बेळगाव : दसरा आणि दिवाळीच्या पार्श्वभूमीवर मध्य रेल्वेतर्फे मुंबई-बेंगळुरू मार्गावर उत्सव स्पेशल रेल्वे सुरू करण्यात येणार आहे. छत्रपती शिवाजी महाराज टर्मिनस, मुंबई ते सर एम. विश्वेश्वरय्या टर्मिनल, बेंगळुरू अशी ही विशेष रेल्वे धावणार असून, बेळगावमधूनही तिची सेवा उपलब्ध राहणार आहे. त्यामुळे सणासुदीच्या काळात मुंबई आणि बेंगळुरूकडे प्रवास करणाऱ्या बेळगावातील प्रवाशांना सोयीचे होणार आहे.

मुंबई-बेंगळुरू उत्सव स्पेशल १० ऑक्टोबर ते २१ नोव्हेंबरदरम्यान धावणार आहे. मुंबईहून रात्री १२.३५ वाजता सुटणारी रेल्वे दुसऱ्या दिवशी रात्री ११.५५ वाजता बेंगळुरूला पोहोचेल. परतीच्या प्रवासात बेंगळुरूहून पहाटे ४.३० वाजता सुटणारी रेल्वे दुसऱ्या दिवशी पहाटे ४.०५ वाजता मुंबईला पोहोचणार आहे.

या विशेष रेल्वेच्या एकूण सात फेऱ्या होणार आहेत. मुंबईहून प्रत्येक शनिवारी, तर बेंगळुरूहून रविवारी ही रेल्वे धावणार आहे. या रेल्वेला दादर, ठाणे, कल्याण, लोणावळा, पुणे, लोणंद, सातारा, कराड, सांगली-मिरज, कुडची, रायबाग, घटप्रभा, बेळगाव, लोंढा, धारवाड, हुबळी, हावेरी, राणेबेन्नूर, हरिहर, दावणगेरी, बिरूर, अरसीकेरे आणि तुमकूर येथे थांबे देण्यात आले आहेत.

एकूण १८ डब्यांची ही विशेष रेल्वे असून, सणासुदीच्या काळातील प्रवाशांची वाढती गर्दी लक्षात घेता प्रवाशांनी या सेवेचा लाभ घ्यावा, असे आवाहन करण्यात आले आहे.

The post दसरा – दिवाळीसाठी मुंबई – बेंगळुरू मार्गावर विशेष रेल्वे appeared first on News 24 Tass Marathi.

बेळगाव : गणेशोत्सवाच्या पार्श्वभूमीवर नैऋत्य रेल्वेने बेंगळुरू – बेळगाव मार्गावर विशेष रेल्वेगाडी सुरू केली आहे. त्यामुळे बेंगळुरूहून बेळगावला येणाऱ्या तसेच बेळगावहून बेंगळुरूला जाणाऱ्या प्रवाशांना दिलासा मिळाला आहे. मात्र, मुंबई-बेळगाव मार्गावरही गणेशोत्सवासाठी प्रवाशांची मोठी गर्दी होत असताना अद्याप विशेष रेल्वे सुरू करण्यात आलेली नाही. त्यामुळे या मार्गावरही विशेष रेल्वेच्या काही फेऱ्या सुरू कराव्यात, अशी मागणी प्रवाशांतून होत आहे.

गणेशोत्सवासाठी मुंबई, ठाणे, नवी मुंबई आणि परिसरात नोकरी, व्यवसाय तसेच शिक्षणानिमित्त राहणारे बेळगाव व परिसरातील नागरिक मोठ्या संख्येने गावी परततात. त्यामुळे सणाच्या काळात मुंबई-बेळगाव मार्गावरील प्रवासी संख्या वाढते. सध्या नियमित रेल्वेगाड्यांना मोठी गर्दी होत असून आरक्षण मिळणेही कठीण झाले आहे. अनेक प्रवाशांना प्रतीक्षा यादीवर राहावे लागत आहे.

रेल्वेत आरक्षण न मिळाल्याने प्रवाशांना खासगी बस किंवा वाहनांचा आधार घ्यावा लागत आहे. मात्र, गणेशोत्सवाच्या काळात खासगी बसचे भाडे मोठ्या प्रमाणात वाढत असल्याने कुटुंबासह प्रवास करणाऱ्या नागरिकांवर अतिरिक्त आर्थिक भार पडत आहे.

