून मिरवणूक काढण्यात येणार असल्याने वाहतूक व्यवस्थेत बदल करण्यात आले आहेत. गर्दीच्या ठिकाणी विशेष लक्ष ठेवण्यात येणार आहे. संवेदनशील भागात पोलीस तैनात करण्यात आले आहेत.वरिष्ठ अधिकाऱ्यांच्या मार्गदर्शनाखाली विविध पथके वाहतूक विभाग, गुन्हे शाखा तसेच तणाव नियंत्रण पथके सज्ज ठेवण्यात आले आहेत.

मिरवणूक मार्गा बरोबरच शहरात कोणताही अनुचित प्रकार घटना घडू नये यासाठी पोलिसांकडून विशेष दक्षता घेतली जात आहे. मिरवणूक मार्ग व शहरातील विविध महत्त्वाचे चौक याठिकाणी एक हजार पेक्षा अधिक सीसीटीव्ही कॅमेरे बसविण्यात आले आहेत. याशिवाय दहा ड्रोनची नजर मिरवणुकीवर असणार आहे. तसेच १४ के एसआरपीच्या तुकड्या आणि आठ राखीव दलाच्या तुकड्या मिरवणुकीच्या मार्गावर तैनात करण्यात येणार आहेत. अन्य पोलीस ताफा मिळून एकूण २२०० पोलीस बंदोबस्तासाठी तैनात करण्यात आले आहेत.

मिरवणुकीच्या पार्श्वभूमीवर वाहतूक व्यवस्थेत बदल करण्यात आलेले आहेत.मिरवणूक शांततेत आणि उत्साहात पार पडण्यासाठी सर्वांनी सहकार्य करावे असे आवाहन नाही पोलीस आयुक्त बोरसे यांनी केले.

The post बेळगावात शिवजयंती चित्ररथ मिरवणुकीसाठी कडेकोट पोलीस बंदोबस्त appeared first on News 24 Tass Marathi.

बेळगाव : शिवजयंती उत्सवानिमित्त क्रांतीसिंह नाना पाटील चौक, चव्हाट गल्ली येथील शिवजयंती उत्सव मंडळातर्फे यंदा एक विशेष उपक्रम राबविण्यात येणार आहे. शिवभक्त व जनसामान्यांच्या मागणीनुसार, छत्रपती शिवरायांचा वैभवशाली सजीव देखावा यावर्षी एकाच ठिकाणी सादर करण्याचा निर्णय मंडळाने घेतला आहे.

मिरवणुकीदरम्यान फिरता देखावा सादर करण्याऐवजी, संयुक्त महाराष्ट्र चौक येथे हा देखावा सतत सादर केला जाणार आहे. मंगळवारी सायंकाळी सात वाजल्यापासून मिरवणूक संपेपर्यंत शिवरायांच्या इतिहासाचे जिवंत दर्शन घडवणारे देखावे येथे पाहायला मिळणार आहेत.

या उपक्रमामुळे शिवभक्तांना एकाच ठिकाणी शांततेत आणि सविस्तरपणे देखावे अनुभवता येणार असून, मोठ्या संख्येने उपस्थित राहून या उपक्रमाचा लाभ घ्यावा, असे आवाहन मंडळाच्या पदाधिकाऱ्यांनी केले आहे.

मंडळाचे अध्यक्ष अनंत बामणे, कार्याध्यक्ष सुनील जाधव, सरचिटणीस रोहन जाधव, उपाध्यक्ष भरत काळगे, चिटणीस मारुती सुतार, खजिनदार आकाश धुराजी, माजी अध्यक्ष मोहन किल्लेकर तसेच गल्लीतले पंच प्रताप मोहिते आणि उत्तम नाकाडी यांनी हे आवाहन केले आहे.

The post चव्हाट गल्ली शिवजयंती उत्सव मंडळाचा सजीव देखावा एकाच ठिकाणी सादर होणार appeared first on News 24 Tass Marathi.

बेळगाव : बेळगावात काल रविवार पासून पारंपरिक शिवजयंती उत्सवाला प्रारंभ झाला आहे. पारंपरिक शिवजयंती निमित्त,शहापूर गाडेमार्ग बिच्चू गल्ली येथील धर्मवीर श्री संभाजी युवक मंडळ व श्री शिवनेरी युवक मंडळाने शिवसंस्कृतीचा वारसा जपणाऱ्या आणि मराठ्यांच्या गौरवशाली शौर्याचा इतिहासाला उजाळा देणाऱ्या शिवकालीन युद्धकलेचा भव्य कार्यक्रम आयोजित केला होता.या कार्यक्रमाने पारंपरिक शस्त्रकला, मर्दानी खेळ,आणि शिवकालीन पराक्रमाचे जिवंत दर्शन घडवून मोठ्या संख्येने उपस्थितांच्या डोळ्यांचे पारणे फेडले.

