जिल्हापालक मंत्री सतीश जारकीहोळी यांच्यावतीने मलगौडा पाटील यांनी हा मुद्दा मांडला. माजी आमदार राजेश पाटील म्हणाले की, तिलारी प्रकल्पातील पाणी कोकणात सोडण्याऐवजी ते मार्कंडेय नदीमार्गे राकसकोप जलाशयात आणल्यास दोन्ही राज्यांतील शेतकऱ्यांना फायदा होईल. त्याचप्रमाणे, कर्नाटकातील म्हैसाळ प्रकल्पातून महाराष्ट्रातील जत तालुक्याला पाणीपुरवठा करण्याचा मुद्दाही याच्याशी जोडला जाऊ शकतो. त्यांनी महाराष्ट्र आणि कर्नाटक सरकारला हा प्रकल्प संयुक्त उपक्रम म्हणून हाती घेण्याचे आवाहन केले. या कल्पनेला यापूर्वी दिवंगत नरसिंगराव पाटील आणि माजी खासदार दिवंगत सुरेश अंगडी यांनी पाठिंबा दिला होता. त्यांनी स्पष्ट केले की, आता खासदार जगदीश शेट्टर आणि मंत्री सतीश जारकीहोळी यांच्यामार्फत हा प्रकल्प पुढे नेण्याचे प्रयत्न सुरू आहेत. यापूर्वी खासदार जगदीश शेट्टर यांनी महाराष्ट्राचे उपमुख्यमंत्री देवेंद्र फडणवीस यांना पत्र लिहून या मुद्द्याकडे लक्ष वेधले होते.

माजी महापौर शिवाजीराव सुंठकर म्हणाले की, जानेवारी ते एप्रिल-मे या कालावधीत हिंडलगा पंपिंग स्टेशनमधून पाणी उपसून लक्ष्मी टेकडीकडे वाहून नेले जाईल. त्यामुळे, हा प्रस्तावित प्रकल्प शहराच्या पाणीपुरवठ्यासाठी आणि शेतीसाठी अत्यंत फायदेशीर ठरेल. जिल्हाधिकारी मोहम्मद रोशन यांनी या प्रस्तावावर सखोल अभ्यास करून दुसरी बैठक बोलावण्याचे आश्वासन दिले आहे.

या बैठकीला चंदगडचे माजी आमदार राजेश पाटील, बेळगावचे माजी महापौर शिवाजीराव सुंठकर, केपीसीसी सदस्य मलगौडा पाटील इतर संबंधित पदाधिकारी आणि आजी – माजी नगरसेवक संघटनेचे पदाधिकारी मोठ्या संख्येने उपस्थित होते.

The post तिलारीचे पाणी राकसकोपकडे वळविण्याच्या प्रस्तावावर जिल्हाधिकारी कार्यालयात बैठक appeared first on News 24 Tass Marathi.

तुडये : हाजगोळी (ता. चंदगड) येथील पोल्ट्री शेडमध्ये उघडकीस आलेल्या कथित ड्रग्ज निर्मिती प्रकरणात बेळगावातील व्यक्तीचा सहभाग समोर आल्यानंतर बेळगाव सीआयडीच्या पथकाने रविवारी (दि. २३) हाजगोळी येथील संबंधित पोल्ट्री फार्मची पाहणी केली.

पुणे येथील अमलीपदार्थ विरोधी टास्क फोर्सने केलेल्या कारवाईत पोल्ट्री शेडमधून २०८ ग्रॅम तयार एमडी ड्रग्ज, विविध रसायने आणि ड्रग्ज निर्मितीसाठी वापरली जाणारी उपकरणे असा एकूण १ कोटी १३ लाख ५१ हजार रुपयांचा मुद्देमाल जप्त करण्यात आला आहे.

या कारवाईनंतर गांधीनगर, बेळगाव येथील एका व्यक्तीला ताब्यात घेण्यात आले आहे. तसेच ड्रग्ज निर्मितीसाठी मदत केल्याचा संशय असलेल्या तुडये (ता. चंदगड) येथील एका व्यक्तीसह हाजगोळीतील पोल्ट्री फार्मचा मालक पप्पू मलतवाडकर (रा. सरोळी, ता. चंदगड) यांनाही अधिक चौकशीसाठी पुणे येथील अमलीपदार्थ विरोधी टास्क फोर्सच्या मुख्यालयात नेण्यात आल्याची माहिती आहे.