रेल्वे प्रवास सुरक्षित, सोयीस्कर आणि तुलनेने कमी खर्चाचा असल्याने मुंबई-बेळगाव मार्गावरही गणेशोत्सवाच्या काळात विशेष रेल्वेच्या काही फेऱ्या सुरू कराव्यात, अशी मागणी प्रवाशांतून होत आहे.

The post मुंबई – बेळगाव मार्गावरही विशेष रेल्वे सुरू करा appeared first on News 24 Tass Marathi.

मुंबई : सांगली जिल्ह्यातील कुपवाड येथील केसरेकर दाम्पत्य दुहेरी हत्याकांडातील मुख्य आरोपीला कठोरात कठोर शिक्षा देण्यासह पीडित कुटुंबातील अनाथ मुलांना शासकीय मदत आणि कायदेशीर संरक्षण मिळावे, अशी मागणी समस्त मराठा समाज बेळगावच्या शिष्टमंडळाने महाराष्ट्राच्या उपमुख्यमंत्र्यांकडे केली. यासंदर्भात शिष्टमंडळाने मुंबईत उपमुख्यमंत्र्यांची भेट घेऊन मागण्यांचे निवेदन सादर केले.

मूळचे बेळगाव जिल्ह्यातील खानापूर तालुक्यातील हेब्बाळ गावचे रहिवासी असलेले मोहन नागाप्पा केसरेकर (वय ४५) आणि त्यांच्या पत्नी मनीषा मोहन केसरेकर (वय ३५) हे उदरनिर्वाहासाठी सांगली जिल्ह्यातील कुपवाड येथे स्थायिक झाले होते. १५ ऑगस्ट २०२६ रोजी कचरा टाकण्याच्या किरकोळ कारणावरून झालेल्या वादातून शेजारी राहणाऱ्या फरीद शेख याने त्यांच्यावर चाकू आणि हातोड्याने हल्ला केल्याचा आरोप आहे. या घटनेत मनीषा आणि मोहन केसरेकर यांचा उपचारादरम्यान मृत्यू झाला. त्यांच्या दोन लहान मुलांवर पालकांचे छत्र हरपल्याने त्यांच्यासमोर मोठे संकट उभे राहिले आहे.

या पार्श्वभूमीवर शिष्टमंडळाने संवेदनशील प्रकरणाचा जलदगतीने तपास करून आरोपीवर कठोर कारवाई करण्याची मागणी केली. या वेळी रमाकांत दादा कोंडुसकर, प्राचार्य आनंद आपटेकर, गुणवंत पाटील, सागर पाटील, मुकेश बारदेश, नंदू इंदलकर, गणेश कदम, कपिल भोसले, विनोद बिर्जे, निलेश मुदगेकर आणि विराज मोरकुंबे उपस्थित होते.

शिष्टमंडळाने उपमुख्यमंत्र्यांकडे या प्रकरणासाठी विशेष सरकारी वकील नियुक्त करण्याची मागणी केली. तसेच खटला जलदगती न्यायालयात चालवून कायद्यानुसार आरोपीला कठोरातील कठोर शिक्षा मिळावी, अशी मागणी करण्यात आली.

प्रकरणाचा तपास विशेष तपास पथकाकडे (एसआयटी) सोपवून लवकरात लवकर दोषारोपपत्र दाखल करावे, अशीही मागणी करण्यात आली. याशिवाय पालक गमावलेल्या दोन्ही मुलांना राज्य सरकारने आर्थिक मदत द्यावी आणि त्यांच्या शिक्षण व भवितव्याची जबाबदारी स्वीकारावी, अशी विनंती निवेदनातून करण्यात आली.

मुख्य फिर्यादी, तिचा भाऊ आणि इतर प्रमुख साक्षीदारांच्या सुरक्षेचा प्रश्न लक्षात घेऊन त्यांना तातडीने पोलीस संरक्षण देण्यात यावे, अशी मागणीही शिष्टमंडळाने केली.