कार्यक्रमाच्या प्रारंभी बेळगावचे पोलीस आयुक्त भूषण बोरसे यांच्या हस्ते छत्रपती शिवरायांच्या मूर्तीचे पूजन करण्यात आले यावेळी विविध क्षेत्रातील मान्यवरही व्यासपीठावर उपस्थित होते. कोल्हापूर येथील श्री खंडोबा वेताळ तालीम मंडळाच्यावतीने सादर करण्यात आलेल्या मर्दानी खेळांचा प्रारंभ लेझीम पथकाच्या निनादासह शिवरायांच्या आगमनाने झाला. त्यानंतर मर्दानी खेळ पथकातील 25 कसरतपटूंनी लाठी लाठी, लाठी कैची, सिंगल पट्टा,चौघांची कैची,शिवरायांची तलवार फेक, दोघांची तलवार लढत यामध्ये दोन तरुणींचा ही सहभाग अशा एकाहून एक चित्तधारक मर्दानी खेळांनी उपस्थितांची मने जिंकून घेतली.

मर्दानी खेळांच्या प्रात्यक्षिकांना शिवशाहीर मिलिंद सावंत यांच्या शिवचरित्रावर आधारित पोवाड्याच्या दमदार आवाजाची तसेच पारंपारिक वाद्यांची साथसंगत देणाऱ्या वाद्यवृंदांची सुरेल साथ लाभली. या कार्यक्रमात पथकाचे मुख्य वस्ताद आनंदराव ठोंबरे बाळासाहेब शिकलगार संगनायक किरण जाधव यांची समर्थ साथ लाभली.
पोलीस आयुक्त भूषण बोरसे यांनीही कलापथकाच्या मर्दानी खेळांचे कौतुक व्यक्त करताना, शिवजयंतीच्या निमित्ताने बिच्चू गल्ली मंडळाने आयोजित केलेल्या अनोख्या शिवचरित्रावर आधारित कार्यक्रमाबाबत समाधान व्यक्त केले‌. अशा कार्यक्रमांचे बेळगावातील इतर मंडळांनी ही अनुकरण करणे आवश्यक असल्याचे त्यांनी सांगितले.

या कार्यक्रमानंतर महाप्रसादाचे आयोजन करण्यात आले होते. मोठ्या संख्येने उपस्थित शिवभक्तांनी या ऐतिहासिक आणि प्रेरणादायी कार्यक्रमाचा आनंद घेतला.

The post शिवकालीन शौर्याच्या थराराने डोळ्यांचे पारणे फिटले ! appeared first on News 24 Tass Marathi.

शतकाहून अधिक वर्षाची वैभवशाली परंपरा असलेली बेळगाव ची शिवजयंती अक्षय त्रितियच्या मुहूर्तावर साजरी होते. या दिवशी अवघी शिवसृष्टी बेळगावच्या गल्लीबोळात, चौका-चौकात अवतरलेली दिसते, शिवरायांचा इतिहास घराघरात पोहचवा आणि बेळगांव सह सीमावासियांच्या मनात शिवाजी महाराजांप्रति जो आदर,आस्था आहे ते दाखवण्याच माध्यम ही शिवजयंती आहे, शिवरायांच्या शौर्याच, त्यागाच आणि स्वाभिमानाचं प्रतीक म्हणून ही शिवजयंती आम्ही मोठ्या उत्साहात साजरी करतो. प्रतिवर्षीप्रमाणे ही शिवजयंती आणि चित्ररथ मिरवणूक शांततेत कोणत्याही प्रकारचे गालबोट न लागता बेळगावकरांनी साजरी करावी असे आवाहन युवा समिती सीमाभागचे अध्यक्ष शुभम शेळके यांनी केले.

यावेळी कार्याध्यक्ष धनंजय पाटील, खजिनदार शिवाजी मंडोळकर, अशोक घगवे, सुरज जाधव, रमेश माळवी, मोतेश बारदेसकर यांच्यासह शिवभक्त मोठ्या संख्येने उपस्थित होते.

The post महाराष्ट्र एकीकरण युवा समिती सीमाभागच्या वतीने पारंपारिक शिवजयंती उत्साहात साजरी appeared first on News 24 Tass Marathi.

छत्रपती शिवाजी उद्यान येथे आज सकाळी ६ वाजता शिवजयंती चित्ररथ महामंडळातर्फे विधीपूर्वक पूजनाचा कार्यक्रम पार पडला. अग्रभागी तेजोमय शिवज्योत आणि छत्रपती शिवाजी महाराजांची भव्य मूर्ती हे या सोहळ्याचे मुख्य आकर्षण ठरले.