दरम्यान, बेळगाव सीआयडीच्या पथकाने अधिकाऱ्यांसह पोल्ट्री फार्मची पाहणी करत या प्रकरणाचे धागेदोरे बेळगावशी संबंधित आहेत का, याबाबत माहिती घेतली. पथकाने साध्या वेशात खासगी वाहनातून घटनास्थळी भेट दिली. यावेळी पोल्ट्रीचालकाच्या कुटुंबीयांकडूनही संबंधित माहिती जाणून घेण्यात आली.

पोल्ट्री शेडमधून तयार एमडी ड्रग्जसह कच्चे रसायन, केमिकल पावडर, सुमारे ७० लिटर मोनोमिथाईल अमाईन केमिकल, फिल्टर पेपर, डिजिटल थर्मामीटर, घनता मापक, टेस्ट ट्यूब, काचेचे प्रयोगशाळेतील जार, इंडिकेटर पेपर, हातमोजे, स्पीड कंट्रोलर, रेग्युलेटर, ओव्हन, टेस्टर, ग्रिलर, मिक्सिंग मोटार व अन्य साहित्य जप्त करण्यात आले आहे.

ड्रग्ज निर्मितीच्या या प्रकरणात बेळगावातील म्होरक्याचा सहभाग असल्याचे तपासात समोर आल्याने सीआयडीकडून बेळगाव कनेक्शनचा शोध घेतला जात आहे. या प्रकरणातील अन्य संशयितांचीही चौकशी सुरू असून, तपासातून आणखी कोणते धागेदोरे समोर येतात, याकडे लक्ष लागले आहे.

The post हाजगोळीतील ड्रग्ज कारखान्याचा पर्दाफाश appeared first on News 24 Tass Marathi.

बेळगाव : शहरातील वारंवार उद्भवणाऱ्या पाणीटंचाईवर कायमस्वरूपी तोडगा काढण्यासाठी महाराष्ट्रातील तिलारी जलाशयातील अतिरिक्त पाणी राकसकोप जलाशयात वळविण्याच्या प्रस्तावाला नव्याने गती मिळाली आहे. या मागणीसंदर्भात बेळगावच्या माजी नगरसेवकांच्या संघटनेने खासदार जगदीश शेट्टर यांची भेट घेऊन सविस्तर निवेदन सादर केले. या प्रस्तावाबाबत खासदार शेट्टर यांनी सकारात्मक भूमिका घेत पुढील पाठपुरावा करण्याचे आश्वासन दिले.

सर्किट हाऊसमध्ये झालेल्या बैठकीत शहरातील पाणीपुरवठ्याची सद्यस्थिती आणि भविष्यातील उपाययोजनांवर चर्चा करण्यात आली. दरवर्षी मे ते जुलै या कालावधीत राकसकोप आणि हिडकल जलाशयांतील पाणीसाठा कमी झाल्याने बेळगाव शहराला तीव्र पाणीटंचाईला सामोरे जावे लागते. यावर दीर्घकालीन उपाय म्हणून चंदगड तालुक्यातील तिलारी जलाशय आणि राकसकोप जलाशय यांची ‘राष्ट्रीय नदी जोड प्रकल्पा’अंतर्गत जोडणी करण्याची मागणी माजी नगरसेवकांनी केली.

माजी नगरसेवक संघटनेचे अध्यक्ष शिवाजीराव सुंठकर यांनी सांगितले की, तिलारी जलाशयात वीज निर्मितीनंतर मे ते जुलै या काळात मोठ्या प्रमाणावर अतिरिक्त पाणी उपलब्ध असते. हे पाणी राकसकोप जलाशयात वळविल्यास बेळगाव शहरासह परिसरातील पिण्याच्या पाण्याचा प्रश्न मोठ्या प्रमाणात सुटू शकतो. याशिवाय मार्कंडेय नदीच्या पात्रातून शेतीसाठीही या पाण्याचा लाभ होईल.