उपमुख्यमंत्र्यांनी निवेदनाची गांभीर्याने दखल घेत पीडित कुटुंबाला लवकर न्याय मिळवून देण्यासाठी आवश्यक कार्यवाही करण्याचे तसेच प्रकरण जलदगती न्यायालयात चालविण्याबाबत सकारात्मक आश्वासन दिल्याचे शिष्टमंडळाने सांगितले. केसरेकर कुटुंबीयांच्या पाठीशी समाज ठामपणे उभा असल्याचेही यावेळी स्पष्ट करण्यात आले.

The post कुपवाड दुहेरी हत्याकांडातील आरोपीला फाशी द्या appeared first on News 24 Tass Marathi.

बेळगाव : बेळगाव आणि मुंबईदरम्यान विमानाने प्रवास करणाऱ्या प्रवाशांसाठी महत्त्वाची बातमी आहे. स्टार एअरची बेळगाव-मुंबई विमानसेवा १७ ऑगस्टपासून तात्पुरती बंद होण्याची शक्यता आहे. सध्याच्या अधिकृत बुकिंग व्यवस्थेत १६ ऑगस्टपर्यंतच या मार्गावरील उड्डाणे उपलब्ध असून, १७ ऑगस्टपासून बुकिंग दिसत नाही. मात्र, २५ ऑक्टोबरपासून पुन्हा तिकिटांचे बुकिंग उपलब्ध असल्याने सेवा पुन्हा सुरू होण्याची शक्यता आहे.

बेळगाव विमानतळावरून मुंबईला जाण्यासाठी ही सेवा व्यापारी, उद्योजक, विद्यार्थी आणि विविध कामांसाठी प्रवास करणाऱ्या नागरिकांसाठी महत्त्वाची आहे. त्यामुळे अचानक बुकिंग बंद झाल्याने आगामी काळात मुंबईला जाण्याचे नियोजन करणाऱ्या प्रवाशांमध्ये संभ्रम निर्माण झाला आहे.

• २५ ऑक्टोबरपासून सकाळी विमानसेवा :

सध्याच्या बुकिंग वेळापत्रकानुसार, २५ ऑक्टोबरपासून बेळगावहून सकाळी ७.२० वाजता विमानाचे उड्डाण होऊन ते सकाळी ८.२५ वाजता मुंबईत पोहोचणार असल्याचे दिसत आहे. इकॉनॉमी क्लासचे प्रारंभिक भाडे सुमारे ६,४०० रुपये असल्याचे बुकिंग प्रणालीत दर्शविण्यात आले आहे.

• बेळगाव – अहमदाबाद सेवेतही बदल :

स्टार एअरच्या बेळगाव-अहमदाबाद विमानसेवेच्या वेळापत्रकातही बदल झाल्याचे दिसून येत आहे. २५ ऑक्टोबरपासून बेळगावहून सकाळी ७.४५ वाजता विमान सुटून सकाळी ९.२५ वाजता अहमदाबादला पोहोचणार असल्याचे बुकिंगमध्ये नमूद आहे. मात्र, २५ ऑक्टोबरपूर्वी या मार्गावरील बुकिंग सध्या उपलब्ध नसल्याचे दिसते.

• दोन महिन्यांहून अधिक काळ सेवा बंद राहणार?

सध्याच्या बुकिंग माहितीनुसार, १७ ऑगस्ट ते २४ ऑक्टोबर या कालावधीत बेळगाव-मुंबई विमानसेवा उपलब्ध राहणार नसल्याचे चित्र आहे. त्यामुळे या काळात मुंबईला जाणाऱ्या प्रवाशांना पर्यायी विमानसेवा तसेच रेल्वे किंवा बसचा पर्याय निवडावा लागू शकतो.

दरम्यान, २५ ऑक्टोबरपासून पुन्हा बुकिंग उपलब्ध असल्याने सेवा पूर्ववत होण्याची शक्यता आहे. मात्र, सेवा तात्पुरती बंद करण्यामागचे कारण आणि २५ ऑक्टोबरपासून ती निश्चितपणे सुरू होणार आहे का, याबाबत स्टार एअरकडून अधिकृत स्पष्टीकरण मिळणे अद्याप बाकी आहे.