महाराजांच्या मूर्तीला दुग्धाभिषेक व जलाभिषेक भाजप नेते डॉ. रवी पाटील तसेच अध्यक्ष सुनील जाधव यांच्या हस्ते करण्यात आले, त्यानंतर सामूहिक आरती व प्रसाद वाटपाचा कार्यक्रम झाला.

दरम्यान, विविध दुर्गांवरून आणण्यात आलेली पवित्र शिवज्योत शहरात दाखल झाली असून, मावळ्यांच्या आगमनाने वातावरणात अधिकच उत्साह संचारला आहे. त्यांच्या स्वागतासाठी शिवभक्तांनी मोठी गर्दी केली होती.

शिवजयंतीनिमित्त सादर होणारे चित्ररथ व सजीव देखावे यासाठी कार्यकर्त्यांनी मोठ्या प्रमाणात मेहनत घेतली असून, हे देखावे भव्य-दिव्य स्वरूपात सादर होणार आहेत. मिरवणूक शांततेत व शिस्तीत पार पाडावी, असे आवाहन अध्यक्ष सुनील जाधव यांनी केले.

सरचिटणीस जे. बी. शहापूरकर यांनी छत्रपती शिवाजी महाराजांचा आदर्श युवकांनी अंगीकारावा असे प्रतिपादन केले आहे. यावेळी उपस्थित शिवजयंती चित्ररथ महामंडळाचे अध्यक्ष सुनील जाधव सरचिटणीस जे. बी. शहपूरकर, प्रसाद पाटील, विनायक बावडेकर, अरुण पाटील, संजय नाईक मारुती पाटील, विजय कुंटे भूषण पाटील, राम कुलकर्णी उमेश शिदोलकर यासह शिवभक्त मोठ्या संख्येने उपस्थित होते.

The post शिवजयंती चित्ररथ महामंडळातर्फे शिवजयंती उत्साहात साजरी appeared first on News 24 Tass Marathi.

बेळगाव : मध्यवर्ती सार्वजनिक श्री शिवजयंती उत्सव महामंडळ बेळगावतर्फे शहापूर येथील छत्रपती शिवाजी उद्यानात छत्रपती शिवाजी महाराजांची जयंती भक्तीभाव आणि उत्साहात साजरी करण्यात आली. यावेळी शिवरायांच्या सिंहासनारूढ मूर्तीचे विधिवत पूजन करून अभिषेक आणि पुष्पहार अर्पण करण्यात आला.

शिवजयंतीनिमित्त विविध गड-किल्ल्यांवरून आणलेल्या शिवज्योतींचे सकाळी धर्मवीर संभाजी चौक येथे स्वागत करण्यात आले. त्यानंतर या शिवज्योतींसह शिवभक्तांची मिरवणूक छत्रपती शिवाजी उद्यानात पोहोचली. उद्यानात आयोजित मुख्य कार्यक्रमात महाराजांच्या मूर्तीचे पूजन करून अभिवादन करण्यात आले. याप्रसंगी महामंडळाचे अध्यक्ष रमाकांत कोंडुसकर, मध्यवर्ती महाराष्ट्र एकीकरण समितीचे अध्यक्ष प्रकाश मरगाळे, भाजप नेते शंकरगौडा पाटील, किरण जाधव, ॲड. मुरुगेंद्रगौडा पाटील यांच्यासह मान्यवरांनी शिवरायांना पुष्पहार अर्पण केला. “छत्रपती शिवाजी महाराज की जय”, “जय भवानी जय शिवाजी”, “हर हर महादेव” अशा घोषणांनी परिसर दुमदुमून गेला.

उद्यानातील शिवरायांच्या मूर्तीचे रंगकाम मध्यवर्ती महामंडळाच्या वतीने पूर्ण करण्यात आले असून त्याचा सर्व खर्च रमाकांत कोंडुसकर यांनी उचलला आहे. बेळगावातील शिवजयंती उत्सवाला प्रारंभ झाला असून 21 एप्रिल रोजी होणाऱ्या भव्य चित्ररथ मिरवणुकीने या उत्सवाची सांगता होणार आहे. 60 ते 70 चित्ररथांच्या माध्यमातून छत्रपती शिवाजी महाराजांचा गौरवशाली इतिहास सादर केला जाणार असून ही मिरवणूक शिस्तबद्ध व शांततेत पार पडावी, असे आवाहन महामंडळाने केले आहे.

या कार्यक्रमास माजी नगरसेवक नेताजी जाधव, माजी उपमहापौर रेणू किल्लेकर, पोलीस उपायुक्त नारायण बरमनी, रमेश पावले, विकास कलघटगी यांच्यासह अनेक पदाधिकारी, शिवप्रेमी आणि नागरिक मोठ्या संख्येने उपस्थित होते.

The post बेळगावात मध्यवर्ती सार्वजनिक श्री शिवजयंती उत्सव महामंडळातर्फे शिवजयंती उत्साहात साजरी appeared first on News 24 Tass Marathi.