माजी नगरसेवक लतीफ खान पठाण यांनी सांगितले की, या योजनेसाठी यापूर्वीही विविध स्तरांवर प्रयत्न झाले आहेत. तिलारीचे पाणी बेळगावला उपलब्ध व्हावे यासाठी जिल्ह्याच्या पालकमंत्र्यांशी चर्चा करून हा विषय संसदेच्या पावसाळी अधिवेशनातही उपस्थित केला जाणार आहे. हा प्रश्न भाषा किंवा सीमावादाशी न जोडता केवळ जनहिताच्या दृष्टीने मार्गी लावावा, अशी अपेक्षाही त्यांनी व्यक्त केली.

खासदार जगदीश शेट्टर यांनी या प्रस्तावाचे स्वागत करत संसदेचे पावसाळी अधिवेशन संपल्यानंतर महाराष्ट्राचे मुख्यमंत्री देवेंद्र फडणवीस यांची भेट घेऊन या विषयावर चर्चा करणार असल्याचे सांगितले. तसेच चंदगडचे आमदार शिवाजी पाटील यांच्यासमवेत तिलारी जलाशय परिसराची संयुक्त पाहणी करून प्रकल्प पुढे नेण्यासाठी आवश्यक ती पावले उचलण्याचे आश्वासन त्यांनी दिले.

या बैठकीला नेताजी जाधव, दीपक वाघेला, वंदना बेळगुंदकर, रेणू किल्लेकर, सुधा भातकांडे, संजीव प्रभू, मोहम्मद पिरजादे यांच्यासह माजी नगरसेवक मोठ्या संख्येने उपस्थित होते.

The post तिलारी जलाशयाचे अतिरिक्त पाणी राकसकोपकडे वळवण्याची मागणी appeared first on News 24 Tass Marathi.

चंदगड : बेळगाव शहरातील वाढत्या पाणीटंचाईवर कायमस्वरूपी तोडगा काढण्यासाठी तिलारी धरणातील अतिरिक्त पाणी राकसकोप जलाशयात वळविण्याची मागणी पुन्हा जोर धरू लागली आहे. यासंदर्भात बेळगाव महापालिकेच्या माजी नगरसेवक संघटनेच्या शिष्टमंडळाने चंदगडचे आमदार शिवाजीराव पाटील यांची भेट घेऊन निवेदन सादर केले.

निवेदनात तिलारी धरणातील अतिरिक्त पाणी मार्कंडेय नदीमार्गे राकसकोप जलाशयात वळविण्याची योजना राबविण्याची मागणी करण्यात आली आहे. हा प्रकल्प साकार झाल्यास बेळगाव शहराच्या पिण्याच्या पाण्याचा प्रश्न मोठ्या प्रमाणात सुटण्याबरोबरच परिसरातील शेतकऱ्यांच्या सिंचनाच्या गरजाही प्रभावीपणे पूर्ण होऊ शकतील, असा दावा शिष्टमंडळाने केला आहे.

बेळगावच्या वाढत्या लोकसंख्येमुळे भविष्यातील पाणीपुरवठा लक्षात घेऊन या योजनेचा गांभीर्याने विचार करून आवश्यक पावले उचलावीत, अशी मागणीही निवेदनातून करण्यात आली.

The post तिलारीचे अतिरिक्त पाणी राकसकोपमध्ये वळविण्याची मागणी appeared first on News 24 Tass Marathi.

कोल्हापूर : जिल्ह्यात गेल्या दोन दिवसांपासून सुरू असलेल्या मुसळधार पावसामुळे धरण क्षेत्रात मोठ्या प्रमाणावर पाण्याची आवक वाढली असून, सर्व प्रमुख नद्यांच्या पाणीपातळीत झपाट्याने वाढ झाली आहे. कोल्हापूरची जीवनवाहिनी असलेल्या पंचगंगा नदीची पातळी सध्या २२ फुटांवर पोहोचली असून, अवघ्या २४ तासांत नदीच्या पाणीपातळीत लक्षणीय वाढ नोंदविण्यात आली आहे.