The post बेळगाव – मुंबई विमानसेवेला तात्पुरती स्थगिती appeared first on News 24 Tass Marathi.

या भेटीत समितीचे अध्यक्ष शुभम शेळके, कार्याध्यक्ष धनंजय पाटील आणि सरचिटणीस मनोहर हुंदरे उपस्थित होते. सीमाप्रश्नाच्या ऐतिहासिक, कायदेशीर, सामाजिक आणि भविष्यातील रणनीतीसंदर्भात सविस्तर चर्चा झाली.

माजी आयएएस अधिकारी श्रीकांत देशपांडे यांनी महाराष्ट्र शासनाच्या सामान्य प्रशासन विभागाचे प्रधान सचिव आणि ‘सीमाप्रश्नाचे प्रधान सचिव’ (विशेष कक्ष) म्हणून महाराष्ट्र-कर्नाटक सीमावादावर अत्यंत महत्त्वपूर्ण आणि धोरणात्मक काम केले. त्यांच्या सोबत डॉ. दीपक पवार यांनी महाराष्ट्र शासनाच्या महाराष्ट्र-कर्नाटक सीमाप्रश्न कक्षाचे विशेष कार्य अधिकारी (OSD) म्हणून काम करताना सीमाभागातील मराठी भाषिक नागरिकांच्या प्रश्नांचा सखोल अभ्यास केला आहे. त्यांनी सीमावादाच्या कायदेशीर बाजू, राज्यघटनात्मक हक्क, भाषिक अस्मिता आणि सांस्कृतिक अस्तित्व या मुद्द्यांवर शासनाला महत्त्वपूर्ण मार्गदर्शन केले.

तसेच त्यांच्या ‘महाराष्ट्र-कर्नाटक सीमावाद : संघर्ष आणि संकल्प’ या संशोधनपर पुस्तकाचा आवर्जून उल्लेख केला पाहिजे. सीमालढ्याचा इतिहास, विविध टप्पे, न्यायालयीन प्रक्रिया, राजकीय घडामोडी आणि भविष्यातील दिशा यांचे दस्तऐवजीकरण करणाऱ्या या पुस्तकाला दक्षिण महाराष्ट्र साहित्य संघाचा ‘कृ. गो. सूर्यवंशी पुरस्कार’ (२०२१) प्राप्त झाला आहे.

बैठकी दरम्यान डॉ. पवार यांनी सीमालढ्याच्या गेल्या अनेक दशकांतील चळवळीचा आढावा घेताना इतिहासात झालेल्या राजकीय, संघटनात्मक आणि सामाजिक नुकसानीचे वस्तुनिष्ठ विश्लेषण मांडले. केवळ आंदोलनांच्या जोरावर सीमाप्रश्न सुटणार नाही, तर रचनात्मक विकास आणि संघर्ष या दोन्ही आघाड्यांवर एकाच वेळी काम करणे आवश्यक आहे, असे त्यांनी स्पष्ट केले.

बेळगाव, कारवार, निपाणी आणि इतर सीमाभागातील प्रत्यक्ष दौऱ्यांमधून मिळालेल्या अनुभवांची माहिती त्यांनी दिली. सीमाभागातील मराठी माणसाचा प्रश्न हा केवळ भूभागाचा नसून भाषिक अस्मिता, सांस्कृतिक हक्क आणि मानवाधिकारांचा प्रश्न आहे, असे त्यांनी सांगितले.

यावेळी युवासमितीच्या पदाधिकाऱ्यांनी डॉ. दीपक पवार यांच्यासारख्या अभ्यासू व्यक्तिमत्त्वाकडून सीमालढ्याच्या इतिहासाची, कायदेशीर प्रक्रियेची आणि भविष्यातील संघटनात्मक दिशेची मिळालेली माहिती युवा पिढीसाठी अत्यंत मार्गदर्शक ठरेल. सीमाभागातील मराठी समाजाच्या न्याय्य हक्कांसाठी संघर्ष अधिक अभ्यासपूर्ण आणि प्रभावी करण्यासाठी ही भेट महत्त्वपूर्ण ठरली आहे. सीमाभागातील युवकांनी भावनिक आंदोलनाबरोबरच अभ्यास, संघटन, कायदेशीर तयारी यांवर भर देणे आवश्यक असल्याचे मत व्यक्त केले.

