महामंडळाचे अध्यक्ष श्री. रमाकांत दादा कोंडुसकर यांच्या अध्यक्षतेखाली महामंडळाच्या पदाधिकाऱ्यांनी आज बेळगावचे पोलीस आयुक्त श्री. प्रकाश निकम तसेच DCP श्री. नारायण बरमनी यांची भेट घेऊन गणेशोत्सवाच्या काळात पोलीस प्रशासनाने केलेल्या उल्लेखनीय सहकार्याबद्दल कृतज्ञता व्यक्त केली.

गणेशोत्सवाच्या काळात शहरातील विविध गणेश मंडळे, मिरवणुका, भाविकांची मोठी गर्दी, वाहतूक व्यवस्था, कायदा व सुव्यवस्था तसेच सुरक्षेच्या दृष्टीने बेळगाव पोलीस प्रशासनाने विशेष नियोजन केले होते. उत्सव शांततेत आणि कोणताही अनुचित प्रकार न घडता पार पडण्यासाठी पोलीस अधिकारी व कर्मचाऱ्यांनी दिवसरात्र परिश्रम घेतले.

विशेषतः अनंत चतुर्दशीच्या दिवशी विसर्जन मिरवणुका सुरळीत पार पाडण्यासाठी जवळपास ४२ तास अहोरात्र पोलीस प्रशासन कार्यरत होते. शहरातील प्रमुख चौक, विसर्जन मार्ग, संवेदनशील ठिकाणे तसेच गर्दीच्या परिसरात पोलिसांनी चोख बंदोबस्त ठेवला. वाहतूक नियंत्रण, नागरिकांची सुरक्षितता आणि गणेश मंडळांच्या मिरवणुका शिस्तबद्ध पद्धतीने पार पाडण्यासाठी पोलिसांनी घेतलेले परिश्रम कौतुकास्पद असल्याचे महामंडळाच्या पदाधिकाऱ्यांनी नमूद केले.

गणेशोत्सव हा बेळगावच्या सामाजिक व सांस्कृतिक एकतेचे प्रतीक असून, उत्सव शांततेत पार पडण्यासाठी गणेश मंडळे, नागरिक, प्रशासन आणि पोलीस यांच्यातील समन्वय महत्त्वाचा आहे. यंदाच्या उत्सवात पोलीस प्रशासनाने दाखविलेली तत्परता, संयम आणि कर्तव्यनिष्ठा यामुळे गणेशोत्सवाची सांगता शांततामय वातावरणात झाली, असे यावेळी सांगण्यात आले.

यावेळी श्री. रमाकांत दादा कोंडुसकर यांनी बेळगाव पोलीस दलातील सर्व अधिकारी, कर्मचारी तसेच वाहतूक पोलीस, बंदोबस्त पथके आणि संबंधित प्रशासनाचे मनःपूर्वक आभार मानले. गणेशोत्सवाच्या काळात नागरिकांच्या सुरक्षेला सर्वोच्च प्राधान्य देत पोलिसांनी केलेले कार्य समाजाच्या दृष्टीने अत्यंत महत्त्वपूर्ण असल्याचे त्यांनी सांगितले.

या भेटीप्रसंगी महामंडळाचे श्री. रणजीत पाटील, जनसंपर्क प्रमुख श्री. विकास कलघटगी, कार्यकारी सचिव प्राचार्य श्री. आनंद आपटेकर, श्री. शिवराज पाटील, श्री. संजय शिंदे, श्री. कपिल भोसले, श्री. प्रशांत भातखंडे, श्री. जयराज हलगेकर, श्री. प्रसाद मरगळे, श्री. महेश जाधव, श्री. प्रदीप अलकुंटे आणि श्री. रवी साळुंखे उपस्थित होते.

पोलीस प्रशासनाच्या सहकार्यामुळे आणि नागरिकांच्या संयमी सहभागामुळे बेळगावचा गणेशोत्सव शांतता, शिस्त आणि सामाजिक एकतेच्या वातावरणात यशस्वीपणे पार पडला, असा विश्वास यावेळी महामंडळाच्या पदाधिकाऱ्यांनी व्यक्त केला.

The post गणेशोत्सव शांततेत पार पाडण्यासाठी परिश्रम घेणाऱ्या पोलीस प्रशासनाचे महामंडळाकडून आभार appeared first on News 24 Tass Marathi.