नद्यांमधील वाढलेल्या पाण्यामुळे जिल्ह्यातील १० बंधारे पूर्णपणे पाण्याखाली गेले आहेत. यामध्ये राजाराम बंधाऱ्याचाही समावेश आहे. राधानगरी, शाहूवाडी, गगनबावडा, भुदरगड, गडहिंग्लज आणि चंदगड या तालुक्यांमध्ये सर्वाधिक पाऊस झाला असून, या भागातील नदी-नाले दुथडी भरून वाहत आहेत.

परिस्थितीचे गांभीर्य लक्षात घेऊन कोल्हापूर जिल्हा प्रशासनाने आपत्ती व्यवस्थापन यंत्रणेला सतर्क राहण्याचे निर्देश दिले आहेत. नद्यांच्या पाणीपातळीत सातत्याने वाढ होत असल्याने नागरिकांनी नदीकाठच्या भागात जाणे टाळावे तसेच पाण्याखाली गेलेल्या बंधाऱ्यांवरून किंवा धोकादायक मार्गांवरून प्रवास करू नये, असे आवाहन प्रशासनाने केले आहे.

The post कोल्हापूर जिल्ह्याला मुसळधार पावसाचा तडाखा appeared first on News 24 Tass Marathi.

बेळगाव : लिव्ह-इन रिलेशनशिपमध्ये राहणाऱ्या प्रेयसीला सोडून दुसऱ्या तरुणीशी विवाह करण्याच्या तयारीत असलेल्या प्रियकराने तिची निर्घृण हत्या करून मृतदेह महाराष्ट्रातील जंगलात फेकून दिल्याची धक्कादायक घटना उघडकीस आली आहे. बेळगाव तालुक्यातील वंटमुरी येथील गंगव्वा हंचिनमणी (वय २५) हिचा तिचा लिव्ह-इन पार्टनर आणि खाजगी शिक्षक बसवराज करनावर (वय ३३, रा. राजनकट्टी, ता. हुक्केरी) याने त्याचे वडील आणि मामाच्या मदतीने खून केल्याचा आरोप आहे.

पोलिसांनी दिलेल्या माहितीनुसार, गेल्या दहा वर्षांपासून गंगव्वा आणि बसवराज हे लिव्ह-इन रिलेशनशिपमध्ये राहत होते. दरम्यान, बसवराजने दुसऱ्या तरुणीशी लग्न ठरवले होते. याला गंगव्वाने विरोध करत जाब विचारल्याने आरोपीने तिचा कायमचा काटा काढण्याचा कट रचला.

‘विशालगडला फिरायला जाऊ’ असे सांगून बसवराजने गंगव्वाला कारमधून नेले. त्यानंतर वडील आणि मामाच्या मदतीने लोखंडी रॉडने तिच्यावर वार करून तिची हत्या करण्यात आली. पुरावे नष्ट करण्याच्या उद्देशाने आरोपींनी मृतदेह महाराष्ट्रातील तिलारी घाटातील जंगलात फेकून दिला.

२९ मे रोजी तिलारी घाट परिसरात कुजलेल्या अवस्थेत एका तरुणीचा मृतदेह आढळून आला होता. याप्रकरणी चंदगड पोलिसांनी तपासाची चक्रे फिरवत घटनास्थळ परिसरातील रस्ते आणि टोल नाक्यांवरील सीसीटीव्ही फुटेजची तपासणी केली. त्यातून संशयास्पद कारचा माग काढण्यात आला आणि शिक्षक बसवराज करनावरसह तिन्ही आरोपींना अटक करण्यात आली.

दरम्यान, मुलीच्या मृत्यूमुळे तिच्या कुटुंबावर दुःखाचा डोंगर कोसळला आहे. “मुलगी जेव्हा जेव्हा भेटायला यायची, तेव्हा सर्व काही ठीक असल्याचे सांगायची. पण तिची अशी हत्या होईल, असे कधीच वाटले नव्हते,” असे म्हणत गंगव्वाच्या आईने आरोपींना फाशीची शिक्षा देण्याची मागणी केली आहे.