बैठकीच्या शेवटी डॉ. दीपक पवार यांनी महाराष्ट्र एकीकरण युवा समिती सीमाभागच्या कार्याला शुभेच्छा देत, सीमालढ्याला दीर्घकालीन ताकद देण्यासाठी युवकांनी सातत्यपूर्ण आणि अभ्यासाधिष्ठित लढा उभारावा, असे आवाहन केले.

The post डॉ. दीपक पवार यांची महाराष्ट्र एकीकरण युवा समिती सीमाभागच्या पदाधिकाऱ्यांशी सीमाप्रश्नावर सविस्तर चर्चा appeared first on News 24 Tass Marathi.

मुंबई (मीरारोड) : महाराष्ट्र एकीकरण युवा समिती सीमाभागच्या पदाधिकाऱ्यांनी मराठी एकीकरण समिती, महाराष्ट्र राज्य यांच्या मीरारोड येथील मध्यवर्ती कार्यालयात राज्याध्यक्ष श्री. गोवर्धन देशमुख व त्यांच्या सहकाऱ्यांची सदिच्छा भेट घेतली. यावेळी मराठी भाषा, मराठी अस्मिता, सीमाभागातील मराठी बांधवांचे न्याय्य हक्क तसेच महाराष्ट्र-कर्नाटक सीमाप्रश्न यासंदर्भात सविस्तर चर्चा झाली.

मराठी एकीकरण समिती, महाराष्ट्र राज्य ही गेल्या १० ते १२ वर्षांपासून महाराष्ट्रात मराठी भाषा, संस्कृती आणि मराठी अस्मितेचा आवाज बुलंद करण्यासाठी सातत्याने कार्यरत आहे. दुसरीकडे, बेळगावसह सीमाभाग महाराष्ट्रात समाविष्ट व्हावा, यासाठी सीमाभागातील मराठी बांधवांचा गेल्या ७० वर्षांहून अधिक काळ लोकशाही मार्गाने संघर्ष सुरू आहे. या दोन्ही चळवळींची उद्दिष्टे समान असल्याने भविष्यात अधिक समन्वयाने आणि व्यापक स्वरूपात कार्य करण्याबाबत एकमत झाले.

बैठकीदरम्यान सीमाभागातील मराठी अस्मितेच्या प्रश्नाला संपूर्ण महाराष्ट्राचे बळ मिळावे, यासाठी राज्यभर व्यापक जनजागृती, संघटनबांधणी आणि लोकसहभागाच्या माध्यमातून नव्या लोकचळवळीची उभारणी करण्याचा महत्त्वपूर्ण निर्णय घेण्यात आला. तसेच मराठी भाषा, मराठी संस्कृती, मराठी अस्मिता आणि सीमाभागातील मराठी बांधवांच्या न्याय्य हक्कांसाठी संयुक्तपणे संघर्ष करण्याचा निर्धार व्यक्त करण्यात आला.

यावेळी महाराष्ट्र एकीकरण युवा समिती सीमाभागचे अध्यक्ष मा. शुभम शेळके, कार्याध्यक्ष मा. धनंजय पाटील व सरचिटणीस मनोहर हुंदरे यांनी मराठी एकीकरण समिती, महाराष्ट्र राज्यचे अध्यक्ष श्री. गोवर्धन देशमुख तसेच समितीच्या पदाधिकाऱ्यांनी मनःपूर्वक स्वागत केले.

बैठकीत महाराष्ट्रातील विविध सामाजिक प्रश्न, मराठी समाजाचे संघटन, आगामी जनजागृती अभियान आणि विशेषतः महाराष्ट्र-कर्नाटक सीमाभागातील मराठी बांधवांच्या न्याय्य हक्कांसाठी राज्यव्यापी आंदोलनाची दिशा यावर सखोल चर्चा करण्यात आली. सीमाभागाचा आवाज संपूर्ण महाराष्ट्रात अधिक प्रभावीपणे पोहोचविण्यासाठी दोन्ही संघटनांनी संयुक्तपणे काम करण्याचा निर्धार व्यक्त केला.