छत्रपती शिवाजी महाराजांची मूर्ती देऊन स्वागत: महामंडळाचे अध्यक्ष माननीय श्री. रमाकांत (दादा) कोंडुसकर यांनी नवीन पोलीस आयुक्त प्रकाश निकम यांना पुष्पगुच्छ आणि आराध्य दैवत छत्रपती शिवाजी महाराज यांची मूर्ती भेट देऊन त्यांचे स्वागत केले व पुढील वाटचालीस शुभेच्छा दिल्या.

• कायदा व सुव्यवस्थेसाठी महामंडळाचे पूर्ण सहकार्य : रमाकांत दादा कोंडुसकर

काही दिवसांवर येऊन ठेपलेला गणेशोत्सव हा बेळगावचा अत्यंत मोठा आणि महत्त्वाचा सण आहे. या पार्श्वभूमीवर बोलताना महामंडळाचे अध्यक्ष रमाकांत दादा कोंडुसकर म्हणाले, “गणेशोत्सवाच्या काळात शहरात शांतता, आनंद आणि कायदा-सुव्यवस्था राखण्यासाठी महामंडळ पूर्ण ताकदीने पोलीस प्रशासनाच्या पाठीशी उभे राहील. प्रशासनाला सर्व बाबींमध्ये आमचे सदैव सहकार्य लाभेल.”

• लवकरच व्यापक बैठक घेणार : पोलीस आयुक्त निकम

महामंडळाच्या पदाधिकाऱ्यांशी संवाद साधताना नवनियुक्त पोलीस आयुक्त श्री. प्रकाश निकम यांनी सकारात्मक प्रतिसाद दिला. “बेळगावचा ऐतिहासिक गणेशोत्सव शांततेत आणि उत्साहात पार पाडण्यासाठी पोलीस प्रशासन कटिबद्ध आहे. उत्सव अधिक चांगल्या रीतीने साजरा होण्यासाठी आणि नियोजनासाठी अत्यंत जलद गतीने सर्व मंडळांची एक व्यापक बैठक बोलवण्यात येईल,” अशी ग्वाही त्यांनी यावेळी दिली.

या स्वागतप्रसंगी मध्यवर्ती सार्वजनिक गणेशोत्सव महामंडळाचे अध्यक्ष रमाकांत दादा कोंडुसकर, जनसंपर्क प्रमुख विकास कलघटगी, उपाध्यक्ष सागर पाटील, कार्यकारी सचिव प्राचार्य आनंद आपटेकर, सचिन पाटील यांच्यासह महामंडळाचे इतर प्रमुख पदाधिकारी उपस्थित होते.

The post बेळगावचे नवीन पोलीस आयुक्त प्रकाश निकम यांचे मध्यवर्ती गणेशोत्सव महामंडळाकडून स्वागत appeared first on News 24 Tass Marathi.

बेळगाव : गणेशोत्सवाला अवघे काही दिवस शिल्लक असताना वडगाव मेन रोडवरील चावडी गल्ली कॉर्नर, नाझर कॅम्प परिसरातील बेळगाव महानगरपालिकेच्या मालकीच्या श्री गणेशमूर्ती विसर्जन तलावाची मध्यवर्ती सार्वजनिक श्री गणेशोत्सव महामंडळाच्या पदाधिकाऱ्यांनी मंगळवारी (११ ऑगस्ट) पाहणी केली. तलावाची दयनीय अवस्था लक्षात घेता उत्सवापूर्वी तातडीने स्वच्छता व दुरुस्तीची कामे पूर्ण करण्याची मागणी करण्यात आली.

गणेशोत्सव काळात या तलावावर मोठ्या संख्येने भाविक आणि गणेशमूर्ती विसर्जनासाठी येणार आहेत. त्यामुळे तलावाची स्वच्छता, दुरुस्ती, परिसरातील मूलभूत सुविधा, प्रकाशयोजना आणि भाविकांच्या सुरक्षेचा यावेळी आढावा घेण्यात आला.

विसर्जनाच्या वेळी भाविकांना कोणतीही गैरसोय होऊ नये, तसेच गणेशमूर्तींचे विसर्जन सुरक्षित आणि शिस्तबद्ध पद्धतीने पार पडावे, यासाठी संबंधित प्रशासनाने उत्सव सुरू होण्यापूर्वी सर्व आवश्यक कामे पूर्ण करावीत, अशी मागणी महामंडळाच्या पदाधिकाऱ्यांनी केली.