मृत तरुणीचा भाऊ रमेश यानेही संताप व्यक्त करत, “महाराष्ट्र पोलीस घरी आल्यानंतरच बहिणीचा खून झाल्याचे समजले. आरोपींना कठोरात कठोर शिक्षा झालीच पाहिजे,” अशी मागणी केली आहे.

The post लिव्ह-इनमधील प्रेयसीची शिक्षकाकडून हत्या appeared first on News 24 Tass Marathi.

चंदगड : तिलारी घाटातील प्रेशर पॉईंट परिसरात बेवारस अवस्थेत आढळलेल्या महिलेच्या खुनाचा स्थानिक गुन्हे अन्वेषण शाखेने अवघ्या काही धागेदोऱ्यांच्या आधारे उलगडा करत कर्नाटकातील तिघा आरोपींना अटक केली आहे. महिलेची ओळख नसताना आणि अत्यल्प पुरावे उपलब्ध असतानाही पोलिसांनी केलेल्या सखोल तपासामुळे या खळबळजनक गुन्ह्याचा पर्दाफाश झाला आहे.

दि. 29 मे 2026 रोजी सकाळी तिलारी घाटातील प्रेशर पॉईंटजवळ एका महिलेचा मृतदेह आढळून आला होता. शवविच्छेदन अहवालात डोक्यावर गंभीर मारहाण झाल्यामुळे मृत्यू झाल्याचे निष्पन्न झाल्यानंतर चंदगड पोलीस ठाण्यात खुनाचा गुन्हा दाखल करण्यात आला होता.

या प्रकरणाचे गांभीर्य लक्षात घेऊन पोलीस अधीक्षक निलोत्पल यांनी स्थानिक गुन्हे अन्वेषण शाखेकडे तपासाची जबाबदारी सोपवली. तपास पथकाने घटनास्थळी मिळालेल्या वस्तू, कपडे, दागिने आणि अन्य पुराव्यांच्या आधारे महिलेची ओळख पटविण्याचे प्रयत्न सुरू केले. याचबरोबर कोल्हापूर, सिंधुदुर्ग तसेच कर्नाटकातील बेपत्ता महिलांच्या नोंदींची पडताळणी करण्यात आली. तिलारीनगर परिसरातील सीसीटीव्ही फुटेजचेही बारकाईने विश्लेषण करण्यात आले.

तपासादरम्यान मृत महिलेची ओळख गंगवा सत्याप्पा हंचीमनी (वय 25, रा. वंटमोरी, ता. हुक्केरी, जि. बेळगाव) अशी पटली. त्यानंतर पोलिसांनी दि. 25 मे रोजी तिलारी घाटातून गेलेल्या एका इको कारचा माग काढला. तब्बल 110 किलोमीटर परिसरातील विविध सीसीटीव्ही फुटेज आणि तांत्रिक माहितीच्या आधारे संशयितांपर्यंत पोहोचण्यात पोलिसांना यश आले.

या तपासातून बसवराज चेल्लप्पा करणावर (वय 33, रा. राजकोटे, ता. हुक्केरी, जि. बेळगाव) याला ताब्यात घेण्यात आले. चौकशीदरम्यान त्याने चेल्लप्पा चेल्लप्पा करणावर (वय 57, रा. राजकोटे) आणि लक्ष्मण लक्ष्मण अंकली (वय 37, रा. केनवट्टी, ता. हुक्केरी) यांच्या मदतीने गंगवा हंचीमनी हिचा खून करून मृतदेह तिलारी घाट परिसरात टाकल्याची कबुली दिली. त्यानंतर तिन्ही आरोपींना अटक करण्यात आली असून पुढील तपास सुरू आहे.

ही उल्लेखनीय कामगिरी पोलीस अधीक्षक निलोत्पल, अप्पर पोलीस अधीक्षक अण्णासाहेब जाधव आणि उपविभागीय पोलीस अधिकारी रामदास इंगवले यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक सुशांत चव्हाण, चंदगड पोलीस निरीक्षक निंगाप्पा चौखंडे, सहाय्यक पोलीस निरीक्षक सागर वाघ, पोलीस उपनिरीक्षक कोळेकर, विजय इंगळे, समीर कांबळे, सागर चौगुले आणि त्यांच्या पथकाने पार पाडली.