मराठी एकीकरण समिती, महाराष्ट्र राज्य आणि महाराष्ट्र एकीकरण युवा समिती सीमाभाग यांच्या संयुक्त विद्यमाने राज्यभर मराठी एकीकरणासाठी व्यापक लोकजागृती अभियान राबविण्यात येणार असून, मराठी समाजाला संघटित करून मराठीच्या सन्मानासाठी आणि सीमाभागाच्या न्याय्य हक्कांसाठी लोकशाही मार्गाने संघर्ष अधिक तीव्र करण्याचा निर्णय यावेळी घेण्यात आला.

“मराठीचा सन्मान, सीमाभागाचा न्याय आणि अखंड महाराष्ट्राचा स्वाभिमान” हा सामायिक ध्यास घेऊन दोन्ही संघटना आगामी काळात एकत्रितपणे कार्य करतील, असा विश्वास बैठकीत व्यक्त करण्यात आला.

The post मराठीचे शिलेदार मायमराठीसाठी एकत्र appeared first on News 24 Tass Marathi.

मुंबई : भारतीय संघाचा अनुभवी फलंदाज अजिंक्य रहाणे याने आंतरराष्ट्रीय क्रिकेटच्या सर्व प्रकारांतून निवृत्ती जाहीर केली आहे. इंस्टाग्रामवर भावनिक व्हिडिओ आणि पोस्ट शेअर करत त्याने आपल्या आंतरराष्ट्रीय कारकिर्दीला पूर्णविराम दिला. या पोस्टमध्ये त्याने भारतीय क्रिकेट नियामक मंडळ (बीसीसीआय), सहकारी खेळाडू, प्रशिक्षक आणि चाहत्यांचे मनापासून आभार मानले.

रहाणेने आपल्या पोस्टमध्ये, “कॅप २७८ आता निरोप घेत आहे. इतकी वर्षे दिलेल्या प्रेमासाठी आणि पाठिंब्यासाठी मनापासून धन्यवाद. तुमचा मी कायम ऋणी राहीन,” असे लिहित आपल्या भावना व्यक्त केल्या.

भारतासाठी रहाणेने ८५ कसोटी, ९० एकदिवसीय आणि २० टी-२० आंतरराष्ट्रीय सामने खेळले. कसोटी क्रिकेटमध्ये त्याने ५,०७७ धावा करत १२ शतके आणि २६ अर्धशतके झळकावली. त्याची सर्वोच्च खेळी १८८ धावांची राहिली. एकदिवसीय क्रिकेटमध्ये त्याने २,९६२ धावा करत ३ शतके आणि २४ अर्धशतके नोंदवली, तर टी-२० क्रिकेटमध्ये ३७५ धावा केल्या.

रहाणेने भारताकडून अखेरचा आंतरराष्ट्रीय सामना जुलै २०२३ मध्ये वेस्ट इंडिजविरुद्धच्या कसोटी मालिकेत खेळला होता. त्याचा शेवटचा वनडे सामना २०१८ मध्ये, तर टी-२० सामना २०१६ मध्ये झाला होता.

शांत, संयमी आणि विश्वासार्ह फलंदाज म्हणून ओळख निर्माण करणाऱ्या अजिंक्य रहाणेने अनेक संस्मरणीय खेळी करत भारतीय क्रिकेटला महत्त्वपूर्ण योगदान दिले. त्याच्या निवृत्तीमुळे भारतीय क्रिकेटमधील एका यशस्वी आणि प्रेरणादायी पर्वाचा शेवट झाला आहे.

The post अजिंक्य रहाणेची आंतरराष्ट्रीय क्रिकेटमधून निवृत्ती appeared first on News 24 Tass Marathi.

मुंबई : मुंबईतील छत्रपती शिवाजी महाराज टर्मिनस (सीएसएमटी) ते केएसआर बंगळुरू रेल्वे स्थानकादरम्यान धावणारी देशातील दुसरी ‘वंदे भारत स्लीपर’ रेल्वे अंतिम चाचणी टप्प्यात पोहोचली आहे. सर्व सुरक्षा चाचण्या आणि आवश्यक मंजुरी पूर्ण झाल्यानंतर ही अत्याधुनिक रेल्वे प्रवाशांच्या सेवेत दाखल होणार असून, मुंबई–बंगळुरू प्रवास अधिक वेगवान आणि आरामदायी होण्याची अपेक्षा आहे.