तसेच विसर्जनावेळी वाहतूक कोंडी टाळण्यासाठी योग्य नियोजन करावे, परिसरात आवश्यक सुरक्षा व्यवस्था आणि प्रकाशयोजना करावी, अशी अपेक्षाही व्यक्त करण्यात आली. प्रशासनाने वेळ न दवडता कामाला सुरुवात करून भाविकांसाठी आवश्यक सुविधा उपलब्ध करून द्याव्यात, अशी मागणी यावेळी करण्यात आली.

पाहणीवेळी सार्वजनिक श्री गणेशोत्सव महामंडळाचे अध्यक्ष रमाकांत कोंडुसकर, विकास कलघटगी, मनोहर हलगेकर, ज्ञानेश्वर मन्नूरकर, अमोल देसाई, संजय शिंदे, राजेंद्र बिर्जे, सागर पाटील, महादेव पाटील, शिवराज पाटील, सुनील बोकडे, राजेंद्र बैलूर, भरत नाग्रोळी, उदय पाटील आणि गुणवंत पाटील यांच्यासह महामंडळाचे पदाधिकारी उपस्थित होते.

The post गणेशोत्सव महामंडळाकडून वडगावमधील गणेश विसर्जन तलावाची पाहणी appeared first on News 24 Tass Marathi.

बेळगाव : आगामी सार्वजनिक गणेशोत्सव शांततापूर्ण, सुरक्षित आणि सामाजिक बांधिलकी जपत उत्साहात पार पडावा, यासाठी प्रशासनाने सर्व विभागांचा समन्वय साधून पूर्वतयारीची कामे तातडीने सुरू करावीत, अशी मागणी मध्यवर्ती गणेश उत्सव महामंडळाच्या वतीने बेळगाव जिल्हाधिकारी मोहम्मद रोशन यांच्याकडे करण्यात आली.

महामंडळाच्या शिष्टमंडळाने जिल्हाधिकाऱ्यांची भेट घेऊन निवेदन सादर केले. निवेदनात गणेशोत्सवाच्या पार्श्वभूमीवर वाहतूक नियोजन, पोलीस बंदोबस्त, स्वच्छता, आरोग्य सुविधा, वीजपुरवठा, अग्निसुरक्षा, आपत्कालीन यंत्रणा आदी बाबींचे नियोजन तातडीने सुरू करण्याची मागणी करण्यात आली. तसेच सर्व संबंधित विभागांची संयुक्त बैठक घेऊन उत्सवाच्या तयारीचा आढावा घ्यावा, असेही निवेदनात नमूद करण्यात आले.

गणेशोत्सव हा केवळ धार्मिक उत्सव न राहता सामाजिक परिवर्तनाचे प्रभावी व्यासपीठ ठरावे, यासाठी शासनाच्या सहकार्याने व मध्यवर्ती गणेश उत्सव महामंडळाच्या माध्यमातून विविध सामाजिक उपक्रम राबविण्याची मागणीही करण्यात आली. शैक्षणिक जनजागृती, मोफत वैद्यकीय शिबिरे, रक्तदान, व्यसनमुक्ती अभियान, युवकांसाठी मार्गदर्शन, बौद्धिक व्याख्याने तसेच विविध शासकीय योजनांची माहिती नागरिकांपर्यंत पोहोचविणारे उपक्रम उत्सव काळात राबवावेत, अशी सूचना निवेदनातून करण्यात आली. यावेळी जिल्हाधिकारी कार्यालयात झालेल्या पूर्वतयारी बैठकीतही महामंडळाच्या प्रतिनिधींनी सहभाग घेऊन विविध सूचना मांडल्या.

निवेदन सादर करताना मध्यवर्ती गणेश उत्सव महामंडळाचे अध्यक्ष श्री रमाकांतदादा कोंडुस्कर, कार्याध्यक्ष रणजीत चव्हाण पाटील, कार्यकारी सचिव प्राचार्य आनंद आपटेकर, संपर्कप्रमुख विकास कलघटगी, उपाध्यक्ष सागर पाटील, सरचिटणीस महादेव पाटील, तसेच सुनील बोकडे, प्रसाद मरगाळे, दुर्गाप्रसाद जोशी आणि अन्य पदाधिकारी उपस्थित होते.

The post गणेशोत्सवाच्या पूर्वतयारीला तातडीने प्रारंभ करा appeared first on News 24 Tass Marathi.