The post तिलारी घाटातील बेवारस महिलेच्या खुनाचा छडा appeared first on News 24 Tass Marathi.

प्रवासी संघाने मुख्यमंत्र्यांचे लक्ष वेधताना म्हटले आहे की, सध्या मुंबई-पुणे-कोल्हापूर आणि इतर जिल्ह्यांदरम्यान रोज हजारो खाजगी वाहनांमुळे लाखो लीटर पेट्रोल व डिझेल वाया जात असून अब्जावधी रुपयांचे परकीय चलन देशाबाहेर जात आहे. ‘शक्तीपीठ महामार्ग’ सारख्या प्रकल्पांवर लाखो कोटी रुपये खर्च केले जात असले, तरी त्यामुळे भविष्यात परकीय इंधनावरील अवलंबित्व कमी होणार नाही. याला उत्तम पर्याय म्हणून १) कोल्हापूर – आजरा – गडहिंग्लज – चंदगड – बेळगाव, २) सावंतवाडी – चंदगड – बेळगाव आणि ३) कोल्हापूर – वैभववाडी या तीन महत्त्वाच्या रेल्वे मार्गांचे नियोजन मुंबई-अहमदाबाद बुलेट ट्रेनच्या धर्तीवर जलद गतीने करून पुढील पाच वर्षांत ते प्रत्यक्ष पूर्ण करावेत, अशी आग्रही मागणी करण्यात आली आहे.

The post सावंतवाडी – चंदगड – बेळगाव प्रलंबित रेल्वे मार्गाचे काम तातडीने सुरू करा appeared first on News 24 Tass Marathi.

आझमनगर परिसरातील काही तरुण शनिवारी तिलारी धरण परिसरात फिरण्यासाठी गेले होते. यामध्ये व्यवसायाने दंतवैद्य असलेले डॉ. मोहम्मद शेहजान (वय २६) हे पोहण्यासाठी अडक्याचा वझर परिसरात पाण्यात उतरले. मात्र पाण्याची खोली लक्षात न आल्याने ते बुडाल्याची घटना घडली.

घटनेची माहिती मिळताच बेळगाव ग्रामीण पोलीस उपनिरीक्षक लक्काप्पा जोडट्टी आणि त्यांच्या पथकाने तातडीने घटनास्थळी धाव घेतली. शनिवारी संध्याकाळपर्यंत शोधमोहीम राबविण्यात आली; मात्र अंधारामुळे ती थांबवावी लागली.

रविवारी सकाळी पुन्हा शोधमोहीम सुरू करण्यात आली. यावेळी एसडीआरएफ पथक, बेळगाव ग्रामीण पोलीस, वन विभाग तसेच सामाजिक कार्यकर्ते अवधूत तुडवेकर, पद्मप्रसाद हुली, मुदस्सर तरनीकर, राजू टक्केकर यांनी संयुक्तपणे प्रयत्न केले. अखेर समन्वित कारवाईतून मृतदेह पाण्याबाहेर काढण्यात यश आले.

The post तिलारी धरणात बुडालेल्या तरुण दंतवैद्याचा मृतदेह सापडला appeared first on News 24 Tass Marathi.

याबाबत घटनास्थळावरून मिळालेल्या माहितीनुसार, महम्मद अमीरशा हा दंतवैद्यकीय शिक्षण पूर्ण करून मित्रांसमवेत तिलारी परिसरात फिरण्यासाठी गेला होता. यावेळी तो धरणात पोहण्यासाठी उतरला असता अचानक बुडाल्याची माहिती त्याच्या मित्रांनी दिली.

घटनेची माहिती मिळताच वडगाव पोलिस ठाण्याचे उपनिरीक्षक लक्कप्पा जोडट्टी व त्यांच्या पथकाने घटनास्थळी धाव घेतली. मात्र अंधार पडल्याने शोधमोहीम राबवण्यात अडचणी आल्या. त्यामुळे रविवारी सकाळी पुन्हा शोधमोहीम सुरू करण्यात येणार आहे.

The post बेळगावचा तरुण ‘तिलारी’ धरणात बुडाला appeared first on News 24 Tass Marathi.