भारत अर्थ मूव्हर्स लिमिटेड (बीईएमएल)ने चेन्नई येथील इंटिग्रल कोच फॅक्टरी (आयसीएफ)च्या तंत्रज्ञानाच्या साहाय्याने ही स्लीपर रेल्वे विकसित केली आहे. ग्रे आणि ऑरेंज रंगसंगतीतील ही रेल्वे विशेषतः रात्रीच्या लांब पल्ल्याच्या प्रवासासाठी डिझाइन करण्यात आली असून, ताशी १८० किलोमीटर वेगाने धावण्याची क्षमता तिच्यामध्ये आहे.

या स्लीपर ट्रेनमध्ये एकूण १६ डबे असून ८२३ प्रवाशांच्या प्रवासाची व्यवस्था करण्यात आली आहे. त्यामध्ये ११ एसी ३-टियर डबे (६११ बर्थ), ४ एसी २-टियर डबे (१८८ बर्थ) आणि एक फर्स्ट एसी डबा समाविष्ट आहे.

प्रवाशांच्या सुरक्षितता आणि आरामासाठी या रेल्वेमध्ये कमी कंपन व आवाज, आधुनिक शौचालये, डिजिटल प्रवासी माहिती प्रणाली, सीसीटीव्ही, पूर्ण वातानुकूलित व्यवस्था, ‘कवच’ सुरक्षा प्रणाली तसेच आपत्कालीन ‘टॉक-बॅक’ सुविधा उपलब्ध करून देण्यात आली आहे.

या मार्गावर बेळगाव, हुबळी-धारवाड आणि पुणे येथील प्रवाशांनाही मोठा फायदा होणार आहे. त्यामुळे मुंबई आणि बंगळुरूदरम्यानचा प्रवास अधिक जलद, सुरक्षित आणि सुखकर होणार असल्याची अपेक्षा व्यक्त केली जात आहे.

देशातील पहिली वंदे भारत स्लीपर रेल्वे जानेवारी २०२६ मध्ये हावडा–कामाख्या मार्गावर सुरू करण्यात आली होती. त्यानंतर आता मुंबई–बंगळुरू मार्गावरील ही दुसरी स्लीपर रेल्वे सेवेत दाखल होण्याच्या अंतिम टप्प्यात असून, चाचण्या यशस्वीरीत्या पूर्ण झाल्यानंतर भारतीय रेल्वेकडून तिच्या उद्घाटनाची अधिकृत घोषणा केली जाणार आहे.

The post मुंबई – बंगळुरू मार्गावर धावणार देशातील दुसरी ‘वंदे भारत स्लीपर’ appeared first on News 24 Tass Marathi.

मुंबई : महाराष्ट्र-कर्नाटक सीमाप्रश्नाची सर्वोच्च न्यायालयातील लढाई अधिक प्रभावीपणे लढण्याचा महत्त्वपूर्ण निर्णय मुंबईतील विधानभवनात बुधवारी मुख्यमंत्री देवेंद्र फडणवीस यांच्या अध्यक्षतेखाली झालेल्या उच्चाधिकार समितीच्या बैठकीत घेण्यात आला. राज्याची बाजू न्यायालयात भक्कमपणे मांडण्यासाठी देशातील नामांकित आणि ज्येष्ठ वकिलांची नियुक्ती करण्यात येणार असून, सीमावासीयांच्या हितासाठी महाराष्ट्र सरकार ठामपणे पाठीशी राहील, अशी ग्वाहीही बैठकीत देण्यात आली.

सर्वोच्च न्यायालयातील आगामी सुनावणीच्या पार्श्वभूमीवर झालेल्या या बैठकीत न्यायप्रविष्ट प्रकरण अधिक आक्रमकपणे लढण्याबाबत एकमत झाले. त्याचबरोबर सीमाप्रश्नासंदर्भात केंद्रीय गृहमंत्र्यांसोबत लवकरच विशेष बैठक आयोजित करण्याचा निर्णयही घेण्यात आला. कर्नाटक सरकारच्या प्रत्येक भूमिकेला महाराष्ट्राने जशास तसे आणि ठोस प्रत्युत्तर द्यावे, या भूमिकेला समितीने मंजुरी देत त्यासंदर्भातील ठरावही संमत करण्यात आला.

मध्यवर्ती महाराष्ट्र एकीकरण समितीने केलेल्या सातत्यपूर्ण आणि आग्रही पाठपुराव्यामुळे या विशेष बैठकीचे आयोजन करण्यात आल्याचे सांगण्यात आले. या बैठकीचे आणखी एक महत्त्वाचे वैशिष्ट्य म्हणजे ज्येष्ठ नेते शरद पवार तब्बल ३४ वर्षांनंतर सीमाप्रश्नासंदर्भातील बैठकीसाठी विशेषत्वाने विधानभवनात उपस्थित राहिले.

या उच्चाधिकार समितीच्या बैठकीस उपमुख्यमंत्री एकनाथ शिंदे, उपमुख्यमंत्री सुनेत्रा पवार, माजी मुख्यमंत्री शरद पवार, नारायण राणे, मंत्री हसन मुश्रीफ, शंभूराज देसाई, माजी मंत्री जयंत पाटील, आमदार भास्कर जाधव, आमदार राजेश क्षीरसागर, आमदार शिवाजी पाटील, आमदार रोहित पाटील, जितेंद्र आव्हाड, शशिकांत शिंदे, माजी सनदी अधिकारी दिनेश ओऊळकर, वकील महेश बिर्जे, माजी आमदार मनोहर किणेकर तसेच मध्यवर्ती समितीचे अध्यक्ष प्रकाश मरगाळे यांच्यासह अनेक प्रमुख नेते, कायदेतज्ज्ञ आणि पदाधिकारी उपस्थित होते.

The post सीमाप्रश्नी महाराष्ट्राची आक्रमक भूमिका appeared first on News 24 Tass Marathi.

या बैठकीला ज्येष्ठ नेते शरद पवार, जयंत पाटील यांच्यासह सत्ताधारी आणि विरोधी पक्षातील वरिष्ठ नेते उपस्थित राहणार आहेत. बेळगावातील महाराष्ट्र एकीकरण समितीचे प्रतिनिधीही बैठकीत सहभागी होऊन सीमाभागातील मराठी भाषिकांच्या विविध प्रश्नांबाबत निवेदन सादर करणार आहेत.

बैठकीत सर्वोच्च न्यायालयात प्रलंबित असलेल्या महाराष्ट्र-कर्नाटक सीमा वादाच्या सुनावणीला गती देण्यासाठी आवश्यक कायदेशीर रणनीती, राज्य सरकारची भूमिका आणि पुढील कृती आराखड्यावर चर्चा होण्याची शक्यता आहे. तसेच सीमा प्रश्नाशी संबंधित पुरावे, कागदपत्रे आणि स्थानिक माहिती अधिक प्रभावीपणे न्यायालयासमोर मांडण्याबाबतही विचारविनिमय होणार आहे.

महाराष्ट्र एकीकरण समितीच्या वतीने मराठी भाषिकांवरील कथित अन्याय, मराठी भाषा व शिक्षणाशी संबंधित अडचणी, प्रशासकीय स्तरावरील प्रश्न तसेच सीमाभागातील नागरिकांच्या हक्कांच्या संरक्षणासाठी ठोस निर्णय घेण्याची मागणी केली जाणार आहे. याशिवाय, सर्वोच्च न्यायालयात सीमा प्रकरणाची तातडीने सुनावणी व्हावी यासाठी महाराष्ट्र सरकारने विशेष प्रयत्न करावेत, अशीही समितीची भूमिका आहे.

उच्चाधिकार समितीच्या या बैठकीतील निर्णय सीमा प्रश्नाच्या कायदेशीर आणि राजकीय लढ्याच्या दृष्टीने महत्त्वपूर्ण ठरण्याची अपेक्षा व्यक्त केली जात आहे.

The post महाराष्ट्र – कर्नाटक सीमाप्रश्नी उच्चाधिकार समितीची आज महत्त्वपूर्ण बैठक appeared first on News 24 Tass Marathi.